Read Sangir MARKUS 2 Bible Online

MARKUS 2 - Sangir bible

MARKUS 2

¹Pira ěllo nal᷊iung ene Mawu Yesus nẹ̌sul᷊e sol᷊ong Kapernaum. Tangu nakekẹ e habarẹ̌ u i Sie kai su wal᷊e.

²Kụ l᷊awọ taumata němpẹ̌děnta. I sire němpẹ̌tampung sene, hakịu seng tawẹ apa l᷊oahe. Kal᷊ingung tukadẹ̌ e mal᷊aing nasěsẹ u taumata. Mase Mawu Yesus e něhabareng hengetang u Mawu Ruata e si sire.

³KạpěhengetangʼE i Sie, piạ e i sire ěpạ měbẹ̌bawenteng tau nẹ̌peose tadeạu wawaěng sarang anum Mawu Yesus.

⁴Kai kahian kal᷊awọu taumata, i sire tawe nakakahaung sarang děduhʼE. I sire nawị kụ nělekesẹ̌ atụ su l᷊antehʼu Mawu Yesus e. Bọu ene i sire němpangul᷊uhʼu tau peosẹ̌ ene ringangu těpihe.

⁵Sarạeng Mawu Yesus nakasilo kasariang pangangimang i sire, i Sie něhengetangke su tau peosẹ̌ e, ”Amang, kal᷊awọu rosanue seng niampungang.”

⁶Ene piạ e mananěntirong agama pirang katau kạpahungkaiange sene, nanětạe nahěngkiwal᷊o su ral᷊ungu naung i sire,

⁷”Kawahani i anu ěndaịe nẹ̌bera kerene! I Sie kai mělẹ̌hinakang Mawu Ruata. I sai wotonge makaampung dosa e sul᷊iun Mawu Ruata e sẹ̌sane?”

⁸Su tempo ene lai Mawu Yesus masingkạu tiněnnang sire. Mase i Sie něhengetangke, ”Kawe unụe i kamene měmpẹ̌tẹ̌tiněnna kerene su naung i kamene?

⁹Sude limembong mahaěng: mẹ̌berang, ’Dosanu seng niampungang’, arau měberang ’Pẹ̌bangungke, hengkẹ e těpihu kụ dal᷊engke’?

¹⁰Arawe ini Iạ sarung mělahẹ si kamene u su wowon dunia ini e, Ahusʼu Taumata e kai kawasa měngampung dosa.” Mase Mawu Yesus něhengetang su tau peosẹ̌ ene,

¹¹”Pẹbangungke, hengkẹ e těpihu e kụ kapul᷊ẹ e!”

¹²Nẹ̌bangungke i sie kụ apidʼu něngal᷊ạ těpihe mase simẹ̌bangke tẹ̌tatinganeng i sire kěbị. I sire e němpẹ̌dal᷊inaụ, kụ mase němpẹ̌dalọe Mawu Ruata. Angkuěng i sire, ”Bẹ̌daweng tanakạsilo i kitẹ hal᷊ẹ̌ kere ini e!”

¹³Mawu Yesus nẹ̌sul᷊e kapia sol᷊ong apeng u Ranong Galilea. Mal᷊awọ taumata e himaung si Sie, mase i Sie naněntiro si sire.

¹⁴Piạ e Mawu Yesus kapẹ̌daral᷊enge sene, i Sie nakasilo sěngkatau maghaghělle bea arenge i Lewi, anạ i Alfeus, kụkaiang su kantorẹ̌ u bea. ”Tol᷊ẹ e Siạ,” ungkuěngu Mawu Yesus si sie. Tangu i Lewi e měngkatewe nẹ̌buạ kụ timol᷊e Mawu Yesus.

¹⁵Kutẹu Mawu Yesus kapẹ̌sẹ̌simokol᷊e su wal᷊eng Lewi,[6] tangu narěntạ e ghapaěngu maghaghělle bea ringangu taumata apạewen pẹ̌pandaěngu taumata l᷊awọ e taumata ral᷊akisẹ̌ kụ nahungkaěng sěngkakaěng dingangu Mawu Yesus sire manga muritʼE. U kai lawọ su tal᷊oaran sire nahuntol᷊e su Mawu Yesus.

¹⁶Mananěntirong agama pirang katau wọu ghapaěng u tau Farisi nakasilo Mawu Yesus sěngkapahungkaěng dingangu manga maghaghělle bea ringangu taumata lẹ̌ěnnaěng barạdosa e. Kụ i sire němpẹ̌kibal᷊o su manga muritʼu Mawu Yesus, ”Kawe unụe mananěntirong kamene e kawe kụkaěng dingangu manga maghaghělle bea ringangu taumata apan dal᷊akisẹ̌ e?”

¹⁷Mawu Yesus e nakaringihẹ̌ kakiwal᷊on sire ene, kụ simimbang ungkuěng, ”Taumata apan mal᷊ahuweka e tawe mẹ̌gaghausẹ̌ dokterẹ̌, kaiso kawe apang masasakị e sidutu. Iạ diměnta e wal᷊inewe kumui apan kụ měpẹ̌pěndang batangenge seng mapia, kaiso kawe taumata apan baradosa e.”

¹⁸Ene piạ su sěngkatempo manga muritʼi Yohanes Měnanahani ringangu tau Farisi e kạpẹ̌puasane. Bọu e kai piạ u himaung su Mawu Yesus kụ nakiwal᷊o angkuěng, ”Kawe unụe muritʼi Yohanes Měnanahani ringangu tumatol᷊e tau Farisi e kawe měpẹ̌puasa, arawe manga muritʼi Tuang kawe tala wue?”

¹⁹Mawu Yesus simimbang, ”Makoạ bue su sal᷊imbangu kawing, kụ manga sake ipẹ̌puhědang? Kereu kaghiang esẹ deng bẹ̌dang dingangi sire, nal᷊ahẹu i sire mang mahungkaěng.

²⁰Kai sarung su tempone kaghiang esẹ e al᷊akeng bọu i sire. Su tempo ene ute wuhụewe i sire tawe měmpahungkaěng.

²¹Tawẹ apa taumata měnděpelu ririsẹ̌ buhu waugʼu ghědẹu pedesẹ̌ těbe. Batụu ririsẹ̌ buhu ene kai měngahěbụ dingangu makaghědẹ pedesẹ̌ ene, kụ sauneng makasaria ghehẹ e.

²²Kerene lai tawẹu mẹ̌tahong anggorẹ̌ buhu su kawihẹ̌ pisị těbe. U anggorẹ̌ buhu e sarung makaběse kawihẹ̌. Samurine i rẹ̌dua e magholọ kěbị. Anggorẹ̌ buhu e kawe hinong itaho su kawihẹ̌ buhu e lai!”

²³ Piạ sěnsul᷊e su ěllon Sabatẹ̌ e, piạ e Mawu Yesus simahe wọu rahaming gandung, manga muritʼE, nanětạ e němpanipo gandung.

²⁴Kutẹu tau Farisi e němpẹ̌berạ e su Mawu Yesus, angkuěng, ”Kawe unụe manga muritʼU e kawe lụl᷊ampa atorʼu agamang kitẹ, kụ i sire kawe měmpẹ̌kẹ̌koạbe apang ipẹ̌pělli su ěllon Sabatẹ̌ e?”

²⁵ Mawu Yesus simimbangke u, ”Kai wẹ̌dang ta nakạbasa i kamene apang kụ nịkakoạ i Daud, piạ i Abyatar kapẹ̌munarane kere sěngkatau imang mawantugẹ̌. Piạ i Daud dingangu manga taumatane něngkal᷊unusẹ̌, kụ nikawusangu kaěng, tangu i sie simuẹ̌ su Wal᷊em Mawu mase kimaěng borotẹ̌ sasěmba su Mawu Ruata. Ku borotẹ̌ ene mal᷊aing pinẹ̌gěllikange su taumatane. U sěmbal᷊iau su atorangʼu agamang kitẹ e kětạewen manga imang botonge kumaěng borotẹ̌ ene.”

²⁷Mase Mawu Yesus bẹ̌dang nẹ̌bera lai u, ”Ěllon Sabatẹ̌ e nikoạ baugu taumata wal᷊inewe taumata waugu ěllon Sabatẹ̌;

²⁸Kụ Ahusʼu Taumata e kai kawasa, ore lai su ěllon Sabatẹ̌.”