Read Sangir MARKUS 3 Bible Online

MARKUS 3 - Sangir bible

MARKUS 3

¹Mawu Yesus nẹ̌sul᷊e kapia sol᷊ong bal᷊eʼm pẹ̌kakal᷊iomanengang. Sene kai piạ tau l᷊imane sěmbẹ̌ka nipatene.

²Sene kai lai piạ i sire měmpẹ̌dědeạ sal᷊ang Mawu Yesus, mědeạu makapangěnsilʼi Sie. Tangu i sire měngkatewe hanesẹ̌ měkẹ̌kakělla si Sie, měnsang i Sie mạpakaul᷊en taumata masakị e su ěllon Sabatẹ̌.

³Mawu Yesus nẹ̌bera su taumata l᷊imane sěmbẹ̌ka nipatene e, ”Mahiko rarisị ěndaung sini su těngone.”

⁴Mase i Sie nakiwal᷊o si sire sene, ”Tuhụ agamang kitẹ e, kai apa hinong koateng i kitẹ su ěllon Sabatẹ̌ e? Mẹ̌koạ mapia arau mẹ̌koạ dal᷊akị? Měngambang taumata arau měmate?” I sire měngkate něngkarěmmasẹ̌.

⁵Mawu Yesus e limangehẹ̌ kạpẹ̌mandane mạngělikụ si sire, kaiso naungʼE mang masusa, ual᷊ingu i sire mạhěmpal᷊iung tungkětị e. Mase i Sie nẹ̌bera su tau ene, ”Togorẹ̌ko l᷊imanu.” Tau ene nanogore limane, kụ sěngkianụe naul᷊e.

⁶Tangu tau Farisi e němpaněntangken bal᷊eng pěkakal᷊iomanengang, mase nẹ̌dal᷊ahintau ringangi sire pirang katau tumatol᷊e si Herodes, mědeạu měmate Mawu Yesus.

⁷Mawu Yesus dingangu manga muritʼE simohọ sol᷊ong Danong Galilea. Tangu mal᷊awọ-l᷊awọ taumata wọu Galilea nahuntol᷊e Mawu Yesus. Mal᷊awọ lai nahunděnta wọu Yudea,

⁸wọu Yerusalem, bọu wanuang Idumea, dingangu wọu wanua su sěmběkan daking Yordan, dingangu wọu l᷊ikudʼu manga soa su Tirus dingangu Sidon. I sire kěbị němpẹ̌děnta sol᷊ong anun Mawu Yesus, u i sire seng nakaringihẹ̌ kal᷊awọu hal᷊ẹ̌ kụ seng nikakoạʼE.

⁹ I sire ene mal᷊awọ-l᷊awọ, hakịu Mawu Yesus něndolohʼu manga muritʼE apẹ̌děndiahi sakaeng baugʼi Sie, u mạdiringu i Sie kasẹ̌sekangu taumata l᷊awọ.

¹⁰I Sie napakaul᷊ẹen masasakị mal᷊awọ, kụ kakěpal᷊ewen masasakị e měngkate měpẹ̌papangansuhẹ̌ mẹ̌těngkarani kạdiongeng deng makapěnenggehẹ̌ si Sie.

¹¹Dingangu i sire apan nikasuẹ̌kangu rohkẹ̌ dal᷊akị e, kasuewen makạsilo si Sie, apidu mẹ̌suba su těngonʼE ringangu měmansagẹ̌ u, ”Seng i Kau e Ahusʼu Ruata e!”

¹²Kai Mawu Yesus měsẹ̌sěding sěngapan botonge u kumbahang manga rohkẹ̌ dal᷊akị e měmombeng i Sie.

¹³Bọu e Mawu Yesus simaka sol᷊ong bul᷊udẹ̌, kụ kimui si sire apang ikẹ̌kapulune. I sire e nahunděnta,

¹⁴mase i Sie namile wọu tal᷊oaran sire mapul᷊o dua su kataune. AngkuěngʼE, ”Iạ e namile si kamene, tadeạu i kamene tumaking si Siạ kụ i kamene Takụ irolohẹ̌ iapangeken Injilʼu Mawu Ruata,

¹⁵ringangu i kamene sarung makatarimạ kawasa mědeạu makapěnokol᷊ʼu manga rohkẹ̌ daral᷊akisẹ̌.”

¹⁶Kai ini e areng i sire mapul᷊o dua ene: I Simon (Kụ isẹ̌sěbạ e lai si Petrus),

¹⁷i Yakobus dẹ̌duan Yohanes tuarine, manga anạ i Zebedeus (i sire ini nitambaěngu areng i Boanerges mangal᷊ene ”manga anạ u rěllụ”),

¹⁸i Andreas, Filipus, Bartolomeus, Matius, Tomas, Yakobus anạ i Alfeus, Tadeus, Simon i Mal᷊intoị,

¹⁹dingangʼi Yudas Iskariot, kụ ianụ e nẹtul᷊ang Mawu Yesus e.

²⁰Bọu e Mawu Yesus napul᷊ẹ sol᷊ong bal᷊ě. Kai taumata l᷊awọ e saụ nahunděnta nẹ̌tampung, sarạeweng Mawu Yesus dingangu manga muritʼE tawe nakapẹ̌simokol᷊ẹ̌.

²¹Taumata němpẹ̌bera, ”I Sie seng nẹ̌pulu!” Ene sarạeng manga anạ u sěngkataune nakaringihe hal᷊ẹ̌ nariadi e, tangu i sire němpangal᷊ạ e si Sie.

²² Manga mananěntirong agama apang němpẹ̌děnta wọu Yerusalem němpẹ̌bera u, ”I Sie nikasuěkang i Beelzebul! Těmbonangu manga rohkẹ̌ dal᷊akị ene e kụ němpěgěllịu kawasa si Sie tadeạu makapěnokol᷊u rohkẹ̌ dal᷊akị.”

²³Tangú Mawu Yesus kimuị e taumata l᷊awọ e, ringangu nẹ̌běken papinintu pirambaụ si sire. ”Kai makoạbe kerea rohkẹ̌ dal᷊akị e manokol᷊ʼu rohkẹ̌ dal᷊akị?” ungkuěngu Mawu Yesus.

²⁴”Kụ kereu sěmbanuaěnge kawe napahiạ su ral᷊ungu piran kamonaěng kụ tawẹ pẹ̌daramene, ute wanua ene tawe mẹ̌daragẹ̌.

²⁵Kụ kereu su ral᷊ungu sěntahanakeng tawẹ kasasěmbaụe ringangu apạewen dal᷊ohone kawe měmpẹ̌sẹ̌sitori sěmbaụ dingangu wal᷊ine, ute pẹ̌tatěnganạu sěngkataue sarung magholang.

²⁶Kereu su ral᷊ungu kararatuangu setang kai piạ kaghagholang dingangu pẹ̌sasitori, kararatuang ene e tawe mẹ̌daragẹ̌ dingangu sarung miwu.

²⁷Tawẹu sarang sěngkatau makasuẹ̌ su wal᷊en tau matoghasẹ̌ kụ měhampasẹ̌ arětạe kereu i sie tawe měhapusẹ̌ tau matoghasẹ̌ ene kal᷊imona. Bọu ene wuhụ e i sie makapěhampasẹ̌ darotonge.

²⁸Kěngkasingkạko! Kereu taumata mẹ̌koạ dosa ringangu měhinakang,[7] i sie wẹ̌dang kaampungang.

²⁹ Arawe i sai měhinakang Rohkẹ̌ u Ruata e i sie tawe kaampungang! Batụu pělahinakang ene kai rosa sarang kakalẹ̌.” (

³⁰Mawu Yesus nakapẹ̌bera kerene, batụu piạ u nẹ̌berau Mawu Yesus niwal᷊iuangu rohkẹ̌ dal᷊akị.)

³¹Bọu e i ninangʼE ringangu manga anạ u sěmbaụe nasongọe. I sire němpěngampal᷊ẹ̌ su l᷊ikude kụ dimolohʼu taumata niapẹ̌kui Mawu Yesus.

³²Su tempo ene mal᷊awọ taumata mạiang mělẹ̌liwung Mawu Yesus. I sire němpẹ̌bera si Sie, ”Tuang, i ninang dingangu manga anạ u sěmbaụ i Tuange ene su l᷊ikude. I sire měmpědẹ̌deạ si Tuang.”

³³Mawu Yesus simimbang, ”I sai tangu i ninangkue? I sai tangu anạ u sěmbaụkue?”

³⁴Bọu ene i Sie namanda si sire apan kụkaiang měmpělẹ̌liwung e mase něhengetang, ”Tamai ini e i ninangku ringangu manga anạ u sěmbaụku e!

³⁵I sai mẹ̌kẹ̌koạ kapuluʼm Mawu Ruata e, i sie kai anạ u sěmbaụku esẹ dingangu anạ u sěmbaụku wawine, ringangu i ninangku.”