Read Sangir MARKUS 4 Bible Online

MARKUS 4 - Sangir bible

MARKUS 4

¹ Mawu Yesus saụewe naněntiro su apengu Ranong Galilea. Taumata měngkate mal᷊awọ měmpẹ̌lěhěmbung si Sie. Ual᷊ingu ene i Sie simakẹ e kụ naiang su ral᷊ungu sakaeng sěnggẹ̌sa dụdalěto su akẹ, kụ taumata l᷊awọ e rụdarisị su wiwihʼu rano.

²Mase Mawu Yesus naněntirong hal᷊ẹ̌ mal᷊awọ si sire su ral᷊ungu papinintu. Kụ i Sie naněntiro kere ini si sire.

³”Pěmpẹ̌daringihẹ̌ko! Piạ tahawaelẹ̌ sěngkatau taraị něngasịu wine.

⁴Kapẹ̌nawuhe, piạ e wine naasị su wěntang dal᷊eng. Bọu e nirěntaěngkeng manụ u winalangeng kụ bine e nasuẹen temọe.

⁵Piạbeng sěnggạ naasị su ěntana mahuwatu kụ ěntanane mahal᷊i. Bine e mal᷊ighạ nahuntuwo watụ u kai manipị ěntanane,

⁶kai sarạeng matangěllo e nasahengkẹ, hětịe nanětạe nalolang kụ su samurine naghihang mase nahěgu, batụu hamụe tawe nakasuẹ̌ maral᷊ung.

⁷Sěnggạ e wue ute piạ bine nasawuhẹ̌ su tal᷊oaran manga sumpinị. Sumpinị ene timuwo kụ naněsẹewe manga towọe, sarang tawe nẹ̌bua.

⁸Kai piạbe lai wine naasị su ěntana mapia. Bine ene himětị kụ timuwo nakoạ gẹ̌guwạ mase něbua e, piạbeng těllum pul᷊o, piạbeng ěnnungu pul᷊o, ringangu piạbeng limembo mahasụ su sul᷊ene kakěpal᷊e.”

⁹Bọuten nẹ̌běke papinintu ene Mawu Yesus něhengetang, ”I kamene piạbe tul᷊ing kamene, raringihe!”

¹⁰Natarangke Mawu Yesus sẹ̌sane, taumata apan seng nakaringihẹ̌ těntironʼE riměntạ e su anunʼE sěngkakarěnta ringangu manga muritʼE i sire mapul᷊o dua. I sire mědẹ̌dorong tadeạu i Sie pěnẹ̌nualagʼu mangal᷊en papinintu ene.

¹¹Tangu Mawu Yesus nẹ̌berạe si sire, ”I kamene seng nionggol᷊angu al᷊amatẹ̌, tadeạu makakasingkạu dahasia mạanun kereapa kararatun Mawu Ruata e. Arawe taumatang likude tẹ̌těntiroěngʼu papinintu,

¹² tadeạu ’I sire sarung měmpạmandawe kahěnga-hěngang kaiso kawe tawe makasilo, i sire sarung hanesẹ̌ měmpẹ̌dẹ̌daringihẹ̌, kaiso tawe makal᷊aěnna, tadeạu kumbahang i sire makasilo ringangu makaěnna ringangu kumbahang mahunděnta su anum Mawu Ruata kụ Mawu e měngampung dosan sire.’ ”

¹³Bọu e Mawu Yesus něhengetang si sire, ”Kereu i kamene tawe makaěnna papinintu ene, ute i kamene kawe makaěnna kereapa manga papinintu lai wal᷊ine tangu?

¹⁴Měnanawuhẹ̌ e ute kai taumata apam mělẹ̌habarʼu hengetangu Mawu Ruata.

¹⁵Bine ninawo su ral᷊eng ute kai isẹ̌sihing si sire apan dụdaringihẹ̌ injilẹ̌ mạanung kereapa kararatun Mawu Ruata e, kaiso tawe makaěnna. Ene nakaringihe, tangu riměntạe setang kụ něngal᷊ạe apang kụ seng nisawuhẹ̌ su ral᷊ungu naung i sire.

¹⁶Bine kụ apan ninawo su ěntana kụ mawawatu, al᷊ingkai taumata makạdingihẹ̌ injilẹ̌, kụ apidewe něnarimạ dingangu mal᷊uasẹ̌.

¹⁷Kai injilẹ̌ ene tawe něhamụ su ral᷊ungu naung i sire hakịu tawẹ kararěpange. Sarangke i sire kinahombangengu sigěsạ arau tatumbiagẹ̌ ual᷊ingu injilẹ̌ e, ute i sire apidʼu nẹ̌tul᷊a.

¹⁸Apam bine nasawuhẹ̌ su tal᷊oaran sumpinị e, al᷊ingkai taumata apam makạdingihẹ̌ injilẹ̌ e,

¹⁹kaiso kawe ghụgěnggangu pẹ̌bawiahʼi sire ringangu lụěnning u wiahẹ̌ mạhěmpal᷊iu. Měnningu haghin sabarange sụsuẹ̌ su ral᷊ungu naungi sire. Ual᷊ingu ene injilʼu Mawu Ruata e kẹ̌kaěpisang su ral᷊ungu naungi sire, hakịu tawe mẹ̌bawua.

²⁰Dingangu wine kụ nasawuhẹ̌ su ěntana matawa e al᷊ingkai taumata kụ apam makạdingihẹ̌ injilẹ̌, ute měnarimạu ene, kụ i sire mẹ̌bua mal᷊awọ, piạbeng těllum pul᷊o, piạbeng ěnnungu pul᷊o, ringangu piạbeng mahasụ su sul᷊ene limembong kal᷊awọe wuane.”

²¹ Mase Mawu Yesus něhengetangke kapia, ”Seng piạ ngae taumata něndikọ sol᷊o kụ bọu e nitakatengu wěnsadẹ̌, arau nipěllọe su ral᷊ungu raral᷊okaěng? Kawe unụe i sie tawe maměllọu sol᷊o ene su ral᷊aede?

²² Tawẹu mạbawuni kụ tawe sarung kasilo; ringangu tawẹu kạpapěnisẹ̌ e kụ sarung tawe masongkahẹ̌.

²³Ual᷊ingu ene, kereu piạ tul᷊i ute, daringihẹ̌ko!”

²⁴ Mase Mawu Yesus saụ lai něhengetang, ”Pẹ̌sipirẹ̌ko apang ikaringihʼi kamene ini! Sasukạ kụ ipanukạ i kamene waugu taumata wal᷊ine sarung lai ipanukạu Mawu Ruata si kamene — dingangu wẹ̌dal᷊aing limembong kal᷊awọe.

²⁵ U i sain seng piạ, sarung l᷊ai onggotang bẹ̌dang limembong kal᷊awọe; arawe apang kụ tạ apa ute, relaing pěngal᷊akengu apam mahal᷊i kụ bědang si sie.”

²⁶Mawu Yesus delaing naněmpụ bisarane, ”Kereu Mawu Ruata e mẹ̌parentạe al᷊ingkai sěngkatau Ratu, kakakoạe wotonge ikasihing kere sěngkatau měnanawuhẹ̌ bine su waelẹ̌ e.

²⁷Hěbi i sie mẹ̌tikị; arawe ěllo i sie mẹ̌bangung. Kụ manga wine ene mang kạtuwone ringangu kakạsariane. Katewe měnsang kereapa kakakoạu tatuwone ringangu nasaria e, tau ene e wẹ̌ga wue.

²⁸Ěntana ene sẹ̌sane nal᷊ahẹ̌u mapasẹ̌bangu wuane: kahumotongange pul᷊ane, bọu ene kawene, mase wuane.

²⁹ Kụ kereu gandung ene seng nasasạe, ute tau ene manětạe měharesẹ̌ e, batụu kai seng tempom pamaměnsạ.”

³⁰”Kereu Mawu Ruata e mẹ̌parenta, ute kai ikasihing i kitẹ e ringangu a?” Kapia Mawu Yesus nakiwal᷊o. ”Kai papasihing apa ikapakẹ i kitẹ mědeạu ikapanualagẹ̌ ngae?

³¹Kereu Mawu Ruata e mẹ̌parenta kakakoạe ute kai kere papinintu ini: Bakịu sasawi sěmbaụ nial᷊ạu sěngkatau kụ nisuang su ěntana. Bakịu sasawi[8] e kai kararidikangu wine su dunia.

³²Kai kamagengu seng timuwo ute, i sie mariadi kasariaěnge wọu tal᷊oarang haghin sasuang. Manga lelange měngkate apa masuhampạ hakịu manga manụ u winalangenge měmpạhunděnta kụ měmpẹ̌kẹ̌koạ sal᷊ehe su naụe.”

³³Kerene kakakoạu Mawu Yesus mạněntiro taumata l᷊awọ dingangkewen papinintu matatimu mẹ̌sul᷊ungu ene, karaụewen kahěnganeng i sire.

³⁴Mawu Yesus měngkate sěntiniạ měpẹ̌pakẹu papinintu kereu i Sie maněntiro si sire ene. Kai kamagengu i Sie hala ringangu manga muritʼE, ute i Sie měnẹ̌nualagʼu kěbị tamai ene si sire.

³⁵Su sěngkawawěllo ene lai, Mawu Yesus něhengetang su manga muritʼE, ”Tamaị e i kitẹ mẹ̌sakaeng sol᷊ong sěmběkan dano.”

³⁶Tangu Mawu Yesus simakẹ e su sakaeng dingangu manga muritʼE, kụ naněntangu taumata lawọ e su wiwihu rano e, kụ simake sěngkasake. Manga sakaengkewe lai wal᷊ine e mal᷊aing ene sene. Mase Mawu Yesus dingangkewelai manga muritʼE tangu nanětạe nẹ̌sakaenge.

³⁷Tawe nararěnnạ wọu ene tangu rěllang maihạe timiụe. Mělisange nanětạe nanakal᷊ẹ̌ sakaenge kụ kinasakeěnge hakịu sakaeng kawe maraning mapenẹu akẹ.

³⁸Su petong sakaeng ene Mawu Yesus kapẹ̌hědange kụ těmbọe kạdal᷊ěngkang su kapepẹ. Manga muritʼE němpěmukọe si Sie. I Sire němpẹ̌bera, ”Tuang Guru, kawe tawe sěmpikang i Tuang tangu i kitẹ masilakạ?”

³⁹Mawu Yesus napukọe kụ namal᷊ěndihẹ̌ anginge kụ nẹ̌berạe su rano u, ”Kěndị e, kal᷊enehẹ̌ko!” Kutẹu anginge nal᷊ědạe, kụ dano měngkatewe nal᷊ene-l᷊enehẹ̌.

⁴⁰Mase Mawu Yesus něhengetang su manga muritʼE, ”Kawe unụe i kamene mạtakụ? Kawe unụe i kamene tawe mangimang si Siạ?”

⁴¹Tangu i sire něngkatakụe kụ němpẹ̌berạe sěmbaụ su wal᷊ine, ”Kawe i sai tangu i Sie ini, hakịu anging dingangu luạ e kawe mạhimang si Sie.”