Read Sangir MARKUS 5 Bible Online

MARKUS 5 - Sangir bible

MARKUS 5

¹Bọu e Mawu Yesus dingangu muritʼE nawunạe su sěmbẹ̌kan Danong Galilea, su wanuan Gerasa.

²Ene Mawu Yesus natumpạe wọu sakaeng, i Sie nihaungangu sěngkatau esẹ matoghasẹ̌ simẹ̌bang bọu manga liangu kubul᷊ẹ̌.

³Tau ene seng nipẹ̌banuangu rohkẹ̌ dal᷊akị kụ i sie seng mẹ̌tẹ̌tanạ su manga pěngangubul᷊ang. I sie seng tawe ikaikị manilaing ikitangu hante.

⁴Seng masau wěntungang su l᷊aede ringangu su l᷊imane, kai manga hante e měngkate wẹ̌běsukange, dingangkewen uase su l᷊aede pẹ̌papẹ̌diange. I sie kerene katoghase hakịewen tawẹu makatětol᷊ẹ̌ měhẹ̌go si sie.

⁵Ěllo hěbi i sie měngkatewe lěgahʼu manga lẹ̌bing dingangu manga wěntihe, kạpěmansage kụ mẹ̌děndal᷊esẹ badange ringangu watu.

⁶Ene wọu maraune i sie seng nakasilo Mawu Yesus narěnta, kụ i sie měngkatewe timal᷊ang naněnsomahẹ̌ mase nẹ̌suba su těngon Mawu Yesus.

⁷Dingangu tingihe maihạ i sie mạmansagẹ̌, ”Yesus Ahusʼu Mawu Ruata Karangetange! Kai sarung pẹ̌kapuranengu iạ ini e? Su arengu Mawu Ruata, iạ mědẹ̌dorong, abe sigěsake iạ e!” (

⁸Tau ene nẹ̌bera kerene batụu Mawu Yesus něhengetang si sie, ”Rohkẹ̌ dal᷊akị, sěbangke wọu tau ěndaị ini!”)

⁹Mase Mawu Yesus nakiwal᷊ọe si sie, ”I sai areng u?” Tau ene simimbang, ”Arengku e i ’Legiun’ — batụu i kami ini e kai mal᷊awọ-l᷊awọ!”

¹⁰Apan piran sul᷊e i sie mědẹ̌dorong sěngapang botonge tadeạu Mawu Yesus abe pěnokol᷊ʼu manga rohkẹ̌ dal᷊aị e wọu weọ e ene.

¹¹Maranin tampạ ene piạ gapaěngu wawi mal᷊awọ měmpědẹ̌deạ kaěnge su lengehʼu wul᷊ude.

¹²Manga rohkẹ̌ dal᷊aịe němpẹ̌dorong su Mawu Yesus, ”Rolohe i kami apạhunsuẹ̌ su ral᷊ungu manga wawi e.”

¹³Kụ Mawu Yesus kimirẹ e. Tangu manga rohkẹ̌ daral᷊aị e nahunsěbangke wọu tau ene kụ němpẹ̌suẹ̌ su wawi e. Kal᷊awọu wawi e němpẹ̌tal᷊ang kụ nahuntumpa wọu wiwihʼu těnggilihange kụ něngkawunsal᷊ẹ̌ su rano mase něngkawul᷊usẹ̌ — kal᷊awọe mangawe rua hiwu su waụ e.

¹⁴Manga měndal᷊ukadẹ̌ bawi e nahuntal᷊ang kụ němpẹ̌běken hal᷊ẹ̌ ene su soa ringangu su apang kampong mạngělikụ e. Mase taumata l᷊awọ e simẹ̌bang němpamanda hal᷊ẹ̌ seng nariadi e.

¹⁵I sire němpẹ̌haungke Mawu Yesus, kụ nakasilo tau kanini niwal᷊iuangu rohkẹ̌ dal᷊akịe kụ mạiang ěndaịse. I sie seng piạ pakeange, ringangu tiněnnane seng kere wiasa. Kụ i sire kěbị e něngkatakụ.

¹⁶I sire apạewen nakasilo hala kakakoạu tau ene ringangu manga wawi e, měmpẹ̌bẹ̌běken hal᷊ẹ̌ seng nariadie.

¹⁷Mase apan tumanạu weọ e ene tangu mědẹ̌dorong tadeạu Mawu Yesus maněntangu wanua ene.

¹⁸Ene Mawu Yesus simakẹ e su sakaeng, i anu nạung niwal᷊iuangu rohkẹ̌ dal᷊aịe nẹ̌dorongke su Mawu Yesus mědeạu i sie wotonge makatol᷊e.

¹⁹Kai Mawu Yesus e tawe napakawala, angkuěngʼE, ”Dakọe kapul᷊ẹ, kụ paul᷊ịe su manga anạ u sěmbaụ u apan seng kinoạu Mawu si kau, ringangu kereapa kapianʼE i Sie si kau!”

²⁰Tau e apidʼu napul᷊ẹ, kụ nanětạe nẹ̌běke su kạguwạu Soa Mapul᷊o apang kụ seng nikoạu Mawu Yesus si sie. Kụ kěbị taumata e měngkaherang nakaringihẹ̌ ene.

²¹Mawu Yesus nẹ̌sul᷊e kạpia sol᷊ong sěmběkan dano. Su wiwihʼu rano e, taumata l᷊awọ němpẹ̌dahěmbung Mawu Yesus.

²²Ene piạ tau narěnta arenge i Yairus. I sie kai sěngkatau těmbonangu wal᷊eng pẹ̌kakal᷊iomanengang su soa ene. Piạ i sie nakasilo Mawu Yesus, i sie nẹ̌suba su těngonʼE,

²³kụ mědẹ̌dorong sěngapam botonge, ”Tuang, anạku wawine kai masakị matědụ. Karimạko i Tuang deng duměnta kụ makapaněllidʼu limanʼU, kụ i sie maul᷊e ringangu tawe mate!”

²⁴Tangu Mawu Yesus e natamai ringang i Yairus. Mal᷊awọ taumata němpẹ̌tol᷊e si Sie měmpẹ̌sẹ̌sasěngkelẹ̌ balạewe měnsang bọu tampạ sude.

²⁵Su tal᷊oaran sire e piạ l᷊ai sěngkatau wawine kụ seng mapul᷊o dua su taunge měngkai rẹ̌dal᷊engangu raha wọu wadange pělli.

²⁶Patikụ darotonge seng nasuen pakẹ e waugu pinamaehẹ̌ manga mangangundang, kaiso tawẹu nakapia, kaiso kawe napahuntinambang tědụe.

²⁷Bawine ene seng mal᷊awọ dingihe mạanun Mawu Yesus. Tangu su tal᷊oarạen taumata l᷊awọ ene, i sie himaungke Mawu Yesus bọu l᷊ikude,

²⁸u su tiněnnane, ”Kạdiongeng katewe iạ manenggehẹ̌ lakụe, tangu iạ e seng mapia!”

²⁹I sie nanenggehẹ̌ lakụ u Mawu Yesus, kụ su tempo ene e lai raral᷊engu rahane e napontodẹ̌. I sie nakapěndangu i sie seng nul᷊e.

³⁰Tangu su orasẹ̌ ene lai Mawu Yesus nakapěndangu piạ kuatẹ̌ siměbang bọu watangengʼE. Tangu i Sie nẹ̌bihu su taumata lawọ ene kụ něhengetang, ”I sai wědị nanenggehẹ̌ lakụ-Ku e?”

³¹Manga muritẹ̌ e němpẹ̌bera, ”I Tuang makạsilo hala u apạe mal᷊awọ taumata kụ měmpẹ̌sẹ̌sasěsẹ. Kụ i Tuang delaing makiwal᷊ou, i sai nanenggehẹ̌ si Tuang?”

³²Arawe Mawu Yesus měngkate sěntiniạ, mạmanda kaihi koaneng mědẹ̌deạ tau nanenggehẹ̌ si Sie.

³³Tau wawine ene kụ nasingkạeng apa nariadi su watangenge, kụ kạkendenẹeng takụ tangu i sie nẹ̌suba su těngon Mawu Yesus kụ něngakụen kěbị-kěbị.

³⁴Tangu Mawu Yesus něhengetang su wawine ene, ”Anạ-Ku, ual᷊ingu i kau nangimang si Siạ, ute i kau e naul᷊e! Dakọe kapul᷊ẹ su ral᷊ungu pẹ̌darame. I kau e seng nul᷊e kahěngang!”

³⁵Ene Mawu Yesus bẹ̌dang kapẹ̌hengetange, piạ darolohang pirang katau, nahunděnta wọu wal᷊eng Yairus. ”Ahusʼi Tuang bawine e seng naněntang,” angkuěng i sire si Yairus. ”Tawe wahal᷊uasẹ̌ i Tuang mapakasusa Mawu Yesus e wẹ̌dang.”

³⁶Tawe nẹ̌sěmpị[9] apang iwẹ̌berang taumata lawọ e, Mawu Yesus něhengetang si Yairus, ”Abe katakụ, měngkate pangimang!”

³⁷Mase Mawu Yesus dimal᷊eng turusẹ̌, kai i Sie tawe napakawalan sarang sěngkatau niapatol᷊e si Sie, kětạewen i Petrus, Yakobus dingangi Yohanes sire tahatuari.

³⁸Sarạeng i sire nahumpạ su wal᷊eng Yairus, Mawu Yesus nakasilou měngkate němpẹ̌golang, dingangu nakaringihẹ̌ sasangị dingangu ral᷊ungkang maihạ.

³⁹Bọu e Mawu Yesus simuẹ̌ dingangu nẹ̌bera si sire, ”Kawe unụe měmpěgẹ̌ganohạ dingangu mạhunsangị? Dariọ ene wal᷊inewe nate, i sie kětạeng mětẹ̌tikị!”

⁴⁰I sire kai nahul᷊ěgen Mawu Yesus. Tangu i Sie něndolohen sire niapasẹ̌bang kěbị. Bọu ene i Sie namaringang si ninang dingangu i amangu rariọ dingangu i sire těllungkatau muritʼE simuẹ̌ su ral᷊ungu kamarʼu rariọ ene.

⁴¹Mawu Yesus nangumpaedẹ̌ liman dariọ e, kụ něhengetang si sie, ”Talita kum,” mangal᷊ene, ”Momọ, Iạ mẹ̌bera si kau: pẹ̌bangungke!”

⁴²Dariọ mahuala e měngkatewe nẹ̌bangung, kụ dimal᷊eng. (Umure seng mapul᷊o dua su taunge.) Kěbị apan nakasilo karariading ene e měngkatewe němpẹ̌dal᷊inaụ!

⁴³Kai Mawu Yesus e nẹ̌sěding sěngapam botonge si sire měhabarʼu hal᷊ẹ̌ ene si sai-sai. Mase ungkuěngʼE, ”Gělikengkong kaěnge rariọ ene.”