Read Sangir MARKUS 6 Bible Online

MARKUS 6 - Sangir bible

MARKUS 6

¹Bọu tampạ ene, Mawu Yesus napul᷊ẹ sěngkakapul᷊ẹ dingangu manga muritʼE sol᷊ong soan sire.

²Kụ su ěllon Sabatẹ̌, i Sie nanětạe naněntiro su wal᷊em pẹ̌kakal᷊iomanengang. Sene kai piạ taumata mal᷊awọ. Ene i sire nakaringihe těntiron Mawu Yesus, i sire mangkewen němpẹ̌dal᷊inaụ. I sire němpẹ̌bera, ”Kai wọu apa tau ěndaị nakaěbạ kěbị tamai ene? Kai kasingkạ kereapa si Sie? Kai kereapa i Sie měkoạ karal᷊inaụ?

³Karạ i Sie kawe basẹ̌ u kalu, anạ i Maria, kụ tuhang i Yakobus, i Yoses, i Yudas dingangi Simon? Ore, manga wawinene mal᷊aing měmpẹ̌tẹ̌tanạ sini.” Ual᷊ingu ene i sire tawe něnarimạ i Sie.

⁴ Mase Mawu Yesus něhengetangke si sire, ”Sěngkatau nabi e lẹ̌adateng suapan tampạ tabeạu katewe su wanuane ringangu sutal᷊oarang anạ u sěmbaụ e ringangu walage.”

⁵Kụ sene Mawu Yesus tawe nakapěkoạ munara makạdal᷊inaụ tabeạu katewe napakapian masasakị, pirang katau ringangu naněllidʼu l᷊imane si sire.

⁶I Sie naral᷊ingung sire, kawe tawe mangimang. Bọu e Mawu Yesus limuhu manga kampong mạngěllikụe kạpaněntirone.

⁷I Sie kimui manga muritʼE mapul᷊o dua e, mase rimolohʼi sire pẹ̌tahạduang katau kụ nionggotangu kawasa tadeạu i sire makapěnokol᷊ẹ̌ manga rohkẹ̌ dal᷊aị e.

⁸ I Sie nẹ̌gěllịu těntiro kere ini si sire, ”Kumbahang mẹ̌bawa manga apa-apa su raral᷊engang i kamene, tabeạu katewe tẹ̌king. Kumbahang měmpẹ̌bawa kaěng arau kawihʼu siděka, arau roitẹ̌.

⁹Pěmpẹ̌sasapatu wue, kai manịeng tawe mẹ̌bawa laahusẹ̌ duam parẹ̌.”

¹⁰I Sie mal᷊aing něhengetang, ”Kereu i kamene rumangeng su wal᷊e sěmbaụ, ute katanạe sene sarang i kamene maněntangu soa ene.

¹¹ Kai kereu i kamene mahumpạe su tampạ sěmbaụ, kụ i sire sene tawe manarimạ dingangu tawe rumaringihẹ̌ si kamene, ute těntangke wanua ene. Kụ tontongko awul᷊ẹ̌ bọu laedʼi kamene makoạ kere sasahidi si sire!”

¹²Tangu manga muritʼu Mawu Yesus i sire mapul᷊o dua e nahundal᷊engke. I sire rimal᷊eng němpẹ̌kakekeng habarẹ̌ u taumata e apětẹ̌tobatẹ̌ bọu kal᷊awọu rosane.

¹³ Manga muritʼu Mawu Yesus e němpanokol᷊ẹ̌ kal᷊awọu manga rohkẹ̌ dal᷊aịe, namuhang lanang zaitun su masasakị, dingangu niapakaul᷊en sire.

¹⁴ Manga habarẹ̌ mạanung kal᷊awọu apan seng nariadi kinaringihʼu Ratu i Herodes,[10] batụu arengu Mawu Yesus e seng timeleng suapan tampạ. Piạ taumata nẹ̌bera u, ”i Yohanes Mananahani e seng nẹ̌biahẹ̌ kạpia! Kai ene hakịu i Sie piạ kawasane mẹ̌koạ karal᷊inaụ tamai ene.”

¹⁵Arawe i sire wal᷊ine e měbẹ̌bera u, ”i Sie kai i Elia.” Piạ l᷊ai měbẹ̌bera u, i Sie kai nabi, mẹ̌sul᷊ungu sěngkatau nabi wọu tal᷊oarang tempo kal᷊imona.

¹⁶Piạ e i Herodes nakaringihẹ̌ ene, i sie nẹ̌bera u, ”Mang kahěngangu ini e kai i Yohanes Mananahani kụ kạngerẹ e seng takụ pakịbusạ těmbọe. Ini i sie kai seng nẹ̌biahẹ̌ kapia!”

¹⁷ Batụu kal᷊imonang ene, i Herodes nạung seng nangoro taumata piněnamẹ si Yohanes, kụ pinakitahungkụ. I Herodes nẹ̌koạ kerene ual᷊ingu i Herodias kawingu anạ u sěmbaụ e hala i Filipus. Batụu i Herodes kai seng nẹ̌kapapuěng dingangi Herodias,

¹⁸kụ su hal᷊ẹ̌ ene tangu i Yohanes kai seng piran sul᷊e měbẹ̌bera si Herodes kere ini, ”Tawe wotonge i kau mẹ̌kapapuěng kawingu anạ u sěmbaụ u ene!”

¹⁹Kai ene sungkal᷊ene hakịu i Herodias nạung nangune si Yohanes kụ mapulu měmate si Yohanes, kai i sie tawe nakakoạ hal᷊ẹ̌ ene, batụu sẹ̌sahagheěng i Herodes.

²⁰Batụu i Herodes kai seng něndolohʼu taumata pẹ̌děndiagạ pakapia-pia si Yohanes su tahungkụ, ual᷊ingu i sie kai mạtakụ i Yohanes. I sie masingkạu i Yohanes kai sěngkatau taumata naunge mapia ringangu matul᷊idẹ̌ kụ nidarolohʼu Mawu Ruata. Kụ kamageng i Yohanes mẹ̌bisara ute, i Herodes mal᷊aing puluang dumaringihẹ̌, maning i sie ikẹ̌kal᷊ipomponge.

²¹Pangěnsueěnge i Herodias nakaẹ̌bạe loahe su ěllom pẹ̌tatahěndungangu karariading Herodes. Su tempo ene i Herodes namangung sal᷊iwangu kěbị wẹ̌batone, těmbonangu manga mẹ̌sasekẹ dingangu manga matatěllangu wanuang Galilea.

²²Su sal᷊iwang ene, anạ i Herodias mahuala[11] taraịe simuẹ̌ nẹ̌sal᷊ai, kụ pẹ̌sasal᷊aine měngkai nakal᷊ahimpulu naung i Herodes dingangkewelai manga sakene. Tangu i Herodes nẹ̌berạe su rariọ mahuala ene, ”I kau e mẹ̌tonengu a, pěhabare! Iạ e sarung měngonggọu ene si kau!”

²³Mase i Herodes nẹ̌kědo su rariọ mahuala ene apidʼu piạ salune. I Herodes nẹ̌berau, ”Baẹbe apa rorongangue mang sarung takụ ionggọ, ore lai maning sěmbẹ̌ka wọu wanua pẹ̌parentaěngku e!”

²⁴Tangu rariọ mahuala ene simẹ̌bangke kụ nakiwal᷊o si ninange, ”Inang, apạ e kapiange takụ dorongang?” I ninange simimbang, ”Pẹ̌dorongke těmbọ i Yohanes Měnanahani.”

²⁵Dariọ mahuala e měngkatewe lighạ nẹ̌sul᷊e sol᷊ong anung Herodes kụ nẹ̌bera, ”Iạ mẹ̌dorong těmbọ i Yohanes Měnanahani kụ onggọ si siạ su orasẹ̌ ini lai ku taho su baki!”

²⁶Sarang nakaringihẹ̌ dorong ene, tangu i Herodes měngkatewe apa masusa-susa naung e. Kaiso, i sie mang tawe makakoạ mangilěmmụ u rorong ene, ual᷊ingu i sie kai seng nẹ̌salu su těngon manga sakene.

²⁷Kụ i sie měngkatewe něhanggosẹ̌ dimolohʼu sěngkatau l᷊ukade apẹ̌ngal᷊ạ těmbọ i Yohanes Měnanahani e. Tangu lukadẹ̌ ene simuẹ̌ e su tahungkụ, mase namusạ těmbọ i Yohanes.

²⁸Bọu ene i sie nẹ̌bawa těmbọ ene su baki kụ nitẹ̌gone su rariọ bawine ene. Mase rariọ bawine ene saụ něnogorʼu těmbọ ene si ninang e.

²⁹Bọu e manga muritʼi Yohanes nakaringihẹ̌ hal᷊ẹ̌ ene, i sire nahunděntạe němpangal᷊ạ maieti Yohanes mase nilẹ̌bing.

³⁰Manga rarolohang kụ nirolohʼu Mawu Yesus e němpẹ̌sul᷊e kapia kụ němpẹ̌komol᷊ẹ̌ dingangu Mawu Yesus. I sire němpẹ̌běke si Sie patikụewe apan seng nikoạ dingangu nitěntiron sire.

³¹Měngkai apa mal᷊awọ taumata měngkasongo ringangu měngkapul᷊ẹ, hakịu kal᷊ingung kumaěnge Mawu Yesus dingangu manga muritẹ̌ e tawẹ loahe. Tangu Mawu Yesus něhengetang su manga muritʼE, ”Bọete i kitẹ sol᷊ong tampạ marěmasẹ̌ mẹ̌těngkatěntani i kitẹ hala, tadeạu i kamene reng makapangirol᷊o kadodọ tempo.”

³²Tangu i sire němpẹ̌buạ e ringangu sakaeng sol᷊ong tampạ marěmasẹ̌.

³³Kutẹu kai lawọ taumata seng nakasilo si sire němpaněntangu tampạ ene, kụ masingkạu i sai wue i sire. Kụ bọu kěbị soa su wanua ene, i sire měngkatewe mạhuntal᷊ang bọu rul᷊unge měmpẹ̌ngal᷊imona Mawu Yesus dingangu manga muritʼE.

³⁴ Ene, Mawu Yesus tụtumpạe wọu sakaeng, i Sie nakasilo taumata lawọ. I Sie timal᷊ěntụ i sire, ual᷊ingu i sire kai kere domba tạ měral᷊ukade. Tangu i Sie nanětạe naněntirong hal᷊ẹ̌ lawọ si sire.

³⁵Ene nawawěllọe, tangu manga muritʼu Mawu Yesus němpẹ̌berạe si Sie, ”Seng masarạ mahěbi, kutẹu tampạ ini e kawe maghea.

³⁶Mapiawe i Tuang pěndolohʼi sire ini e aparal᷊eng, tadeạu i sire makawelliwe kaěng su manga weọ e arau manga kampong apan mạngělikụ ini e.”

³⁷Kai Mawu Yesus e simimbang, ”I kamene e pěgěllị kaěng i sire.” ”Hu, kai i kami harusẹ̌ dumal᷊eng mamělli borotẹ̌ arẹ̌gan doitẹ̌ sal᷊aka[12] dua hasụ su kal᷊ěpane waugʼu kaěng i sire ini e?” kerene angkuěngu manga muritʼu Mawu Yesus e.

³⁸Mase Mawu Yesus nakiwal᷊ọ e, ”Kai pirang baụ borotẹ̌ si kamene? Kěnangko pěmpẹ̌kakělla.” Bọuten i sire němpẹ̌kakělla, ute i sire němpẹ̌bera u, ”Piạ borotẹ̌ limambaụ dingangu piạ lai kinạ duambua.”

³⁹Mase Mawu Yesus nangoro si sire kěbị e apạkaiang pěkẹ̌kamonaěng su rěmpugẹ̌ melong.

⁴⁰I sire měngkate nahungkaiang němpẹ̌kamonaěng. Kụ piạ u pẹ̌tahạ mahasụ, dingangu piạ l᷊ai pẹ̌tahạ l᷊imam pul᷊o su kataune pẹ̌sěngkamonaěng.

⁴¹Bọu ene Mawu Yesus něngal᷊ạ e borotẹ̌ limambaụ dingangu kinạ duambua ene, mase rimal᷊ingara sol᷊ong langị kụ nakitarimakasẹ su Mawu Ruata. Bọu ene, i Sie nangangompeng borotẹ̌ ene ringangu l᷊imanʼE kụ nionggọ e su manga muritʼE pakipahiạ su taumata l᷊awọ ene. Kụ kinạ duambua ene nipẹ̌papahiạ l᷊ai si sire kěbị.

⁴²Tangu i sire nahungkaěngke sarang něngkal᷊aedẹ̌.

⁴³Bọu ene lěmbeng kaěng e nịkakomol᷊u manga muritʼu Mawu Yesus — kal᷊awọe mapul᷊o dua su luwene napenẹ-penẹ.

⁴⁴Kụ kal᷊awọu manga esẹ apan nahungkaěng borotẹ̌ e nạung piạu manga lima hiwu su kataune.

⁴⁵Bọu e Mawu Yesus měngkatewe rimolohʼu manga muritʼE nipẹ̌sakaeng piněngal᷊imona si Sie sol᷊ong Betsaida paị sěmběkan dano, arawe i Sie reng mạpakapul᷊ẹ u taumata lawọ e.

⁴⁶Sarạeng bọu nẹ̌katạu taumata l᷊awọ e, Mawu Yesus simaka sol᷊ong bul᷊ude tadeạu mẹ̌kal᷊iomaneng.

⁴⁷Ene nahěbi e, sakaengu manga muritʼE ene seng su tal᷊oaran dano, arawe Mawu Yesus e wẹ̌dang su rul᷊unge.

⁴⁸I Sie nakasilọete si sire měngkate marasai mẹ̌děndalung sakaenge watụ u somahẹ̌. Ual᷊ingu ene, mangạe su wěllạu pukul᷊ẹ̌ tatěllu ringangu pukul᷊ẹ̌ ěnnung mal᷊ukadẹ̌, i Sie němatụ si sire kụ dimal᷊eng su wowong akẹ. Kụ i Sie měngkate rimal᷊eng mẹ̌sul᷊ungu lumiu si sire.[13]

⁴⁹Kai sarạeng i sire nakasilo si Sie rụdal᷊eng su wowon akẹ e, ute i sire mạngiral᷊ingu i Sie kai himukudẹ̌,

⁵⁰hakịu i sire němpẹ̌kiạ u katatakụ. U kai i sire kěbị e nakasilo si Sie kụ i sire něngkawintogẹ̌. Kai Mawu Yesus e lighạ namisara si sire, ”Pakarěmmasẹ̌ko! Iạ e kai i Yesus. Abe kěngkatakụ!”

⁵¹Mase i Sie simakẹ e su sakaeng i sire, kụ anginge nal᷊ědạ e. Manga muritʼE mangkewen dimal᷊inaụ tawẹ sihinge.

⁵²Karal᷊inaụ su piạ borotẹ̌ limambaụ e, wědang ta nakạpuko pangangimangi sire. Mawěhạ baugʼi sire makahěngang.

⁵³Sarạeng narakị su sěmběkan dano e, i sire němal᷊ango su apengu Genesaret.

⁵⁴Lěpase i sire natumpa wọu sakaenge, i sire nakakiral᷊a u narěntae kawe Mawu Yesus.

⁵⁵Mase i sire měngkatewe nẹ̌tatal᷊ang suapang kạguwạu weọe ene, kụ nanětạe nanondan masasakị su těpihẹ̌ sol᷊ong anum Mawu Yesus. Kereu i sire makaringihẹ̌ u Mawu Yesus kai ene su tampạ sěmbaụ, i sire tamai manondang masasakị sene.

⁵⁶Balạewe Mawu Yesus měnsang — su weọ e sude su kampong, su soane arau su wawurasenge — sene i sire mang duměnta maměllọu masasakịe su tal᷊uahe. Mase i sire měmpẹ̌dorong tadeạu masasakịe rembeng ipakawala měmpanenggehẹ̌ kakingkaenge manịeng tumbạu humbune. Kěbị apan němpanenggehẹ̌ e, něngkapia.