Read Sangir MARKUS 7 Bible Online

MARKUS 7 - Sangir bible

MARKUS 7

¹Tau Farisi sěngkamonaěng dingangu pirang katau mananěntirong agama wọu Yerusalem nahunděnta su anun Mawu Yesus.

²I sire nakasilo manga muritʼu Mawu Yesus pirang katau mạhungkaěngu l᷊iman sire kotorẹ̌ tuhụ agama, mangal᷊ene tawe němpanguhasẹ̌ lima kal᷊imona tuhụ atorʼu agama.

³Tau Farisi, kerene lai patikụ apan tau Yahudi e masatia kahěngang mahuntol᷊e tundung i upung gaghurang i sire. I sire tawe mahungkaěng kereu tawe nanguhasẹ̌ liman sire tuhụ tundu seng nihundugẹ̌ e.

⁴Apan niwělliang su pasarẹ̌ e reng tawe kanengang, těntal᷊ang deng tawe nilẹ̌uhasẹ̌ kal᷊imona.[14] Dingangu lawọ l᷊ai atorẹ̌ bal᷊ine wọu i upung i sire kụ lẹ̌umpaedang i sire matoghasẹ̌; kere manguhasẹ̌ galasẹ̌, bekerẹ̌ dingangu apal᷊iwụ bọu witụ.[15]

⁵Batụu ene manga tau Farisi ringangu manga mananěntirong agama e, němpẹ̌kiwal᷊o su Mawu Yesus, ”Kai unụe manga muritʼU e kawe kụkaěngu lima tawe nilẹ̌uhasẹ̌? Kai unụe i sire tawe tumatol᷊e tundu manga i upung gaghurang i kitẹ e?”

⁶ Mawu Yesus simimbang, ”I kamene mamben taumata mělle! Mangkewen nihino apang nitẹ̌bal᷊ʼi Yesaya mạanung kamene, ’U kai kere ini angkuěng u Mawu Ruata, i sire ene kětạeng mạngadatẹ̌ si Siạ su mohong, arawe naung i sire e kai marau wọu Iạ e.

⁷Tawẹ kěhase i sire měmpaněmba Siạ, batụu kai tiahan taumata itẹ̌těntiron sire, tabidạu kai tita-Ku!’

⁸Manga titan Duata e tawe sasěmpikang i kamene, arawe tundung taumata e lẹ̌umpaerangbeng kamene masěga-sěgadẹ̌.”

⁹Mase Mawu Yesus saụe wue něhengetang, ”I kamene e pande kahěngang mẹ̌sunial᷊ʼu titaʼm Mawu Ruata e, tadeạu makapẹ̌tahutěndạu těntirong kamene hala.

¹⁰ I Musa e seng nangonggọu tita kerei, ’Pangadatẹ̌ si amangu ringangu si ninangu,’ dingangu ’I sai mamul᷊o si amange ringangu si ninange, hinong ihukung pateěng.’

¹¹Arawe i kamene kawe mẹ̌nẹ̌něntiro: Kereu piạ u měmul᷊o gaghurange, ’Apang kụ hinong takụ ionggọ si amangku ringangu si ninangku, seng bọu takụ nịsasěmba su Ruata,’

¹²tangu i kamene kai něliwirẹ̌ taumata ene wọu tatangkianenge mẹ̌tul᷊ung i amange ringangu i ninange.

¹³Tangu ual᷊ingu těntirong kamene kụ nionggọ i kamene su taumata e, i kamene měnděmmẹ u hengetangu Mawu Ruata. Bědal᷊aing mal᷊awọ kakakoạ kere ini kụ kẹ̌koateng i kamene.”

¹⁴Mase Mawu Yesus kimui taumata lawọ e sěnsul᷊e kạpia kụ něhengetang si sire, ”Pěmpẹ̌daringihẹ̌ko tadeạu makaěnna!

¹⁵Tawẹ manga apa kụ bọu l᷊ikude masuẹ̌ su ral᷊ungu taumata kụ makal᷊amuhụ si sie. U kawe apan sụsěbang bọu sěngkatau ene nakal᷊amuhụ si sie. [

¹⁶Tangu kereu piạ tul᷊i, pěmpẹ̌daringihẹ̌.]”

¹⁷Ene sarạeng Mawu Yesus naněntangken taumata l᷊awọ e kụ dimangeng su wal᷊e, manga muritʼE nakiwal᷊o si Sie měnsang kaia timonan papinintu ene.

¹⁸Tangu Mawu Yesus něhengetang si sire, ”Kai ta nakaěnna i kamene? Arau kai tawe makaěnna i kamene u apan masuẹ̌ su ral᷊ungu pẹ̌sěngkatau e tawe makal᷊amuhụ si sie?

¹⁹U apạewen masuẹ̌ e tawe sumahe ral᷊ungu naung, kaiso kawe lụl᷊iu tiang, kụ susamurine sụsěbang kapia.” Bọu manga wawera ene Mawu Yesus mělẹ̌lahẹ u kěbị kaěng e mapia.

²⁰Mase Mawu Yesus saụ lai něhengetang, ”Apan sumẹ̌bang bọu pẹ̌sěngkataue kai ene makạl᷊amuhụ si sie.

²¹Batụu wọu ral᷊unge, mangal᷊ene wọu ral᷊ungu naung, pěbẹ̌buakengu tiněnna raral᷊akị kụ makạbodaị taumata měkẹ̌koạ lamuhụ, mẹ̌tako, měmate,

²²mạbuang, měngakal᷊ẹ̌, mělẹ̌hinakang dingangu měkẹ̌koạ haghing kakanoạ dal᷊akị, mauagẹ̌, tạ adate, mẹ̌nanoi, maobotẹ̌, dingangu mawěhạ pěněntiroěnge.

²³Kěbị apan daral᷊akị ene sụsěpụ bọu ral᷊unge, kụ kai ene e makạl᷊amuhụ taumata e.”

²⁴Bọu e Mawu Yesus naněntang u tampạ ene, kụ nakoạ sol᷊ong beọ e maraning soan Tirus. I Sie simuẹ̌ su ral᷊ungu wal᷊e sěmbaụ, kụ tawe mapulu piạu makakasingkạu i Sie kawe ene sene. Kai i Sie tawe nakawuning batangenge.

²⁵Sěngkatau inang, kụ piạ anạe wawine kụ niwal᷊iuang u rohkẹ̌ dal᷊aị, nakaringihẹ̌ piạ Mawu Yesus. I Sie riměnta sol᷊ong anum Mawu Yesus kụ nẹ̌suba su těngonʼE,

²⁶apidʼu nẹ̌kal᷊iomaneng tadeạu Mawu Yesus e měnokol᷊u rohkẹ̌ dal᷊aị bọu rariọ ene. Tau wawine ene wal᷊inewe tau Yahudi, nihanạ su wanuan Fenisia su Siria.

²⁷Mawu Yesus něhengetang si sie, ”Manga rariọ e hinong gělirang u kaěnge kal᷊imona. Kawe ral᷊akị mangal᷊ạ kaěng u manga rariọ e kụ iteledẹ̌ su asu.”

²⁸”Tuang,” angkuěngu wawine ene, ”manga asu su al᷊ungu meda e mal᷊aing kụkaěng manga popahẹ̌ kụ ilẹ̌ondol᷊ʼu manga rariọ e!”

²⁹Mase Mawu Yesus e něhengetang si sie, ”Ual᷊ingu sasimbahu ene, ute kapul᷊ẹ e; rohkẹ̌ dal᷊akịe seng simẹ̌bang bọu anạu e!”

³⁰Inang ene e napul᷊ẹ. Su wal᷊e, i sie nakahombangke anạ e rụdal᷊oka su raral᷊okaěng, kụ rohkẹ̌ dal᷊akịe mambeng kahěngang seng siměbang bọu rariọ e.

³¹Bọu e Mawu Yesus naněntangken Soan Tirus kụ nanẹ̌paseng daral᷊enge lumiun Sidon sol᷊ong Danong Galilea. I Sie niral᷊engu weọ e limiu Soa Mapul᷊o.

³²Sene tangu taumata e nangěntudʼu sěngkatau mou kutẹu lai wengelẹ̌ su anunʼE. I sire mẹ̌dorong su Mawu Yesus apạněllidʼu limane su tau ene.

³³Mawu Yesus nẹ̌bawạe tau ene niapakatěntani wọu taumata l᷊awọ, mase naněllidʼu tal᷊imědone su tul᷊in tau ene ruambẹ̌ka e. Mase Mawu Yesus nangědu ringangu nanenggehẹ̌ lilang tau ene.

³⁴Tuhụ e Mawu Yesus e rimal᷊ingara sol᷊ong langị, kụ simindạ maral᷊ung dingangu něhengetang su tau ene, ”Efata,” mangal᷊ene, ”Kawuka e!”

³⁵Tul᷊in tau ene nawukạ e, ringangu lilane limontọe saụ, kụ i sie nanětạ e nakawera mapia.

³⁶Mase Mawu Yesus nẹ̌seding i sire kěbị měmpẹ̌běken hal᷊ẹ̌ ene si sai-sai. Kai mangkeng isẹ̌dingu Mawu Yesus, i sire lai mangkeng měbẹ̌běkeng ene.

³⁷Kụ kěbị taumata apan nakaringihẹ̌ e, rimal᷊inaụ tawẹ sihinge. I sire němpẹ̌bera, ”Kěbị e seng nikoạʼE ringangu maudupẹ̌! O i Sie wẹ̌dang lai napakateleng u tul᷊in tau wengelẹ̌ dingangu taumata mou e nakawera!”