Read Sangir MARKUS 8 Bible Online

MARKUS 8 - Sangir bible

MARKUS 8

¹Tawe nararěnnạ wọu ene, piạ l᷊ai ghapaěngu taumata l᷊awọ diměnta nẹ̌komol᷊ẹ̌. Ual᷊ingu i sire tawẹu kanengang, ute Mawu Yesus měngkatewe kimui manga muritʼE kụ něhengetang,

²”Iạ e timal᷊ěntụ u taumata l᷊awọ tamai ini e. Seng těllu ěllo karěngụe i sire ringang-Ku, kụ orasẹ̌ ini i sire tawẹu kanengang.

³Kamageng Iạ měndolohʼi sire iapakapul᷊ẹ lunusẹ̌ e ute i sire sarung měnsu su tal᷊oaran dal᷊eng. Kutẹu sěnggạ kawe piạ u nahunděnta wọu mararau.”

⁴Manga muritʼE simimbang, ”Su tampạ kụ naghea ini e, kai suapạ e kapědeakeng kaěng mapakal᷊aedʼu taumata l᷊awọ ini e?”

⁵”Kal᷊awọe borotẹ̌ si kamene?” ungkuěng u Mawu Yesus. ”Pitumbaụ,” angkuěng i sire.

⁶Tangu Mawu Yesus nangorọe taumata sěnggapaěnge niapakaiang su ěntana, mase i Sie nangal᷊ạ borotẹ̌ pitum baụ e kụ nakitarimakasẹ su Ruata. Bọu e i Sie něngangangompengke borotẹ̌ ene ringangu l᷊imanʼE, mase nitẹ̌gone su manga muritʼE tadeạu ipẹ̌papahiạ su taumata l᷊awọ. Tangu manga muritʼE němpẹ̌koạ ene.

⁷Ene si sire piạko l᷊ai kinạ daridị manga pirambua. Mawu Yesus nakitarimakasẹ su Mawu Ruata waugʼu manga kinạ ene, bọu e rimolohʼu manga muritʼE pinẹ̌papahiạ u kinạ ene lai.

⁸I sire nahungkaěngke sarang něngkal᷊aedẹ̌ — kụ piạu manga ěpạ u hiwu su kataune apan nahungkaěng. Bọu ene manga muritʼu Mawu Yesus e němpangomol᷊en lěmbeng kaěng — kụ pitung kěmbuahẹ̌ nasěgadẹ̌. Mase Mawu Yesus dimolohʼi sire ene nipakapul᷊ẹ,

¹⁰kụ i Sie ringangu manga muritʼE apidʼu němpẹ̌sake sakaeng kụ něngkakoạ sol᷊ong banuan Dalmanuta.

¹¹ Piạ e tau Farisi pirang katau nahunděnta su anun Mawu Yesus kụ nanětạe nẹ̌darendehẹ̌ dingangʼE tadeạu měmpanompol᷊ẹ̌ e. I sire mědẹ̌dorong Mawu Yesus pěkẹ̌koạ karal᷊inaụ kere karal᷊ahẹu i Sie kai wọu anun Duata.

¹² Mawu Yesus nẹ̌kurate, bọu e simimbang, ”Kawe unụe taumatang ěllo ini e mědẹ̌dorong si Siạ pěkẹ̌koạ karal᷊inaụ? Tala! Iạ e tawe měgěllịu karal᷊inaụ kerene si sire!”

¹³Mase Mawu Yesus naněntang i sire, kụ simake su sakaeng; kụ bọu ene rimakị sol᷊ong sěmběkan dano e.

¹⁴Manga muritʼu Mawu Yesus e nạung niwul᷊e němpẹ̌bawa borotẹ̌ pinakatimu. Si sire nạung kětạewen piạ borotẹ̌ sěmbaụ su sakaeng.

¹⁵ ”Pěmpẹ̌teghang bue su lahaesʼu tau Farisi ringangu lahaesʼi Herodes,” ungkuěng u Mawu Yesus si sire.

¹⁶Tangu manga muritʼu Mawu Yesus e nanětạe němpahumbisarang hal᷊ẹ̌ ene. I sire němpẹ̌bera, ”I Sie nẹ̌bera kerene watụ u si kitẹ e kawe tawẹ apa borotẹ̌.”

¹⁷Mawu Yesus e masingkạu apa ipẹ̌pahumbisaran sire. Batụu ene i Sie nakiwal᷊o si sire, ”Kawe unụe ipạhumbisarawen kamene hal᷊ẹ̌ u si kamene tawẹ apa borotẹ̌ e? I kamene kai wěga, arau kai relaing ta nakaěnna? Kai apạe kal᷊umu tiněnnang kamene e?

¹⁸ I kamene piạbe mata, kawe unụe tanakasilo? I kamene piạbe tul᷊i, kawe unụe ta nakaringihẹ̌? Kai ta nakatahěndung i kamene,

¹⁹borotẹ̌ limambaụ Takụ nipẹ̌kakakompeng baugʼu l᷊ima hiwu su kataune? Pirang luwe kal᷊awọe lěmbeng kaěng nịkakomol᷊ʼi kamene?” ”Mapul᷊o dua,” angkuěng i sire.

²⁰”Kutẹu piạ e Iạ něngangempang borotẹ̌ pitumbaụ baugʼu ěpạ u hiwu su kataune,” saụewe kapia Mawu Yesus nakiwal᷊o, ”pirang luwe kal᷊awọe lěmbeng kaěng nịkakomol᷊ʼi kamene?” ”Pitu,” sasimbahʼi sire.

²¹”Kutẹu, měngkai wẹ̌dang ta nakaěnna i kamene?” angkuěngkewen Mawu Yesus e.

²²Tangu i sire narěntạe su Betsaida. Sene kai piạ taumata nangěntudʼu sěngkatau wuta su anum Mawu Yesus, kụ mědẹ̌dorong tadeạu i Sie apạnenggehẹ̌ tau wuta e apakạpia.

²³Tangu Mawu Yesus něngumpaedẹ̌ liman tau wuta e kụ nitatanʼE niapasěbang bọu soa ene. Bọu e Mawu Yesus něngědu matan tau ene ringangu naněllidʼu limanʼE su matan tau ene, kụ nakiwal᷊o si sie, ”Piạ e nikasilonu orasẹ̌ ini e?”

²⁴Tau ene němandạ e sol᷊ong těngone, kụ nẹ̌bera u, ”Ore. Iạ e nakasilo taumata mědẹ̌daral᷊eng; kaiso i sire kakěllaěng kai kere kalu.”

²⁵Mawu Yesus saụewe naněllidu l᷊imanʼE su matan tau ene. Sěnsul᷊e ini tau ene tụtaedẹ̌ sěngapam botonge. Matane nul᷊e, kụ i sie nakasilọ e kěbị dingangu mal᷊ahẹ-l᷊ahẹ.

²⁶Mase Mawu Yesus nehengetang si sie, ”Kapul᷊ẹ e, kụ abe pẹ̌sul᷊e sol᷊ong soa ene.”

²⁷Mawu Yesus dingangu manga muritʼE nahundal᷊eng sol᷊ong manga kampong mạngělikụ Kaisarea Filipi. Su tal᷊oaran dal᷊eng Mawu Yesus nakiwal᷊ọe si sire, ”Angkuěngu taumata, kai i sai Iạ ini e?”

²⁸ I sire simimbang, ”Piạ u němpẹ̌berau i Yohanes Měnanahani; piạ u lai němpẹ̌berau, i Elia, ringangu wal᷊ine ete wue němpẹ̌berau; kai sěngkatau wọu manga nabi.”

²⁹ ”Arawe tumuhụ si kamene hala e, kai i sai Iạ ini e?” ungkuěngu Mawu Yesus. I Petrus simimbang, ”I Tuang e kai Ratu Mananal᷊amatẹ̌!”

³⁰Bọu e Mawu Yesus nẹ̌sěding masěga-sěgadẹ̌ si sire, tadeạu kumbahangbe piạu měhabarẹ̌ si sai-sai mạanun batangengʼE.

³¹Bọu ene, Mawu Yesus nanětạe naněntiro manga muritʼE u Ahusʼu Taumata e harusẹ̌ mẹ̌tatahangu sunsara haghi, ringangu sarung dokatengu manga těmbonange, manga imang těmbonange ringangu manga mananěntiro agama. I Sie sarung pateěng, kai su katěllu ěllone i Sie sarung ipẹ̌bangung kapia.

³²Dingangu mal᷊ahẹ-l᷊ahẹ Mawu Yesus něhabarʼu hal᷊ẹ̌ ene su manga muritʼE. Tangu i Petrus němol᷊engke Mawu Yesus sarang sěndihange apidʼu namokạ si Sie.

³³Kai Mawu Yesus e nẹ̌bihu kụ němanda manga muritʼE, mase nẹ̌bera maihạ si Petrus, ”Pěmehọe wọu ini, setang! Tiněnnanu e kai tiněnnan taumata; wal᷊inewe tiněnnan Duata!”

³⁴ Bọu ene Mawu Yesus nẹ̌kuị e taumata lawọ apang ene sene ringangu manga muritʼE. Mase i Sie něhengetang si sire, ”I sai mapulu tumol᷊e Siạ harusẹ̌ mẹ̌timbul᷊eng kapulun batangenge, bọu e pamasaěng kuruisẹ̌ kụ tol᷊e si Siạ sěntiniạ.

³⁵ U i sai mẹ̌tahutěndạu pẹ̌bawiahe, sarung kailangengu pẹ̌bawiahe. Arawe i sai kụ manarakangu pẹ̌bawiahe waugu Iạ dingangu waugu Injilʼu Ruata, sarung mapakasal᷊amatʼu watangenge.

³⁶Apa wue gunane su taumata e, kereu kạguwạu dunia e makoạ tataghuanenge, a kutẹu i sie kawe kailangengu pẹ̌bawiahe?

³⁷Makoạ bue ngae pẹ̌bawiahẹ̌ e ipěnal᷊iu apa-apa?

³⁸Kereu pẹ̌sěngkataue mamea mangakung Iạ dingangu těntiroku su tempon duruhaka ringangu kararalakisẹ̌ ini e, ute Ahusʼu Taumata e mal᷊aing mamea mangakun taumata ene, su tempong i Sie ruměnta sarung dingangu kawasang AmangʼE, tẹ̌takinangu manga malạekatẹ̌ masasusi e.”