Read Sangir MARKUS 9 Bible Online

MARKUS 9 - Sangir bible

MARKUS 9

¹”Kasingkạko!” angkuěngu Mawu Yesus. ”Bọu tal᷊oarang kamene sini e piạ u tawe mate, těntal᷊ang deng ta nakạsilo Mawu Ruata nẹ̌parenta ringangu kawasa!”

² Ěnnungu ěllo samuring ene Mawu Yesus němaringangi Petrus dingangi Yakobus dẹ̌duang Yohanes tuarine, nẹ̌těngkatěntani sol᷊ong bul᷊ude sěmbaụ marangẹ. Kutẹu su pandaěng i sire Mawu Yesus e kai nẹ̌bal᷊ui ghahịe.

³Pakeange nẹ̌těngkawira kụkerong. Tawẹu sarang sěngkatau tahaunsạu dunia ini e kụ makawurẹ̌si kerene kawirane.

⁴Bọu e i sire těllu manga muritʼE nakasilo Mawu Yesus mạhumbisara ringangi Elia rẹ̌duan Musa.

⁵Tangu i Petrus měngkatewe nẹ̌bera su Mawu Yesus, ”Tuang Guru, kai apạe kapia su tampạ ini. Mapiawe i kami měndarisị selo tatěllu: sěmbaụ baugʼi Tuang, sěmbaụ baugʼi Musa, dingangu sěmbaụ lai e waugʼi Elia.”

⁶Tuhụ hinone i Petrus e wẹ̌ga wue měnsang apa ipẹ̌berane, batụu i sie ringangu ringange rarua e kai su katatakutang tạ sihinge.

⁷ Bọu e piạ binawa něhěmbung si sire kụ bọu ral᷊ungu winawa ene kinaringihe tingihẹ̌ měbẹ̌berau, ”Ini e kai Ahusẹ̌-Ku ikẹ̌kěndagẹ̌. Pěmpẹ̌daringihẹ̌ si Sie!”

⁸Masahawụ-sahawụ i sire měkẹ̌kakělla su kaihi arau koaneng i sire, kai mang tawẹu sarang sěngkatau kinasilo ringangi sire sene, sul᷊iun Mawu Yesus sẹ̌sane.

⁹Tangu piạ e i sire mạhunděsung bọu wul᷊udẹ̌, i Sie měgẹ̌gěllịu ingate si sire u, ”Abe pěmpẹ̌běke su sarang sěngkatau apang kinasilong kamene těntal᷊ang Ahusʼu Taumata e reng tawe nipẹ̌bangung bọu papatene.”

¹⁰I sire mang mẹ̌tẹ̌tahěndung tatanata ene, kai su tal᷊oaran sire hala e, nanětạ e měkẹ̌kakereapa měnsang apa timonaʼm Mawu Yesus su ”mapẹ̌bangung kapia wọu papate”.

¹¹ Tangu i sire nakiwal᷊o si Sie, ”Kawe unụe manga mananěntirong agama e měmpẹ̌bẹ̌bera u, i Elia e harusẹ̌ duměnta kal᷊imona?”

¹²Mawu Yesus simimbang, ”I Elia e mambeng harusẹ̌ duměnta kal᷊amona e tadeạu mapěnạdiang kal᷊awọu kěbị e. Kai kereapa wue ngae Ahusʼu Taumata? Kawe unụe su Winohẹ Susi e mạbawohẹ u i Sie sarung mẹ̌tatahangu sunsara l᷊awọ dingangu hinakanengu taumata e?

¹³Arawe Iạ maul᷊ị si kamene: i Elia e seng diměnta, kụ i sire němpẹ̌koạ si sie tuhụewe kapulun sire. Ene nẹ̌tatahino ringangu mạbawohẹ su Winohẹ Susi mạanun batangenge.”

¹⁴Piạ e Mawu Yesus dingangi sire těllu muritʼE narěnta kạpia sutal᷊oaran manga muritẹ̌ bal᷊inẹ e, i sire nakasilo taumata l᷊awọ sene. Mananěntirong agama pirang katau měmpẹ̌dẹ̌darendehẹ̌ dingangu manga muritʼu Mawu Yesus e.

¹⁵Lěpasewe taumata l᷊awọ e nakasilo Mawu Yesus, i sire měngkatewe rimal᷊inaụ, mase nahuntal᷊ang němpaněnsomahẹ̌ si Sie.

¹⁶”Kai apạe ipědẹ̌darendehʼi kamene ringangu manga mananěntirong agama e?” angkuěngu Mawu Yesus su manga muritʼE.

¹⁷Sěngkatau wọu tal᷊oaran taumata l᷊awọ e simimbang, ”Tuang Guru, iạ kai mạngěntudʼu anạku si Tuang. I sie kai němou ual᷊ingu niwal᷊iuangu rohkẹ̌ dal᷊akisẹ̌.

¹⁸Kamagengu i sie sampokang u rohkẹ̌ ene ute wadange ipětẹ̌těngkawěbahẹ̌ su ěntana, mohonge mẹ̌nẹ̌něbu, isine mẹ̌kẹ̌karerong, dingangu kạguwạu wadange mạtětogẹ̌. Iạ mẹ̌dorong su manga muritʼi Tuang pěněnokol᷊u rohkẹ̌ dal᷊akị ene, kai i sire mang tawe nakapẹ̌koa ene.”

¹⁹Tangu Mawu Yesus něhengetang si sire, ”Balinewe mal᷊ongkọ i kamene ini e! I kamene e mambeng kahěngang-hěngang taumata ta měmpěngangimang. Delaing kạděngụe Iạ mẹ̌tanạ dingangi kamene dingangu mẹ̌kakědang ual᷊ingu i kamene? Bawạe rariọ ene ramahi!”

²⁰I sire němpangěntuden dariọ e su anum Mawu Yesus. Lẹ̌pasewe rohkẹ̌ dal᷊akịe nakasilọe Mawu Yesus, i sie napakatẹ̌togʼu wadangu rariọ e, hakịu rariọ e nawatang kụ nẹ̌paral᷊unggi su ěntana. Mohonge piạ sẹ̌bune.

²¹Mase Mawu Yesus nakiwal᷊o si amangu rariọ e, ”Seng kạděngụe i sie kere ini?” ”Dongkeng i sie wẹ̌dang kadodọ!” angkuěng i amange.

²²”Seng masau rohkẹ̌ dal᷊akịe mẹ̌deạu měmate si sie, mangondol᷊ʼi sie sarang dal᷊ungu putung arau sarang dal᷊ungu akẹ. Kai kereu i Tuang e wotonge makatul᷊ung, ute karimạko i Tuang e sadia tumal᷊ěntụ i kami ringangu mẹ̌tul᷊ung i kami e!”

²³”Apa ungkuěngu? Kereu i Tuang botonge?” angkuěngu Mawu Yesus, ”Patikụe wotonge, asal᷊eweng taumata e mangimang!”

²⁴I Amangu rariọ e apidu nẹ̌kiạ, ”Mawu, iạ e mạngimang, kaiso pangangimangkue kai lome. Tul᷊ungko iạ e tadeạu pangangimangku e mahuntinamba!”

²⁵Ene Mawu Yesus nakasilou taumata lawọ e nanětạe riměnta němpẹ̌dahěmbung, ute i Sie něnokol᷊u rohkẹ̌ dal᷊akị ene nipẹ̌beraěng u, ”Rohkẹ̌ bengelẹ̌ dingangu mou, Iạ e mẹ̌parenta si kau, sẹ̌bangke wọu rariọ ini kụ kumbahang-bahang sumuẹ̌ kapia su ral᷊unge!”

²⁶Tangu rohkẹ̌ dal᷊akị e měngkatewe nẹ̌pal᷊ehe mase nipẹ̌kahimběsọ u wadangu rariọ e, bọu e simẹ̌bang bọu rariọ ene. Dariọ e pandaěng seng mẹ̌sul᷊ungu kasuang hakịu kal᷊awokange taumata e němpẹ̌berau, ”I sie seng nate!”

²⁷Kai Mawu Yesus měngkatewe něngumpaedẹ̌ l᷊imane kụ nẹ̌tul᷊ungi sie němangung. Kụ anạe lai nẹ̌bangung.

²⁸Ene, sarạeng Mawu Yesus seng su wal᷊e, manga muritʼE němpẹ̌haungke těntani su anunʼE kụ nakiwal᷊o, ”Kawe unụe i kami ta nakatokol᷊ẹ̌ rohkẹ̌ dal᷊akị ene?”

²⁹Mawu Yesus simimbang, ”Rohkẹ̌ dal᷊akị kerene tawe ikatokol᷊ẹ̌ baebe koateng kereapa tabeạu katewe ringangu kal᷊iomaneng.”

³⁰Mawu Yesus dingangu manga muritʼE naněntangu tampạ ene kụ nanẹ̌pasʼu raral᷊eng limiu wanuang Galilea. Mawu Yesus mạdiri kasingkateng u taumata měnsang kai suapa i Sie e,

³¹u i Sie kai kạpaněntirone manga muritʼE. ”Ahusʼu Taumata e sarung isarakang su kawasan taumata,” kerene angkuěngu Mawu Yesus, ”kụ i Sie sarung pateěng, kai su katěllu ěllone i Sie sarung mẹ̌bangung!”

³²Manga muritʼE tawe nakaěnna apa itẹ̌těntirom Mawu Yesus, kai i sire matakụ makiwal᷊o si Sie.

³³Ene i sire narěntạe su Kapernaum. Kutẹu sarangke seng su wal᷊e, Mawu Yesus nakiwal᷊ọ e su manga muritʼE, ”I kamene nạung kai měmpạhumbisarang apạe su raral᷊engang kanini?”

³⁴ I sire tawe němpẹ̌simbang, batụu kạpahundal᷊enge i sire kai mědẹ̌darendehʼu měnsang i sai kasěllahenge.

³⁵ Mawu Yesus naiang, kụ bọu e nẹ̌kui si sire mapul᷊o dua muritʼE. I Sie něhengetang si sire, ”I sai kụ mapulu makoạ kahumotongange, i sie harusẹ̌ makoạ kasamuriange kụ harusẹ̌ makoạ mẹ̌tatangkuang patikụ taumata.”

³⁶Bọu e Mawu Yesus něngal᷊ạ dariọ kadodọ sěngkatau, kụ nipararisị su těngon sire kěbị. Mawu Yesus limahěkụ dariọ ene kụ něhengetang su manga muritʼE,

³⁷ ”I sai měnarimạ u sěngkatau rariọ kere ini ual᷊ingu Iạ e, ute něnarimạ u Iạ. Kụ i sain něnarimạu Iạ, i sie wal᷊inewe tumbạu něnarimạu Iạ e, kaiso mal᷊aing něnarimạ i Sie kụ dimolohʼu Iạ e.”

³⁸Mase i Yohanes nẹ̌bera su Mawu Yesus, ”Tuang Guru, i kami nakasilo piạ tau mělẹ̌liwuahẹ̌ setang su areng i Tuang. Kụ i kami nẹ̌sěding i sie, batụu i sie wal᷊inewe wọʼi kitẹ.”

³⁹Kai Mawu Yesus e kawe něhengetang, ”Abe pẹ̌sěding i sie, u kai tawẹu sarang sěngkatau mẹ̌koạ karal᷊inaụ su ral᷊ungu arengku, kụ apidʼu měngkai měndal᷊akịu Iạ e.

⁴⁰ U i sai tawe rumokạ si kitẹ e ute kai mělẹ̌lahẹu su sěmběkang kitẹ.

⁴¹ Pẹ̌tahěndungke! I sai mạpanginung i kamene ual᷊ingu i kamene kawe tumatol᷊e Ratu Mananal᷊amatẹ̌, ute i sie mambeng těngadẹ̌ manarimạu wawal᷊ise.”

⁴²”I sai makawodaị sěngkatau wọu i sire rarodọ tamai ini e kụ tawe mangimang si Siạ, ěndokangbe watuangengu watung pěmaměhaseng kụ ikị su lehẹ e, kụ i sie iwahung su l᷊audẹ̌.

⁴³ Kereu limanue kai makarosa si kau, pentehe limanu ene! Mapiaěngbe i kau mẹ̌biahẹ̌ dingangu Mawu limanu sěmbẹ̌ka sul᷊ungu piạ limanu ruambẹ̌ka kụ masuẹ̌ su naraka, mangal᷊ene putung kakalẹ̌. [

⁴⁴Sene putunge tawe masasẹ̌bu, ringangu ul᷊idẹ̌ e tawe l᷊umaate.]

⁴⁵Dingangu kereu laedʼu e kai makarosa si kau, pentehe laedʼu ene. Mạpiaěngbe i kau mẹ̌biahẹ̌ dingangu Mawu Ruata e tạ laedʼu sěmběka, sul᷊ungu piạ laedʼu ruamběka kụ i kau iwahung su naraka. [

⁴⁶Paị sene putunge tawe masasẹ̌bu ringangu ul᷊idẹ̌ e tawe l᷊umaate.]

⁴⁷ Kereu matanue kai makarosa si kau, loẹ e mata ene! Mapiaěngbe i kau sumuẹ̌ Dunia Wuhun Duata tạ mata sěmbẹ̌ka, sul᷊ungu piạ matanu ruamběka kụ i kau iwahung su naraka.

⁴⁸ Paị sene putung ta masasẹ̌bu ringangu ul᷊idẹ̌ e tawe l᷊umaate.

⁴⁹Sěngkatau-sěngkataue sarung sahikangu putung, kerẹewe sasěmba sẹ̌sahikangu asing.

⁵⁰ Asinge apạewe mapia, kai kereu kawe malele, botonge saụ asingang ngae? Tangu karimạko i kamene makoạ kere asing. Pěmpẹ̌biahe sěngkapẹ̌biahẹ̌ su ral᷊ungu pẹ̌darame.”