Read Sangir LUKAS 10 Bible Online

LUKAS 10 - Sangir bible

LUKAS 10

¹Bọu ene Mawu e nanẹ̌bọ lai pitum pul᷊o[14] muritʼE wal᷊ine, mase něndolohʼi sire tahạ duang katau niapangal᷊amona si Sie su apan soa ringangu tampạ sarung karěntaěngʼE.

² ”Buane kụ sarung i pěnsạ e mal᷊awọ,” angkuěngʼE si sire, ”arawe mamaměnsạe kětạeng mahal᷊i. Batụu ene pěmpẹ̌dorongke su Taghuange tadeạu i Sie měndolohʼu mělahal᷊ẹ̌ e mẹ̌deạu manipo wuane.

³ Ho! dakọe pěmpahundal᷊engke! kụ ene ěng! Iạ měndolohʼi kamene tabidạu rumba sutal᷊oaran dal᷊ugẹ̌.

⁴ Abe pěmpẹ̌bawa kawihu roitẹ̌, arau ponde arau sapatu. Abe pěngẹ̌dung sutal᷊oaran dal᷊eng kụ měmpẹ̌tabeạ su sarang sěngkatau.

⁵Kamageng i kamene rumangeng su wal᷊e, pěmpẹ̌bera kal᷊imona, ’Karimạko piạ pẹ̌darame su wal᷊e ini.’

⁶Kụ kereu sene piạ taumata mapulung pẹ̌darame, ute tạbeạu pẹ̌daramenu e měngkai matanạ si sie. Kereu tala ute, saụewe wal᷊ị kapia tạbeạu pědaramenu ene.

⁷ Kụ kěngkatanạ su wal᷊e sěmbaụ ene. Pěmpanarimạ apang kụ nisiliwirẹ̌ sene si kau, batụu i sai měmẹ̌munara e hinone wue makahombang bawaehe. Abe pěmpangal᷊ing bọu wal᷊e sěmbaụ sol᷊ong bal᷊e wal᷊ine.

⁸Kereu i kamene ruměnta su soa sěmbaụ kụ sene i kamene nitarimạ dingangu mapia ute, kaěngke apang nisadia sene si kamene.

⁹Apakaul᷊eko taumata apang masasakị su soa ene kụ pěmpẹ̌habarẹ̌ko su taumata sene, ’Mawu Ruata e seng masanggidu tempone mẹ̌parenta makoạ Datu su tal᷊oarang kamene.’

¹⁰ Arawe kamagengu i kamene ruměnta su soa sěmbaụ kụ sene tawe nitarimạ ute, pahunsẹ̌bang sol᷊ong dal᷊eng kụ pěmpẹ̌bera,

¹¹’Saral᷊aing awul᷊u soang kamene riměkạ su laedʼi kami e, tontongangbeng kami e makoạ tatiala si kamene. Kụ kěngkasingkạko u kai seng maranin tempone Mawu Kasěllahenge manětạ mẹ̌parenta makoạ Datu su tal᷊oarang kamene!’

¹² Pẹ̌tahěndungko, su Ěllong Kiamatẹ̌, tau Sodom sarungbe limembong kal᷊owokange ampungang u Mawu Ruata sul᷊ungu taumatan soa ene!”

¹³ ”Kaěngkěhang i kamene, Korazim! Dingangu kaěngkěhang i kamene Betsaida! Kereu manga apa makạl᷊aherang kụ seng nikakoạ su tal᷊oarang dua e seng nịkakoạ su soan Tirus dingangu Sidon ěngkudeng manga taumata pai sene seng marěngụ němpẹ̌tobatẹ̌ bọu kal᷊awọu rosan sire, kụ němpěluheng pakeangu lutu ringangu němpěnawuhʼu awul᷊ẹ̌ su wowon těmbo i sire.

¹⁴Maěndokangbe tau Tirus dingangu Sidon ampungang u Mawu Ruata sul᷊ungu i kamene, su Ěllong Kiamatẹ̌.

¹⁵ Dingangu i kamene Kapernaum! I kamene mạngiral᷊ingu i kamene kai sarung masapuạ sol᷊ong sorga? Tala! I kamene sarung irěmmẹ sarang naraka!”

¹⁶ Mase Mawu Yesus něhengetang su manga muritʼE, ”I sain dụdaringihẹ̌ si kamene, rudaringihẹ̌ Siạ. I sai mạnuhudʼi kamene, kai manuhudu Iạ, kụ lai mạnuhudʼi Sie rimolohu Iạ e.”

¹⁷I sire pitum pul᷊o[15] muritẹ̌ e něngkawal᷊ịbe ringangu naungi sire maral᷊uasẹ̌ kahěngang. ”Mawu,” angkuěng i sire, ”kal᷊ingung manga rohkẹ̌ daral᷊akị e sụsasuměllung si kami kahiang pěmamarentang kami e si sire su areng u Mawu!”

¹⁸Mawu Yesus simimbang, ”Iạ e nakasilo setang ěnnaẹ nanawo wọu l᷊angị kere kilạ.

¹⁹ Kěngkasingkạko! I kamene seng Takụ nionggotangu kawasa tadeạu i kamene makatahịda těmpu ringangu i ninangu l᷊ipang dingangkewe mamẹ̌di kạguwạu wuntuangu rokạ, kụ mambeng ta makapẹ̌kapura si kamene.

²⁰Maning seng kerene, abe pahul᷊uasẹ̌ ual᷊ingu manga rohkẹ̌ daral᷊akị e sụsasuměllung si kamene. Ěndokang i kamene pěmpahul᷊uasu u areng i kamene mạbawohẹ su sorga.”

²¹Su orasẹ̌ ene lai i Yesus limuasu Rohkẹ̌ u Ruata e[16] nẹ̌karadiahang si Sie. I Yesus něhengetang, ”Amang, Mawu kawasang l᷊angị dingangu dunia! Iạ makịtarimakasẹ si Kau watụ u kěbị ini ipakạpěnisʼu taumata mapapande ringangu matatahuěnna, kaiso kareạu mang nilahẹ u su kal᷊awọu taumata reng ta nạsikol᷊a. Ene e makal᷊uasẹ̌ naung i Amang.

²² Patikụ sạbarang seng nisarakang i Amang si Siạ. Tawẹu sarang sěngkatau masingkạ u Ahusẹ̌ kětạewen i AmangʼE. Tawẹu l᷊ai masingkạ i Amang mantịewen Ahusẹ̌ e dingangu i saịewen i kapulung Ahusẹ̌ e pělahekangu i AmangʼE.”

²³Mase i Yesus nẹ̌bihu su manga muritʼE, bọu ene něhengetang si sire hala, ”Kariangkamang i kamene watụ u seng nakasilo apan nikasilong kamene orasẹ̌ ini.

²⁴Kai pẹ̌tahěndung bue: Lawọ nabi ringangu ratu mapulu makasilo apang kinasilong kamene orasẹ̌ ini, kaiso tawe ikasilon sire. I sire mapulu rumaringihẹ̌ apang kinaringihʼi kamene orasẹ̌ ini, kaiso tawe ikaringihʼi sire.”

²⁵ Bọu e piạ sěngkatau mananěntiro agama nẹ̌buạ měnangkạ si Yesus. I sie nakiwal᷊o, ”Tuang Guru, kai měkapurạe iạ e tadeạu makahombang pẹ̌bawiahẹ̌ patutune ringangu kakalẹ̌ e?”

²⁶I Yesus simimbang, ”Apa tangu mạbawohẹ su ral᷊ungu Winohẹ Susi? Kerea tiněnnanu su hal᷊ẹ̌ ene?”

²⁷ Tau ene simimbang, ”Kěndagẹ̌kon Mawu Ruatanu ringangu kạguwạu naungu, ringangu kạguwạu kuatʼu kụ dingangu kaguwạu laěnnanu kụ kěndagẹ̌kong kasanggidangu mẹ̌sul᷊ungu i kau kuměndagu watangengu.”

²⁸ ”Sasimbangu e nihino,” angkuěng i Yesus. ”Pẹ̌koạko kerene kụ i kau sarung mẹ̌biahẹ̌.”

²⁹Kai mananěntiro agama ene mapulu mẹ̌těngkahinom batangenge. I sie nakiwal᷊o, ”I sai wue kasanggidangku e?”

³⁰Yesus simimbang, ”Piạ sěngkatau esẹ diměsung bọu Yerusalem sol᷊ong Yerikho. Su tal᷊oaran dal᷊eng i sie nihombangengu taha pěngaho, nihampasẹ̌ kal᷊awọu rarotonge, nịbawawẹ̌bahẹ̌ sarang masarạ mate, mase niwala ral᷊imbatange su ral᷊eng dingangu lesẹ e ghẹ̌guwạ.

³¹Nẹ̌sarětạ u l᷊ai sěngkatau imang narěsungu ral᷊eng ene. Kutẹu i sie nakasilọe tau ene, i sie měngkatewe limihi pai wọu sěmběkane kụ měngkai rimal᷊eng.

³²Kerene lai ringangu sěngkatau hiten tau Lewi e rudẹ̌sung sene, suapạewen nikasilone tau ene, nihaungange kapẹ̌pẹ̌patehe si sie. Kaiso i sie nětěngkaghea sarang sěmběkan dal᷊eng, mase měngkate rimal᷊eng.

³³ Arawe wọu ene piạko l᷊ai sěngkatau wọu Samaria nasahe sural᷊eng ene. Sarạeng kinasilone tau ene, ute naunge měngkatewe nẹ̌kakal᷊ẹ̌kaden tatal᷊ěntụ.

³⁴Kụ měngkatewe tamai himaung tau e mase namurěsi manga lesẹ e niuhasu anggorẹ̌ kụ niundangengu lana, bọu e naměkisẹ̌ manga l᷊esẹ ene. Mase i sie něnduịu tau ene su wowong kalidene sẹ̌sane, kụ niẹ̌ntudẹ̌ su wal᷊e kawawunakeng dingangu nipạdul᷊iange.

³⁵Sěngkariọěllone i sie něngukahẹ̌ doitẹ̌ sal᷊aka ruang kal᷊ěpa kụ nitẹ̌gone su taghuangu wal᷊e e apidu nẹ̌bera, ’Padul᷊ie wue i sie kụ apạeweng manga wawaehẹ̌ bal᷊ine ute, sarung takụ baehang kereu iạ mawal᷊ị kapia sini.’ ”

³⁶Bọu e i Yesus něngěnsuẹeng běkene ringangu kakiwal᷊o ini, ”Bọu i sire těllu ene i saị e su ěnnanu nakoạ kere tau kasanggidange wọu tau nihampasẹ̌ e?”

³⁷Mananěntiro agama e nikiwal᷊ongu ene simimbang, ”Tau kụ seng timal᷊ěntụ u tau ene!” ”Ho, dakọe kụ pěkoạ e kerene lai!” angkuěng i Yesus.

³⁸ Bọu e i Yesus dingangu manga muritʼE nẹ̌saụewe rimal᷊eng kụ narěntạ e su kampong sěmbaụ. Sene piạ sěngkatau wawine arenge i Marta, nighausang i Sie sol᷊ong bal᷊ene.

³⁹I Marta piạ tuarine arenge i Maria. I Maria e kimaiangke maraning Mawu Yesus dụdaringihẹ̌ manga těntironʼE.

⁴⁰Arawe i Marta e měngkatewe matasibung hal᷊ẹ̌ u wal᷊e. I sie himaung si Yesus kụ nẹ̌bera, ”Mawu, apa Mawu ta mẹ̌sasěmpị si Maria naněntangu hal᷊ẹ̌ pinakihal᷊ẹ̌ si siạ sẹ̌saku? Dolohẹ̌ko i sie pẹ̌tul᷊ungu iạ!”

⁴¹”Marta, Marta!” angkuěngu Mawu. ”I kau měngkatewe ghụgěnggang dingangu tasibu mẹ̌tẹ̌tiněnnan hal᷊ẹ̌ lawọ;

⁴²sěmbal᷊iau hal᷊ẹ̌ kahumotongange mang sěmbaụ. Kụ i Maria seng namile apang kapiaěnge, kụ tawe sarung ikaal᷊ạ wọʼi sie.”