Read Sangir LUKAS 17 Bible Online

LUKAS 17 - Sangir bible

LUKAS 17

¹Mawu Yesus něhengetang su manga muritʼE, ”Manga haghin sạbarang makoạ katatanggaěngu taumata měmpẹ̌dosa těngadẹ̌ sarung luměto. Arawe kaěngkěhang i sai makakoạ katatanggaěng!

²Mạpiangbe kereu watung gilimang nịlaikị su l᷊ehẹ e, mase i sie niwontol᷊ẹ̌ su l᷊audẹ̌, sul᷊ungu i sie makakariadin sěngkatau wọu manga rariọ tamai měmpẹ̌dosa.

³ Ual᷊ingu ene pakapia wue! Kereu anạ u sěmbaụ u mẹ̌sal᷊a, ute pẹ̌berai. Kụ kereu i sie mẹ̌sasěsilẹ̌ ute, ampunge wue i sie.

⁴Kereu i sie nẹ̌sal᷊a si kau pitun sul᷊e sahěllo kụ apan su sul᷊ene ruměnta su anunu kụ mẹ̌bera u, ’Iạ mẹ̌dorong ampung,’ ute ampunge wue i sie.”

⁵Manga rasulẹ̌ němpẹ̌berạ e su Mawu Yesus, ”Mawu, toghaseko pangangimang i kami e.”

⁶Mawu simimbang, ”Kereu i kamene piạ pangangimang kere kaguwạu wakị u sasawi ute, i kamene makapẹ̌bera su kalu murbei ěndaị, ’Kaẹ̌bụko i kau kụ kasuangko su sasị,’ těngadẹ̌ kalu ene sarung tumuhụ si kamene.”

⁷”Kereu sěngkatau wọʼi kamene piạ ěllange mạmungkalang ěntana arau mělal᷊ukadẹ̌ domba. Kamageng ěllange masongo kụ i sie makawera wue ngae si sie, ’Mahịe lighạ e kaěng’?

⁸Mamben tala! Kasuenge i sie sarung mẹ̌bera si sie, ’Pěllọko kaěngku, Pěluhengkon pakeang burẹ̌si ringangu hapaiko iạ, těntal᷊ang deng kạkaěnge ringangu kạpěnginunge; bọu e i kau e wuhude kaěng.’

⁹Ěllang ene tawahal᷊uasʼu raloěng ual᷊ingu seng timuhụ parentang mawune wẹ̌gang?

¹⁰Kerene lai i kamene. Kereu i kamene seng němpẹ̌koạ kal᷊awọu apạewen ipakịkoạ si kamene e ute, pěmpẹ̌berạe u, ’I kami ěllangbe wiasa; i kami kětạeweng mẹ̌koạ apang hinong koateng i kami.’ ”

¹¹Suraral᷊engang sarang Yerusalem, i Yesus kai rimal᷊eng bọu wěllạ u Samaria ringangu Galilea.

¹²Piạ e simuẹ̌ su kampong sěmbaụ, i Sie nirěntaěngu mapul᷊ongkatau piạ sakịe su pisị, makạtatakụ.[22] I sire rụdarisị bọu maraune,

¹³kụ měmpẹ̌kẹ̌kui mal᷊aihạ, ”Mawu Yesus! Tal᷊ěntukong kami e!”

¹⁴ Sarang i Yesus nakasilo si sire, i Sie něhengetang, ”Dakọe pěmpẹ̌těngkatodẹ su manga imang, pẹ̌dorong si sire pamarikẹ̌sa wadang i kamene.” Kạpahundal᷊engete i sire něngkaul᷊ẹ e wọu sakị i sire.[23]

¹⁵Kutẹu sěngkatau wọi sire nakapěndangu i sie seng napia ute, měngkatewe nẹ̌sul᷊e kapẹ̌daloneng tingihẹ̌ maihạ su Mawu Ruata e.

¹⁶Mase su těngon Yesus, i sie nẹ̌těngkasumagẹ̌ kụ makịtarimakasẹ e i Sie. Tau ene tangu kai tau Samaria.

¹⁷Bọu e i Yesus něhengetang, ”Karạ kawe mapul᷊ongkatau arau napia? Kụ kawe suapa ho i sire siong katau l᷊ai?

¹⁸Unụe kětạen tau raghị ěndai e nẹ̌sul᷊e kapia nakitarimakasẹ su Mawu Ruata?”

¹⁹Mase i Yesus něhengetang su tau e, ”Pẹ̌buạ e kụ kapul᷊ẹ e. Ual᷊ingu i kau mangimang si Siạ ute i kau naul᷊e.”

²⁰Piạ tau Farisi pira-pirang katau nakiwal᷊o si Yesus měnsang angerẹ Mawu Ruata ruměnta mẹ̌parenta. I Yesus simimbang, ”Kararatuangu Mawu Ruata e tawe tẹ̌takengu tatiala ikẹ̌kasilon taumata,

²¹hakịu taumata makapẹ̌bera, ’Mahịe kakělla, ěndaị i sie!’ arau, ’Paị sene i sie!’ U Mawu Ruata seng manětạ mẹ̌parenta si kamene.”[24]

²²Bọu ene Mawu Yesus něhengetang su manga muritʼE, ”Sarung duměnta tempone i kamene mapulu reng makasilo ěllo sěmbaụ bọu patikụ ěllong Ahusʼu Taumata, kaiso i kamene mang ta makasilo.

²³Sarung piạ taumata mẹ̌bera si kamene, ’Kakělla, pai sene!’ arau, ’Kakělla, ěndaung sini!’ Kai kumbahang i kamene sumẹ̌bang mẹ̌deạ si sie.

²⁴Kerẹewe kakerongu kilạ su l᷊angị kụ mạtuahẹ̌ bọu pondol᷊e sarang pondol᷊e, kerene lai sarung kakakoạ u Ahusʼu Taumata e su ěllonʼE.

²⁵Kai kakal᷊imonaěnge i Sie mang deng harusẹ̌ masunsara kụ ikạdirin taumata orasẹ̌ ini.

²⁶ Su ěllong Ahusʼu Taumata sarung ilẹ̌lahẹ kakakoạ e mẹ̌sul᷊ungkewen nạung su tempong Noakẹ̌ kal᷊imona e.

²⁷ I sire nạung nahungkaěng dingangu němpanginung dingangu němpẹ̌kawing; kụ kerene měngkate sarang i Noakẹ̌ e simuẹ̌ su ral᷊ungu kapal᷊ẹ̌ kụ nirěntaěngken dalulung kụ nakawinasạ e kěbị taumata.

²⁸ Mẹ̌sul᷊ungkewelain su tempon Lotẹ̌. I sire mạhungkaěng měmpạnginung mẹ̌bẹ̌bawělli, mạhěnsinuang dingangu měmpẹ̌lẹ̌langing bal᷊e.

²⁹Arawe sarạeng i Lotẹ̌ simẹ̌bang bọu Sodom, su ěllo ene putung dingangu malelang ěnnaẹ nẹ̌boang bọu l᷊angị kụ nakawinasạ e si sire kěbị.

³⁰Mal᷊aing kerene sarung su ěllon pẹ̌těngkal᷊ahekangu Ahusʼu Taumata e.

³¹ Su ěllo ene i sai su wowong atụ u wal᷊ene, abe lintụ mangal᷊ạ manga apal᷊iwụ e su ral᷊ungu wal᷊e. Mal᷊aing kerene i sain su waelẹ̌, abe pẹ̌sul᷊e sarang bal᷊ene.

³² Pěmpẹ̌tahěndung apan seng nariadi su kawing i Lotẹ̌.

³³ I sai mẹ̌těngkasal᷊amatʼu pẹ̌bawiahe sarung kailangengu pẹ̌bawiahe. Arawe i saing kailangengu pẹ̌bawiahe sarung makauntung.

³⁴Pangimangke: Su hẹ̌bi ene, duang katau su pẹ̌tatikilang sěmbaụ, sěngkatau paringaneng dingangu sěngkatau itěntang.

³⁵Duang katau wawine kapẹ̌lutạ e gandung sěngkatau paringaneng, dingangu sěngkatau itěntang. [

³⁶Duang katau mạmunara su lantang sěngkatau paringaneng, kụ sěngkatau e wue itěntang.]”

³⁷Manga muritʼi Yesus němpẹ̌kiwal᷊ọe, ”Suapa wue ene sarung mariadi Mawu?” Yesus simimbang, ”Suapan piạ bangke ute, sene piạ manụ mananodọ bangke ene.”