Read Sangir LUKAS 18 Bible Online

LUKAS 18 - Sangir bible

LUKAS 18

¹Bọu ene i Yesus měbẹ̌běken sěmbaụ papinintu waugu ipaněntiro manga muritʼE tadeạu i sire hanesẹ̌ měmpẹ̌doa ringangu tawe ikawěsụ u ěnna.

²Mawu Yesus něhengetang, ”Su soa sěmbaụ kai piạ mělahukung kụ tamatatakụ u Mawu Ruata e, dingangu tawe měndarekeng i sai-sai.

³Su soa ene piạ l᷊ai sěngkatau wawine wal᷊u kụ seng pira-pirang sul᷊e mětẹ̌těngong mělahukung ene mědẹ̌dorong perkarane pakịontol᷊ẹ̌, ’Tul᷊ungko iạ mẹ̌těngon dokạku,’ angkuěngu wawine wal᷊u ene.

⁴Ene sěngapang děngụe mělahukunge tawe mapulu mẹ̌tul᷊ungu wawine wal᷊u ene. Kai samurine mělahukung ene kai nẹ̌tiněnna, ’Maningbeng iạ tamatakụ u Mawu Ruata ringangu tawe měndarekeng i sai-sai,

⁵kai ual᷊ingu wawine wal᷊u ini měngkai hanesẹ̌ duděnta manahaghe siạ, mapiangbe iạ mẹ̌tul᷊ungu perkarane. Kai kereu tala, i sie měntěhang měngkai hanesẹ̌ duděnta kụ makasigěsạ si siạ.’ ”

⁶Bọu e Mawu něhengetang, ”Pẹ̌tiněnna apang kụ niwerang mělahukung tạ katul᷊ide ene!

⁷Ho! Sěnaungu Mawu Ruata kai ta makakoạ tumatawang pěrkarang umatʼE sẹ̌sane kụ měmpẹ̌kẹ̌kal᷊iomaneng si Sie ěllo-hẹ̌bi? Su naungu i Sie měnẹ̌nohọ u tempo mědeạu mẹ̌tul᷊ung i sire?

⁸Pangimangke: I Sie měngkate masahawụ tumatawang pěrkarang sire! Kaiso kamageng Ahusʼu Taumata ruměnta, apa wědaweng makahombang taumata mạngimang si Sie su dunia ini?”

⁹Mawu Yesus mal᷊aing nẹ̌běkeng papinintu ini kụ pinẹ̌timonanʼE su taumata mapakasanạ u taumata wal᷊ine, kaiso mangiaking u batangeng i sire mapia.

¹⁰Angkuěng i Yesus, ”Piạ tau ruang katau kụ nakoạ sarang bal᷊eng Mawu měmpẹ̌kal᷊iomaneng. Sěngkatau tau Farisi, kụ sěngkatau e wal᷊ine lai e maghaghělle bea.

¹¹Tau Farisi ene rimarisị nẹ̌těngkahae sẹ̌sane kụ nẹ̌kal᷊iomaneng,[25] ’Oh Ruata, iạ makitarimakasẹ si Kau, u iạ bal᷊ine kere taumata sěnggạ, kụ tahapěhampasẹ̌, tạ katul᷊ide, arau tahawuang. Iạ makitarimakasẹ ual᷊ingu iạ bal᷊inewe mẹ̌sul᷊ungu maghaghělle bea ěndaị ene.

¹²Iạ mẹ̌puasa duan sul᷊e sěngkamisa dingangu iạ mangonggọ u sasěmbaku si Kau katahạpul᷊ong bahageange bọu kěbị ěbạku.’

¹³Arawe maghaghělle bea ene dụdarisi bọu maraune dingangu sal᷊a matakụ kadal᷊ingarane sarang l᷊angị. Apidʼu kạpẹ̌ngapune sěbạ e i sie kapẹ̌berane, ’O Mawu Ruata, tal᷊ěntụkon iạ taumata waradosa ini!’ ”

¹⁴ ”Pangimangke,” angkuěng i Yesus, ”su tempong napul᷊ẹ sol᷊ong bal᷊e, maghaghělle bea ene kụ nitarimạ u Mawu Ruata bal᷊inewe tau Farisi ene. U apan taumata kụ mẹ̌těngkarangẹ u watangenge kai iapakasanạ; dingangu i saing kụ mětěngkasanạ u watangenge kai iapakarangẹ.”

¹⁵Piạ manga taumata němpẹ̌bawa manga rariọ darodọ sol᷊ong anun Mawu Yesus tadeạu i Sie manenggehẹ̌ dingangu mangal᷊amatẹ̌ si sire. Sarạeng manga muritʼi Yesus nakasilo ene, i sire kai limangehẹ̌ su taumata l᷊awọ ene.

¹⁶Kai i Yesus nẹ̌kui manga rariọ e mase něhengetang su manga tumatol᷊enʼE, ”Balạ e manga rariọ aparěnta su anu-Ku! Abe sahaghei i sire, batụ kai taumata kere ěndaị ini makoạ anạ u Mawu Ruata.

¹⁷Tahěndungeko! I sain tawe mẹ̌těngon Duata e kere manga rariọ ini, tawe makoạ manga anạ u Mawu Ruata.”

¹⁸Sěngkatau pangahạ u tau Yahudi e nakiwal᷊o su Mawu Yesus, ”Tuang Guru lẹ̌adateng, iạ harusẹ̌ mẹ̌kapura ho, tadeạu makaěbạ pẹ̌bawiahẹ̌ kakalẹ̌?”

¹⁹”Kawe unụe i kau měsěsěbạ u Iạ mapia?” kakiwal᷊on Mawu si sie. ”Tawẹu sarang sěngkatau mapia, sul᷊ikudʼu Mawu Ruata sẹ̌sane.

²⁰ I kau seng masingkạ manga parentang Mawu Ruata: ’Kumbahang mawuang, kumbahang mamate, kumbahang mẹ̌tako, kumbahang měsahiding konti, ringangu pangadatẹ̌ si amangu ringangu si ninangu.’ ”

²¹”Kěbị parenta ene seng takụ nituhukang, dokeng iạ bẹ̌dang kadodọ,” sasimbangu tau ene.

²²Nakaringihẹ̌ ene, i Yesus něhengetang, ”Bědang piạ sěmbaụ hinong koatengu: Bal᷊ụko kěbị arětạ u kụ onggọko roite su tau kasiang, kụ i kau sarung makahombang arětạ u su sorga. Bọu ene mahịe tol᷊e Siạ.”

²³Sarangke tau ene nakaringihẹ̌ ene, i sie měngkatewe masusa naunge, ual᷊ingu i sie kai kalạ kahěngang.

²⁴I Yesus masingkạ u tau ene masusa naunge ual᷊ingu ene Mawu Yesus něhengetang, ”Masigěsạ kahěngang tau kalạ makoạ kawanuang Mawu Ruata!

²⁵Mal᷊owokangbe onta sumuẹ̌ su tul᷊in darahung, sul᷊ungu tau kalạ sumuẹ̌ su kararatuang u Mawu Ruata.”

²⁶Kěbị taumata apan nakaringihẹ̌ si Yesus něhengetang kerene nakiwal᷊o, ”Kamageng kerene, i sai tangu hinong masal᷊amatẹ̌?”

²⁷Yesus simimbang, ”Apan tawe mariadi su taumata e, mariadi wue su Mawu Ruata!”

²⁸Mase i Petrus nẹ̌bera, ”Kakělla! I kami seng naněntangu sěmbal᷊eěng baugu tumol᷊e si Tuang.”

²⁹”Pangimangke!” angkuěng i Yesus. ”I sain seng naněntangu wal᷊ene, arau kawinge arau mahuanene arau inang-iamange arau manga anạ e ual᷊ingu mẹ̌tangkiang Mawu Ruata,

³⁰i sie sarung bal᷊isang limembong kal᷊awọe pira haweng su tempo ini, dingangu su tempo sarung duměnta, i sie sarung gělikangu pẹ̌tatumbiahẹ̌ tutune ringangu kakalẹ̌.”

³¹Mawu Yesus nangomol᷊i sire muritʼE mapul᷊o dua nihaene mase něhengetang, ”Daringihẹ̌ko! I kitẹ ini mětẹ̌timona Yerusalem. Pai sene, kěbị apan niwohẹ u manga nabi mạanun Ahusʼu Taumata sarung mariadi.

³²I Sie sarung isarakang su apan taumata wal᷊ine Yahudi, kụ sarung mẹ̌taghunalang, měhinakang dingangu mangědu si Sie.

³³I sire sarung manịgěsạ dingangu mamate si Sie, arawe su katěllu ěllone i Sie sarung mẹ̌bangung.”

³⁴Patikụ ene tawe nikaěnnaěngu manga muritʼE sarang kadodọ-dodọ. Mangal᷊en bawerang Yesus ene nibawunin sire. I sire běgan Sie měnsang měbẹ̌bisarang apa.

³⁵Su tempon Yesus marani mahumpạ u Yerikho, sěngkatau wuta mạiang mẹ̌taharorong su wiwihʼu ral᷊eng.

³⁶Piạ i sie nakaringihẹ̌ taumata l᷊awọ sụsahe i sie nakiwal᷊o, ”Kai piạ apa?”

³⁷”Yesus tau Nazaret ene sụsahe,” angkuěng i sire si sie.

³⁸Tangu tau wuta e nẹ̌kiạe, ”Yesus, Ahusʼi Daud! Tal᷊ěntụkong iạ!”

³⁹I sire apan su těngone, němpẹ̌pědu ringangu něngoron sie apakạděmasẹ̌. Kai i sie saunengkewe nẹ̌kuịewen tingihe limembong kaihạ e, ”Ahusʼi Daud! Tal᷊ěntukong iạ!”

⁴⁰Mawu Yesus nẹ̌dung dingangu nangoro taumata apẹ̌bẹ̌bawa tau wuta ene sarang anunʼE. Sarạeng i sie nahumpạ, Yesus nakiwal᷊o,

⁴¹”Kai apa kapulunu Takụ koateng si kau?” ”Tuang,” sasimbahu tau wuta ene, ”iạ mapulu makasilo.”

⁴²Mase Mawu Yesus něhengetang, ”Kamageng kerene ute, pẹ̌kěllạe! Ual᷊ingu i kau mangimang si Siạ ute, i kau e mul᷊e.”

⁴³Su tempo ene lai, i sie ringangu nakasilo, mase i sie timol᷊e si Yesus apidu nakitarimakasẹ, su Mawu Ruata. Sarạeng taumata l᷊awọ e nakasilọ e hal᷊ẹ̌ ene ute, i sire kěbị němpẹ̌dalo Mawu Ruata.