Read Sangir LUKAS 19 Bible Online

LUKAS 19 - Sangir bible

LUKAS 19

¹Sarạeng i Yesus nahumpạ su Yerikho, i Sie měngkatewe rimal᷊engu soa ene.

²Su soa ene piạ sěngkatau těmbonangu maghaghělle bea kalạ, Arenge i Zakheus.

³I sie mapulu makasilo kai i sai Mawu Yesus ene, kụ ual᷊ingken taumata tumanịu l᷊awọ dingangu i sie sẹ̌sane kai masanạ, ute i sie tawe nakasilo si Yesus.

⁴Kutẹu i sie timal᷊ang nangal᷊amona taumata l᷊awọ, bọu e naawị su kalu, tadeạu makasilo si Yesus kụ tạ kaděngụe sarung sumahe sene.

⁵Sarạeng i Yesus nahumpạ su kalu ene, i Sie rimal᷊ingara mase nẹ̌bera, ”Zakheus lighạko ěnaẹ dělusẹ̌! U Iạ e kai mapulu mawunạ su wal᷊enu sahěllo ini.”

⁶I Zakheus měngkatewe masahawụ-sahawụ dimělusẹ̌ dingangu nanarimạ si Yesus napenẹ u ral᷊uasẹ̌.

⁷Kěbị taumata nakasilo hal᷊ẹ̌ ene nanětạe němpẹ̌gahutụ. I sire nẹ̌bera, ”Sih! I Sie tamai makisake su wal᷊en taumata ral᷊aị!”

⁸Bọu e su wal᷊ene, i Zakheus dimarisị dingangu nẹ̌berạ e si Yesus, ”Mawu, sěmbahạgeang bọu arětạku, takụ ionggọ su taumata kasiang; dingangu balạe i sai wọu takụ kinaakal᷊eng, sarung takụ baehang kapia si sie ěpạ u sul᷊e!”

⁹Mase angkuěng i Yesus, ”Su sahěllo ini i kau ringangu kal᷊awọu ral᷊ohon bal᷊enu masal᷊amatẹ̌ dingangu ghěllikangu pẹ̌bawiahẹ̌ buhu, batụu mang i kau lai hiten Abraham.

¹⁰ Ahusʼu Taumata ruměnta mědeạ dingangu mapakasal᷊amatu apang něngkapal᷊idẹ̌.”

¹¹ Piạ e i sire wẹ̌dang kạpẹ̌dẹ̌daringihe si Yesus měbẹ̌bisara, i Sie nẹ̌běken papinintu sěmbaụ. Batụu su orasẹ̌ ene i Sie maraning Yerusalem, dingangu taumata mạngiral᷊ingu Mawu Ruata seng lighạ mẹ̌parenta kere sěngkatau Ratu su dunia.

¹²Mawu Yesus něhengetang, ”Piạ sěngkatau tuhasẹ̌ kụ nakoạ sol᷊ong banua marau mědeạu mahengkẹ makoạ datu, mase mẹ̌sul᷊e kapia.

¹³Bědang ta něbẹ̌buạ, i sie nẹ̌kui mapul᷊ongkatau ěllange, mase nangonggọu roitẹ̌ bul᷊aeng pẹ̌sěngkal᷊ěpa si sire pẹ̌sěngkatau. ’Pěmpẹ̌dagangken doitẹ̌ ini karěngụewen iạ suraral᷊engang,’ angkuěnge si sire.

¹⁴Arawe ral᷊ohon soa ene měbẹ̌binsị i sie. Kutẹu, sarạeng i sie seng napaghohẹ̌ i sire něndolohu rarolohang tadeạu apạul᷊ịu, ’I kami madiring tau ini ipakakoạ datung kami.’

¹⁵Kaiso tuhasẹ̌ ene nahengkẹ naratu bọu e nẹ̌sul᷊e su wanuane. Měngkate apa masahawụ i sie kimui manga ěllange apẹ̌tẹ̌těngo, tadeạu makakasingkạu kal᷊awọu untunge nikatarimạ i sire.

¹⁶Ěllang humotonge riměnta ringangu nẹ̌bera, ’Mawu, doitẹ̌ bul᷊aeng kụ nionggọ u Mawu e, seng takụ kinakoạ mapul᷊ong kal᷊ěpa.’

¹⁷’Mapaelẹ̌,’ angkuěngu mawune, ’i kau ěllang mapia! Ual᷊ingu su manga hal᷊ẹ̌ dararodọ, i kau wotonge kapěngumbalaěng ute, iạ sarung mẹ̌koạ si kau mangawasa soa mapul᷊o.’

¹⁸Ěllang karuane riměnta ringangu nẹ̌bera u, ’Tuang, doitẹ̌ bul᷊aeng sěngkal᷊ẹ̌pa nionggọ i Tuange, seng takụ nikakoạ l᷊ima.’

¹⁹Su ěllang ene, datu e nẹ̌bera, ’I kau sarung mangawasa soa lima.’

²⁰Ěllang kewelai wal᷊ine riměnta, kụ nẹ̌bera, ’Tuang, ini roitʼu; takụ niresọ su ral᷊ungu lenso.

²¹Iạ kai mạtakụ si Tuang batụu i Tuang kai taumata mahẹ̌gisẹ̌. I Tuang kawe mạngal᷊ạ apam bal᷊ine tataghuaneng i Tuang, dingangu i Tuang mạměnsạ su tampạ tawe niasị i Tuang.’

²²Datu ene nẹ̌bera si sie, ’I kau ěllang dal᷊aị! Mẹ̌takaewen baweranu sẹ̌sanu iạ sarung měhukung i kau. I kau masingkạ u iạ taumata mahěgisẹ̌: iạ měngal᷊ạ apang kụ bal᷊ine tataghuanengku, dingangu mạměnsạ su tampạ tawe takụ piněngasikang.

²³Mạeng kerene unụe i kau tawe nanowa roitẹ̌ ene su bank tadeạu su tempon iạ mawal᷊ị, iạ nakapanarimạ bue roitẹ̌ dingangu untune?’

²⁴Mase ratu ene nẹ̌bera si sire apan mạhundarisị sene, ’Al᷊ạ e roitẹ̌ ene wọʼi sie kụ gělịko su ěllang kụ mạnaghuang doitẹ̌ bul᷊aeng mapul᷊o ene.’

²⁵Arawe i sire ene němpẹ̌bera, ’Mawu, i sie seng něnaghuang mapul᷊o.’

²⁶ Datu e simimbang, ’Tahěndunge: i sain seng piạ si sie, sarung tambaěng iapakal᷊awọ. Arawe i sain tawe apa ute, apan ene si sie sarung pěngal᷊akeng lai woʼi sie.

²⁷Kụ orasẹ̌ ini ute wawạe ramahi apan dumarokạ si siạ e, ringangu tawe mapulu iạ makoạ datun sire. Patẹ e i sire kěbị su těngoku!’ ”

²⁸Sarạeng i Yesus něhengetang u kěbị ene, i Sie rimal᷊eng su těngon sire nẹ̌timona Yerusalem.

²⁹Sarạeng seng maraning Betfage ringangu Betania su Wukidʼu Zaitun, i Sie rimolohʼu muritʼE ruang katau niapangal᷊imona.

³⁰”Dakọko sarang kampong pai tẹ̌tatěngoěng,” angkuěng i Yesus si rẹ̌dua, ”kereu i rua masuẹ̌ sene i rua měntěhang makasilo anạ u kalide sěmbaụ mạl᷊aikị. Kalide ene wẹ̌dang tawe nisẹ̌sakeěngu taumata. Lukạe kalide ene ringangu wawạ e ramahi.

³¹Kereu taumata makiwal᷊o si rua, ’Unụe i rua něluka kalide e?’ pẹ̌berako, ’Mawu[26] e měgẹ̌gausẹ̌.’ ”

³²I rẹ̌dua muritʼi Yesus e natamai ringangu kinaẹ̌bakeng kěbị e kahěngang kerẹewe niweran Yesus.

³³Kutẹu i rẹ̌dua kapẹ̌lukane anạ u kalide e, taghuange nẹ̌bera si rẹ̌dua, ”Unụe i rua měluka kalide ene?”

³⁴I rẹ̌dua simimbahẹ̌, ”Mawu měgẹ̌gausẹ̌.”

³⁵Bọu e i rẹ̌dua nẹ̌bawa anạ u kalide e sarang anung Yesus. Mase i rẹ̌dua němilạu pakeang i rẹ̌dua su tal᷊ětugu kalide e kụ niapaawị i Yesus su wowong kalide ene.

³⁶Kutẹu i Sie simahe apidʼu kạsakene kalide e taumata l᷊awọe němpamilạem pakeang i sire su ral᷊eng.

³⁷Su tempong i Yesus maranịeng mahumpạ u Yerusalem sural᷊eng kụ dumẹ̌sungu Wukidʼu Zaitun, kěbị manga muritʼE makěpal᷊ẹ̌ ene nanětạ e měmpẹ̌dalon tingihẹ̌ maihạ mědẹ̌dalo Mawu Ruata ringangu makịtarimakasẹ si Sie ual᷊ingu kal᷊awọu munara makạl᷊aherang kụ seng kinasilon sire e.

³⁸ I sire němpẹ̌bera maihạ, ”Al᷊amatẹ̌ kawuạko su Ratu kụ kạděntane su ral᷊ungu areng u Mawu! Pẹ̌darame su sorga dingangu apakaraloko Mawu Ruata!”

³⁹Pirang katau tau Farisi wọu tal᷊oaran taumata l᷊awọ e němpẹ̌bera si Yesus, ”Tuang Guru, pẹ̌beraiko manga muritʼi Tuang apakarěmasẹ̌.”

⁴⁰Mawu Yesus simimbang, ”Pangimangke! Kereu i sire marěmasẹ̌ ute manga watu ini sarung měmpẹ̌gio.”

⁴¹Sarạeng i Yesus lụhaungkeng Yerusalem kụ nakasilọ e soa ene, i Sie simangịen soa ene.

⁴²AngkuěngʼE, ”Pirua, kerẹeng kapiane, kereu sahěllo ini i kau masingkạu apan makarěntan pẹ̌darame! Kaiso orasẹ̌ ini e i kau tawe makasilo ene.

⁴³I kau sarung makapěndang su sěnsul᷊e tempo suapan sekẹ u e mẹ̌koạ sasahaghe ipělikụ si kau; i sire sarung měmpẹ̌liwung si kau ringangu měmpaněsẹ si kau wọu kěbị tampạ.

⁴⁴I sire sarung mapakasilakạ i kau ringangkewen taumata ral᷊ohonu e; kụ tawẹ manga watu sarang sěmbaụ iwalan sire mạdal᷊ěnsung su tampạ e, batụu i kau tawe měnẹ̌naungu tempon Mawu Ruata ruměnta mapakasal᷊amatʼi kau!”

⁴⁵Mawu Yesus simuẹ̌ su Wal᷊em Mawu kụ nanětạ nanokol᷊u mal᷊ahumbal᷊ụ su tampạ ene.

⁴⁶ ”Su ral᷊ungu Winohẹ Susi,” angkuěngʼE si sire, ”mạbawohẹ kere ini: Mawu Ruata e něhengetang, ’Bal᷊e-Ku kai sarung makoạ bal᷊eng pẹ̌kakal᷊iomanengang.’ Kutẹu kahiang kamene nikakoạ liangu taha pěhampasẹ̌!”

⁴⁷ Ěllo-ěllo i Yesus mạněntiro su ral᷊ungu Wal᷊em Mawu. Manga imang těmbonange ringangu manga mananěntiro agama, ringangkewen manga pangahạu tau Yahudi e mapulu mamate si Sie,

⁴⁸kutẹu tawe nakareạ dal᷊enge měnsang kereapa mẹ̌koạ hal᷊ẹ̌ ene, ual᷊ingu kěbị taumata měngkate rụdaringihẹ̌ si Sie ringangu rudaringihẹ̌ manga hengetangʼE.