Read Sangir LUKAS 2 Bible Online

LUKAS 2 - Sangir bible

LUKAS 2

¹Kutẹu su tempo ene, Kaisar Agustus nẹ̌parenta tadeạu kěbị kawanua Paparentang u Roma e makiwohẹ u areng su manga měndarol᷊ẹ̌.

²Pěndarol᷊ẹ̌ humotong ini e nariadi piạ i Kirenius nakoạ guběrnurẹ̌ su wanuang Siria.

³Kěbị taumata su tempo ene nahundal᷊eng makirol᷊ẹ̌ su soan sěmbaụ-sěmbaụ.

⁴I Yusup e mal᷊aing nẹ̌buạ bọu Nazaret su Galilea, sol᷊ong Betlehem su Yudea tampạ kinawantelangu Ratu i Daud; batụu i Yusup kai hiten Daud.

⁵I Yusup nakiwohẹ arenge ringangi Maria kaghiange, kụ kạpẹ̌bẹ̌bawane kapapia.

⁶Kutẹu piạ i rẹ̌dua su Betlehem, tempone natimụe i Maria mamantelẹ̌.

⁷I sie naiwanteleng ahusẹ̌ esẹ, ahusẹ̌ iakang. Anạ ene nịpapikungu laěmping mase nipapěllọe su ral᷊ungu kakanengangu binatang lohon dahami; batụu i sire tawe nakaěbạ loahe su wal᷊e kawawunakenge.

⁸Su hěbi ene, piạ manga mělal᷊ukadẹ̌ měmpẹ̌lẹ̌hapạewe ghapaěng u dombane su wimbaengu rěmpugẹ̌ kụ su wanua ene.

⁹Sěngkělěndịu kai piạ malạekatʼu Mawu mẹ̌tẹ̌těngkatodẹ si sire, kụ tualagʼu Mawu e měngkatewe simarang měnẹ̌nualagẹ̌ si sire, kụ i sire něngkawintogẹ̌.

¹⁰Arawe malạekatẹ̌ e nẹ̌bera, ”Abe kěngkatakụ! U iạ kawe ruměnta mẹ̌bawa ral᷊uasẹ̌ masaria si kamene — ral᷊iagẹ̌ e makoạ buạ u sěngkawanuang.

¹¹Su sahěllo ini su soan Daud seng nawantelẹ̌ Datu Mananal᷊amatẹ̌ kụ kai i Kristus, Mawu e.

¹²Kụ ini e tatialane: I kamene sarung makahombang dariọ kadodọ mạpapikung u laěmping, dingangu rụdal᷊oka su kakanengang u binatang.”

¹³Arakutẹu sěngkianu piạ malaekatẹ̌ dingangu ghapaěngu malạekatẹ̌ bal᷊ine měmpẹ̌dẹ̌dalo Mawu Ruata e. I sire němpẹ̌bera,

¹⁴”Dalo su Ruatang l᷊angị su marangẹ! Dingangu pẹ̌darame su dunia, mal᷊unsemahẹ̌ taumata apan makạl᷊uasẹ̌ naung u Mawu!”

¹⁵Sarạeng malạekatẹ̌ seng naněntang i sire kụ něngkapul᷊ẹ sol᷊ong sorga e, tangu manga mělal᷊ukadẹ̌ e němpẹ̌berạe sěngkatau su wal᷊ine, ”Bọete i kitẹ sol᷊ong Betlehem kụ kumakěllako hal᷊ẹ̌ nariadi ene, niapakasingkạ u Mawu si kitẹ.”

¹⁶I sire měngkatewe němpẹ̌sasahawụ nahundal᷊eng mase nakaěbạe si Maria rẹ̌duang Yusup dingangu rariọ kadodọ dụdal᷊oka su kakanengangu binatang e.

¹⁷Ene, sarạeng i sire mělal᷊ukadẹ̌ e nakasilo rariọ e, i sire němpẹ̌běkẹeng apang nihabarʼu manga malạekatẹ̌ mạanun dariọ ene.

¹⁸Kụ kěbị taumata mạherang nakaringihẹ̌ běken sire mělal᷊ukadẹ̌ e.

¹⁹Arawe i Maria ute něndesọ u kal᷊awọu ene su ral᷊ungu naunge ringangu sẹ̌sipirange.

²⁰Manga mělal᷊ukadẹ̌ e němpẹ̌sul᷊ẹ e sol᷊ong wimbaengu rěmpugẹ̌ kạpẹ̌dalone ringangu kạpẹ̌pudine Mawu Ruata e, ual᷊ingu kěbị apạewen kinaringihẹ̌ dingangu kinasilon sire, mẹ̌sul᷊ungkewe apan nipaul᷊ị u malạekatẹ̌.

²¹ Sarạeng natimụe umure ual᷊u ěllo, mase rariọ e nisunate. Kụ i sire němpẹ̌sẹ̌bạ e si Yesus, arengkewe nạung sinẹ̌bạ u malạekatẹ̌ dokeng i Sie reng ta nipẹ̌pẹ̌pohiama.

²² Sarạeng ěllone natimụe i Yusup dingangi Maria mẹ̌dẹ̌ndal᷊engu tundung kawawurẹ̌si tuhụewe toratʼi Musa. Kụ i sire němpẹ̌bawa Anạ ene sol᷊ong Yerusalem mědeạu ionggọ su Mawu Kasěllahenge.

²³ Kai su ral᷊ungu Toratʼu Mawu e mạbawohẹ kere ini, ”Apạewen anạ esẹ iakang, hinon isarakang su Mawu.”

²⁴I sire lai měngěnna u mangěntudẹ̌ sasěmba, kere manụ těkukurẹ̌ sěhongkateng arau anạ u paluma kawuhuang darua tuhụewe wawera su ral᷊ungu Toratʼu Mawu.

²⁵Kutẹu su tempo ene su Yerusalem piạ e sěngkatau arenge i Simeon. I sie tau mapia, mạtakụ u Mawu Kasěllahenge, dingangu měngẹ̌ngampal᷊ẹ̌ orasʼu Mawu Ruata e mapakasal᷊amatʼu Israel. Rohkẹ̌ u Ruata mạtanạ si sie,

²⁶dingangu l᷊ai Rohkẹ̌ u Ruata e seng mělẹ̌habarẹ̌ si sie u i sie tawe sarung mate kereu reng tawe makasilo Ratu Mananal᷊amatẹ̌ nạung nikẹ̌don Mawu.

²⁷Kutẹu Rohkẹ̌ u Ruata něngahạ si Simeon nasuẹ̌ su Wal᷊em Mawu. Su tempo ene i Yusup dingang i Maria nẹ̌bawa si Yesus, nạung deng kadodọe mědeạu koateng hal᷊ẹ̌ u pẹ̌sasarakang tuhụ tundun toratẹ̌.

²⁸Tangu i Simeon měngkatewe nangal᷊ạ dariọ ene mase nisarul᷊unʼE, kụ i sie nẹ̌dalọ e Mawu Ruata,

²⁹”Ini e Mawu, ute i Kau seng ta nělanda kire. Karimạko ěllangʼU e mairị be su ral᷊ungu pẹ̌darame.

³⁰Batụu ringangu mataku hala e iạ seng nakasilo Mananal᷊amatẹ̌ bọu anunʼU.

³¹Měnanal᷊amatẹ̌ ene e seng niriahinʼU baugu patikụ umatẹ̌:

³² tabidạu tualagẹ̌ měnẹ̌nualagẹ̌ daral᷊engu manga umatẹ̌ bal᷊ine mědeạu ruměnta su anunʼU, kụ kai tualagẹ̌ makakarěntang kal᷊aadatẹ̌ su kawanuanʼU Israel.”

³³Ene i amange rẹ̌duang ninangu Rariọ ene měngkatewe mạhundal᷊inaụ nakaringihẹ̌ apan niweran Simeon mạanung Anạ i sire.

³⁴I Simeon něngal᷊amatẹ̌ si sire ringangu nẹ̌bera si Maria, i ninangu Rariọ e, ”Dariọ ene seng kinapilen Mawu Ruata mẹ̌deạu mapakawinasa ringangu mapakasal᷊amatʼu kal᷊awọu tau Israel. I Sie sarung mariadi tatiala wọu Ruata e, kụ sarung dokatengu taumata l᷊awọ,

³⁵kụ ual᷊ingu kai kerene ute naukahe kěbị dal᷊ungu naung i sire. Kasasusa e sarung měnusụ dal᷊ungu naung i kamene kere aghidẹ̌ mahoro.”

³⁶Ene piạko l᷊ai nạung sěngkatau nabi wawine seng maghurang kahěngang. Arenge i Hana, anạ i Fanuel, bọu hěntong Asyer. Piạ e seng kapitu taunge nẹ̌dal᷊ahikingu kawinge karěngụe,

³⁷i Hana nawal᷊ue kụ sarạeweng umure ual᷊um pul᷊o ěpạ su taunge.[2] Mang tawe naněntangu Wal᷊em Mawu. Ěllo hẹ̌bi i sie mẹ̌tẹ̌tahamawu Ruata měkẹ̌kal᷊iomaneng dingangu měpẹ̌puasa.

³⁸Tangu su orasewe lai ene, i sie himaung, mase nẹ̌dalo Mawu Ruata e ringangu měbẹ̌bisara mạanun anạ ene su kěbị apan měmpẹ̌ngẹ̌ngampal᷊ẹ̌ tempone Ruata mapakal᷊iun Yerusalem e.

³⁹ Sarạeng i Yusup dẹ̌duang Maria mẹ̌kẹ̌koạ kal᷊awọu apạewen hinong koateng tuhụ Toratʼu Mawu, ute i rẹ̌dua e němpẹ̌sul᷊ẹ e sol᷊ong Nazaret su Galilea.

⁴⁰Dariọ e ute limembọeng kaguwạe ringangu natoghasẹ̌. I Sie měngkatewe matahuěnna ringangu Mawu Ruata e mang makěndagẹ̌ si Sie.

⁴¹ Apan taun-taung gaghurang i Yesus makoạ sol᷊ong Yerusalem mědeạu mẹ̌sal᷊imbang u Ěllon Sal᷊imbangu Paskah.

⁴²Kụ piạ e i Yesus umure natimụe mapul᷊o dua su taunge, i sire tamai nẹ̌sal᷊imbang tuhụewe tundune.

⁴³Sarangke nasuẹ e sal᷊imbang ene i sire němpẹ̌sul᷊ẹ e, dariọ ene wẹ̌dang mạtanạ su Yerusalem, kụ i amang dingangu i ninange nikawẹ̌gaěnge.

⁴⁴I rẹ̌dua měngẹ̌ngěnna i Sie kai natol᷊e ringangu ghapaěngu taumata. Sarạeng bọu nahundal᷊eng sahěllo e karěngụe, buhụe i rẹ̌dua mědẹ̌deạ si Sie sutal᷊oarang anạ u sěmbaụ dingangu manga kanarang i rẹ̌dua e.

⁴⁵Kutẹu i rẹ̌dua kai tawe nẹ̌sombangʼE, kụ i sire saụewe nẹ̌sul᷊e kapia sol᷊ong Yerusalem kạpẹ̌deạ e si Sie.

⁴⁶Kutẹu nal᷊iun těllu ěllo mẹ̌dẹ̌deạ, i rẹ̌dua kai nakaěbạ si Sie su ral᷊ungu Wal᷊em Mawu. I Sie mạiang dụdaringihẹ̌ manga mananěntiro agama ringangu mạkibal᷊o.

⁴⁷Kụ kěbị apan makạdingihẹ̌ si Sie měngkatewe mạdal᷊ingun manga sasimbangʼE matahuěnna.

⁴⁸Ene gaghurangʼE mal᷊aing mạdal᷊ingu nakasilo si Sie. I ninangʼE nẹ̌berạe si Sie, ”Amang, kawe unụe i Kau nẹ̌koạ kerene si kami? Ěndaung, i kanduang amangu e měngkatewe su kaghaghěngganeng mědẹ̌deạ si Kau!”

⁴⁹I Yesus simimbangke, ”Kawe unụe i amang dingangi ninang mědẹ̌deạ si Siạ e? Apa i amang dingangi ninang kawe wẹ̌ga, u Iạ e kawe hinong ene su wal᷊eng Amang-Ku e?”

⁵⁰Ene, i rẹ̌dua tawe nakaěnna sasimbang i Yesus e.

⁵¹Bọu e i Yesus napul᷊ẹ e ringangi rẹ̌dua sol᷊ong Nazaret, kụ dimaringihẹ̌ si rẹ̌dua. Kụ patikụ ene kạdaresọ si ninange su ral᷊ungu naunge.

⁵² I Yesus e mang kakạsěllahe ringangu kakạtahuěnnane ringangu makạl᷊ahimpulu Ruata ringangu ikẹ̌kapulun taumata.