Read Sangir LUKAS 21 Bible Online

LUKAS 21 - Sangir bible

LUKAS 21

¹Su Wal᷊em Mawu e, i Yesus něhengkẹ u matane nakasilo makakalạe němpaměllọ u roitẹ̌ su ral᷊ungu peting sasěmba.

²I Sie nakasilo l᷊ai sěngkatau wawine wal᷊u kasiang nẹ̌tahong duang kal᷊ěpa roitẹ̌ tambaga.

³Mase i Yesus něhengetang, ”Daringihẹ̌: tau wal᷊u ěndai e nẹ̌tahon sasěmba limembong kal᷊awọe wọu kěbịewe lai wal᷊ine.

⁴Batụu i sire kěbị e měngkai měmpẹ̌gẹ̌gěllị bọu tompẹ u arětạ i sire. Arawe wawine wal᷊u ěndaị e, manịeng tumanịu kasiang, kaiso i sie nangonggọu kěbị apan tẹ̌taghuanenge kụ gẹ̌gausang hala waụgu pẹ̌bawiahẹ̌.”

⁵Piạ i sire mạhumbisara mạanung kereapa kapaele Bal᷊em Mawu nilěgahu watu maral᷊ěnggihẹ̌ dingangu manga sạbarang sasěmba su Ruata. Tangu i Yesus něhengetang si sire.

⁶”Kai sarung piạ tempone kěbị apang kinasilong kamene sarung matěnehẹ̌ kụ tawẹu sarang batu sěmbaụ ěndaị sini mạdal᷊ěnsung su tampạ e.”

⁷I sire nakiwal᷊o si Yesus, ”Tuang Guru, angerẹ ngae tamai ene mariadi? Kụ kai apạ e tatialane, watụ u kai sen tempone hal᷊ẹ̌ ene sarung mariadi?”

⁸I Yesus něhengetang, ”Pakapapia wue kumbahangbe i kamene kaakal᷊eng. Lawọ taumata sarung mahunděnta ringangu areng-Ku, kapẹ̌berane seng, ’Iạ e i Sie!’ ringangu ’Seng tempone.’ Kaiso kumbahangbe i kamene tumol᷊e si sire.

⁹Abe lai kěngkatakụ kereu i kamene makaringihẹ̌ habarʼu pẹ̌sasekẹ dingangu pẹ̌gaghuhaeng. Tamai ene harusẹ̌ mariadi kal᷊imona. Kaiso ene wal᷊inewe mangal᷊en seng tempone mẹ̌kiamatẹ̌.”

¹⁰Bọu e i Yesus nanẹ̌paseng hengetangʼE, angkuěngʼE, ”Umatẹ̌ sěmbaụ sarung mẹ̌sekẹ dumokạ umatẹ̌ bal᷊ine ringangu kararatuang sěmbaụ sarung dumokạ kararatuang bal᷊ine.

¹¹Su apang tampạ sarung piạ linuhẹ̌ mal᷊aihạ dingangu karal᷊unusẹ̌ dingangu sahindạ suapan tampạ. Mase sarung mariadi manga apa makạl᷊ahiasẹ̌ dingangu makạtatakụ su l᷊angị.

¹²Kai kal᷊imonan patikụ ene nariadi, i kamene ute sarung isamẹ dingangu tingkaitang. I kamene sarung ihukung su manga wal᷊em pẹ̌kakal᷊iomanengang kụ itahungkụ. Dingangu i kamene sarung ipẹ̌těngom manga ratu ringangu manga měngangawasa ual᷊ingu i kamene kawe manga muritẹ̌-Ku.

¹³Kụ ene kai seng tempone si kamene tadeạu makapẹ̌habarʼu Injilʼu Ruata.

¹⁴ Měngkate pakapaku su naung i kamene u i kamene tawe sarung ghuměnggangu apang isimbahʼi kamene mẹ̌tahutěndạu watangeng.

¹⁵Iạ sẹ̌saku sarung piạ u takụ ipẹ̌bera ringangu sasal᷊ěntihọ tadeạu tawẹu manga sarang sěngkatau wọu manga rokạku makakarokạ arau mẹ̌děndilu apan niwerang kamene.

¹⁶I kamene sarung ipẹ̌binsị u ghaghurang, manga anạ u sěngkatau arau kahian manga ěgẹ arau manga hapị i kamene. Sěmbahageang boʼi kamene sarung pateěng i sire.

¹⁷I kamene sarung ipẹ̌binsị u kěbị taumata ual᷊ingu i kamene kawe muritẹ̌-Ku.

¹⁸Kaiso sarang utạ sěmbua wọu těmbọ i kamene e tawe sarung mailang.

¹⁹Kereu i kamene makakẹ̌dang dingangu makasabarẹ̌ ute i kamene sarung masal᷊amatẹ̌.”

²⁰”Kereu i kamene makasilọe Yerusalem mạdal᷊iwungu wuntuangu mẹ̌sasekẹ ute i kamene sarung masingkạ u soa ene tawẹ karěngụe lai sarung pakawinasa.

²¹Su tempo ene apang ene su Yudea e harusẹ̌be pahuntal᷊ang sol᷊ong bul᷊ude. I sire apan su ral᷊ungu soa harusẹ̌be paněntangu soa, kụ i sire apan sul᷊ikudʼu soa e abe suẹ̌ su ral᷊ungu soa.

²² Batụu ěllo-ěllo ene e kai ’Ěllo-ěllon Tilakehangu Papahang’, mědeạu ual᷊ingu kakakoạ kerene ute mariadi wue kere seng nawohẹ su ral᷊ungu Winohẹ Susi.

²³Kụ apạewe kereng katědụe su manga ěllo ene mihino su manga wawine piạ kapapia, ringangu mapạsusun dariọe! Banua ini e sarung kahombangengu sigěsạ masaria, dingangu Mawu e sarung měhukungu kawanua ini.

²⁴Piạ sarung pateěngu peda, piạben lai sarung tawengang sarang banuan tau l᷊iwụ; ringangu i sain běgan Mawu e sarung měndal᷊inda Yerusalem sarang masue tempone nitantun Mawu e si sire.”

²⁵ ”Hẹ̌dowe su matangěllo, wul᷊ang dingangu su manga wituing sarung ikasilo manga tatiala. Su dunia e, manga umatẹ̌ e sarung měngkatakụ dingangu měmpẹ̌bingọ u ghal᷊ědụ dingangu wělladu sasị.

²⁶Taumata e sarung matakụ tạ sihinge tumatěngo apa sarung mariadi su kasěllahʼu dunia ini, watụ u manga mangawasa l᷊angị e sarung guminuẹ̌.

²⁷ Su tempo ene Ahusʼu Taumata e sarung duměnta su ral᷊ungu winawa, piạ e kawasanʼE, ringangu kawawantugʼE masěllahẹ̌.

²⁸Kamagengu kěbị ene manětạ e mariadi ute pěmpẹ̌pětịko mase ral᷊ingara, u měntěhang ini e i kamene sarung ipakasal᷊amatẹ̌.”

²⁹Mase i Yesus nẹ̌běken papinintu kere ini si sire, angkuěngʼE, ”Kakěllako kalun ara ringangu kal᷊awọu kakaluang bal᷊ine.

³⁰Kereu manga towọe seng manětạ humětị ute i kamene masingkạu musungu pědisẹ̌ e seng masandigẹ̌.

³¹Kerene lai kereu i kamene makasilo manga hal᷊ẹ̌ ene mạdiadi, i kamene sarung masingkạ u Mawu Ruata seng tạ karěngụe mẹ̌parenta kere sěngkatau Ratu.

³²Kasingkạko! Manga hal᷊ẹ̌ ene sarung mariadi kal᷊imonan taumata měbẹ̌biahẹ̌ orasẹ̌ ini e, kěbịe reng ta něngkapul᷊ẹ asal᷊ẹ̌.

³³Langị dingangu dunia e sarung mapaghohẹ̌ arawe hengetang-Ku e ute tatapẹ̌ sarang marěngụ-děngụ.”

³⁴”Pěndiagạ batangengu, kumbahang sarang i kamene měngkate mětẹ̌tasibung sal᷊iwang kụ měmpanginung inumang makạbukang arau měngkate měsẹ̌sipirʼu hal᷊ẹ̌ u pẹ̌bawiahẹ̌ hakịu i kamene tawe nasạdia su tempong ěllo ene sěngkianu ruměnta makạl᷊ahěkosẹ̌.

³⁵U Ěllo ene sarung duměnta kere rarěntang tahatako su patikụ taumata su wowon dunia ini.

³⁶Pakarariagạ dingangu pěmpẹ̌kẹ̌kal᷊iomaneng sidutu mẹ̌deạu i kamene mạtoghasẹ̌ mẹ̌tatětol᷊u patikụ hal᷊ẹ̌ mariadi kụ i kamene makararisị su těngong Ahusʼu Taumata.”

³⁷ I Yesus naněntiro su Wal᷊em Mawu su tempong ěllo ringangu hěbine i Sie tamai sarang Bukidʼu Zaitun kụ nẹ̌tanạ sene.

³⁸Apan mal᷊ukadẹ̌ kěbị taumata e mạhunděnta su Wal᷊em Mawu mẹ̌deạu rumaringihewe si Yesus maněntiro.