Read Sangir LUKAS 22 Bible Online

LUKAS 22 - Sangir bible

LUKAS 22

¹ Sal᷊iwang u Borotẹ̌ Tawe Kabọ e, isẹ̌sẹ̌bạ Paskah e seng masandigẹ̌.

²Manga imang těmbonange ringangu mananěntiro agama mang kapẹ̌dẹ̌deạ e ral᷊engu mamate si Yesus dingangu marěma-rěmasẹ̌, batụu i sire mạtakụ u taumata l᷊awọ.

³Bọu e setang simuẹ̌ e si Yudas kụ isẹ̌sẹ̌bạ lai si Iskariot, sěngkatau wọu i sire mapul᷊o dua muritʼi Yesus.

⁴Ual᷊ingu ene i Yudas tamai kụ němpahumbisara ringangu manga imang těmbonange ringangkewen manga těmbonangu l᷊ukadʼu Wal᷊em Mawu měnsang kereapa i sie makapěnarakang i Yesus si sire.

⁵I sire měngkate maral᷊uasẹ̌ kụ nẹ̌kědo měmpẹ̌gěllịu roitẹ̌ si sie.

⁶I Yudas mal᷊aing kimire kụ nanětạ e nẹ̌deạ loahe pakapia mědeạu manarakang i Yesus si sire, tawe kasingkateng i sai-sai.

⁷Nidatingken tempone ěllon Sal᷊iwang u Borotẹ̌ Tawe Kabọ e, tangu domba waugu kaěngu Paskah e nipotọ e.

⁸Tangu i Yesus rimolohi Petrus rẹ̌duan Yohanes, ”Dakọko pěmpěnạdia kaěngu Paskah waugʼi kitẹ.”

⁹”Suapa i Tuang mapulu sadiang i kami e?” kakiwal᷊on dẹ̌dua.

¹⁰Yesus simimbang, ”Su tempon i rua kạpahunsuẹ̌ e su soa, piạ sěngkatau esẹ mạmasaěng běnsadʼu akẹ sarung ipẹ̌sombang i rua. Tol᷊eiko i sie sarang bal᷊e suěkange,

¹¹mase pěmpẹ̌bera su taghuangʼu wal᷊e e: I Tuang nẹ̌bera, ’Suapa tampạ Iạ ringangu manga muritẹ̌-Ku kumaěng kaěngu Paskah?’

¹²Taghuangu wal᷊e ene sarung manul᷊ada si rua kamarẹ̌ gẹ̌guwạ su loteng nasukụ u apal᷊iwụe. Sadiako kěbị ene sene.”

¹³Tangu nahundal᷊engke i Petrus dẹ̌duan Yohanes kụ nakahombangke kěbị ene kere nipaul᷊ị i Yesus. I rẹ̌dua němpanạdia simokol᷊ʼu Paskah e.

¹⁴Sarạeng seng orasʼu mẹ̌pakẹ simokol᷊u Paskah e, i Yesus naiangke ringangkewen manga muritʼE su medang perjamuang.

¹⁵Mase i Sie něhengetang si sire, ”Iạ nạung měngkai měkẹ̌karimang tạ sihinge kumaěng kaěngu Paskah e ringang i kamene kal᷊imonan Iạ e masunsara!

¹⁶U pangimang bue: Iạ e sembeng ta kumaěng ini e l᷊ai sarạeweng mangal᷊en pẹ̌papěrjamuang ini e ipakal᷊ahẹ su Wanuan Duata Wuhu e.”

¹⁷Bọu e i Yesus rimaẹ kụ nihengkẹ e panganginumangu anggorẹ̌, bọu ene nakitarimakasẹ su Ruata, mase něhengetang, ”Al᷊ạko ini kụ pẹ̌papahiạeng kamene;

¹⁸kụ kěngkasingkạko: manětạ orasẹ̌ ini Iạ mang seng ta manginung akẹ u anggorẹ̌ ini lai sarạeweng Mawu Ruata e ruměnta kapia mẹ̌kawasa patikụ.”

¹⁹Bọu e Mawu Yesus něngal᷊ạ e borotẹ̌. Kụ bọuten nakitarimakasẹ, nikakakompenge borotẹ̌ ene ringangu l᷊imanʼE mase tinẹ̌gone si sire kụ něhengetang, ”Ini e kai wadang-Ku [ilẹ̌onggọ baugʼi kamene. Koạko ini e tatahěndung si Siạ.”

²⁰ Kerene lai samuring kạkaěnge, i Sie nangonggọen panganginumangu anggorẹ̌ e si sire mase něhengetang, ”Panganginumang ini e kai pẹ̌dariandin Mawu Ruata wuhu nisarakang su ral᷊ungu raha-Ku — rahạ e niapaelehẹ̌ baugʼi kamene].”

²¹ ”Kaiho, kěllạe! Tau manarakangu Iạ e ene lai sini ringang-Ku!

²²Ahusʼu Taumata e sarung mapohong kerẹewe nịtatantungʼu Mawu Ruata; arawe kaěngkěhang taumata kụ manarakang i Sie!”

²³Ene i sire nanětạ e nẹ̌kiwal᷊o, sěngkatau su wal᷊ine, měnsang i sai wọu tal᷊oaran sire sarung mẹ̌koạ kerene.

²⁴ Sutal᷊oaran manga muritʼi Yesus nakoạ pẹ̌sasitori měnsang i saị e wọi sire hinong ikatikạ kasěllahenge.

²⁵ Yesus něhengetang si sire, ”Datung kal᷊awọu umatẹ̌ běgan Mawu Ruata manigěsạ kawanuane, ringangu měngangawasa si sire e isẹ̌sẹ̌bạ ’Měndal᷊ukadʼu Kawanua’.

²⁶ Arawe i kamene abe kerene. Kaiso i saing makoạ kasěllahenge su tal᷊oarang kamene hinong makoạ kere kakạdodokange, ringangu pangahạ e hinone makoạ kere mẹ̌tatangkiang.

²⁷ Kụ kawe i sai limembong kasěllahenge: taumata mạiang kụkaěng su meda, arau kawe i sai mẹ̌tẹ̌tangkiang si sie? Tantu i saing kụkaiang ene. Arawe Iạ ene su tal᷊oarang kamene kere mẹ̌tatangkiang.

²⁸Su patikụ sigěsạ-Ku i kamene měngkate sěntiniạ dingang-Ku.

²⁹Kerẹewe i Amang seng něgěllịu kawasa si Siạ mẹ̌parenta, kerene lai Iạ e sarung mengonggọu kawasa ene si kamene.

³⁰ Ual᷊ingu ene i kamene wotonge makapahul᷊uasẹ̌ dingang-Ku su tempon Iạ makoạ Datu. Kụ i kamene sarung kumaiang su wowong kadera mapul᷊o dua mědeạu kawasa makaparenta umatʼu Israel mapul᷊o dua su hěntone.”

³¹”Simon, Simon daringihẹ̌ko! Setange seng niapakawala ipanal᷊ukạ si kamene; tabidạu gandung nihae wọu pisine hakịewen mapia e nihae wọu ral᷊akisẹ̌.

³²Arawe Iạ e seng nẹ̌kal᷊iomaneng baugʼi kau, Simon, tadeạu pangangimangu e tawe měnsu. Kụ kereu i kau mẹ̌sasěsilẹ̌ bọu pẹ̌sasal᷊a ute i kau harusẹ̌ panoghasẹ̌ manga anạ u sěmbaụ u.”

³³I Petrus simimbangu, ”Mawu, iạ manilaing sumuẹ̌ su tahungkụ, saral᷊aing mate asal᷊ẹ̌ dingangʼU Mawu!”

³⁴”Pangimangke, Petrus,” angkuěng i Yesus, ”těntal᷊ang manụ deng ta kimẹ̌kukụ sahěllo ini, u i kau e seng těllun sul᷊e nẹ̌děndilu Iạ e.”

³⁵ Bọu ene i Yesus něhengetang si sire, ”Kangerẹ piạ Iạ dimolohʼi kamene ringangu tawe mapakawalang kamene měmpẹ̌bawa dompetẹ̌, kawihẹ̌ arau sapatu, i kamene nikakawusangu manga apa?” ”Tala!” angkuěng i sire.

³⁶”Arawe ini,” angkuěng i Yesus, ”i sai piạ dompete arau kawihe harusẹ̌ pěmpẹ̌bawa; ringangu i sain tawẹ pedane harusẹ̌ pẹ̌bal᷊ụ u lakụe kụ pěmělli peda.

³⁷ U, pangimangke ayetʼu Winohẹ Susi e bawal᷊one kere ini, ’I Sie kai nirekeng kere sěngkatau ral᷊akị,’ hinong mariadi su watangeng-Ku. U apan mạbawohẹ su ral᷊ungu Winohẹ Susi e mětẹ̌tatahinong Iạ e selaing mạdiadi orasẹ̌ ini.”

³⁸”Mawu,” angkuěngu manga muritʼi Yesus, ”kakělla, ěndaung sini piạ peda rarua.” ”Kuhạe!”[28] angkuěng i Yesus.

³⁹Mawu Yesus naněntangken soa e, kụ dimal᷊eng sarang Bukidʼu Zaitun kerẹewe tundune kụ manga muritʼE nahuntol᷊e lai si Sie.

⁴⁰Sarạeng nahumpạ sene, i Sie něhengetang si sire, ”Pěmpẹ̌kal᷊iomaneng mědeạu i kamene tawe mědosa kerẹewe i kamene kasal᷊ukateng.”

⁴¹Mase i Sie nẹ̌těngkaghea kadodọ bọʼi sire, mangawe pamahungangben batu karaune, bọu ene němul᷊angeng dingangu nẹ̌kal᷊iomaneng,

⁴²”Amang,” angkuěngʼE, ”kereu wotonge apakarauko wọu kasasigěsạ kụ humombang si Siạ ini. Kai wal᷊inewe tuhụ kapulu-Ku, kaiso tuhụbe su kapulung Amang sẹ̌sane.” [

⁴³Malạekatẹ̌ sěngkatau riměnta si Sie kụ nanoghasẹ̌.

⁴⁴I Yesus měngkatewe mạsusa naunge hakịu i Sie měngkate makuatẹ̌ mẹ̌kal᷊iomaneng. LiaghanʼE měngkate kere raha tụtědọ su ěntana.]

⁴⁵Bọuten nẹ̌kal᷊iomaneng, i Yesus tangu nẹ̌sul᷊e kapia su anum manga muritʼE. I Sie nakaěbạ e si sire kạpahuntikị e kahian susa naung.

⁴⁶Kutẹu i Sie něhengetang si sire, ”Kawe unụe i kamene měmpẹ̌tẹ̌tikị? Pěmpẹ̌bangungke kụ pěmpẹ̌kal᷊iomaneng, mạdiring i kamene kahinoěngu sasal᷊ukạ.”

⁴⁷Mawu Yesus těntal᷊ang deng kạpẹ̌lẹ̌hengetange riměntạ e taumata sěnggapaeng. I sire lẹ̌ahakeng i Yudas, sěngkatau wọu manga muritʼi Yesus. Bọu ene i Yudas nakoạ sarang anung Yesus mase riměngu si Sie.

⁴⁸Kutẹu i Yesus něhengetang si sie, ”Yudas ual᷊ingu rarěngunu e i kau manarakangu Ahusʼu Taumata?”

⁴⁹Sarạeng manga muritʼi Yesus apang ene sene nakasilọe apa sarung mariadi, i sire němpẹ̌bera, ”Mawu, pilikangkeng kami ringangu peda!”

⁵⁰Mase sěngkatau woʼi sire namilị e ěllangu manga imang mawantugẹ̌ dingangu pẹda hakịu nasahing tul᷊ine koaneng.

⁵¹Kutẹu i Yesus něhengetang, ”Balạete!” Mase i Sie nanenggehẹ̌ tul᷊in tau e kụ niapakapiane.

⁵²Bọu e i Yesus něhengetang su manga imang těmbonange dingangu manga těmbonangu l᷊ukadʼu Wal᷊em Mawu, ringangkewen matatimadʼu Yahudi němpẹ̌děnta sarang ene mědeạu manamẹ si Sie. ”Unụe Iạ kai taumata ral᷊akisẹ̌ tangu, sarang kate i kamene ruměntang pẹda ringangu pal᷊o-pal᷊o měnamẹ si Siạ?

⁵³ Apan kal᷊aěllo Iạ e ene ringangi kamene su Wal᷊em Mawu, i kamene tawe měnamẹ Siạ. Kai ini e seng tempone i kamene kumanoạ, su piạ kawasang kararěndunge nakoạ panekehe.”

⁵⁴I sire něnamẹ si Yesus kụ niěntudẹ̌ su wal᷊en imang mawantugẹ̌. I Petrus ute nẹ̌batụ bọu maraune.

⁵⁵Su tal᷊oaran dělahẹ̌ ene putunge seng niaparěllị kụ i Petrus tamai kimaiang sěngkakaiang dingangi sire mạhungkaiang mělẹ̌likụ putung.

⁵⁶Sěngkatau wọu ěllange wawine nakasilọe si Petrus kụkaiang su wiwihʼu putung kạděllịe; mase ěllang bawine ene namanda si Petrus, bọu e nẹ̌bera, ”Tau ěndaị kanini e mal᷊aing dingang i Yesus!”

⁵⁷Arawe i Petrus nẹ̌děndilẹ̌. I sie nẹ̌bera, ”Iạ mang bẹ̌ga-wěgan tau ěndaị ene!”

⁵⁸Ta nararěnnạ, piạko sěngkatau wal᷊ine nakasilo si Petrus kụ nẹ̌bera, ”I kau mal᷊aing sěngkatau wọʼi sire!” Kai i Petrus simimbang, ”Tala, bal᷊inewe iạ!”

⁵⁹Mangawe sěngkaorasẹ̌ bọu ene, sěngkatauko l᷊ai wal᷊ine mal᷊aing nẹ̌bera maihạ, ”Kahěngang tau ěndaị e muritʼi Yesus, batụu i sie mal᷊aing tau Galilea!”

⁶⁰Kutẹu i Petrus simimbang, ”Kai a su tiněnnanu, iạ běga wue!” Orasẹ̌ ene lai, piạ i Petrus bẹ̌dang kạpẹ̌berane, ute manụ kimukụ.

⁶¹Yesus lai nẹ̌bihu kụ timingang si Petrus. Mase i Petrus nakatahěndungke Mawu seng něhengetang si sie, ”Těntal᷊ang manụ deng ta kimẹ̌kukụ sahěllo ini, i kau seng těllun sul᷊e nẹ̌sunial᷊ʼu Iạ.”

⁶²Tangu simẹ̌bangke i Petrus wọu ene kụ měngkatewe apa simangị marasai.

⁶³Manga taumata kapẹ̌lẹ̌hapane si Yesus e měmpẹ̌tẹ̌taghunalang dingangu nělimadẹ̌ si Sie.

⁶⁴I sire němpanakạ matanʼE ringangu nakiwal᷊o si Sie, ”Kěnang tikạ, i sai nělimadẹ̌ si Kau e?”

⁶⁵Lawọ l᷊ai manga wawera lahinakang kụ nịbaweran sire si Sie.

⁶⁶Sěngkamal᷊ukade, manga matatimadʼu tau Yahudi, manga imang těmbonange ringangu manga mananěntiro agama němpẹ̌komol᷊ẹ̌ bọu ene i Yesus niěntudẹ̌ su těngon Měnggaghuta agaman sire.

⁶⁷”Habareko i kami e,” angkuěng i sire si Sie, ”kai i Kau ini Ratu Mananal᷊amatẹ̌?” Yesus simimbang, ”Kerẹu Iạ měhabarẹ̌ si kamene, kai i kamene mang tawe mangimang.

⁶⁸Kai maning Iạ makiwal᷊o si kamene kai i kamene tawe sumasimbang.

⁶⁹Kai manětạ bọu orasẹ̌ ini, Ahusʼu Taumata sarung maiang su sěmběkang koanengu[29] Mawu Kasěllahenge.”

⁷⁰I sire kěbị němpẹ̌bera, ”Kamageng kerene, i Kau ini kai Ahusʼu Ruata?” Yesus simimbang, ”Kere niwerang kamene.”

⁷¹Tangu i sire němpẹ̌berạ e, ”Tawahal᷊uasʼu mẹ̌gausẹ̌ sasahidine! I kitẹ seng nakaringihẹ̌ bọu mohongʼE sẹ̌sane.”