Read Sangir LUKAS 23 Bible Online

LUKAS 23 - Sangir bible

LUKAS 23

¹Kal᷊awọ mẹ̌sasidang ene nahundarisị bọu ene nẹ̌bawa si Yesus pẹ̌těngon Pilatus.

²Sene i sire nanětạ e němpěngaduhang i Sie. I sire němpẹ̌bera, ”I kami nakahombang tau ini mạmal᷊idẹ̌ kawanua. I Sie mẹ̌sẹ̌sědingu taumata mědeạu abe pěmẹ̌maehẹ̌ balasteng su Kaisarẹ̌, batụu angkuěngʼE i Sie kai i Kristus, sěngkatau ratu.”

³Bọu ene i Pilatus nakiwal᷊o si Yesus, ”Kahěngang bue i Kau ratun tau Yahudi e?” Yesus simimbahẹ̌, ”Mang kere niweranu e.”

⁴Tangu i Pilatus e nẹ̌berạ e su manga imang těmbonange ringangu su taumata l᷊awọ ene. ”Iạ e tawe nakahombang sěmbaụ sal᷊a su tau ini kụ makapěhukung i Sie.”

⁵Arawe i sire saunengkewe lai, ”Měmpẹ̌nẹ̌nahosọu ual᷊ingu těntironʼE i Sie mapẹ̌gẹ̌ganohạ u taumata su kaguwạu Yudea; nitětạ e wọu Galilea kụ tempo ini seng nahumpạ l᷊ai sini.”

⁶Sarạeng i Pilatus nakaringihẹ̌ ene, i sie nakiwal᷊o, ”Apa tau ini, tau Galilea?

⁷Sarạeng nipaul᷊ikang u Yesus kai wọu tampạ su al᷊ungu kawasang Herodes, i Pilatus něndolohʼi Yesus sarang anung Herodes, kụ tempo ene mal᷊aing ene su Yerusalem.

⁸I Herodes měngkatewe mal᷊uasẹ̌ tạ sihinge sarạeng nakasilo si Yesus, ual᷊ingu seng marěngụ i sie makạdingihẹ̌ kakakoạ i Yesus kụ měngkate mẹ̌měnningu makasilo si Yesus. I sie mělẹ̌harapẹ̌ u reng makasilo si Yesus makapẹ̌koạ tanda makạl᷊aherang.

⁹Ual᷊ingu ene i Herodes nangantagu kakiwal᷊o lawọ si Sie, kaiso i Yesus tawe simimbahẹ̌ sarang sěngkamohong.

¹⁰Manga imang těmbonange ringangu manga mananěntiro agama mal᷊aing timatěngo sene kụ měngkate měmpạngěnsilʼi Yesus marasai.

¹¹I Herodes dingangu manga sordadone e měmpẹ̌tẹ̌taghunalang dingangu měmpẹ̌lẹ̌hinakang si Yesus, mase mạpěluhen Sie pakeangu kawawantugẹ̌ bọu e rumolohʼi Sie pẹ̌bal᷊i sarang anum Pilatus.

¹²Su sahěllo ene lai i Herodes dingangi Pilatus, nạung kawe sědụ ute ini e sembeng saụ nẹ̌dal᷊ahapị.”

¹³I Pilatus něngomol᷊en manga imang těmbonange, manga pangahạ, dingangu kawanua,

¹⁴mase nẹ̌bera si sire, ”I kamene nẹ̌bawa tau ini sarang anuku kụ měbẹ̌bera u i Sie makạpal᷊idẹ̌ taumata. Kụ ini su těngong kamene iạ e seng namarikẹ̌sa si Sie kai iạ tawe nakạěbạ kakanoạ e ral᷊akị sarang sěmbaụ kere ilẹ̌ěnsilʼi kamene si Sie.

¹⁵Kerene lai ěbạ i Herodes, batụu i sie lai seng něndolohʼi Yesus e ipẹ̌sẹ̌sul᷊e su anung kami. Tau ini tawe nẹ̌koạ manga apa sarang sěnsul᷊e kụ hinong hukunangu papate.

¹⁶Ual᷊ingu ene iạ měnggeserẹ̌ si Sie bọu ene takụ ipělọ.” [

¹⁷Apan tempong sal᷊imbangu Paskah, i Pilatus harusẹ̌ maměllọ u sěngkatau wọu taumatan tahungkụ baugu kawanua.]

¹⁸Kěbị taumata kụ mạkakomol᷊ẹ̌ sene sěngkapẹ̌bansagẹ̌, ”Patẹ e i Sie! Pěllọ e i Barabas baugʼi kami!” (

¹⁹I Barabas nitahungkụ ual᷊ingu něnggohaeng sutal᷊oaran soa ringangu ual᷊ingu namate.)

²⁰I Pilatus mapulu měměllọ i Yesus ual᷊ingu ene i sie saụ mẹ̌bisara kapia sutal᷊oaran taumata l᷊awọ e.

²¹Kai i sire němpẹ̌bansagẹ̌ u, ”Kuruise i Sie! Kuruise i Sie!”

²²Bọu ene saụ katěllun sul᷊ene i Pilatus nẹ̌bera si sire, ”Kai apa pẹ̌sasal᷊anʼE? Iạ tawe nakaěbạ sal᷊a sarang sěmbaụ si Sie kụ hinong ihukungu hukumang papate! Iạ e měnggeserẹ̌ si Sie mase takụ ipěllọ.”

²³Kai i sire měngkate měbẹ̌bansagẹ̌ sěngapang ihạ i sire u i Yesus kai hinon pakikuruisẹ̌. Kụ samurine pẹ̌bawansagʼi sire timětal᷊ẹ̌.

²⁴Tangu i Pilatus něnawong hukumangu papate si Yesus kerẹewe su kapulun taumata l᷊awọ ene,

²⁵dingangu nělěsọ u taumata kụ dẹ̌dorongang i sire, mangal᷊ene tau kụ nitahungkụ ual᷊ingu pěnggaghohaeng dingangu pamamate. Bọu e i Yesus nisarakangke si sire balạewe koateng tuhụ kapulun sire.

²⁶Ene i Yesus niwawạelain sire. Su tal᷊oaran dal᷊eng, i sire nẹ̌sombangu tau sěngkatau kụ arenge i Simon kụ asal᷊e wọu Kirene kụ seng kạsuẹ̌ e su soa. I sire nanamẹ si sie, mase nisihasang sěngapan botonge pamasaěng kalung kuruisẹ̌ niapatol᷊e si Yesus.

²⁷Lawọ taumata nahuntol᷊e si Yesus — piạko l᷊ai kạdal᷊aụ manga wawine pirang katau. Manga wawine ene mạhunsangị dingangu mạhunggungguin Mawu Yesus.

²⁸Arawe i Yesus nẹ̌bihu si sire ringangu nẹ̌bera, ”Manga wawinen Yerusalem! Abe pahunsangị u Iạ. Pahunsangịen batangeng dingangu manga anạ i kamene.

²⁹U kai sarung duměnta tempone taumata e měmpẹ̌bera, ’Kariangkamang manga wawine wantọ e ringangu tawe němpẹ̌hanạ, dingangu tawe niapasusun manga rariọ!’

³⁰ Su tempo ene taumata e sarung měmpẹ̌bera su manga wul᷊ude, ’Kaensạko si kami!’ Dingangu su manga wongkone, ’Pangambungko si kami!’

³¹Kai kereu su kalu wẹ̌dang biahẹ̌, taumata seng měkẹ̌koạ kere ini ute, kereapa wue sarung pẹ̌kakoạ i sire su kalu mạhẹ̌gu!”

³²Piạ lai ruang katau wal᷊ine — irẹ̌dua taha pẹ̌koạ dal᷊aị — kụ niwawan sire waugu pakikuruisẹ̌ dingang i Yesus.

³³Sarạeng nahumpạ su tampạ kụ isẹ̌sěbạ ”Daran Těmbọ”, i sire nanguruisʼi Yesus dingang i rẹ̌dua tahapẹ̌gue ene — sěngkatau su sěmběka koaneng dingangu sěngkatau l᷊ai su sěmběkane kaihing Yesus.

³⁴ Mase i Yesus nẹ̌kal᷊iomaneng, ”Amang ampunge wue i sire! U i sire wěga wue apa kẹ̌koateng i sire.” Pakeang i Yesus pinẹ̌papahiạen sire sene ringangu lahurị.[30]

³⁵ Taumata l᷊awọ mạhundarisị sene měmpẹ̌bẹ̌biala manga pangahạ u tau Yahudi nẹ̌baheaun Yesus apidʼu nẹ̌bera u, ”I Sie makasal᷊amatẹ̌be taumata wal᷊ine; kěnangko ini i Sie pělěsọkon batangengʼE, kereu i Sie kahěngang-hěngang Datung Sal᷊amatẹ̌ kụ nipilen Mawu Ruata!”

³⁶ Manga sordado l᷊ai nẹ̌baheaun Sie. I sire němpẹ̌haung dingangu němpanẹ̌gon anggorẹ̌ mahaesẹ̌ si Sie,

³⁷apidu nẹ̌bera, ”Kereu i Kau ratun tau Yahudi, pělěsọkon batangengʼU!”

³⁸Su wowong kalung kuruisʼu Mawu Yesus, mạbawohẹ bawera ini: ”Ini e Ratun Tau Yahudi.”

³⁹Sěngkatau wọu tau tahapẹ̌gue mạgaghantong sene něhinakang Mawu Yesus. I sie nẹ̌bera, ”I Kau Ratun Sal᷊amatẹ̌ běgang? Ute pělěsọkon batangengʼU ringangu i kandua l᷊ai!”

⁴⁰Arawe tahapẹ̌gue sěngkatau e wue nẹ̌bera su hapịe angkuěnge, ”Apa i kau tamatatakụ u Mawu Ruata e? I kau seng sěngkakahukungu papate kere i Sie.

⁴¹Kětạeng hukumang si kaduạ ute, někětạeweng kakanoạ i kaduạ. Kai i Sie mang tawẹ sal᷊ane!”

⁴²Mase i sie nẹ̌bera, ”Mawu Yesus, tahěndunge wue iạ kereu i Kau seng duměnta kere sěngkatau Ratu!”

⁴³”Pangimangke,” angkuěng i Yesus si sie, ”sahěllo ini i kau sarung dingang-Ku su Firdaus.”

⁴⁴Mangạe pukul᷊ẹ̌ mapul᷊o dua ěllo rangẹ matangěllo tawe siměnnang dingangu kạguwạu wanua ene měngkate marěndung-děndung sarang pukul᷊ẹ̌ tatěllu wawěllo.

⁴⁵ Gordeng mạgaghantong su ral᷊ungu Wal᷊em Mawu e natingkasẹ̌ napahiạ darua.

⁴⁶ Mase Mawu Yesus něluntingihu tingihʼE maihạ, ”Amang! Su ral᷊ungu l᷊imanʼU Iạ manarakangu watangeng-Ku!” Bọuten něhengetang kerene, i Sie napohong.

⁴⁷Sarạeng těmbonangu sordado e nakasilọe apan seng nariadi, i sie mědẹ̌dalo Mawu Ruata mase i sie nẹ̌bera, ”Kahěngang i Sie Taumata tạ sal᷊ane!”

⁴⁸Taumata l᷊awọ kụ narěnta sene kụ měmpẹ̌biala, nakasilọe apa nariadi. I sire napul᷊ẹ dingangu naung napenẹ u pẹ̌sasasěsilẹ̌.

⁴⁹ Dingangu kěbị kanarang i Yesus laụ e manga wawine kụ nahuntol᷊e si Sie wọu Galilea, mạhundarisị bọu maraune kụ nakasilo kěbị ene.

⁵⁰Piạ sěngkatau arenge i Yusup kụ asal᷊e wọu soang Arimatea su wanuan Yudea. I sie sěngkatau mapia kụ lẹ̌adatengu taumata kụ mal᷊aing kạpangampal᷊e tempone Mawu Ruata manětạ mẹ̌parenta kere sěngkatau Ratu. Maning i sie kai anggotang Měnggaghuta, i sie tawe sěngkanaung su putusang dingangu kakanoạ i sire ene.

⁵¹

⁵²I Yusup e tamai nẹ̌těngon Pilatus kụ měgẹ̌gausẹ̌ tadeạu wadangu Mawu Yesus e pakigěllị si sie.

⁵³Bọu ene i sie nangal᷊ạ badangu Mawu Yesus bọu kalu kuruisẹ̌, mase nipikungu hekạ sapụ bọu hekạ al᷊usẹ̌. Kutẹu nipěllọete su ral᷊ungu kubul᷊ẹ̌ kụ nikakoạ su ral᷊ungu watu hanibẹ̌ — kubul᷊ẹ̌ ene bẹ̌daweng ta nịpapakẹ.

⁵⁴Ěllo ene ěllon sambaiang; dingangu seng maraning pěnanětạu ěllon Sabatẹ̌.

⁵⁵Manga wawine kụ němpẹ̌tol᷊e si Yesus bọu Galilea e timol᷊e lai si Yusup kụ nakasilọe kubul᷊ẹ̌ ene. I sire nakasilo lai kereapa wadangu Mawu Yesus nipěllọ su ral᷊ungu kubul᷊ẹ̌.

⁵⁶ Bọu ene i sire něngkapul᷊ẹ mase němpanạdia manga rampa ringangu l᷊ana mawěngi baugu mělanisẹ̌ badang i Yesus. Su ěllon Sabatẹ̌, i sire tawe něhal᷊ẹ̌ baugu tụtuhụ tita su ral᷊ungu pangangagama.