Read Sangir LUKAS 3 Bible Online

LUKAS 3 - Sangir bible

LUKAS 3

¹Su taung kapul᷊o l᷊imane pẹ̌paparentang Kaisar Tiberius, i Pontius Pilatus nahengkẹ nakoạ Guběrnur su Yudea kụ i Herodes nẹ̌parenta su Galilea. I Filipus anạ u sěmbaụ i Herodes nẹ̌parenta su wanuang Iturea dingangu Trakhonitis. Arawe kawe i Lisanias ute nẹ̌parenta su Abilene.

²Kutẹu nakoạ manga imang mawantugẹ̌ ute kai i Hanas dẹ̌duang Kayafas.[3] Su taung ene ute Mawu Ruata něhengetang si Yohanes anạ i Zakharia su wanua l᷊inggi.

³Tangu i Yohanes rimal᷊eng su apan tampạ su kaguwạu wimbaengu Sal᷊ụ u Yordan e kụ mělẹ̌habarʼu hengetangu Ruata e. I Yohanes něhabarẹ̌ si sire u, ”Pěmpẹ̌tobate i kamene wọu kal᷊awọu rosanu, kụ i kamene harusẹ̌ pakisahani, tadeạu Mawu Ruata mangampung i kamene.”

⁴ Ene, kerẹewe mạbawohẹ su ral᷊ungu bukẹ̌ u Nabi Yesaya: ”Piạ e tingihʼu tau mạmohang su wanua l᷊inggi, ’Diahiko raral᷊engangu Mawu e, pakatateneko daral᷊engang i Sie.

⁵Apang pingkạ e ambunge, apam bul᷊ude ringangu wongkone e sapo. Apang dal᷊eng kalelọ e tul᷊ide, ringangu apang dal᷊eng matatahigagul᷊ẹ̌ e harusẹ̌be tene.

⁶Patikụ taumata su dunia e sarung makasilo sal᷊amatʼu Mawu Ruata e!’ ”

⁷ Mal᷊awọ taumata e mạhunděnta sol᷊ong anung Yohanes e mědeạu makisahani. I Yohanes nẹ̌bera si sire, ”E i kamene taumata raral᷊aị! I sai tangu nẹ̌bera u i kamene makatal᷊ang bọu hukumang u Mawu Kasěllaheng e ramahi kạděntane?

⁸ Todẹ̌ko su kakanoạ i kamene u i kamene kai seng němpẹ̌tobatẹ̌ bọu kal᷊awọu rosang kamene! Kụ kumbahang měnětạ mẹ̌bera u i Abraham e kai i upung i kamene. Pẹ̌tahěndung: Bọu manga watu tamai ini e Mawu Kasěllaheng e mal᷊aing makakoạ pal᷊ahiteng Abraham!

⁹ Bal᷊iung e seng kạdariahi waugu i panuwang kalu sarang manga hamụ e. Tangu apạeweng kalu ta mẹ̌bawuam buane mapia e, sarung tuwangeng kụ iwahung su ral᷊ungu putung.”

¹⁰”Kụ kai apạ e tangu hinong koateng i kami e?” Kerene kakiwal᷊ong taumata lawọ e si Yohanes.

¹¹I Yohanes simimbang, ”I sain piạ l᷊akụ e rarua, gěllịko sěmbaụ e si sain tala; dingangu i sain piạ kaěnge, hinom pěmahiạ l᷊ai.”

¹² Maghaghělle manga bea e mal᷊aing diměnta su anung Yohanes mědeạu makisahani. I sire nakiwal᷊o, ”Tuang Guru, kai iapẹ̌kapura tangu i kami e?”

¹³I Yohanes simimbang, ”Kumbahang maghělle kụ něngalembo wọu apan seng nipoěng.”

¹⁴Piạ l᷊ai sordado nakiwal᷊o, ”Kereapa wue i kami e? Apạ e hinong koateng i kami tangu?” I Yohanes simimbang, ”Kumbahang měmpěngakal᷊ẹ̌ si sai-sai dingangu kumbahang měmpěhampasẹ̌ doitẹ̌ ual᷊ingu pěngangangěnsilẹ̌ tạ katěngade. Kaiso pěmpẹ̌kadarewen ěbạ i kamene e!”

¹⁵Su tempo ene tangu taumata e nanětạ e měkẹ̌kakiwal᷊o, měnsang i Yohanes ute kai Ratu Měnanal᷊amatẹ̌ lẹ̌antiwang i sire ngae.

¹⁶Kai ual᷊ingu ene hakịu i Yohanes nẹ̌bera si sire kěbị, ”Iạ e měnẹ̌nahani si kamene e ringangu akẹ, kai hědowen sarung duměnta Taumata něngalembong kasěllahe wọu iạ e. Kal᷊ingung měluka tal᷊ing sapatune e, iạ e mal᷊aing tawe wotonge. I Sie sarung měnahani si kamene ringangu Rohkẹ̌ u Ruata e dingangu putung.

¹⁷Su l᷊imanʼE seng piạ nihung mědeạu pẹ̌taěkang kěbị gandung e sarangkewe mawurẹ̌si. Gandung sarung ikomol᷊ẹ̌ su ral᷊ungu pěndaresokange, arawe kěbị apam bal᷊ẹ̌kane sarung tutungangʼE su ral᷊ungu putung tawe masasẹ̌bu!”

¹⁸Kerene i Yohanes mạnal᷊ěntihọ si sire ringangu haghing kakakoạ e, su tempọen sie mělẹ̌habaru Injilẹ̌.

¹⁹ Arawe i Herodes datun Galilea e nisěngkul᷊ang i Yohanes hal᷊ẹ̌ u pẹ̌kakawinge ringang i Herodias, kinawing u tuhang e, dingangkewelain su hal᷊ẹ̌ u kěbị kararal᷊aị bal᷊ine e kụ seng kinoạ e.

²⁰Kaiso i Herodes kai sauneng něnambang kararal᷊akise kụ dingangu nanuẹ̌ i Yohanes su ral᷊ungu tahungkụ.

²¹Tangu sarangke taumata kěbị e seng nisahani, i Yesus nisahani l᷊ai. Kụ piạ e i Sie kapẹ̌kẹ̌kal᷊iomanenge, tangu langị e nahěngẹ,

²² kụ Rohkẹ̌ u Ruata e nẹ̌těngkatěntung si Sie kere manụ paluma su pusige. Bọu ene kinaringihe tingihʼu Mawu Ruata e něhengetang, ”I Kau e kai Ahusẹ̌-Ku ikẹ̌kěndagẹ̌ e. I Kau e makạl᷊uasẹ̌ naung-Ku e.”

²³Su tempon Mawu Yesus nanětạ u munaranʼE, umurʼE seng piạ u manga těllum pul᷊o su taunge. Angkuěngkewen taumata, uade i Sie kai anạ i Yusup, anạ i Eli,

²⁴anạ i Matat, anạ i Lewi, anạ i Malkhi, anạ i Yanai, anạ i Yusup,

²⁵anạ i Matica, anạ i Amos, anạ i Nahum, anạ i Hesli, anạ i Nagai,

²⁶anạ i Maat, anạ i Matica, anạ i Simei, anạ i Yosekh, anạ i Yoda,

²⁷anạ i Yohanan, anạ i Resa, anạ i Zerubabel, anạ i Sealtiel, anạ i Neri,

²⁸anạ i Malkhi, anạ i Adi, anạ i Kosam, anạ i Elmadam, anạ i Er,

²⁹anạ i Yesua, anạ i Eliezer, anạ i Yorim, anạ i Matat, anạ i Lewi,

³⁰anạ i Simeon, anạ i Yehuda, anạ i Yusup, anạ i Yonam, anạ i Elyakim,

³¹anạ i Melea, anạ i Mina, anạ i Matata, anạ i Natan, anạ i Daud,

³²anạ i Isai, anạ i Obed, anạ i Boas, anạ i Salmon, anạ i Nahason,

³³anạ i Aminadab, anạ i Admin, anạ i Arni, anạ i Hezron, anạ i Peres, anạ i Yehuda,

³⁴anạ i Yakub, anạ i Ishak, anạ i Abraham, anạ i Terah, anạ i Nahor,

³⁵anạ i Serug, anạ i Rehu, anạ i Peleg, anạ i Eber, anạ i Salmon,

³⁶anạ i Kenan, anạ i Arpakhsad, anạ i Sem, anạ i Nuh, anạ i Lamekh,

³⁷anạ i Metusalah, anạ i Henokh, anạ i Yared, anạ i Mahalaleel, anạ i Kenan,

³⁸anạ i Enos, anạ i Set, anạ i Adam, anạ u Ruata.