Read Sangir LUKAS 4 Bible Online

LUKAS 4 - Sangir bible

LUKAS 4

¹Mawu Yesus napenẹ u Rohkẹ̌ u Ruata e su tempong i Sie naněntangu sal᷊ụ u Yordan e. Rohkẹ̌ u Ruata e nangahạ si Sie sol᷊ong banua l᷊inggi.

²Sene i Sie nisal᷊ukateng u setang ěpạ u pul᷊o su ěllone karěngụe. Karěngụewen ěllo ene, i Sie tawe kimaěng manga apa-apa kụ pěngěnsueěnge i Sie nakapěndang nahutung.

³Setang nẹ̌berạe si Sie, ”I Kau Ahusẹ̌ben Duata arauěng? Ute pěngoroko watu ěndaị apakakoạ borotẹ̌.”

⁴ Tangu Mawu Yesus simimbang, ”Su ral᷊ungu Winohẹ Susi kạbawohẹ, ’Taumata e tawe makapẹ̌biahẹ̌ sěmatang bọu borotẹ̌.’ ”

⁵Mase setange něngahạe si Yesus sol᷊ong sěmpalang marangẹ, kụ su ral᷊ungu sěngkakondạ tangu setange nanodẹen patikụ kararatuangu dunia ini e si Sie.

⁶”Patikụ kawasa ringangu kakakalạ ěndaị e sarung takụ onggotang si Kau e,” angkuěngu setang si Yesus e, ”ual᷊ingu patikụ ene seng nighěllị si siạ, ute walạewe iạ mapulu měnsang takụ ionggọ si sai-sai.

⁷Tangu patikụ ene sarung makoạ bạgeangʼU, kereu i Kau mẹ̌suba su těngoku.”

⁸ I Yesus simimbang, ”Su ral᷊ungu Winohẹ Susi e mạbawohẹ, ’Pẹ̌subạe su Mawu Kasěllahenge kụ pẹ̌tahamawụ e si Sie sẹ̌sane.’ ”

⁹Mase setange nangahạewen Yesus sol᷊ong Yerusalem kụ naměllọ i Sie su wowong atụ u Wal᷊em Mawu e, kụ nẹ̌berạe si Sie, ”I Kau Ahusẹ̌ben Mawu Ruata arau ěng? Ute tumpạ e wọu ini.

¹⁰ Batụu su ral᷊ungu Winohẹ Susi e mạbawohẹ, ’Mawu Ruata e sarung mẹ̌parenta manga malạekatẹ̌ ipěnanudẹ̌ pakapia-pia si Kau.’

¹¹ Kutẹu lai, ’Manga malạekatẹ̌ sarung měmpanal᷊endeng si Kau ringangu l᷊imang sire, tadeạu l᷊aedʼU e lai tawe matangga su watu.’ ”

¹² I Yesus simimbang, ”Su ral᷊ungu Winohẹ Susi mạbawohẹ, ’Kumbahang manal᷊ukạ Mawu Kasěllahenge Ruatanu.’ ”

¹³Tangu sarạeng setange nangědọe nanal᷊ukạ si Yesus dingangu haghin sasal᷊ukạ, tangu i sie namehọe wọu anun Yesus kụ něngampal᷊ẹ̌ tempone mapia.

¹⁴Bọu e i Yesus nẹ̌sul᷊ẹ e sol᷊ong Galilea; kụ i Sie nilohoěngken Rohkẹ̌ u Ruata e. Kụ telengu mạanun Sie měngkatewe nasěsahẹ̌ su patikụ banua ene.

¹⁵I Sie mạněntiro su manga wal᷊em pẹ̌kakal᷊iomanengang ringangu kěbị taumata mẹ̌dẹ̌dalo si Sie.

¹⁶Ene i Yesus natamai lai sol᷊ong Nazaret tampạe nạung kinasariaěnge. Su ěllon Sabatẹ̌ e tuhụewe tundune i Sie simuẹ̌ su wal᷊em pẹ̌kakal᷊iomanengang. I Sie nẹ̌buạ dimarisị mẹ̌basa Winohẹ Susi e,

¹⁷kụ nighěllikangkem bukẹ̌ u Nabi Yesaya. I Sie namingkahẹ̌ bukẹ̌ ene, mase nakahombang ayetẹ̌ ini,

¹⁸ ”Rohkẹ̌ u Mawu ene si Siạ, batụu i Sie seng nělanisẹ̌ si Siạ tadeạu ipẹ̌lẹ̌habarʼu habarẹ̌ makạdal᷊uasẹ̌ e su makakasiang. I Sie rimolohʼu Iạ mědeạu pěmẹ̌mohangu karal᷊ěsọ u mạtatahungkụ dingangu kawawekesu matan tau wuta; iapělẹ̌liu tau tẹ̌tumbiagheng

¹⁹ringangu iapělẹ̌habarʼu orasʼu rarěntang Mawu e, makasal᷊amatẹ̌ umatʼE pinilene.”

²⁰Mase i Yesus wọeten něndul᷊ung bukẹ̌ ene kapia kụ naněgong ene su mělahal᷊ẹ̌, bọu ene i Sie kimaiang.[4] Matang kal᷊awọu taumata su ral᷊ungu wal᷊em pẹ̌kakal᷊iomanengang e měngkatewe matatandạ si Sie.

²¹Tangu i Yesus nanětạe něhengetang si sire kere ini, ”Manga ayetʼu Winohẹ Susi su sahěllo ini e pinakasěhụ su orasʼu i kamene nakaringihẹ̌.”

²²Manga wawera niweranʼE měngkatewe maral᷊ěnggihẹ̌, hakịu i sire němpẹ̌dal᷊inaụ dingangu mạbohang si Sie. I sire němpẹ̌bera, ”Kai wal᷊inewe anạ i Yusup i Sie Ho?”

²³Tangu i Yesus něhengetang si sire, ”Ěndịu i kamene mang mẹ̌pakẹu sasailing bawera ini e si Siạ, ’Dokterẹ̌ pangundangko watangengue. Apan nakal᷊aherang kinaringihʼi kami e nikoạ u su Kapernaum, koạko l᷊ai su soan gaghurangu e.’ ”

²⁴ I Yesus saụewe něnamba, ”Pẹ̌tahěndungke, tawe apa nabi kụ lẹ̌adateng su soane sẹ̌sane.

²⁵ Ual᷊ingu ene daringihẹ̌ko: su tempong Elia, piạ e arẹ̌gan těllu taung ěnnungu wul᷊ang karěngụe tawe rimasehẹ̌, hakịu piạ e karal᷊unusẹ̌ masaria su kạguwạu wanua. Su tempo ene lawọ manga wawine wal᷊u su Israel.

²⁶ Maning seng kerene, Mawu Ruata e tawe něndolohʼi Elia tamai sol᷊ong sěngkatau wọu manga wal᷊u e, kaiso kětạewen sol᷊ong anun sěngkatau wawine wal᷊u su Sarfat su wanuang Sidon.

²⁷ Kerene lai su tempon Nabi Elisa mal᷊awọ taumata su Israel piạ sakịe kusta makatatakụ, kaiso tawẹu sarang sěngkatau l᷊ai woʼi sire nipakaul᷊e, tumbạewen i Naaman tau Siria e.”

²⁸Kěbị taumata su wal᷊em pẹ̌kakal᷊iomanengang e měngkatewe nisawelangu pẹ̌du sarạeng nakaringihẹ̌ tamai ene.

²⁹Kụ i sire měngkatewe němpẹ̌bua mase nanokol᷊ʼi Yesus nipasẹ̌bang bọu soa, ringangu niwawan sire sarang lengehu wul᷊ude, pinẹ̌koateng soan sire. I sire mẹ̌nẹ̌naung u měnuhudʼi Sie su těnggilihange.

³⁰Arawe i Yesus dimal᷊eng bọu tal᷊oaran taumata l᷊awọ e apidu natamai.

³¹Bọu e i Yesus tamai sol᷊ong soan Kapernaum su Galilea. Su tampạ ene i Sie mạněntiro taumata l᷊awọ su ěllon Sabatẹ̌ e.

³² Kụ i sire mangkewen měmpẹ̌dal᷊inaụ nakasilo kakakoạʼE maněntiro, u i Sie mẹ̌bẹ̌bera ringangu kawasa.

³³Ene su wal᷊em pẹ̌kakal᷊iomanengang piạ e sěngkatau nisakeěngu rohkẹ̌ dal᷊akị. Tau ene měngkatewe namansagẹ̌ maihạ-ihạ,

³⁴”Ei Yesus, tau Nazaret, i Kau mapulu mẹ̌koạ apa si kami? I Kau riměnta maminasa si kami e? Iạ masingkạ i sai Kau! I Kau kai rarolohangu Ruata!”

³⁵”Pakarěmmasẹ̌ko!” Pal᷊ěndihʼi Yesus su rohkẹ̌ dal᷊akị e. ”Pěmpẹ̌sẹ̌bangke wọu tau ěndaị e!” Mase rohkẹ̌ dal᷊akị e wọuten napakawẹ̌bahu tau e su těngon sire kẹ̌bị, bọu e simẹ̌bang wọu tau ene, kụ tawe kạdiongeng nakapẹ̌kapura si sie.

³⁶Kěbị taumata naral᷊ingu kụ němpẹ̌bera sěngkatau su wal᷊ine, ”Bal᷊inewe mal᷊ongkọ manga waweranʼE. Piạ pěhěngkingʼE ringangu kawasanʼE, i Sie nẹ̌parenta manga rohkẹ̌ daral᷊aị pasẹ̌bang, kụ i sire nahunsěbangke wue!”

³⁷Kutẹu telengu mạanun Yesus měngkatewe nẹ̌sasěsahẹ̌ su apam beọ u wanua nal᷊ikụ.

³⁸I Yesus simẹ̌bang bọu wal᷊em pẹ̌kakal᷊iomanengang e, mase rimangeng su wal᷊eng Simon. Kutẹu i empong Simon bawine e kai lụl᷊ěhabẹ̌, kụ i sire nakitul᷊ungke si Yesus e.

³⁹Tangu i Yesus himaung su ral᷊okangu tau wawine ene, kụ napakailangu lěhabẹ̌ ene. Kụ lěhabẹ̌ e naintal᷊ẹ̌ dingangu i empong Simon bawine e měngkatewe nẹ̌bangung dingangu nẹ̌tangkiang si sire.

⁴⁰Ene sarạeng matangěllo simědạ e ute kěbị taumata němpangěntudẹ̌ sol᷊ong anung Yesus apạewen anạ u sěngkataun sire balạewe měnsang sakị apa. I Yesus e něnělidʼu l᷊imanʼE su pẹ̌sěngkatau kụ napakapian sire.

⁴¹Manga rohkẹ̌ daral᷊aị e mal᷊aing nahunsẹ̌bang bọu taumata l᷊awọ e, apidu kạpẹ̌mansage maihạ, ”I Kau Ahusʼu Ruata e!” Kutẹu i Yesus kai němal᷊ěndihẹ̌ si sire kụ tawe napakawalan sire niapẹ̌bera, watụ u i sire kawe masingkạ u i Sie kai Ratu Mananal᷊amatẹ̌.

⁴²Sarạeng matangěllo e nanětạe siměnnang i Yesus naněntangu soa ene mase nakoạ sol᷊ong tampạ tạ taune. Kutẹu taumata l᷊awọ e nanětạ e mědẹ̌deạ si Sie kụ piạ e i sire nakaěbạ si Sie, i sire měngkai mạmaedẹ̌ si Sie u abe apẹ̌něntang i sire.

⁴³Kaiso i Yesus něhengetang, ”Injilẹ̌ mạanun kereapa Mawu Ruata e mẹ̌parenta ute hinon Takụ habareng lai su manga soa wal᷊ine batụu kai ene Mawu Kasěllahenge rimolohʼu Iạ sol᷊ong dunia e.”

⁴⁴Ual᷊ingu ene Mawu Yesus měngkawe měnẹ̌nasẹ̌ su manga kanisa su patikụ soan Yudea e.