Read Sangir LUKAS 5 Bible Online

LUKAS 5 - Sangir bible

LUKAS 5

¹ Sěnsul᷊e tempo i Yesus rụdarisị su apeng u Ranong Genesaret. Lawọ taumata měngkate měngkạsěngkilẹ̌ měgẹ̌gausẹ̌ dumaringihẹ̌ hengetang u Mawu Kasěllahenge.

²Kụ i Yesus nakasilo sakaeng duang gěsa mạsasiladẹ̌ su apeng ene. Manga mẹ̌papakisaghẹ e ute nạung nahuntumpa wọu sakaeng e kụ měmpạnẹ̌bang somạ i sire.

³I Yesus měngkatewe simake su sěnggěsa su sakaeng i Simon, mase něngoro si Simon apẹ̌nondo sakaeng e riọ pakaghea wọu apeng. Yesus naiang su ral᷊ungu sakaeng e kụ naněntiro taumata l᷊awọ bọu ral᷊ungu sakaeng e.

⁴Sarạeng i Sie nangědọe něhengetang e tangu i Sie nẹ̌berạe si Simon, ”Pundal᷊ẹ̌ko sasaẹ sol᷊ong tampạ maral᷊ung e kụ paněntangkon somạ i kamene su sasị mědeạu panamẹ kinạ.”

⁵ ”Tuang Guru,” nisimbangi Simon, ”kanandun hẹ̌bi e i kami nạung mětẹ̌těngkasaghedẹ̌, kai i kami e tawe nakaal᷊ạ apa-apa! Kai ual᷊ingken i Tuang nangoro e, ute kerenẹ e; iạ deng saụ maněntang u somạ.”

⁶ Bọuten i sire němpẹ̌koạ kerene, i sire nakal᷊iwungke ghapaěngu kinạ l᷊awọ-l᷊awọ hakịu somang sire nanětạe naghehẹ.

⁷Ual᷊ingu ene i sire němpangalapẹ e mẹ̌dẹ̌dorong tul᷊ung su manga ringang i sire su sakaeng bal᷊ine e, apẹ̌sẹ̌sumbala si sire. Manga ringangi sire ramahịe mase i sire nẹ̌tatal᷊iwung nělurangken kinạ e su sakaeng duang gẹ̌sa e pinakapenẹ hakịu manga sakaeng e masarạ mawul᷊usẹ̌.

⁸Sarangke i Simon nakasilo ene, ute i sie měngkatewe nẹ̌tumpěkuhẹ̌ su těngon Yesus e, mase nẹ̌berạe, ”Těntangke iạ, Mawu! U iạ kai taumata warạdosa!”

⁹I Simon dingangu kěbị taumata ringangi sie mangkewen dimal᷊inaụ nakasilo kinạ kerene kal᷊awọe nikasamẹ i sire.

¹⁰Kerene lai manga hapị i Simon, u i Yakobus dẹ̌duan Yohanes, manga anạ i Zebedeus. Ene i Yesus něhengetangke si Simon, ”Abe katakụ! Manětạ bọu ini e i kau kai makoạ mananomạ taumata.”

¹¹I Simon ringangkewelain manga ringange němpamuạ sakaeng ene sol᷊ong apeng, bọu e naněntangu kěbị ene, mase nahuntol᷊e si Yesus.

¹²Piạ sahěllo i Yesus nạung su soa sěmbaụ. Paị sene lai piạ sěngkatau esẹ kụ badange natukusu sakị u pisị makạtatakụ.[5] Kutẹu sarang i sie nakasilo si Yesus e, i sie nẹ̌těngkasumagẹ̌ su těngone apidu mẹ̌dẹ̌dorong, ”Tuang, kereu i Tuang mapulu, ute i Tuang deng mapakapian iạ e!”

¹³Tangu i Yesus měngkatewe něngumpaedẹ̌ tau ene apidu něhengetang, ”Iạ e mapulu kụ kapiạ e!” Orasẹ̌ ene lai sakị e měngkatewe naněntang.

¹⁴ Mase i Yesus nẹ̌sědingken tau ene mẹ̌běkeng hal᷊ẹ̌ ene su patikụ taumata angkuěngʼE, ”Dakọe pẹ̌těngkatodẹ su imang kụ pẹ̌dorong si sie pěnahiring kau e kụ seng naul᷊e e. Bọu e tamai pẹ̌bawa sasěmba kere tinitan Musa e ipanahuntěngadẹ̌ su manga taumata u i kau mamben těnga-těngadẹ̌ seng naul᷊e.”

¹⁵Arawe telengu i Yesus kai sauneng napěpidẹ̌ su apan tampạ kụ měngkai lawọ taumata němpẹ̌děnta měgẹ̌gausẹ̌ dumaringihẹ̌ si Sie ringangu makikapian sakị i sire.

¹⁶Bọu ene i Yesus nangingkạ nẹ̌kal᷊iomaneng su tampạ tạ taune.

¹⁷Su sěnsul᷊e tempo piạ e i Yesus kạpaněntirone piạ pirang katau tau Farisi ringangu manga mananěntiro agama mạhungkaiang sene. I sire nạung nahunděnta wọu Yerusalem dingangu wọu manga soa su Galilea ringangu Yudea e. Kụ kawasang Mawu Kasěllahenge ene mẹ̌tẹ̌tumanạ si Yesus mědeạu mapakapiam manga masasakị.

¹⁸Kutẹu su tempo ene sěngkianu piạ pirang katau nahunděnta němpẹ̌bawa sěngkatau peosẹ̌ pětẹ̌timbangeng sural᷊okange. I sire měngkai mẹ̌tẹ̌tawakal᷊i manuẹ̌ tau ene sol᷊ong dal᷊ungu wal᷊e mẹ̌deạu ipěllọ su těngong Yesus e.

¹⁹Kai ual᷊ingken taumata tumanịu l᷊awọ sene ute i sire tate nakasuẹ̌. Tangu i sire nělěngkangken sie su wowong atụ u wal᷊e. Mase i sire nělekese atụ e ringangu nangul᷊uhʼi sie ringangkewen dal᷊okaěnge su těngong Yesus su tal᷊oaran taumata l᷊awọ ene.

²⁰Ene sarạeng i Yesus nakasilo kerene kaguwạe pangangimang i sire, i Sie něhengetang su tau ene, ”Anạ u sěmbaụku ikẹ̌kěndagẹ̌, dosanu e seng niampungang.”

²¹Manga mananěntiro agama ringangu manga tau Farisi nanětạe němpẹ̌bera sěngkatau su wal᷊ine, ”Kai i sai tau ěndaị e wahani něhinakang Mawu Ruata e? I sai wue makaampung dosa, sul᷊ikudʼu Mawu sẹ̌sane?”

²²I Yesus masingkạ u kakiwal᷊on sire, kụ i Sie něhengetang, ”Kawe unụe i kamene měkẹ̌kiwal᷊o kerene su ral᷊ungu naungu?

²³Mal᷊owọkangbe sude ngae, mẹ̌bera u, ’Kal᷊awọu rosanu e seng niampungang’, arau mẹ̌bera u, ’Pẹ̌bangungke, mase ral᷊engke!’?

²⁴Arawe orasẹ̌ ini e Iạ sarung manahuntěngadẹ̌ si kamene u su wowong dunia ini e Ahusʼu Taumata e kawasa mangampung dosa e.” Mase i Yesus něhengetang su tau nipeosẹ̌ ene, ”Pẹ̌bangungke, panapuạe raral᷊okaěngu kụ kapul᷊ẹ e!”

²⁵Ene i sie měngkatewe nẹ̌bangung su těngon sire kěbị, mase nanapuạ dal᷊okaěnge kụ napul᷊ẹ kạpẹ̌dalone Mawu Ruata e.

²⁶Tangu i sire kěbị mangkewen němpẹ̌dal᷊inaụ kụ němpẹ̌dalo Mawu Ruata e. Kụ dingangu pěndangu katatakụ i sire němpẹ̌bera, ”Apa makadal᷊inaụ kahěngang kinasilon kitẹ su sahěllo ini!”

²⁷Bọu ene i Yesus simẹ̌bang kụ nakasilo sěngkatau maghaghělle bea, arenge i Lewi, kụkaiang su kantorẹ̌ e. I Yesus něhengetang si sie, ”Tol᷊ẹe Siạ.”

²⁸Ene i Lewi měngkatewe nẹ̌buạ kụ naněntangu kěbị, mase timol᷊e si Yesus e.

²⁹Tangu bọu ene i Lewi nẹ̌koạko sal᷊iwang baugʼi Yesus su wal᷊ene. Lawọ maghaghělle bea ringangu taumatạewe wal᷊ine nahungkaěng dingang i sire.

³⁰ Kutẹu pirang katau tau Farisi ringangu manga mananěntiro agama nakapěndang naunge tạ kal᷊oahenge, tangu němpẹ̌bera su manga muritʼi Yesus, ”Unụe i kamene kěbị mạhungkaěng dingangu měmpạnginung dingangu maghaghělle bea ringangu manga taumata raral᷊akị?”

³¹I Yesus simimbang, ”Tau mal᷊ahuweka e tawe hinom piạ mangangundange; kaiso kawe masasakị e.

³²Iạ diměnta wal᷊inewe měkẹ̌kui taumata makapěndang batangenge mapia, kaiso taumata marosa tadeạu i sire měmpẹ̌tobatẹ̌ bọu kal᷊awọu rosan sire.”

³³Ene i sire němpẹ̌bera si Yesus, ”Muritʼi Yohanes ringangu muritʼu tau Farisi e masau měmpẹ̌puasa ringangu měmpẹ̌kal᷊iomaneng. Arawe manga muritʼU ute měngkawe mạhungkaěng dingangu měmpạnginung.”

³⁴Kutẹu i Yesus simimbang, ”Apa i kamene makakoạ mangoro manga sake ipẹ̌puasa su sal᷊iwangu kawinge, těntal᷊ang kaghiang esẹ e reng dingangi sire? Tantu tala!

³⁵Kai sarung mịdating tempone kaghiang esẹ ene al᷊akeng bọu anun sire. Kụ su tempo ene i sire wuhụewe měmpẹ̌puasa.”

³⁶Mase i Yesus nẹ̌běken papinintu ini si sire, ”Tawẹu sarang sěngkatau měnděpellẹ̌ lakụ těbe dingangu ririsu lakụ buhu. Batụu i sie kai makaghehẹ lakụ buhu ene. Mase lai hekạ darěpelẹ̌ buhu e tawe nẹ̌kětạ su lakụ těbe.

³⁷Kerene lai tawẹ taumata mẹ̌tẹ̌tahong anggorẹ̌ buhu e su kawihẹ̌ pisị těbe, u anggorẹ̌ buhu e kai sarung makariading kawihẹ̌ ene mawẹ̌desẹ̌. Kutẹu anggorẹ̌ e nawosọ e ringangu kawihẹ̌ e magholọ.

³⁸Anggorẹ̌ buhu e hinong itaho su ral᷊ungu kawihẹ̌ buhu l᷊ai.

³⁹Kerene lai tawẹ taumata mapulu manginung anggorẹ̌ buhu kereu seng bọu nanginung anggorẹ̌ těbe. ’Anggorẹ̌ těbe uade kai katemangenge,’ angkuěnge.”