Read Sangir LUKAS 7 Bible Online

LUKAS 7 - Sangir bible

LUKAS 7

¹Tangu sarạeng nasuẹ e kal᷊awọu hengetange su taumata l᷊awọ, i Yesus simuẹ̌ e su Kapernaum.

²Sene piạ těmbonangu sordadong Roma e piạ ěllange ikẹ̌kěndage. Kutẹu ěllang ene kai masakị marasai, kụ seng marani mate.

³Su tempon těmbonangu sordado nakaringihẹ̌ u kai piạ i Yesus e, i sie rimolohʼu pirang katau manga těmbonangu tau Yahudi iapẹ̌sombang i Sie tadeạu pẹ̌gẹ̌gausẹ̌ si Sie apạděnta kụ apạkapiang ěllange.

⁴Ene, sarạeng i sire narěntạe su anung Yesus, i sire měngkatewe mẹ̌dẹ̌dorong tadeạu i Sie měngambang těmbonangu sordado e, ”Těmbonangu sordado ene hinong ambangeng i Tuang,” angkuěng i sire si Yesus.

⁵”U i sie kai kụkěndagʼu wansang kitẹ e kụ seng němangung wal᷊em pẹ̌kakal᷊iomanengang waugʼi kami e.”

⁶Tangu i Yesus měngkatewe rimal᷊eng sěngkahindọ dingangi sire. Kutẹu i Yesus seng mạdaniem bal᷊e e těmbonangu sordado ene rimolohen manga hapịe su anunʼE mẹ̌deạu iapẹ̌bera, ”I Tuang manịeng tawe mẹ̌těngkasaghedẹ̌, sol᷊ong bal᷊eku. Iạ ta hinone manarimạ i Tuang su wal᷊eku e.

⁷Hakịu ene iạ sẹ̌saku tawe wahani humaung si Tuang. Kụ botongke pẹ̌hengetang sěngkamohong tadeạu ěllangku e seng mul᷊e.

⁸U iạ e mal᷊aing mạsasěllung su parentang mangangawasa ringangu su al᷊ungu iạ piạ l᷊ai manga sordado mal᷊aing harusẹ̌ sumasuměllung su parentaku. Kereu iạ mẹ̌bera su sěngkatau sordado, ’Rakọko!’ ute i sie rumal᷊eng; dingangu kereu iạ mẹ̌bera su wal᷊ine, ’Mahiko!’ ute i sie mitụ. Dingangu kereu iạ mẹ̌parenta ěllangku, ’Pẹ̌koạko ini!’ ute i sie mẹ̌koạ.”

⁹I Yesus naral᷊ingu nakaringihẹ̌ ene. I Sie nẹ̌bihu kụ něhengetang su taumata l᷊awọ mạhuntol᷊e si Sie, ”Nanihing bue tau ěndaị e. Su tal᷊oaran taumatang Israel e Iạ mang ta nakạhombang pangangimang kasěllahe kere ini!”

¹⁰Tangu sarạeng taumata nirol᷊ohẹ̌ e něngkawal᷊ị su wal᷊eng těmbonangu sordado ene tangu ěllang ene napiạ e.

¹¹Tawẹ karěngụe samuring ene,[7] i Yesus nakoạ sol᷊ong soan Nain. Manga muritʼE ringangu taumata l᷊awọ e mạhundingang i Sie.

¹²Ene sarạeng i Yesus lụhaung pasěllangeng u soa e ute manga taumata ěnsaẹ měmpẹ̌tẹ̌tatimbang taumata nate ene sarang l᷊ikudu soa ute kai anạ esẹ, anạ u tau wawine wal᷊u mang sěmbaụ. Lawọ taumatan soa e němpẹ̌tal᷊eing tau wawine ene.

¹³Ene sarạeng Mawu Yesus nakasilo tau wawine ene, i Sie timal᷊ěntụ e mase něhengetang, ”Kuhạe sumangị, bawine!”

¹⁴Bọu e i Yesus himaung ringangu nanenggehẹ̌. Tangu mamamenteng e nangẹ̌dung kụ i Yesus něhengetang, ”Ei umbaseng Iạ mẹ̌bera si kau pẹ̌bangungke!”

¹⁵Umbaseng nate ene něpětịe kimaiang dingangu nanětạe nẹ̌bera. Tangu i Yesus e něnarakangke si ninange.

¹⁶I sire kěbị e něngkatakụ e kụ nanětạe němpẹ̌dalo Mawu Ruata. I sire němpẹ̌bera, ”Sěngkatau nabi masěllahẹ̌ e seng limẹ̌to su tal᷊oarang kitẹ e! Mawu Ruata e seng diměnta tadeạu makasal᷊amatẹ̌ kawanuanʼE!”

¹⁷Tangu habarẹ̌ mạanun hal᷊ẹ̌ i Yesus e niměnẹ su patikụ banuan Yudea ringangu ghal᷊ipohone.

¹⁸Manga muritʼi Yohanes e tangu němpaul᷊ịe si Yohanes kal᷊awọu sạbarang ene. Ene i Yohanes kimuịe murite ruang katau.

¹⁹Mase něndolohen sire sol᷊ong anun Mawu Yesus e kụ nakiwal᷊o, ”Seng i Tuang tangu sarung duměnta kere su riandin Mawu Ruata e arau měnsang i kami reng iapạngampal᷊ẹ̌ taumata wal᷊ine?”

²⁰I rẹ̌dua muritʼi Yohanes e natamai sol᷊ong anun Yesus kụ nẹ̌bera, ”I Yohanes Mananahani něngoro si kami pakịbal᷊o si Tuang, měnsang i Tuang kai taumata kụ sarung marěnta tumuhụ diandin Duata e arau i kami měngampal᷊ẹ̌ taumata wal᷊ine?”

²¹Orasẹ̌ ene, i Yesus napakapian taumata l᷊awọ dingangu něnguserẹ̌ kal᷊awọu rohkẹ̌ daral᷊akị apidu napẹ̌kěllan taumata wuta mal᷊awọe.

²² Tangu i Yesus simimbang, ”Pěmpẹ̌sul᷊ẹ e sol᷊ong anung Yohanes kụ pěmpẹ̌habarẹ̌ apang kinaringihẹ̌ dingangu kinasilong kamene: tau wuta nẹ̌kělla, tau peosẹ̌ nakaral᷊eng, tau piạ sakịe pisị makạtatakụ[8] naul᷊ẹ e, tau wengelẹ̌ nakaringihẹ̌, tau nate nẹ̌biahẹ̌ saụ, dingangu Injilʼu Mawu Ruata e nilahabarẹ̌ su taumata kasiang.

²³Kariangkamang, i sain tạ kadiongeng dal᷊engu mẹ̌sunial᷊u Iạ.”

²⁴Su pal᷊useng manga rarolohang i Yohanes e, tangu i Yesus nanětạe něhengetang su taumata l᷊awọ mạanun Yohanes, angkuěngʼE, ”I kamene nahunsẹ̌bang sol᷊ong banua l᷊inggi e kai měmpẹ̌kakělla apa? Hiung ipẹ̌gẹ̌gaghinggeng anging?

²⁵I kamene nahunsẹ̌bang timingang apa tangu? Sěngkatau měpẹ̌pakeang mal᷊ěnggihẹ̌? Taumata apang měpẹ̌pakeang kerene ringangu měbẹ̌biahẹ̌ masasẹ̌dapẹ̌ e kai mětẹ̌tanạ su wal᷊eng mararatu!

²⁶Kụ i kamene kai simẹ̌bang němpẹ̌tingang apa tangu? Němpẹ̌tingang nabi ngae? Ore! Limembol᷊ain sěngkatau nabi!

²⁷ Kai i Yohanes nạung ipẹ̌bẹ̌bal᷊on ayetʼu Winohẹ Susi ini, ’Ini e kai rarolohang-Ku,’ angkuěngu Ruata e. ’Iạ e sarung měndolohʼi sie iapangal᷊imona wọʼi Kau, tadeạu i sie iapěndiahi raral᷊engangu e su těngonʼU!’ ”

²⁸”Pẹ̌tahěndungko,” angkuěng i Yesus lai, ”su dunia ini e tawẹu sarang sěngkatau limembong kasěllahe wọʼi Yohanes Mananahani. Arawe taumata kakạdọdokang e sutal᷊oarang kawanuan Duata e, limembong kasariane wọʼi Yohanes Mananahani.”

²⁹ Kěbị taumata — nasowa l᷊ai maghaghělle bea e — rụdaringihẹ̌ si Yesus něhengetang u hal᷊ẹ̌ ene; i sire ete taumata apan tụtuhụ manga atorangu Mawu Ruata ringangu napulu nakisahani si Yohanes e.

³⁰Arawe tau Farisi ringangu manga mananěntiro agama e tawe manarimạ u tingirang u Ruata e si sire. I sire madiri makisahani si Yohanes.

³¹Mase i Yesus něhengetang kapia angkuěng, ”Kai Takụ isihing suapa taumata tempo ini? Kai mẹ̌sul᷊ungu a i sire?

³²I sire kai mẹ̌sul᷊ungu manga rariọ mạhungkaiang su pasarẹ̌; sěngkamonaěng měmpẹ̌kẹ̌kui si sire wal᷊ine, ’I kami mẹ̌sẹ̌sulingu lagun dal᷊uasẹ̌ si kamene, kai i kamene mang tạ kadiongeng mẹ̌sal᷊ai! I kamene mẹ̌kẹ̌kantarịu kakantarị makạsusa kaiso i kamene mang tạ kadiongeng sumangị!’

³³I Yohanes Mananahani e riměnta — i sie mẹ̌pẹ̌puasa ringangu tawe manginung anggorẹ̌ — kụ i kamene němpẹ̌berau, ’I sie kinasuěkangu setang!’

³⁴Ahusewen Taumata e riměnta — i Sie kụkaěng dingangu mạnginung — mase i kamene němpẹ̌berau, ’Kěllạe taumata ěndaị! Kombangeng, tahawukaneng, hapị u maghaghělle bea ringangu hapịu taumata warạdosa.’

³⁵Maningbeng kerene, katatahuěnnan Mawu Ruata e nitahutěngadeng bọu kal᷊awọu taumata apan mạnarimạ i sie.”

³⁶Ene sěngkatau tau Farisi, arenge i Simon, něnotẹ̌ si Yesus kumaěng. Tangu i Yesus rimangeng su wal᷊ene e kụ naiang su meda e.

³⁷ Kutẹu su soa ene piạ l᷊ai sěngkatau wawine waradosa. Piạ e i sie nakaringihẹ̌ u i Yesus kụkaěng su wal᷊en tau Farisi e, i sie riměnta ringangu nẹ̌bawa wotol᷊ẹ̌ pualam lohong lana mawěngi.

³⁸Kụ i sie rimarisị su l᷊ikudʼi Yesus maraning laedʼE kụ kạsangịe, kụ ěllong matane timědọ něnantạ laedʼi Yesus e. Bọu e laẹdʼi Yesus manantạ ene niěmmụeweng utạ e mase nirěnguange ringangu nilanisangu l᷊ana mawěngi.

³⁹Tangu sarạeng tau Farisi něnotẹ̌ si Yesus nakasilọe hal᷊ẹ̌ ene, i Sie nẹ̌berạ e su ral᷊ungu naunge, ”Kereu tau ěndaị e nabi, ute angkeěng i Sie masingkạ bue i sai tangu wawine nanenggehẹ̌ si Sie ringangu kawe wawine waradosa!”

⁴⁰Kutẹu i Yesus něhengetang si Simon, ”Simon, kai piạ apa Takụ ipaul᷊ị si kau.” ”Kerenẹ e Tuang,” angkuěngkewen Simon e, ”měngkate pěhengetang.”

⁴¹I Yesus něhengetang, ”Piạ duang katau němpangutang su tau piněngẹ̌dangeng doitẹ̌. Kụ sěngkatau něngutang l᷊ima hasụ doitẹ̌ sal᷊aka, mase sěngkatau l᷊ai limam pul᷊o sukal᷊ẹ̌pane roitẹ̌ sal᷊aka.

⁴²I rẹ̌dua kěbị tawe nakawaehẹ̌ utang ene, tangu i rẹ̌dua semben tawe niapamaehẹ̌. Kụ i sai wọu tal᷊oaran dẹ̌dua e limembong kakěndage su tau pinangẹ̌dangeng doitẹ̌ ene?”

⁴³”Su pěndangku e ute i anu kakěpal᷊enge utange ta niapamaehẹ̌ e!” angkuěng i Simon. ”Tiněnnanu e nihino,” angkuěng i Yesus.

⁴⁴Bọu e i Yesus němanda su tau wawine ene ringangu něhengetang si Simon, ”I kau nakasilo wawine ini? Iạ dimangeng su wal᷊enu, kụ i kau tawe něnadiang akẹ lauhasẹ̌ laedẹ̌-Ku; arawe wawine ěndaị e ute seng němurẹ̌si laedẹ̌-Ku e ringangu ěllom matane mase niěmmụe ringangu utạ e.

⁴⁵I kau tawe naněnsomahẹ̌ Siạ dingangu laimbu, arawe wawine ěndaị e ute tawe nangẹ̌do nangimbu laedẹ̌-Ku rokẹeweng Iạ narangeng sini e.

⁴⁶I kau tawe naměmbingu l᷊ana piněluwi těmbọ-Ku, arawe wawine ěndaị e ute seng nanědọ u l᷊ana mawěngi su laedẹ̌-Ku e.

⁴⁷Kahěngang: kakěndage masaria ene e mạnodẹu rosane lawọ e seng nasue niampungang! Kereu i saing kadodọ pangangampunge, ute i sie mal᷊aing sarung kadodọ kakěndage.”

⁴⁸Mase i Yesus něhengetang su tau wawine ene, ”Kal᷊awọu rosanu e seng niampungang.”

⁴⁹Manga taumata wal᷊ine mạhungkaiang kụkaěng dingangi Yesus nanětạ e němpẹ̌bera sěngkatau su wal᷊ine, ”I saị e tau ěndaị e kawe lai mangampung dosa e?”

⁵⁰Kutẹu i Yesus něhengetang su tau wawine e, ”Ual᷊ingu i kau mạngimang si Siạ, i kau masal᷊amatẹ̌. Dakọe kapul᷊ẹ su pẹ̌darame!”