Read Sangir LUKAS 8 Bible Online

LUKAS 8 - Sangir bible

LUKAS 8

¹Tawe Karěngụe wọu ene tangu i Yesus limuhu kal᷊awọu soa ringangu manga kampong tadeạu měhabarʼu Injilẹ̌ u Mawu Ruata seng nanětạ mẹ̌parenta makoạ Datu. I sire mapul᷊o dua su kataune muritʼE ute ringangʼE.

² Kerene lai pirang katau manga wawine apan seng naul᷊e wọu rohkẹ̌ dal᷊akị dingangu sakịe. I sire ene i Maria, isẹ̌sẹ̌ba si Magdalena (rohkẹ̌ dal᷊akị pitu e nạung seng nisěbang bọu i sie);

³i Yohana l᷊ai, kawingi Khuza, mělẹ̌hal᷊ẹ̌ su wal᷊eng Datu i Herodes; i Susana ringangu l᷊awọ lai manga wawine wal᷊ine. Ringangu wawaehʼi sire hala ute i sire měmpẹ̌tẹ̌tangkiang si Yesus dingangu l᷊ai manga muritʼE.

⁴Taumata měngkatewe mạhunděnta sol᷊ong anung Yesus wọu kal᷊awọu soa. Ringangu su tempon seng lawọ taumata natampung, i Yesus mẹ̌bẹ̌běken papinintu kere ini:

⁵”Piạ e sěngkatau měnanawuhẹ̌ bine. Kutẹu kạpanawuhete, piạ bine nanawo su ral᷊eng. Sěnggạ ute nitahidang u taumata ringangu sěnggạ nikaěng u manụ u winalangeng e.

⁶Piạko l᷊ai nanawo su tampạ mawatu kụ su tempon himẹ̌tị, apidu nahẹ̌gu, watụ u ěntanane mamara.

⁷Piạko l᷊ai wine nanawo su tal᷊oaran sumpinị. Tangu sumpinị e timuwo sěngkatuwo ringangu wine e, kụ nakaěpisẹ̌ hakịu nate.

⁸Kutẹu piạko l᷊ai wine nanawo su ěntanane matawa, mase timuwo ringangu nẹ̌bua mahasụ su kawene.” Sarạeng bọu nẹ̌běkem papinintu ene, i Yesus něhengetang, ”Kamageng piạ tul᷊i, daringihẹ̌!”

⁹Manga muritʼi Yesus nakiwal᷊o si Sie mangal᷊en papinintu ene.

¹⁰ I Yesus simimbang, ”I kamene seng nionggotang u tahuěnna tadeạu makaěnna piněnnisu mạanun měnsang kereapa Mawu Kasěllahenge nẹ̌parenta nakoạ Datu e. Arawe i sire wal᷊ine ute tẹ̌těntirong dingangu papinintu, mẹ̌deạu i sire kumakělla, kaiso wẹ̌ga wue apa nariadi; ringangu i sire makạdingihẹ̌, kaiso tawe makaěnna.”

¹¹”Kai ini mangal᷊em papinintu ěndaị e: Bine ene kai hengetangu Ruata.

¹²Bine nasawuhẹ̌ sural᷊eng mẹ̌sul᷊ungu taumata apan nakaringihẹ̌ hengetang ene. Arawe setang riměnta kụ něhampasẹ̌ hengetang ene wọu naungi sire, mẹ̌deạu i sire tawe měmpangimang kụ měngkasal᷊amatẹ̌.

¹³Bine nasawuhẹ̌ su tampạ mawatu mẹ̌sul᷊ungu i sire nạung su tempon nakaringihẹ̌ hengetang ene, něnarimạbe ringangu naung maral᷊uasẹ̌. Kaiso hengetang ene tawẹ hamụe su ral᷊ungu naung i sire. I sire němpangimang sěngkakondạ, kụ su tempon sasal᷊ukạ himombang, i sire němpẹ̌děndilẹ̌.

¹⁴Bine nanawo su sumpinị mẹ̌sul᷊ungu i sire apan nakaringihẹ̌ hengetang e, kaiso ghụgěnggang u pẹ̌bawiahʼi sire ringangu mapulu mẹ̌biahẹ̌ su kakakalạ dingangu karal᷊unsemahẹ̌ su ral᷊ungu dunia ini. Kěbị ene mạngěpisẹ̌ si sire hakịu tawe měmpẹ̌buam buane masasạ.

¹⁵Bine nanawo su ěntanane matawa e mẹ̌sul᷊ungu taumata nakaringihẹ̌ hengetang e, mase něndesọ maěmpigẹ̌ su naunge ringangu katul᷊ide. I sire měmpạngampal᷊ẹ̌ sarang piạ buane.”

¹⁶ ”Tawẹ taumata měndikọ sol᷊o mase lingkubang u wěnsadẹ̌ arau isěllung sual᷊ung u ral᷊okang. I sie sarung maměllọ u sol᷊o e tadeạu taumata apan simuẹ̌ e makasilo tualagẹ̌.

¹⁷ Tawẹ apa mạbawuni kụ tawe ikasilo; ringangu tawẹ apa mạdal᷊irung kụ tawe sarung l᷊umahẹ dingangu kasingkateng.

¹⁸ Ual᷊ingu ene kakěllako pakapia-pia apan seng kinaringhʼi kamene. U i sain piạ delaing onggotang pakal᷊awọe; arawe i sain tala, ute lěmbene kadodọ e relaing sarung pěngal᷊akeng.”

¹⁹Ene i ninangʼE ringangu manga tuhang i Yesus nahunděnta sol᷊ong anunʼE, arawe i sire tawe nakahaung si Sie kahian taumata tumanịu l᷊awọ.

²⁰Tangu piạ sěngkatau nẹ̌bera si Yesus e, ”Tuang, i ninang dingangu manga mahuanenʼU ene su l᷊ikude. I sire mapulu mẹ̌sombang i Tuang.”

²¹Kai i Yesus něhengetang, si sire, ”I sire apạewen dụdaringihẹ̌ hengetangu Mawu Ruata e ringangu mẹ̌kẹ̌koạ ene, ute kai i sire i ninang-Ku ringangu anạ u sěngkatau-Ku e.”

²²Ene su ěllo sěmbaụ i Yesus dingangkewen muritʼE simake sakaeng. ”Mahịe i kitẹ dumakị sol᷊ong sěmbẹ̌kang dano e,” angkuěng i Yesus si sire. Tangu i sire němpẹ̌buạ e.

²³Su tempong i sire kạpẹ̌sakaenge, i Yesus kinahuntikilang. Sěngkělěndịe piạ děllang timiụ su rano e. Akẹ nanětạe nakasuẹ̌ sarang dal᷊ungu sakaeng, hakịu nakatatakụ si sire kěbị.

²⁴Manga muritʼi Yesus himaungke si Sie kụ němpamuko si Sie. I sire němpẹ̌bera, ”Tuang Guru, Tuang Guru, i kitẹ masilakạ!” I Yesus napuko mase němal᷊ěndihẹ̌ anging dingangu luạ kạpẹ̌gẹ̌galumbange. Anging dingangu luạ e nal᷊ědạe kụ dano e měngkatewe nal᷊ene-l᷊enehẹ̌.

²⁵Mase i Yesus něhengetang su manga muritʼE, ”Kawe unụe i kamene tawe měmpangimang si Siạ?” I sire něngkaral᷊ingu ringangu něngkatakụ. Kụ němpahumbisarạ e i sire sěngkatau su wal᷊ine, ”I sai tangu tau ěndaị e hakịu nẹ̌parenta anging dingangu luạ, kụ i Sie rẹ̌daringihang!”

²⁶Mawu Yesus dingangu manga muritʼE nanẹ̌pasen pẹ̌sasakaengi sire sol᷊ong nahumpạ u wanuang Gerasa[9] su sěmběkang Danong Galilea.

²⁷Kutẹu sarangke i Yesus natumpa surul᷊unge, i Sie nihaungangu sěngkatau esẹ nikasuěkang u rohkẹ̌ dal᷊akị. Tau ene wọu soa. Seng marěngụ ta mělal᷊uhen pakeange ringangu mạdiri matanạ su wal᷊e. I sie měngkawe mapulu mạtanạ su ral᷊ungu manga l᷊iang tampạ u pěndal᷊ẹ̌bingang.

²⁸Sarangke nakasilo si Yesus e, i sie němansagẹ̌ mase nẹ̌těngkaěnsạ su těngong Yesus kụ nẹ̌bera, ”Yesus, Ahusʼu Mawu Ruata Karangetange! Sarung koatengʼU kereapa iạ e? Iạ mẹ̌kal᷊iomanengu abe paněnsara siạ e!”

²⁹Tau ene nakapẹ̌bera kerene ual᷊ingu i Yesus nẹ̌parenta rohkẹ̌ dal᷊akị e niapasẹ̌bang bọʼi sie. Měngkatewe seng masau i sie sẹ̌sawelangu rohkẹ̌ dal᷊akị e hakịu maning lima ringangu l᷊aede seng mạl᷊aikị dingangu hante kụ i sie lẹ̌lukadeng, kai i sie wẹ̌dang lai makabẹ̌sụ hante ene mase wẹ̌bawaěngu rohkẹ̌ dal᷊akị sol᷊ong banua l᷊inggi.

³⁰Mawu Yesus nakiwal᷊o su tau ene, ”I sai arengu?” ”Arengku e ’Legiun’,” angkuěngu tau ene — ual᷊ing kai lawọ rohkẹ̌ dal᷊akị seng simuẹ̌ e su ral᷊ungu watangenge.

³¹Manga rohkẹ̌ daral᷊akị e měngkatewe němpẹ̌dorong sěngapam botonge tadeạu i Yesus kumbahangbe měnokol᷊i sire su Těndihe Makạpate.[10]

³²Kutẹu maraning tampạ ene piạ gapaěngu wawi kapẹ̌deạ e kaěng su lengehʼu wul᷊ude. Manga rohkẹ̌ daral᷊akị e němpẹ̌dorongke si Yesus tadeạu apạmalan sire sěngapam botonge mahunsuẹ̌ su manga wawi ene. Tangu i Yesus kimirẹ e.

³³Ene manga rohkẹ̌ daral᷊akị e nahunsẹ̌bangke wọu tau e kụ nahunsuẹ̌ su wawi e. Kutẹu wawi sěnggapaěnge měngkatewe nahuntal᷊ang dingangu nahuntumpa wọu wiwihu tigal᷊ụ sol᷊ong dano, bọu ene něngkal᷊ěmmisẹ̌.

³⁴Manga měndal᷊ukadʼu wawi e tangu seng nakasilo hal᷊ẹ̌ nariadie. Tangu i sire nahuntal᷊angke kụ němpẹ̌běkeng habarẹ̌ ene su soa ringangu su kampong nal᷊ikụe.

³⁵Mase manga taumata e nahunsẹ̌bangke němpẹ̌kakělla hal᷊ẹ̌ nariadie. I sire nahunděnta sol᷊ong anung Yesus e, kụ sene i sire nakaěbạ taumata wuhu nisěbangengu manga rohkẹ̌ daral᷊akisẹ̌ kạkaiange maraning laedʼi Yesus e. I sie seng piạ pakeange ringangu naunge seng matilang. I sire měngkatewe něngkatakụ.

³⁶Ene i sire apạewen nakasilo kakakoạ e němpẹ̌bẹ̌kẹ e su manga taumata l᷊awọ e kereapa tau ene niapakapia.

³⁷Kutẹu kal᷊awọewen dal᷊ohom banuang Gerasa e měngkatewe němpẹ̌dorong tadeạu i Yesus maněntangu tampạ ene, u i sire mangkewen mạtakụ. Kụ i Yesus e tangu simakẹ e su sakaeng e mase nẹ̌sul᷊e.

³⁸Kutẹu tau nisẹ̌bangeng u rohkẹ̌ daral᷊akị e kai nẹ̌dorong si Yesus mědeạu i sie makakatol᷊e. Arawe i Yesus kai rimolohʼi sie angkuěng,

³⁹”Kapul᷊ẹ e ringangu pẹ̌běkeng apa seng kinoạ u Mawu Ruata e si kau.” Tangu tau e tamai namombeng su kạguwạu soa e, apa seng kinoạ i Yesus si sie.

⁴⁰Su kawawal᷊ịen Yesus su sěmběkan dano e, i Sie niampangeng dingangu kararal᷊uasen sire watụ u i sire e měngkai měkẹ̌kati si Sie.

⁴¹Kutẹu riměntạ e sěngkatau těmbonang u jamaatẹ̌ su tampạ ene. Arenge i Yairus. I sie mẹ̌tẹ̌těngkasanạ su těngong Yesus kụ mẹ̌kẹ̌kal᷊iomaneng sěngapam botonge tadeạu i Yesus apạdangeng su wal᷊ene,

⁴²ual᷊ingu mang sěmbaụ ene anạ e wawine kụ umbure mangawe mapul᷊o dua su taunge, seng lụhědụ. Piạ e i Yesus kạhaunge wal᷊eng Yairus, taumata l᷊awọ e měngkawe mẹ̌sẹ̌sasěngkilẹ̌ walạe wọu tampạ sude.

⁴³Wọu tal᷊oaran sire piạko l᷊ai sěngkatau wawine seng kapul᷊o duane su taunge masakị rẹ̌dal᷊engangu raha. I sie seng nakasue kěbị darotonge pẹ̌sẹ̌sal᷊imaẹ su dokterẹ̌,[11] kaiso mang tawẹu nakapia sarang sěngkatau.

⁴⁴Bawine ene himaung si Yesus wọu l᷊ikudẹ̌, kụ nanenggehẹ̌ biwihʼu l᷊akụʼE. Orasẹ̌ ene raral᷊eng u rahane ringangkewen napotọ.

⁴⁵I Yesus nakiwal᷊o, ”I sai nanenggehẹ̌ Siạ e?” Tangu kěbị taumata němpẹ̌děndilẹ̌. Kutẹu i Petrus nẹ̌bera, ”Tuang, kai měngkate lawọ taumata mělẹ̌liwung si Tuang; i sire měngkate mạněsẹ si Tuang!”

⁴⁶I Yesus něhengetang, ”Kai piạ tau nanenggehẹ̌ Siạ. Iạ nakapěndang batụu piạ kuatẹ̌ simẹ̌bang bọu Iạ.”

⁴⁷Bawine ene nakahěngangke u kakakoạ e seng kinasingkateng. Kutẹu i sie himaung kạkendene mase nẹ̌suba su těngong Yesus. Tangu i sie nẹ̌běke su taumata l᷊awọ e unụe i sie nanenggehẹ̌ si Yesus mase sakịe naul᷊e su orasẹ̌ ene lai.

⁴⁸I Yesus něhengetang si sie, ”Anạ-Ku, ual᷊ing i kau nangimang si Siạ ute i kau seng napia. Dal᷊engke su pẹ̌darame.”

⁴⁹Kutẹu i Yesus bẹ̌dang mělẹ̌hengetang, sěngkatau rarolohange riměnta wọu wal᷊eng Yairus e. I sie nẹ̌bera si Yairus, ”Ahusʼi Tuang bawine e seng nate. I Tuang maningke tawe saụ mapakasigesạ i Tuang Guru.”

⁵⁰Sarang i Yesus nakaringihẹ̌ ene, i Sie něhengetang si Yairus, ”Abe katakụ, měngkate pangimang, kụ anạu mul᷊e wue.”

⁵¹Sarạeng narěnta su wal᷊eng Yairus ute, i Yesus tawe nipakawala sarang sěngkatau niaparangeng dingangʼE kẹ̌tạu i Petrus, Yohanes, Yakobus dingangkewen i ninang i amangu rariọ.

⁵²Ene kěbị měngkatewe mạhunsangị dingangu mạhul᷊ungkang batụu kapapateng anạ e. Arawe i Yesus něhengetang, ”Abe pěmpẹ̌sangị. Dariọ ene bal᷊inewe nate, kaiso kětạeng mětẹ̌tikị!”

⁵³Ene i sire kai nahul᷊ěgen Yesus, watụ u i sire masingkạ u, i sie mambeng nate.

⁵⁴Bọu e i Yesus něngumpaedẹ̌ l᷊imang anạ ene kụ něluntingihẹ̌, ”Pẹ̌bangungke, inang!”

⁵⁵Tangu rohkẹ̌ u rariọ e nẹ̌sul᷊e su anung dariọ e kụ orasẹ̌ ene lai i sie nẹ̌bangung. Bọu e i Yesus nangoro si sire pakionggoteng kaěnge rariọ ene.

⁵⁶Ene manga gaghurangu rariọ e mangkewen dimal᷊inaụ tạ sihinge. Kai i Yesus nẹ̌sěding i sire u kumbahang měhabarẹ̌ apan nariadị e sarang su sěngkatau.