Read Sangir PANGANGONGGỌ U TORATẸ̌ KAPIA 1 Bible Online

PANGANGONGGỌ U TORATẸ̌ KAPIA 1 - Sangir bible

PANGANGONGGỌ U TORATẸ̌ KAPIA 1

¹Bukẹ̌ ini lohone wawerang Musa e su tau Israel piạ i sire su wanua l᷊inggi su Wal᷊ang Yordan. Wal᷊ane ene su sěmbekan dakị bọu Sal᷊u u Yordan, maraning soan Suf, su wěllạu soang Paran su sěmběkane, ringangu manga soan Tofel, Laban, Hazerot dingangu su Di-Zahab su sěmběkane wal᷊ine. (

²Bọu Wul᷊udu Sinai sarang mịdatingu Kades-Barnea limiu ěntanang bawul᷊urangu Edom, gẹ̌gausang mapul᷊o ěsa su ěllone su raral᷊engang.)

³Su tanggalẹ̌ humotong bul᷊ang kapul᷊oěsane su taung kaěpạ u pul᷊one samurin sire naněntangu Misirẹ̌ e, i Musa něhabarẹ̌ su kawanua ene patikụ apan nioroʼm MAWU mẹ̌deạu iwera si sire.

⁴ Ene nariadi samurin Musa[1] němatạ Sihon, datun tau Amori, kụ mẹ̌pẹ̌parenta su soan Hesybon, dingangu Og, datuʼm Basan, kụ mẹ̌pẹ̌parenta su manga soang Asytarot dingangu Edrei.

⁵Kụ, su sěmbekan daki wọu Yordan su ěntanang Moab, i Musa e kahumotongange něnualagu manga toratẹ̌ dingangu kal᷊awọu titaʼm MAWU. Angkuěng i Musa,

⁶”Piạ i kitẹ e su wowoʼm Bul᷊udu Sinai e, MAWU Ruatang kitẹ e něhengetang, ’I kamene e seng diọ mararěnna natanạ su wul᷊ude ini.

⁷Ini e golangke pẹ̌darasengang i kamene dakọ e kakoạ sarang bawul᷊urangu tau Amori ringangu sarang kasěllahu wanua mạngělikụ e Wal᷊ang Yordan, banua piạ manga wongkone ringangu manga wimbaenge matene, banua su sěmběkan timuhẹ̌ dingangu apengu Laudẹ̌ Tal᷊oara e. Dakọ e kụ kaianeko ěntanang Kanaan dingangu wawul᷊urangu Libanon sarang Sal᷊ụ u Efrat gẹ̌guwạe.

⁸Iạ e MAWU, kụ seng nẹ̌dianding kasěllahu ěntana ene su manga i upung i kamene i Abraham, Ishak, dingangi Yakub ore pal᷊ahiten sire. Kụ dakọ e pěmpẹ̌tanạ su ěntana ene.’ ”

⁹I Musa e nẹ̌bera su wansa ene, ”Nạung su tempong i kitẹ e su wowoʼm Bul᷊udu Sinai, iạ nẹ̌bera si kamene: Bawawaěng baugu měngahạ si kamene e tumanịu mawěhạ si siạ e. Iạ e tawe makakoạ sẹ̌saku, u

¹⁰MAWU Ruatang kamene e napakahuntinambang kamene kal᷊awọe kere manga wituing su l᷊angị.

¹¹Mal᷊owọko MAWU Ruatang manga i upung i kamene e tiniạ kal᷊awọ e sarang sěhiwu su sul᷊ene mawalung, dingangu mapakariading kamene e wansa kụ tawẹ konsange apa kerẹewe seng niriandin-Ne!

¹²Kaiso kereapa wue iạ sẹ̌saku makaumal᷊ẹ̌ měmasaěng bawawaěng mawěhạ e mědeạu matagapi kěbị sungkal᷊ene tangu?

¹³Pěmilẹ e wọu apang ghal᷊ipoho e pira-pirang katau manga esẹ e apang kụ pelesa ringangu lawọ ěbạ e, ringangu nasukụ u katatahuěnna, tadeạu iạ e měhengkẹ i sire makoạ pangahạ i kamene.

¹⁴Těgu ene tarimạbeng kamene pakapia.

¹⁵Ual᷊ingu ene sutal᷊oarang manga pangahạ kụ nipileng kamene e, pirang katau taumata kụ pelesa e ringangu piạ ěbạ e takụ al᷊akeng dingangu takụ hengketang makoạ mananěmbonang si kamene e. Pirang katau e nikoạ těmbonangu sěhiwu su kataune, dingangu wal᷊ine e těmbonangu mahasụ su kataune ringangu waugu limam pul᷊o su kataune arau waugu mapul᷊ong katau. Iạ e mal᷊aing měhengkẹ u manga těmbonange wal᷊ine ipěngurusẹ̌ manga ghal᷊ipohong kamene e.

¹⁶Su tempo ene e iạ e mapěhal᷊ẹ̌ i sire kere ini: Kakěllaiko pẹ̌sasilontahẹ̌ kụ siměpụ sutal᷊oarang bansanu e. Pěngonggọkong putusange kụ adilẹ̌ e baẹ su ral᷊ungu pěrkara kụ piạ kaitange ringangu taumata kawanua sěmbaụ e arau mapasowan taumata raghị e kụ matanạ sutal᷊oarang kamene e.

¹⁷Putusang i kamene e kumbahangbe mawěhạ sěmběka; apan taumata e ghutaing kamene ringangu kakakoạ e mẹ̌sul᷊ungu, tawẹ pẹ̌dal᷊ahaedangu kai i sai taumata ěndaị ene. Kumbahang matakụ i sai-sai, watụ u putusang ial᷊ạ i kamene e rarěntane kai wọu anun Duata e. Kereu pěrkara sěmbaụ e tumanịu mawěhạ si kamene e, bawạe ramahi sarang anuku, kụ hědo iạ e měmutusu ene.

¹⁸Su tempo ene lai iạ e mẹ̌gěllịu manga tatul᷊adane si kamene mạanung kal᷊awọu hal᷊ẹ̌ bal᷊ine kụ hinong koateng i kamene.”

¹⁹”Bọu ene natuhụewe kere su titaʼm MAWU Ruatang kitẹ e, i kitẹ e něněntangu Wul᷊udu Sinai ringangu rumal᷊eng lumiu wanua l᷊inggi kụ mal᷊oahẹ̌ dingangu makạtatakụ mẹ̌timona wawul᷊urangu tau Amori. Su tempong i kitẹ e nahumpạ su Kades-Barnea,

²⁰iạ e nẹ̌bera: Orasẹ̌ ini e i kamene seng nahumpạ su wanua wawul᷊urangu tau Amori, ěntana kụ nionggọ si kitẹ e kahiang MAWU Ruatang kitẹ e ringangu Ruatang manga i upung i kitẹ e. Kakělla, su těngonu e mạl᷊aěmpahẹ̌ ěntana ene. Dakọ e mědeạu kaianẹete kerẹewe seng niorong MAWU e. Abe ghěnggang arau matakụ.

²¹

²²Arawe i kamene e riměnta su anuku ringangu nẹ̌bera, ’Mạěndokangbe i kitẹ e měndolohu pirang katau apěngal᷊imona si kitẹ e mědeạu pěnanẹ̌sui wanua ini tadeạu i sire e makawera si kitẹ u kai ral᷊eng sude hinong liuang i kitẹ e ringangu kereapa wue kal᷊awọu soa kụ sarung děntaěng i kitẹ.’

²³Těgu ene itarimạku, ual᷊ingu ene iạ e měmile mapul᷊o dua su kataune, pẹ̌sěngkatau e wọu apang ghal᷊ipoho.

²⁴I sire e němpẹ̌suẹ̌ banua wawul᷊urange ene e karaung Bal᷊ang Eskol, bọu e ral᷊engang i sire.

²⁵Bọu ene i sire e mẹ̌sul᷊e sarang anung kitẹ e mẹ̌bawa manga wua-bua kụ nikaěbakeng i sire paị sene ringangu měhabarẹ̌ u wanua sarung i onggọu MAWU Ruatang kitẹ e mambeng těngadẹ̌ matawa e.

²⁶ Arawe i kamene e kawe rumokạ titang MAWU Ruatanu e, ringangu tawe mapulu sumuẹ̌ su wanua ene.

²⁷I kamene e sụsimbulung kere ini, ’MAWU e mạběnsing si kitẹ. Tangú i Sie napasěbang i kitẹ e wọu Misirẹ̌ baugu měnarakang i kitẹ e su ral᷊ungu l᷊iman tau Amori tadeạu i sire měmate si kitẹ.

²⁸Kụ kai waugu apa i kitẹ e sarang paị ene? Taumata apang niringọ i kitẹ tamai kerene nakakariading kitẹ e natakụ u pal᷊aul᷊ị u kawanua ene kawe limembong mahasa wọʼi kitẹ e; ringangu uade i sire kai mạtanạ su manga soa kụ mesele mararangẹ sěndangẹ u l᷊angị. I sire makạsilo ansuang dasị sene!’

²⁹Arawe iạ e mẹ̌bera: Abe katakụ i sire ene.

³⁰MAWU Ruatanu e sarung měngahạ i kamene ringangu mẹ̌bangkuadẹ̌ baugi kamene kerẹewe seng kinasahidiang i kamene e su Misirẹ̌ e,

³¹ ringangu su wanua l᷊inggi. I kamene nakasilo kereapa MAWU Ruatanu e nẹ̌bawa si kamene nasal᷊amatẹ̌ kanandung dal᷊eng ene e sarang tampạ ini, tawẹ beong-beonge kere sěngkatau i amang něningkul᷊u anạ e.

³² Kaiso maningbe iạ e seng nẹ̌bera kerene, i kamene wědang lai tawe mangimang su MAWU Ruatang kamene,

³³kụ dụdal᷊eng su těngong kamene baugu mẹ̌deạ tampạ pẹ̌darasengang baugʼi kamene. Iạ e měnodẹ u ral᷊eng si kamene su tempong hěbi su ral᷊ungu rihi putung dingangu su tempong ěllo e su ral᷊ungu rihi winawa.”

³⁴ ”MAWU e nakaringihẹ̌ ral᷊umpasiangu kụ bọu e kawe nẹ̌pědụ. I Sie nẹ̌salu,

³⁵’Tawẹ u sarang sěngkatau wọu sěmbihingangu ral᷊akisẹ̌ ini e sarung makakasuẹ̌ su ěntana matawa kụ seng Takụ niriandi su manga i upung i kamene.

³⁶Kětạeng i Kaleb anạ i Yefune sarung makakasuẹ̌, ual᷊ingu i sie těbewe satia si Siạ. Baugʼi Kaleb dingangu manga hěntone Takụ pẹ̌gěllikangu wanua kụ seng niluhuange ene.’

³⁷I kamene lai nakakariadiʼm MAWU e nẹ̌pědu si siạ dingangu nẹ̌bera, ’Musa, i kau e mal᷊aing tawe makakasuẹ̌ su wanua ene.

³⁸Katewe pakararagẹ̌ bue naungu lumaontol᷊u e, i Yosua anạ i Nun. Seng i sie kụ sarung měngahạ u Israel měmul᷊aho ěntana ene.’

³⁹Bọu e MAWU nẹ̌bera lai si kitẹ kěbị, ’Manga anạ u e kụ bědang tumanịu rarodọ e waugu mapẹ̌dal᷊ahaeng mapia wọu ral᷊akisẹ̌ e manga rariọ kụ tuhụ baweranu e sarung pul᷊ahoěngu manga sědụ i kamene, seng si sire e Takụ pẹ̌gěllikangu ěntana ene, ringangu i sire e sarung makakaiang sene.

⁴⁰Arawe i kamene, pẹ̌sul᷊ẹ e sarang banua l᷊inggi lumiu ral᷊eng kụ mẹ̌timona Běngạ u Akaba.’

⁴¹I kamene simimbang, ’Musa, i kami e seng nẹ̌baradosa su těngom MAWU. Arawe orasẹ̌ ini e i kami mapulu tamai mẹ̌sekẹ kerẹewe seng niorong MAWU, Ruatang kitẹ.’ Bọu e sěngkatau-sěngkatau sutal᷊oarang kamene e pěmpẹ̌dariahi waugu mẹ̌sekẹ, dingangu mạngiral᷊ingu měliwung banua wawul᷊urange ene e hal᷊ẹ̌be kạdodọ.

⁴²Kaiso MAWU e nẹ̌bera si siạ, ’Abe walanu i sire e mẹ̌sekẹ, u Iạ e tawe ruměndingang si sire, měntěhang i sire e ikawatạ u rumarokạ si sire.’

⁴³Iạ maul᷊ị si kamene apang kụ niwerang MAWU e, kaiso i kamene tawe něpandung. I kamene rụdokạ parentan MAWU, kụ dingangu obotẹ̌ e tamai sarang banua wawul᷊urange ene.

⁴⁴Bọu e tau Amori kụ měmpẹ̌tẹ̌tanạ su wawul᷊urange ene e siměbang dumokạ si kamene. Kal᷊awọ i sire e tawẹ sihinge, kere ghapaěngu katiupang. I sire měnẹ̌nahusu si kamene karaung Horma, wọu e měmatạ si kamene su wawul᷊urangu Edom.

⁴⁵Bọu e i kamene e mẹ̌sul᷊e ringangu kumahiorọ su MAWU makitul᷊ung, katewe i Sie tawe mapulu rumaringihẹ̌ arau mẹ̌pandung si kamene.”

⁴⁶”Bọu ene i kitẹ e nẹ̌tanạ su Kadesẹ̌ e marěngụ kahěngang.