Read Sangir PANGANGONGGỌ U TORATẸ̌ KAPIA 10 Bible Online

PANGANGONGGỌ U TORATẸ̌ KAPIA 10 - Sangir bible

PANGANGONGGỌ U TORATẸ̌ KAPIA 10

¹”Bọu ene MAWU e nẹ̌bera si siạ, ’Musa, pakangko pěpal᷊ẹ̌ batu rarua kerẹewe humotong, kụ koạko l᷊ai kere peti kalu sěmbaụ baugu tampạ e bọu ene ramahiko sarang anu-Ku su wowom bul᷊ude.

²Su manga watu ene Takụ bohekang bawerane mẹ̌sul᷊ungu su watu kụ seng nịbawěkanu; bọu ene kal᷊awọu watu ene harusẹ̌ suẹ̌ u su ral᷊ungu peti ene.’

³Mase iạ mẹ̌koạ peti wọu kalung akasia ringangu měmakang batu rarua kere nạung kal᷊imona ringangu mẹ̌bawa ene sarang bowoʼm bul᷊ude.

⁴Su watu ene MAWU němohẹ u Tita Mapul᷊o mẹ̌sul᷊ungu kere humotong, kụ kai nạung manga tita kụ nionggọʼE si kamene, piạ i Sie nẹ̌bisara wọu tal᷊oarang manga putung su ěllong kamene němpẹ̌tampung su pentọ u wul᷊ude. Bọu ene MAWU e něngonggọu watu lei ene si siạ

⁵dingangu iạ e nẹ̌bal᷊ị kapia ruměsung bọu wul᷊ude. Bọu ene natuhụewe kere su parentaʼm MAWU, batu rarua ene takụ nisuẹ̌ su ral᷊ungu peti takụ nikoạ — dingangu nanětạ bọu tempo ene sarang orasẹ̌ ini pěpal᷊ẹ̌ batu rarua ene wědang ene sene.” (

⁶ Bọu ene tau Israel nẹ̌buạ bọu sumuʼn tau Yaakan dingangu nakoạ sarang Mosera. Sene i Harun naněntangu dunia, kụ nilěbing. I Eleazar anạ e něngaweng si sie kere sěngkatau imang.

⁷Sene i sire nakoạ sarang Gudgod, bọu ene turusẹ̌ sarang Yotbata, banua kụ akẹ e mal᷊awọ.

⁸ Su wul᷊ude ene,[10] MAWU e napakataning ghal᷊ipohong Lewi e waugu mẹ̌tangkiang Petiʼm Pẹ̌dariandi ringangu mẹ̌tangkiang MAWU, ore mẹ̌berang al᷊amatẹ̌ su ral᷊ungu arengʼE. Kai ene e hal᷊ẹ̌ i sire sarang orasẹ̌ ini.

⁹Ual᷊ingu ene ghal᷊ipohong Lewi e tawe nakatarimạu ěntana pusakạ kerẹewe manga ghal᷊ipoho lai wal᷊ine, batụu kai MAWU e nakoạ pusakạ bahageang i sire, kerẹewe seng niwerang MAWU Ruatanu e si sire.)

¹⁰ ”Ěpạ u pul᷊o su ěllone ringangu ěpạ u pul᷊o su hěbine iạ matanạ su wowom bul᷊ude kerẹewe sen takụ nikoạ humotong. Sěnsul᷊e ko l᷊ai MAWU e rimaringihẹ̌ si siạ, kụ i Sie mal᷊uasẹ̌ kereu tawe mapakawinasang kamene.

¹¹Mase i Sie rimolohu iạ apạdal᷊eng pěngẹ̌ngahạ si kamene tadeạu i kamene makapěnaghuang ěntana kụ nikědonʼE su manga i upung i kamene.”

¹²”Ini e, manga anạ u sěngkatau, naungeko apang tẹ̌tuntukangu MAWU Ruatanu e wọʼi kamene: Kěndagẹ̌kong MAWU Ruatanu e ringangu koạko kal᷊awọu tita-Ne. Kěndagẹ̌kon Sie ringangu pẹ̌kal᷊iomanengke si Sie ringangu kasěllahu himukudu ore lai wadangu.

¹³Daringiheko kal᷊awọu titaʼm MAWU kụ sěhěllo ini e takụ ihabarẹ̌ si kamene waugu kapiang kamene hala.

¹⁴MAWU Ruatanu e mạnaghuang langị karangetange; dunia e mal᷊aing tataghuanengʼE ringangu kal᷊awọu apang ene su wowone.

¹⁵Arawe kakěndagu MAWU su manga i upung i kamene enẹ e kasariane, hakịu wọu kal᷊awọu wansa e seng i kamene pinile-Ne, ringangu sarang orasẹ̌ ini e i kamene mal᷊aing umatʼE kinapile.

¹⁶Kụ měnětạ bọu orasẹ̌ ini i kamene harusẹ̌be mararingihẹ̌ su MAWU ringangu kumbahang delaing mẹ̌tungkětị u těmbọ.

¹⁷ MAWU Ruatanu e ene su wowong kal᷊awọu ruata ringangu namal᷊iung patikụ kawasa. I Sie kai Ruata mawantugẹ̌ dingangu kawasa kụ hinon daringihang. I Sie tawe mapulu manumběka ringangu tawe lai měnanarimạ u sasorokẹ̌.

¹⁸I Sie tụtatawang hakẹ̌ u manga rariọ kasisi ěndusẹ̌ dingangu manga wawine wal᷊u tadeạu i sire kẹ̌koatengbe tuhụ kaadile; i Sie kụkěndagu taumata raghị e kụ mẹ̌bẹ̌biahẹ̌ sěngkapẹ̌biahẹ̌ dingangu kawanuang kitẹ e ringangu mapakaěng dingangu mapẹ̌pakeang i sire e.

¹⁹Tangú i kamene mal᷊aing hinong mapatodẹ u kakendagu su taumata raghị ene, batụu nạung kal᷊imona e i kamene mal᷊ain tau raghị su Misirẹ̌ e.

²⁰Kěndagẹ̌kong MAWU Ruatanu e ringangu pěmpẹ̌kal᷊iomanengko si Sie samatang. Karimạko i kamene e tatapẹ̌be satia si Sie ringangu mẹ̌salu su ral᷊ungu arengʼE samatang.

²¹Pẹ̌daloko si Sie u i Sie kai Ruatanu. Dingangu matanu hala i kamene seng nakasilo kal᷊awọu kakanoạ masaria ringangu makạtatakụ kinoạʼE waugi kamene.

²² Piạ manga i upung i kamene makoạ sarang Misirẹ̌ e kal᷊awọ i sire e kětạeng pituʼm pul᷊o su kataune. Kaiso MAWU Ruatanu e seng napakahuntinambang kal᷊awọ i kamene kere kal᷊awọu wituing su l᷊angị e.”