Read Sangir PANGANGONGGỌ U TORATẸ̌ KAPIA 11 Bible Online

PANGANGONGGỌ U TORATẸ̌ KAPIA 11 - Sangir bible

PANGANGONGGỌ U TORATẸ̌ KAPIA 11

¹”Kěndagẹ̌kong MAWU Ruatanu e, ringangu tuhukeko sěntiniạ kal᷊awọu tita-Ne e.

²Pẹ̌tahěndungko ini e apa nạung singkạ i kamene mạanum MAWU wọu ěbạu. Manga anạu e tawẹ apa ěbạ e kerene. Seng i kamene e nakasahidi kawawantugu MAWU Ruatanu, katoghasʼE, kawasa-Ne

³ ringangu manga karal᷊inaụ kụ nikoạʼE. I kamene nakasilo hala apa nạung kinoạʼE su ratuʼm Misirẹ̌ e dingangu kal᷊awọu wanuane.

⁴ I kamene nakasilo kereapa MAWU e napakaupung sordadon Misirẹ̌ e ringangu kěbị kawal᷊o ringangu karetan sekẹ i sire. I sire kěbị e nilěmisẹ̌ su Laudẹ̌ Lěntuwu[11] piạ e nạung kapěnẹ̌nahusune si kamene.

⁵I kamene masingkạ u apa nạung nikoạu MAWU e si kamene su wanua l᷊inggi kal᷊imonang i kamene nahumpạ sini.

⁶ I kamene lai nakatahěndung apa nạung nikoạu MAWU e si Datan dẹ̌duang Abiram, manga anạ i Eliab bọu hěnton Ruben. Su těngong kamene kěbị banua e nahěngẹ kụ bọu ene něngělụ si sire ringangu ral᷊ohom bal᷊en sire e, pẹ̌darasengang, kal᷊awọu ěllang dingangu binatang i sire e.

⁷O, seng i kamene ringangu matang kamene hala seng nakasilo kěbị karal᷊inaụ nikoạu MAWU e.”

⁸”Daringiheko kěbị toratẹ̌ kụ takụ nihabarẹ̌ si kamene sěhěllo ini, tangu i kamene e makal᷊iuwe sal᷊ụ dingangu makakasuẹ̌ su wanua kụ seng tawẹ kararěngụ e lai pẹ̌tanakeng i kamene.

⁹Dingangu i kamene e sarung mẹ̌biahẹ̌ marěngụ su wanua kụ kalạ dingangu matawa, kụ nikědoʼm MAWU su manga i upung i kamene ringangu su manga hiten sire.

¹⁰Banua kụ pẹ̌tẹ̌tanakeng i kamene e sarungbe wal᷊inẹ kere ěntanang Misirẹ̌, tampạ i kamene kal᷊imona mạtanạ. Paị sene i kamene harusẹ̌ měhal᷊ẹ̌ masěgadẹ̌ baugu mapěhuakẹ u pẹ̌sasuangeng su tempong měnawuhu wine.

¹¹Arawe wanua kụ sarung suěkang i kamene nakoạ bọu wawul᷊urange ringangu manga wal᷊ane; ěntanane lẹ̌huaketangu tahiti.

¹²MAWU Ruatang kamene e mẹ̌pẹ̌padul᷊i wanua ene ringangu mẹ̌děndiagạ kanandun taung.

¹³ Kụ daringiheko kal᷊awọu tita takụ nihabarẹ̌ si kamene sěhěllo ini; tal᷊ěntukon MAWU Ruatanu e ringangu pẹ̌kal᷊iomanengke si Sie dingangu kasariang naungu ore lai wadangu.

¹⁴Kereu i kamene mẹ̌koạ kerene, tangú MAWU e sarung maparasehu tahiti waugu ěntananu su musunge, masueng pěnsạ e i kamene, ringangu su tempong i kamene e měnětạ mẹ̌suang. Tangu i kamene e sarung makahombang gandung masukụ, anggorẹ̌ dingangu lanan zaitun,

¹⁵dingangu rěmpugẹ̌ baugu binatang i kamene. Kal᷊awọu kaěng kụ gausang i kamene e, sarung kạsasadia si kamene.

¹⁶Kumbahang i kamene mapulu ipakarau wọu anuʼm MAWU waugu měnal᷊e arau mẹ̌tahamawu su manga ruata wal᷊ine.

¹⁷Kereu i kamene lumampa tita ene, MAWU e sarung mẹ̌pědu si kamene. I Sie sarung tawe maparasehu tahiti; ěntananu e mamara-mara kụ sasuange tawe měgěllịu wuane. Tangu su ral᷊ungu tempo manimbụ i kamene mate su ěntana matawa kụ nionggọu MAWU e si kamene.

¹⁸ Pẹ̌tahěndungko ringangu pěmpěnaungko manga tita ene. Ikịko su takiahu ringangu sakẹko su rěhụu mědeạu hanesẹ̌ tẹ̌tahěndungang.

¹⁹Těntiroko su manga anạu. Pahumbisarako su ral᷊ungu wal᷊e arau su l᷊ikudu wal᷊e, su tempong měngẹ̌ngirul᷊e, arau su tempong mělẹ̌hal᷊ẹ̌.

²⁰Bohẹko su rihiʼn tukadu wal᷊enu ringangu su tukadu pasěllangengu.

²¹Tangu i kamene ringangu manga anạ i kamene e sarung umbure manandụ su wanua kụ nikědong MAWU Ruatanu su manga i upungu. Karěngụ u piạ langị su wowon dunia e, karěngụ u ene lai sarung i kamene mẹ̌tanạ su ěntana ene.

²²Tuhukeko pakasatia su kěbị toratẹ̌ kụ takụ nihabarẹ̌ si kamene: Tal᷊ěntukon MAWU Ruatanu, pẹ̌koạko kal᷊awọu apan nitita-Ne si kamene, ringangu kěnangko i kamene e tatapẹ̌be masatia si Sie.

²³Tangú MAWU e sarung měnokol᷊u kěbị bansa ene wọu těngonu, ringangu i kamene e sarung mẹ̌tanạ su ěntana tataghuanengu manga wansa kụ něngalembong masaria ringangu něngalembong katoghase wọʼi kamene.

²⁴ Apaʼm banua kụ dẹ̌dal᷊engang i kamene e sarung makoạ tataghuanengu. Banuanu e nawatedẹ̌ bọu kěhu l᷊inggi bọu sěmběkan timuhẹ̌ sarang bawul᷊udangu Libanon su sěmběkan sawěnahẹ̌ dingangu wọu Sal᷊ụ u Efrat su sěmběkan daki sarang Laudu Tal᷊oara e su sěmběkaʼm bahẹ.

²⁵Su kasěllahu wanua ene MAWU Ruatanu e sarung mapakariadin taumata e mạtakụ i kamene e kerẹewe seng niriandi-Ne, hakịu tawẹu sarang sěngkatau e kụ makasahaghe si kamene.

²⁶Ěllo ini e i kamene wotongewe měmile wọu tal᷊oarang al᷊amatẹ̌ arau laane.

²⁷I kamene e sarung al᷊amateng kereu mararingihẹ̌ su manga titaʼm MAWU Ruatanu e, kụ sěhěllo ini e takụ nihabarẹ̌ si kamene.

²⁸Arawe i kamene e sarung aneěng kereu tawe rumaringihẹ̌ suapan titaʼm MAWU Ruatanu, kaiso kawe mẹ̌sul᷊ẹ waugu maněmba manga ruata wal᷊ine kụ tawe nisẹ̌sěmbaěng kamene.

²⁹ Samuring MAWU Ruatanu e nẹ̌bawa si kamene simuẹ̌ sarang banua kụ sarung pẹ̌tanakeng i kamene e, al᷊amatẹ̌ ene e iwerang kamene wọu Wul᷊udu Gerizim, dingangu laane ene e wọu Wul᷊udu Ebal. (

³⁰Bul᷊ude rarua ene e kaẹ̌bakeng su sěmběkaʼm bahẹ bọu Sal᷊ụ u Yordan su ěntanan tau Kanaan kụ mạtanạ su Wal᷊ang Yordan, tụtatěngo sěmběkaʼm bahẹ tạ kararaune wọu manga kakaluang tampạu pẹ̌kakal᷊iomanengang su More su rěduhu soang Gilgal.)

³¹Tawẹ lai kararěngụ e i kamene lumiu Sal᷊ụ u Yordan, dingangu mẹ̌tanạ su wanua kụ nionggọu MAWU Ruatanu e si kamene. Bọu ene i kamene e měmul᷊aho wanua ene mase mẹ̌tanạ sene.

³²I kamene harusẹ̌ tumuhụ kal᷊awọu tita kụ takụ nihabarẹ̌ si kamene sěhěllo ini.”