Read Sangir PANGANGONGGỌ U TORATẸ̌ KAPIA 12 Bible Online

PANGANGONGGỌ U TORATẸ̌ KAPIA 12 - Sangir bible

PANGANGONGGỌ U TORATẸ̌ KAPIA 12

¹”Seng ini e kal᷊awọu toratẹ̌ kụ harusẹ̌ tuhukang i kamene kanandung biahʼi kamene su wanua kụ nionggọ si kamene kahiang MAWU Ruatang manga i upung i kamene.

²Nasuẹ̌ e su wanua ene i kamene harusẹ̌ měnggoghahẹ̌ kal᷊awọu tampạu pěnaněmbaěng su wowong manga wul᷊ude mararangẹ, su manga wukide, ringangu su manga al᷊ungu manga kakaluang mal᷊ahěbung, tampạ u wansa kụ mạtanạ sene mẹ̌němba manga ruatan sire.

³ Lenggeko kal᷊awọu pananěmbaěng i sire e ringangu ghoghahẹ̌ko kal᷊awọu rihi watu kụ lẹ̌ěnnaěng i sire kawe piạ kakakoạ e. Tutungko kal᷊awọu manga awẹ i Asyera, ringangu goghahẹ̌ko kal᷊awọu tul᷊adang mahan duatan sire e, hakịu kal᷊awọu manga ruata ene tawe lai sarung isěmba suapan tampạ ene.

⁴Su tempong i kamene mẹ̌němba MAWU Ruatanu e, kumbahangbe mẹ̌těno lulun sire e měněmba manga ruatan sire e.

⁵Bọu kal᷊awọu wanuang manga ghal᷊ipohong Israel, MAWU Ruatanu e sarung měmile tampạ sěmbaụ tadeạu kawanuang kitẹ e makakarěnta sarang těngo-Ne ringangu měněmba si Sie.

⁶Sarang tampạ ene e, i kamene hinong mẹ̌bawa manga sasěmba tẹ̌tutungang ore lai sasěmba wal᷊ine, sasěmbang kamene pẹ̌tahạsěngkapul᷊one bọi kau, ringangkewe lai manga sasěmba lai wal᷊ine, sasěmba wawaehẹ̌ diandinu, sasěmba wọu karal᷊uasu naungu e ringangu anạ u sapi ringangu kambing arau dombang kamene kụ buhu ral᷊ěpụ.

⁷Sene lai, su těngom MAWU Ruatanu e, i kamene ringangu walagi kamene harusẹ̌ pěmpẹ̌kaěng dingangu pahul᷊uasẹ̌ baugu manga tawakal᷊inu kụ piạ ual᷊ine ual᷊ingu nial᷊amatengu MAWU Ruatanu e.

⁸Kereu tempo ene seng narěnta, i kamene kumbahang delaing mẹ̌koạ kere orasẹ̌ ini e. Sarang orasẹ̌ ini e i kamene mẹ̌kẹ̌kal᷊iomaneng tuhụ kapulun naungʼi kamene,

⁹ual᷊ingu i kamene e wědang tawe nạsuẹ̌ su wanua kụ nionggọu MAWU Ruatang kamene e, tampạ i kamene kụ botongewe makapangindunụ tawẹ konsange.

¹⁰Bọuteng i kamene limiu Sal᷊ụ u Yordan, MAWU Ruatanu e sarung mẹ̌tul᷊ung i kamene kumaiang dingangu mẹ̌tanạ su ěntana su sěmběkan sal᷊ụ ene. I Sie sarung měnirung si kamene wọu kal᷊awọu sekẹ, kụ i kamene sarung mẹ̌biahẹ̌ dingangu mal᷊enehẹ̌ ore lai marěmasẹ̌.

¹¹Bọu ene MAWU Ruatanu e sarung měmile tampạ sěmbaụ suapang i Sie harusẹ̌ sěmbaěng. Sarang ene e i kamene harusẹ̌ tamai mẹ̌bawa kal᷊awọu apan takụ nioro si kamene, kere sasěmba tẹ̌tutungang dingangu sasěmbạewe lai wal᷊ine, sasěmba pẹ̌sěngkatahạpul᷊one ringangu sasěmba těntani kụ seng nirianding kamene su MAWU.

¹²Pahul᷊uasẹ̌ko su těngon MAWU Ruatanu, ringangu manga anạ i kamene, manga ěllangu ringangu taumatan Lewi kụ mạtanạ su manga soanu, ual᷊ingu tau Lewi e tawe kawahageanengu ěntana su wanuang kamene.

¹³I kamene tawe wotonge mẹ̌gěllịu sasěmbanu su tampạ kụ měngkate wala mapile kahiang kamene hala e,

¹⁴kaiso tumbạeng su tampạ kụ pinileʼm MAWU e su wanua sěmbaụ bọu tal᷊oarang banuang manga ghal᷊ipohonu. Sene e samatang i kamene hinong měnarakangu sasěmba tẹ̌tutungang dingangu mẹ̌koạ hal᷊ẹ̌ bal᷊ine kụ takụ ioro si kamene.

¹⁵Arawe i kamene e mal᷊iwirẹ̌ baugu ipěmotọ binatangu e ringangu kuminạ gẹ̌sine suapan tampạ pẹ̌tanakeng i kamene. I kamene e wotonge mangidopẹ̌ kal᷊awọeweng nionggọu MAWU Ruatanu e si kau. Apan taumata e waẹbe wurěsi arau mal᷊amuhụ e, wotongewe kuminạ gẹ̌si ene, kerẹwe lai i kamene wotonge kuminạ gěsing kijang arau gẹ̌sing rusa.

¹⁶ Kětạembeng dahane tawe wotonge kinaseng, kaiso harusẹ̌ iwoso sarang ěntana kere akẹ.

¹⁷Su tampạ katatanakengu e i kamene tawe wotonge mẹ̌biahu sasěmba pẹ̌sěngkatahạpul᷊one wọu gandung i kamene, angguri kamene, lanan zaitun i kamene, sapi arau kambing kerene lai dombang kamene kụ humotong ipěhanạ, sasěmba wawaehẹ̌ diandinu, sasěmba ual᷊ingu karal᷊uasu naung, araụewe sasěmba wal᷊ine.

¹⁸I kamene ringangu manga anạ i kamene e ringangkewelaing manga ěllangu ringangu taumatan Lewi e kụ mạtanạ su soanu, harusẹ̌be mangidopẹ̌ sasěmba ene su těngom MAWU Ruatanu, su tampạ nipilem MAWU Ruatanu. Kụ su tampạ ene i kamene e harusẹ̌be mahul᷊uasẹ̌ ual᷊ingu kal᷊awọu tawakal᷊inu.

¹⁹Diagateko kumbahang sarang i kamene mapakawalang ghal᷊ipohong Lewi e tụtal᷊iahu karěngụeweng i kamene mẹ̌bẹ̌biahẹ̌ su wanua ini.

²⁰Samuring MAWU Ruatanu e napakawěnahu manga pẹ̌saraěngu wanuang kamene kerẹewe seng niriandi-Ne, i kamene wotongewe kuminạ gěsim binatang e tuhụ kapulunu.

²¹Kereu tampạ kụ pinileʼm MAWU Ruatanu e tumanịu marau wọu tampạu, i kamene wotonge měmotọ sapi sěmbaụ, domba arau kambing kụ nionggọu MAWU si kamene, ringangu kuminạ gěsine su tampạu ringangu kapulun naungu, kerẹewe seng takụ pinẹ̌bera si kamene.

²²Apan taumata e, baewe apaʼm burěsi arau mal᷊amuhụ e, wotonge kuminạ gěsi ene, kerẹewe i kamene wotonge kuminạ gěsin rusa arau gěsing kijang.

²³ Arawe ghěsi kụ bědang piạ dahane, tawe wotonge kinaseng, batụu niawa e ene su ral᷊ungu raha, ringangu i kamene e tawe wotonge kuminạ niawa ringangu ghěsine sěngkakinạ.

²⁴Dahane mamben tawe wotonge kinaseng, u kai hanesẹ̌ běmbing su ěntana kere akẹ.

²⁵Kereu i kamene tumuhụ tita ene, MAWU e sarung mal᷊uasẹ̌, dingangu i kamene ore lai kal᷊awọu hitenu e sarung mal᷊unsemahẹ̌.

²⁶Kal᷊awọu gaghěllị dingangu sasěmba kụ seng nirianding kamene su MAWU e, harusẹ̌be wawang kamene sarang tampạ kụ nipileng MAWU e.

²⁷Sasěmba tẹ̌tutungang dingangu sasěmba kụ kẹ̌kinaseng gěsine e harusẹ̌be isěmba su wowoʼm pananěmbaěng u MAWU Ruatanu, ringangu rahane sarung bosoěng su wowoʼm pananěmbaěng ene.

²⁸Naungeko pakapia kal᷊awọu apan seng takụ nioro si kamene, tangu i kamene mẹ̌koạbe mapia ringangu mẹ̌tatal᷊ahino su MAWU Ruatanu, hakịu i kamene ringangu pal᷊ahiteng kamene e masal᷊amatẹ̌ dingangu mal᷊unsěmahẹ̌ sarang marěngụ-děngụ.”

²⁹”MAWU Ruatanu e sarung mapakawinasang manga wansa kụ mạtanạ su wanua ene, hakịu i kamene e makakaiang dingangu mẹ̌tumanạ sene.

³⁰Samuring manga wansa ene pinakawinasa e, pakaudupẹ̌ bue kumbahang sarang i kamene mẹ̌těno si sire měněmba manga ruata wal᷊ine, watụ u pẹ̌kakoạ kerene e makạkaděntang silakạ.

³¹Kakakoạ u manga wansa ene e měněmba manga ruatan sire e, kumbahangbe i kamene mẹ̌těno waugu měněmba Mawu Ruatanu, watụ u i sire e měněmba ringangu mẹ̌kẹ̌koạ kakanoạ i sire matatingkaị kụ kẹ̌kawěnsingangu MAWU. Sarang manga anạ i sire hala e tẹ̌tutungang i sire su wowoʼm pananěmbaěng kere sasal᷊e waugu manga ruatan sire e.

³² Pẹ̌koạko kal᷊awọu apan takụ nioro si kamene e kumbahangbe tambaěng arau gaingang.