Read Sangir PANGANGONGGỌ U TORATẸ̌ KAPIA 13 Bible Online

PANGANGONGGỌ U TORATẸ̌ KAPIA 13 - Sangir bible

PANGANGONGGỌ U TORATẸ̌ KAPIA 13

¹Kereu sěngkatau nabi arau lumaipine[12] mẹ̌dianding sěmbaụ kal᷊aherang arau karal᷊inaụ

²timonane tadeạu i kamene měněmba ringangu mẹ̌tahamawu su manga ruata kụ bědang tawe nịkasingkateng i kamene, manilaing apa kụ ipẹ̌diandine ene těnga-těngadẹ̌ mariadi,

³kumbahang mẹ̌pandung si sie. MAWU Ruatanu e mẹ̌pakẹu taumata ene, waugu měnal᷊ukạ si kamene, mẹ̌deạu makasilo měnsang i kamene kahěnga-hěngangbe kụkěndagu MAWU e ringangu kạguwạu naung arau tala.

⁴Taumata kerene harusẹ̌ ihukungu pakapate, ual᷊ingu mapulu makapal᷊idẹ̌ si kamene wọu ral᷊eng kụ nioroʼm MAWU Ruata e si kamene. I sie kai taumata ral᷊akisẹ̌ ual᷊ingu něngoro si kamene pěděndokạ MAWU Ruatanu kụ seng něliwirʼi kamene wọu Misirẹ̌ tampạ nipẹ̌tahuěllang i kamene. Kụ i sie harusẹ̌ pateěng tadeạu karal᷊akisẹ̌ e ene ipakailang. Arawe i kamene e kěnangko tol᷊e MAWU Ruatanu kụ daringiheko i Sie ringangu pẹ̌koạ e kal᷊awọu parenta-Ne. Tatapẹ̌ko pakasatia ringangu pẹ̌tahamawu si Sie.

⁶Kereu anạ u sěngkataunu arau anạu esẹ dingangu wawine, arau kawingu ikẹ̌kěndagẹ̌ e arau hapịu kapiaěnge marěmma-rěmmasẹ̌ měngẹ̌ngologẹ̌ si kau e waugu měněmba manga ruata wal᷊ine kụ tawe kinakiral᷊anu ringangu ikakiral᷊ang manga i upungu, manga ruataʼm manga wansa kụ matanạ marani arau marau,

⁸abe raringihe i sie ringangu abe wala watangengu e ologange. Kumbahang lai kuměndagẹ̌ arau měněntanudẹ̌ tau ene.

⁹I sie harusẹ̌ berengangu watu sarang pakapate. I kau e harusẹ̌ měněkạ měmahung si sie, tol᷊eěngu kěbị kawanua. Tau nẹ̌sal᷊a ene e harusẹ̌ pate, u i sie mapulu mapakaraung kamene wọu anung MAWU Ruatanu kụ mapakal᷊iwirʼi kitẹ e wọu pẹ̌tatahuěllang su Misirẹ̌.

¹¹Tangu kal᷊awọu tau Israel sarung makaringihẹ̌ hal᷊ẹ̌ u pěmamate ene ringangu něngkatakụ hakịu tawẹu sarang sěngkatau relaing mẹ̌koạ lai kerene karal᷊akise.

¹²Kereu i kamene sarung matanạ su manga soa kụ nionggọu MAWU Ruatanu e si kau, aramanung masěsahẹ̌ habarẹ̌ e

¹³u pirang katau taumata ral᷊akisẹ̌ e wọu kawanuanu e seng nakapal᷊idẹ̌ tumanạu soa waugu měněmba manga ruata kụ tawe kinakiral᷊ang kamene.

¹⁴Kereu ikaringihẹ̌ habarẹ̌ niusẹ̌ kerene, parikẹ̌saiko pakapia. Kereu karal᷊akisẹ̌ ene kahěnga-hěngang seng nariadi,

¹⁵tangú kal᷊awọu tumanạ u soa ene ringangu manga binatange harusẹ̌ pateěng. Soa ene harusẹ̌ ipakaupu kahěngang.

¹⁶Patikụ arětạ u tumanạ u soa ene harusẹ̌ itampung dingangu ambungang su ěntana mal᷊oahẹ̌, bọu e soa ringangu kal᷊awọu arětạ e harusẹ̌ tutungang kere sasěmba su MAWU Ruatanu. Bọu ene kěbị e harusẹ̌ itěntang makoạ ěnnạe ringangu tawe wotonge pětikang kapia.

¹⁷Apal᷊iwụ niane ene e tawe wotonge resokang baugu watangengu e hala, kaiso harusẹ̌ ipakawinasa marihutu. Tangú ral᷊angehu MAWU e sarung mal᷊ěda ringangu i Sie sarung manodẹu kakěndage si kau. I Sie sarung mal᷊ondo naunge si kau ringangu mapakariading kamene wansa kụ masaria kerẹewe nạung niriandi-Ne su manga i upungu,

¹⁸asal᷊u i kamene e tumuhụ kal᷊awọu tita-Ne nạung takụ nihabarẹ̌ si kamene sěhěllo ini, ringangu mẹ̌koạ kal᷊awọu apang ikẹ̌kapulu-Ne.”