Read Sangir PANGANGONGGỌ U TORATẸ̌ KAPIA 14 Bible Online

PANGANGONGGỌ U TORATẸ̌ KAPIA 14 - Sangir bible

PANGANGONGGỌ U TORATẸ̌ KAPIA 14

¹ ”I kamene e kai umatu MAWU Ruatanu. Kụ su tempong i kamene mělẹ̌lutu e, kumbahang mapakal᷊esẹu wadangu arau měngul᷊ụ utạ u su wowon děhụ u kere kẹ̌koatengu manga wansa wal᷊ine.

² I kamene e kai tataghuanengu MAWU Ruatanu; ringangu kal᷊awọu wansa su wowon dunia, seng i kamene e nipilen Duata e waugu makoạ umatʼE.”

³”Kumbahang kuminạ binatang ipẹ̌tẹ̌tělling nihabaru MAWU e.

⁴I kamene e wotonge kuminạ manga binatang ini e: sapi, domba, kambing,

⁵rusa, dombang kěhu, kambingu kěhu, kijang,

⁶dingangu kěbị binatang kụ kanukune nawěka rarua ringangu tụtal᷊umama.

⁷I kamene tawe wotonge kuminạ binatang kụ kanukune tawe nawěka ringangu tawe tumatal᷊umama. Kumbahang kuminạ onta, kělinci arau marmot. Binatang ene e ipẹ̌tẹ̌tělling ual᷊ingu manilaing tụtal᷊umama e, kai kanukune tawe nawěka.

⁸Kumbahang kuminạ bawi. Binatang ene e ipẹ̌tẹ̌tělling, batụu manilaing kanukune nawěka, kai i sie e tawe tumatal᷊umama. Gěsine tawe wotonge kinaseng, kasuenge tawe wotonge senggehang.

⁹I kamene wotonge kuminạ kal᷊awọu haghing kinạ piạ gěnggalange ringangu piạ onạ e.

¹⁰Binatang kụ mẹ̌bẹ̌biahẹ̌ su ral᷊ungu akẹ kaiso tawẹ apa gěnggalange ringangu tawẹ apa onạ e ute kai pẹ̌tẹ̌tělling, kụ tawe wotonge kinaseng.

¹¹I kamene e wotonge kuminạ kal᷊awọu haghing manụ u winalangeng kụ tawe ipẹ̌tatělling.

¹²Katewe piạ pira-pira haghine manụ u winalangeng kụ tawe wotonge kinaseng, kere: manụ kasiahe, sampahạ, dingangu haghing kalěmba, manụ sahedẹ̌, gaga, manụ onta, pěpato, bahoa awạe meha, ringangu haghiʼm bahoa, waral᷊ang, kuheẹ̌, paniki.[13]

¹⁹Patikụ binatang lụhomang kụ piạ papanide e kai ipẹ̌tẹ̌tělling, kụ tawe wotonge kinaseng.

²⁰Binatang piạ papanide kụ tawe itatělling e wotonge kinaseng.

²¹ Binatang kụ nate e semben nal᷊ahẹ u tawe wotonge kinaseng i kamene, kaiso wotongewe kinaseng u tau raghị kụ matanạ sutal᷊oarang kamene, arau iwal᷊ụ su tau raghị. I kamene kai umatẹ̌ nihae waugu MAWU Ruatanu. Gěsing anạ u domba e arau anạ u kambing tawe wotonge sasakengu akẹ u susung ninange.”

²² ”Apan taung i kamene harusẹ̌ měhae pẹ̌sěngkapahiakeng mapul᷊o wọu gěsing ěntananu.

²³Su těngon MAWU Ruatanu e, su tampạ kụ nipile-Ne, waugu tampạu pẹ̌kakal᷊iomanengang, i kamene e harusẹ̌ kumaěng sasěmbang pẹ̌sěngkapahiakeng mapul᷊o e wọu gandung, akẹ u anggorẹ̌, lanan zaitun, dingangu anạ u sapi ringangu kambing ore dombanu kụ buhu ral᷊ěpụ. Koạko hal᷊ẹ̌ ene tadeạu waugu sarang marěngụ i kamene měngěndung měngadatẹ̌ MAWU Ruatanu.

²⁴Kereu tampạ kụ nipileng MAWU Ruatanu tumanịu marau wọu wal᷊enu hakịu sěngkapahiakeng mapul᷊o wọu ghěsing ěntananu kụ nionggọ u MAWU Ruatanu e si kau tawe ikawawang kamene sarang ene, tangu

²⁵wal᷊ụ e wahageangu wọu ghẹ̌sing ěntananu ene, ringangu wawako roite sarang tampạ kụ nipileng MAWU Ruatanu.

²⁶Bal᷊ụ e roitẹ̌ ene waugu manga apang ilẹ̌ěnning i kamene ñ sapi arau kambing domba, akẹ u anggorẹ̌ arau inumang makakětị — bọu e su tampạ ene, su těngoʼm MAWU Ruatanu, i kamene ringangu walagu e harusẹ̌ kumaěng sěngkakaěng dingangu sěngkapẹ̌dal᷊uasẹ̌.

²⁷Tau Lewi abe pakawala karal᷊antinge su manga soanu; pẹ̌tahěndung bue u i sire e tawẹ apa ěntanan sire hala e.

²⁸Su pěhẹ̌pusangu apan těllu taungu pělahal᷊ẹ̌ e, i kamene harusẹ̌ pẹ̌bawa sěngkapahiakeng mapul᷊o wọu ghěsing ěntanang kamene, ringangu měnampung ene e su apan soanu.

²⁹Kaěng ene e waugu tau Lewi, watụ u i sire tawẹ ěntanan sire, ringangu waugu tau raghị e anạ kasisi ěndusẹ̌ dingangu apaʼm bal᷊u kụ měmpẹ̌bẹ̌biahẹ̌ su manga soanu e. I sire wotonge ruměnta kụ měngal᷊ạ kal᷊awọu apang gausang i sire e. Kereu i kamene mẹ̌koạ kerene, tangú MAWU Ruatanu e sarung měngal᷊amatẹ̌ kal᷊awọu munaranu.”