Read Sangir PANGANGONGGỌ U TORATẸ̌ KAPIA 15 Bible Online

PANGANGONGGỌ U TORATẸ̌ KAPIA 15 - Sangir bible

PANGANGONGGỌ U TORATẸ̌ KAPIA 15

¹”Su pěngěnsueěngu apan taung kapitune i kamene harusẹ̌ pẹ̌koạ pěndarědasẹ̌ utang.

²Kere ini kakakoạ e. Apan tau Israel kụ měmpěngědang doitẹ̌ su taumata kụ bansa sěmbaụ e, harusẹ̌be pěndědasẹ̌ utang ene batụu tumuhụ putusangu MAWU e sẹ̌sane utang ene e seng nirědasẹ̌, kụ semben tawe wotonge saụ tẹ̌tul᷊ang.

³I kamene wotonge měnětul᷊ẹ̌ doitẹ̌ kụ pinakiědang i kamene su tau raghị, kaiso tawe wotonge saụ měnětul᷊ẹ̌ kapia roitẹ̌ kụ pinakiědang i kamene su taumata kụ bansa sěmbaụ dingang i kamene.

⁴MAWU Ruatanu e sarung měngal᷊amatẹ̌ si kamene su wanua kụ nionggọʼE si kamene. Tangú sutal᷊oaran bansanu e sarung tawẹ apa taumata kasiang,

⁵asal᷊u i kamene matuhụ su MAWU Ruatanu, kụ dingangu maunsui mẹ̌koạ kal᷊awọu apan takụ nioro si kamene sěhěllo ini.

⁶MAWU Ruatanu sarung měngal᷊amatẹ̌ si kamene kere nạung niriandi-Ne. I kamene sarung mapěngědangu roitẹ̌ su wansa mal᷊awọ, arawe i kamene hala e tawe měmpěngědang; i kamene e sarung mẹ̌kawasa wansa mal᷊awọ, kaiso i sire e tawe makapẹ̌kawasa si kamene.

⁷ Kereu i kamene seng mạtanạ su wanua kụ nionggọ u MAWU Ruatanu e si kau, mase su soa sěmbaụ bọu tal᷊oarang manga soanu, piạ taumatang kamene kụ bansa sěmbaụ kụ biahe masigěsạ, kumbahang kětạeng měngẹ̌ngěnna pandungangu watangenge hala mase tawe mẹ̌tul᷊ung i sie.

⁸Ral᷊iune, i kamene harusẹ̌ mal᷊ondo ringangu mapěgěllịu ědang su taumata ene kal᷊awọu apang gausange.

⁹Kumbahangbe kawe tawe mapulu měngonggọu ědang si sie ual᷊ingu taungu pěndarědasẹ̌ utang e kawe seng marani. Abe wala tiněnnan sire ral᷊akisẹ̌ ene masuẹ̌ su ral᷊ungu naungu. Kamageng u i kamene e madiri mapěgěllịu ědang, taumata ene e sarung kumakindoạ su MAWU mědeạu kumurateng kau e, tangú i kamene e sarung ipẹ̌sal᷊a.

¹⁰Pěngonggọko si sie ringangu naung mal᷊uasẹ̌ ore lai mal᷊oahẹ̌, tangú MAWU Ruatanu e sarung měngal᷊amatẹ̌ kal᷊awọu munaranu.

¹¹ Sutal᷊oaran tau Israelẹ̌ e sidutu mang kẹ̌kaěbakeng manga pirang katau taumata kasiang dingangu masigěsạ biahe. Ual᷊ingu ene iạ e měngoro si kamene mědeạu mahimumu si sire.”

¹² ”U kereu sěngkatau esẹ arau wawine wọu wansanu e mẹ̌bal᷊ụ u watangenge[14] makoạ ěllangu, i sie harusẹ̌ měhal᷊ẹ̌ baugʼi kau karěngụu ěnnungu taung. Su ral᷊ungu taung kapitune i sie harusẹ̌ ipakal᷊iwirẹ̌.

¹³Ěllang kụ ipakal᷊iwirẹ̌ e tawe wotonge iwala pakapul᷊ẹ lima mapul᷊o.

¹⁴Pěngonggọko si sie ringangu karal᷊ondo wọu apang kụ nionggọ u MAWU Ruatanu e si kau kụ kambing, domba, gandung dingangu anggorẹ̌.

¹⁵Pẹ̌tahěndungko u i kamene nạung kal᷊imona e ěllang su Misirẹ̌ bọu ene nipakal᷊iwiru MAWU Ruatanu; kụ kai ual᷊ingu ene hakịu iạ e něngonggọ u parenta ini e si kau.

¹⁶Kaiso kamagengu ěllang ene e mạdiri rumal᷊eng ual᷊ingu i sie kụkěndagʼi kau ringangu ral᷊ohoʼm bal᷊enu e kụ mal᷊uasẹ̌ mẹ̌tanạ dingangu,

¹⁷wawako i sie sarang tukadu wal᷊enu ringangu lohangko tul᷊ine, tangú i sie sarung makoạ ěllangu kanandung umburu pẹ̌bawiahe. Kerene lai harusẹ̌be i kamene pẹ̌koạ pakapia su ěllangu wawine e.

¹⁸Kereu i kamene e mapakal᷊iwiru sěngkatau ěllange, kumbahangbe kawe makapěndang mẹ̌sasěsilẹ̌, u karěngụ u ěnnungu taung i sie seng němunara waugʼi kamene, ringangu sěngkapahiakeng darua wọu tatendengu sěngkatau mẹ̌tatangkiang.[15] Koạko tita ene, tangú MAWU Ruatanu e sarung měngal᷊amatẹ̌ kal᷊awọu munaranu.”

¹⁹ ”Anạ u sapi ringangu kambing domba esẹ kụ nipěhanạ humotonge harusẹ̌ isěmba su MAWU Ruatanu. Sapi ene tawe wotonge paketang baugu pěmol᷊eng sasěndugẹ̌ ěntana ringangu domba ene tawe wotonge kul᷊ukang.

²⁰Apan taung i kamene sěmbalagheng e harusẹ̌ kuminạ gěsine su těngong MAWU Ruatanu, su tampạ kụ nipileʼm MAWU.

²¹Kaiso kamagengu binatang ene piạ turạ e, andene pengkadẹ̌ arau wuta arau piạ sakị e matědụ bal᷊ine e, i kamene tawe wotonge měněmbang ene su MAWU Ruatanu e.

²²Apan taumata, baewe wurẹ̌si arau mal᷊amuhụ e, wotongewe mahungkinạ su wal᷊e, kere kuminạ gěsing rusa arau gěsing kijang.

²³ Dahane e tawe wotonge kinaseng, kaiso harusẹ̌ bosoěng su ěntana e kere akẹ.”