Read Sangir PANGANGONGGỌ U TORATẸ̌ KAPIA 16 Bible Online

PANGANGONGGỌ U TORATẸ̌ KAPIA 16 - Sangir bible

PANGANGONGGỌ U TORATẸ̌ KAPIA 16

¹ ”Bantugeko Paskah e su ral᷊ungu wul᷊ang u Abib baugu měngadatẹ̌ MAWU Ruatanu, u su ral᷊ungu wul᷊ang ene e, su tempong hěbi, i Sie měliwirʼi kamene e wọu Misirẹ̌ e.

²Dakọ e sarang tampạ kụ nipileng MAWU waugu měmotọ sěmbaụ bọu kambing arau domba arau sapinu kere sasěmbang Paskah e waugu měngadatẹ̌ MAWU Ruatanu.

³Sasěmbang Paskah ene harusẹ̌ kinaseng dingangu borotẹ̌ tawẹ kabọ e. Pitu ěllo karěngụ e i kamene harusẹ̌ kumaěng borotẹ̌ tawẹ kabọ e, kere su tempong i kamene něněntangu ěntanang Misirẹ̌ e mẹ̌sẹ̌sasahonsang. Kaěngke borotẹ̌ ene, borotẹ̌ kụ nisěbạ borotẹ̌ u pẹ̌tatahangu sigěsạ, tadeạu kanandung umburu pẹ̌bawiahu e, i kamene makatahěndung ěllong kamene e něněntangu Misirẹ̌ e, tampạ i kamene nẹ̌tatahangu sunsara.

⁴Karěngụu pitu ěllo su kạguwạu wanuanu e tawẹu sarang sěngkatau e wotonge měndesọ kabọ su wal᷊ene. Gěsing binatang kụ nipotọ su tempong hěbi su ěllo humotong harusẹ̌be kinạ pakasue su hěbi ene e lai.

⁵Binatang kụ baugu pěmamantugẹ̌ ěllom Paskah e harusẹ̌be potọ su tampạ kụ nipilen MAWU Ruatanu e, ringangu tawe wotonge su tampạ bal᷊ine su kạguwạu wanua kụ nionggọʼE si kau. Hal᷊ẹ̌ ene e harusẹ̌be koạ i kamene su tempong matang ěllo e sumědạ, kerẹewe su tempong i kamene e naněntangu ěntanang Misirẹ̌ e.

⁷Tuěngko gẹ̌sim binatang ene e, ringangu kinạko su tampạ kụ nipileng MAWU Ruatanu, wọu ene kapul᷊ẹ e sarang bal᷊enu e sěngkarịěllone mal᷊ukadẹ̌ e.

⁸Karěngụu ěnnungu ěllo kụ tuhụ e i kamene harusẹ̌ kaěng borotẹ̌ tawẹ kabọ e. Su ěllo kapitune i kamene e harusẹ̌ pẹ̌tampung baugu měněmba MAWU Ruatanu. Kumbahangbe měhal᷊ẹ̌ su ěllo ene.”

⁹ ”Pěndekengko pitung kamisa měnětạ bọu ěllo humotong i kamene něharesẹ̌ gandung,

¹⁰bọu e bantugeko Sal᷊imbangu Pěmaměnsạu baugu ipěngadatẹ̌ MAWU Ruatanu e. Su ěllo ene e wawako sasěmbang naung mal᷊uasẹ̌ si Sie tuhụ kal᷊awọu asěki kụ seng nionggọ e si kau.

¹¹Su těngong MAWU Ruatanu e, su tampạ kụ nipile-Ne, i kamene harusẹ̌ lumuasẹ̌ sěngkapahul᷊uasẹ̌ dingangu manga anạu e, manga ěllangu, ringangu tau Lewi, tau raghị, manga rariọ kasisi ěndusẹ̌ dingangu apaʼm bal᷊u kụ mạtanạ su manga soanu.

¹²Tuhukeko kěbị tita-Ne pakasatia, dingangu kumbahangbe miwul᷊e u nạung kal᷊imona e i kamene kai ěllang su Misirẹ̌.”

¹³ ”Samuring kěbị gandungu e masueng pěpele ringangu kal᷊awọu wuang anggoru e masueng pěhane, i kamene harusẹ̌ měmantugẹ̌ Sal᷊imbangu Selon Daukalu e karěngụ u pitu ěllo.

¹⁴Pahul᷊uase sěngkapahul᷊uasẹ̌ dingangu manga anạu e, manga ěllangu, tau Lewi, tau raghị, dingangu manga rariọ kasisi ěndusẹ̌, dingangu kal᷊awọu manga wal᷊u apang měmpẹ̌tẹ̌tanạ su apan soanu.

¹⁵Pitu ěllo karěngụ e i kamene harusẹ̌ pěmantugẹ̌ sal᷊imbang ene e waugu měngadatẹ̌ MAWU Ruatanu e su tampạ kụ nipilen MAWU. Pahul᷊uase, watụ u MAWU Ruatanu e seng něngal᷊amatẹ̌ gěsing ěntana e ringangu munaranu.

¹⁶Patikụ apang manga esẹ u Israelẹ̌ e harusẹ̌ duměnta měněmba MAWU Ruatanu, su tampạ kụ nipile-Ne těllu sul᷊e sěntaung, kụ su ěllong Pěmamantugu Paskah, su Sal᷊imbang u Pěmamensạ dingangu Selon Daukalu. Apan taumata harusẹ̌ mẹ̌bawa sasěmba

¹⁷tuhụ ikaumal᷊e, tuhụewe kal᷊awọu asěki kụ nionggọ u MAWU Ruatanu e si sie.”

¹⁸”U suapan soa kụ nionggọu MAWU Ruatanu e si kau, i kamene harusẹ̌be měhengkẹ manga mělahukung dingangu manga mělahal᷊ẹ̌ bal᷊inẹ e, waugu měhukungu kawanua e su kaadile.

¹⁹ Su ral᷊ungu měngal᷊ạ putusang, i sire e tawe wotonge mẹ̌kakanoạ mẹ̌batụ kapulung batangeng arau mawěhạ su sěmběka. I sire lai tawe wotonge měnarimạu sasorokẹ̌, ual᷊ingu sasorokẹ̌ ene kai makạpẹ̌bẹ̌butan taumata, saranglai taumata pelesa e ringangu matul᷊idẹ̌ e, hakịu měngal᷊ạ putusang e tawe su kạadile.

²⁰I kamene e harusẹ̌ sěntiniạ adilẹ̌ tadeạu wotonge makapěnatapẹ̌ dingangu mẹ̌biahẹ̌be mal᷊unsemahẹ̌ su ěntana kụ nionggọu MAWU Ruatanu e si kamene.

²¹ Kereu i kamene e mẹ̌koạ pananěmbaěng baugu MAWU Ruatanu, kumbahangbe měměllọu tul᷊adang mahan duata wọu kalu sasihing si Asyera su sěmběkane,

²² ringangu kumbahang mapararisịu rihi waugu měnal᷊e mahan duata, ual᷊ingu MAWU e mạběnsingu kakanoạ ene.