Read Sangir PANGANGONGGỌ U TORATẸ̌ KAPIA 17 Bible Online

PANGANGONGGỌ U TORATẸ̌ KAPIA 17 - Sangir bible

PANGANGONGGỌ U TORATẸ̌ KAPIA 17

¹Kumbahang maněmban sapi arau domba piạ turạ e su MAWU Ruatanu, ual᷊ingu i Sie měbẹ̌binsị u ene.

²Kereu i kamene makaringihẹ̌ u su soa sěmbaụ piạ taumata nẹ̌sal᷊a su MAWU Ruatanu e ual᷊ingu limampa pẹ̌kakědo

³ ringangu hengetangʼE kụ mẹ̌sẹ̌suba su manga ruata wal᷊ine arau su matangěllo, wul᷊ang arau manga wituing,

⁴tangú i kamene harusẹ̌ měnẹ̌sui pakaunsui. Měnsang těngadẹ̌ bue lamuhụ ene seng nariadi su Israel,

⁵taumata piạ sal᷊ane harusẹ̌ iwawa sol᷊ong likudu soa mase wahungang u watu sarang mate.

⁶ Kaiso i sie kětạeng botonge i hukungu papate kereu piạ duang katau sahidi arau něngalembo; pẹ̌sěngkatau e tawe wotonge i hukungu papate kụ ketạeng ual᷊ingu sahidiangu sěngkatau.

⁷ Apan sahidi e hinong měmahungu watu humotong su tau ene, mase tol᷊eěngu patikụ kawanua. Ual᷊ingu kakakoạ kerene tangú i kamene pěhěpako karal᷊akisẹ̌ ene.

⁸Kereu piạ pěrkara kụ tawe ikaputusu manga mělahukung ual᷊ingu tumanịu matal᷊imbuku, kere andene pěrkarang pěmamate nipẹ̌tatudẹ arau tawe nipẹ̌tatudẹ, pẹ̌dararendehu arětạ pusakạ arau pẹ̌tatatěkạ, ute i kamene harusẹ̌ kakoạ sol᷊ong tampạ nipileng MAWU Ruatanu.

⁹Kalakẹ̌ko pěrkaranu ene su manga imang u Lewi ringangu su manga mělahukung kạpẹ̌munarane, kụ balạ e i sire apěmutusẹ̌.

¹⁰Seng i sire e mangonggọu putusang, kụ i kamene harusẹ̌ měndal᷊eng u ene pakaudupẹ̌ apạeweng niweran sire si kamene.

¹¹Daringihẹ e putusang i sire kụ pěmpẹ̌koạ apang nipoěng i sire sarangkewe apa rarodọe.

¹²Walaẹwe i saing kụ bahani rumokạ mělahukung arau imang kụ kạpẹ̌mẹ̌munarane e ute harusẹ̌ ihukung u papate; kụ ual᷊ingu ene tangú i kamene němunasě kararal᷊akị ene e su Israel.

¹³Kereu taumata e sarung makaringihẹ̌ hal᷊ẹ̌ nariadi ene dingangu měngkatakụ, hakịu semben tawẹu wahani mẹ̌koạ kerene.”

¹⁴ ”Kereu ěntana kụ nighěllịu MAWU Ruatanu e si kamene seng nakoạ tataghuanengu, mase i kamene kawe seng nẹ̌tanạ sene, ute aramanung i kamene mapulu tadeạu sěngkatau ratu e mẹ̌sul᷊ungu kal᷊awọu umatẹ̌ apang měmpẹ̌tẹ̌tanạ su tampạ i kamene mạngělikụ e.

¹⁵Titikeko pakapia tadeạu taumata nạung nihengkẹ i kamene nakoạ datung kamene e ute kai taumata nạung nipileng MAWU Ruatanu. I sie harusẹ̌ sěngkatau wọu tal᷊oaram bansanu hala; kumbahang měhengkẹ u taumata ragang makoạ datung kamene.

¹⁶ Datu e tawe wotonge managhuang kawal᷊o mal᷊awọ baugu manga sordadone ringangu tawe wotonge měngoro wansa ini pẹ̌sul᷊e sol᷊ong Misirẹ̌ mědeạ u pěmělli kawal᷊o,[16] batụu MAWU e seng něhengetang su manga umatʼE tawe wotonge mẹ̌sul᷊e kapia sol᷊ong banua ene.

¹⁷ Datu tawe wotonge piạ kawinge mal᷊awọ, tadeạu i sie tawe tumal᷊ikudẹ̌ MAWU. I sie mal᷊aing tawe wotonge mẹ̌těngkakalạ u watangenge dingangu sal᷊aka ringangu wul᷊aeng.

¹⁸Kereu sěngkatau e ihengkẹ makoạ datu, i sie harusẹ̌ gěllirangu bukẹ̌ sěmbaụ lohong manga titam Mawu Ruata kụ nial᷊ing bọu bukẹ̌ tutune niresọ u manga imang u Lewi.

¹⁹Bukẹ̌ ene hinong hanesẹ̌ ene su rěduhe, kụ karěngụewen pẹ̌bawiahe i sie harusẹ̌ mẹ̌basa tadeạu mangěndung měngadatẹ̌ MAWU Ruatane kụ masatia rumaringihẹ̌ kal᷊awọu tita mạbawohẹ su ral᷊unge.

²⁰Kereu i sie mẹ̌basawe maindunụ, i sie tawe sarung měngěnna watangenge limembong kapiane wọu i sire wansa sěmbaụ, dingangu tawe sarung lumampa titam MAWU walạewe měnsang kere apa kakakoạ e. Mase i sie ringangu manga hitene sarung mẹ̌parenta wansane wọu hěnto sarang hěnto.”