Read Sangir PANGANGONGGỌ U TORATẸ̌ KAPIA 18 Bible Online

PANGANGONGGỌ U TORATẸ̌ KAPIA 18 - Sangir bible

PANGANGONGGỌ U TORATẸ̌ KAPIA 18

¹”Kal᷊awọu hěnton Lewi nighěllirangu munarang imang, hakịu ene tawe wotonge makatarimạ u wahageangu ěntana su Israel. I sire harusẹ̌ mẹ̌biahẹ̌ bọu manga sasěmba arau gaghěllịewe lai wal᷊ine kụ ighěllị su MAWU.

² I sire tawe wotonge managhuang ěntana kere manga wansa wal᷊ine, watụ u kai MAWU e wuạ u asěking sire kerẹewe seng nikědong MAWU e si sire.

³Kereu pẹ̌sěngkatau e mẹ̌gěllịu sasěmba sapi arau domba, tangú palange su těngo, běngahe ringangu tiangu binatang ene harusẹ̌ isarakang su manga imang buạ i sire.

⁴Ěbạ i sire kakal᷊imonaěnge wọu gandung, akẹ u anggorẹ̌, lanang zaitun dingangu rukụu domba, mal᷊aing gunang buạ i sire.

⁵Bọu patikụ taumatang Israel, MAWU Ruatanu e seng němile hěnton Lewi makoạ imang sarang marěngụ-děngụ.

⁶Kereu tau Lewi sěngkatau kụ asal᷊e měnsang bọu soa sude su Israel diměnta sol᷊ong tampạ nipilen MAWU kụ mapulu mẹ̌tanạ sene,

⁷i sie wotonge mẹ̌tangkiang MAWU Ruatane makoạ sěngkatau imang mẹ̌sul᷊ungu manga tau Lewi wal᷊ine kụ měmẹ̌munara sene.

⁸I sie harusẹ̌ makatarimạ u kaěng mẹ̌sul᷊ung kal᷊awọe kere su manga imang bal᷊ine; apạeweng kinaẹ̌bakenge wọu anạ u sěngkataune kerene lai waugʼi sie.”

⁹”Kereu i kamene seng nasuẹ̌ su wanua kụ nionggọ u MAWU Ruatanu e si kamene, kumbahang kawe mẹ̌těno kakanoạ dal᷊akisẹ̌ kẹ̌koatengu manga wansa apang ene sene.

¹⁰ Bọu tal᷊oarang kamene kumbahangbe piạ u maněmbang manga anạe kere sasěmba tinongkạ. Dingangu kumbahangbe piạu sarang sěngkatau makoạ tahatighadẹ̌, mẹ̌deạ manga tatiala, mẹ̌pakẹ u kal᷊awọu lahopa arau

¹¹ kasingkạ u wal᷊ikụ mata, arau mẹ̌kui rohkẹ̌ u apan taumata nate.

¹²Taumata kụ apang měmpẹ̌koạ kakanoạ dal᷊akisẹ̌ e ikawěnsing u MAWU Ruatanu, kụ kai ual᷊ingu ene hakịu manga wansa ene e nịsasekehe wọu těngonu.

¹³ Kụ i kamene pěmpẹ̌munarako waugu MAWU Ruatanu e ringangu kasěllahu naung i kamene.”

¹⁴Bọu e i Musa nẹ̌bera, ”Manga wansa su wanua kụ sarung pẹ̌tanakeng i kamene němpẹ̌daringihẹ̌ sasal᷊ěntihọ u manga tahatighadẹ̌ dingangu měngkai mẹ̌dẹ̌deạ manga tatiala. Arawe MAWU Ruatanu e tawe mapakawalang kamene měmpẹ̌koạ ene.

¹⁵ Su sěmběkane ute wọu bansang kitẹ hala e i Sie sarung měndolohu sěngkatau nabi mẹ̌sul᷊ungu iạ ini e si kamene, kụ i kamene harusẹ̌be raringihẹ̌ si sie.[17]

¹⁶Su ěllo piạ i kamene nẹ̌tampung su Wul᷊udu Sinai, i kamene kawe nẹ̌dorong takadeạu i kamene kumbahang saụ l᷊ai makaringihẹ̌ MAWU Ruatanu e měbẹ̌bisara kụ kuhạ e relaing saụ ikasilo rarěntanʼE su ral᷊ungu putung dụděllị, u i kamene kawe matakụ u mate.

¹⁷Ual᷊ingu ene MAWU e nẹ̌bisara si siạ, ’Dorong i sire ene e sural᷊enge.

¹⁸Bọu kawanuan sire hala Iạ sarung dumolohu sěngkatau nabi mẹ̌sul᷊ung i kau e si sire. Iạ sarung maul᷊ị si sie apang hinong iwerane, mase i sie[18] sarung měhabarẹ̌ su wansa ene patikụ apan Takụ ilẹ̌oro.

¹⁹ I sie sarung mẹ̌bisara su ral᷊ungu areng-Ku, dingangu Iạ e[19] sarung měhukung i saing tawe rumararingihẹ̌ si sie.

²⁰Kaiso kamagengu sěngkatau nabi e wahani měhabaru sěmbaụ sasal᷊ěntihọ su ral᷊ungu areng-Ku sěmbal᷊iau Iạ e tawe rimolohi sie apẹ̌kẹ̌koạ kerene e, i sie hinong mate; kerene lai apạeweng nabi kụ mẹ̌bẹ̌bisara su arengu manga ruata wal᷊ine e harusẹ̌ mate.’

²¹Aramanung i kamene e makiwal᷊o su ral᷊ungu naung, ’Kereapa i kami masingkạ u měnsang sasal᷊ěntihọ u sěngkatau nabi e rarěntane wọu anum MAWU arau tala?’

²²Kereu sěngkatau nabi mahumbisara su arengu MAWU, kaiso apangkewe niwerane ene e tawe mariadi, tangú tighadẹ̌ ene e wal᷊inewe wọu anum MAWU. Nabi ene e mẹ̌bẹ̌bisara waugu arenge sẹ̌sane kụ i kamene tawahal᷊uasu matakụ i sie.”