Read Sangir PANGANGONGGỌ U TORATẸ̌ KAPIA 19 Bible Online

PANGANGONGGỌ U TORATẸ̌ KAPIA 19 - Sangir bible

PANGANGONGGỌ U TORATẸ̌ KAPIA 19

¹ ”Bọuten manga wansa ene niapakawinasang MAWU Ruatanu e ringangu wanuang sire nionggọ si kamene, kụ samuring kamene nangal᷊ạ manga soa ringangu wal᷊en sire kụ nẹ̌tanạ sene,

²tangú wanua ene harusẹ̌be pahiạ i kamene makoạ těllung kamonaěng kụ sěngkatau-sěngkatau e ringangu soane sěmbaụ nakoạ tatal᷊angeng mahaěng karatingang tadeạu apang tahapate makakatal᷊ang sene.

⁴Kereu pẹ̌sěngkatau kụ bal᷊inewe nipẹ̌tatudẹ kụ seng němate taumata wal᷊ine kụ bal᷊inewe rokạ e; i sie wotongewe makapẹ̌kěllung su soa sěmbaụ bọu tal᷊oarang kal᷊awọu soa sene kụ botonge matanạ sene.

⁵Manga andene ruang katau sěngkapahunsuẹ̌ su ral᷊ungu kěhu waugu měnuwang kalu e. Ene sěngkatau kapẹ̌nuwange kalu e, uaseng bal᷊iunge nělimpěsohẹ̌ bọu pul᷊une, kụ timangga hapị e hakịu nate. Tangú tau namate wal᷊ine nipẹ̌tatudẹ ene e tawẹ sal᷊ane, kụ botonge tumal᷊ang mẹ̌kěllung su soa sěmbaụ bọu tal᷊oarang soa tatěllu pẹ̌kakěllungang ene e tadeạu maambang. Mangawe piạ u kětạeng soa sěmbaụ piane, aramanung sarang paị ene kai tumanịu marau, ringangu ral᷊ohom bal᷊e kụ hinong mamal᷊isẹ̌ pěmamate ene e makapěnahusu si sie kụ su ral᷊ungu ral᷊angehe mamate taumata tawẹ sal᷊ane.

⁷Ual᷊ingu ene iạ měngoro si kamene pěnadia soa tatěllu.

⁸Kereu MAWU Ruatanu e seng napakawěnahu wanuanu kerẹewe seng nikědonʼE su manga i upungu ringangu kasěllahu wanua ene seng nionggọ si kamene,

⁹i kamene hinong měmile kapia soa pẹ̌kakěllungange tatěllu. (Banua ene sarung ionggọ si kamene, kereu i kamene měmpẹ̌koạ kal᷊awọu apan takụ ilẹ̌oro si kamene sahěllo ini, dingangu kamagengu i kamene tumal᷊ěntubeng MAWU Ruatanu e ringangu mẹ̌biahẹ̌ tụtuhụ těntironʼE.)

¹⁰Koạko ene tadeạu i kamene kumbahang mẹ̌baradosa ual᷊ingu mapakawalang taumata tawẹ sal᷊ane pateěng su wanua nionggọu MAWU Ruatanu e si kamene.”

¹¹”Kaiso nẹ̌darol᷊e wue kereu pẹ̌sěngkatau měhěgạ sědụ e ore ringangu ipẹ̌tatudẹ dingangu kawawěnsing kụ němate si sie, kụ bọu e timal᷊angu wadange su soa sěmbaụ pẹ̌kakěllungang mědeạu makahombang kal᷊aěllung.

¹²Kụ su hal᷊ẹ̌ewe ini tangú apang pangahạ u soane harusẹ̌ mẹ̌kui tau ene bọu e měnarakang i sie sural᷊ohong bal᷊e apang hinong mamal᷊isẹ̌ pěmamate ene, mědeạu i sie wotonge pateěng.

¹³Kumbahang tumal᷊ěntụ i sie. Liwirẹ̌ko Israelẹ̌ e tahapate ěndaị e, tadeạu i kamene mal᷊unsemahẹ̌ bue.”

¹⁴ ”Kereu i kamene seng mahumpạu wanua nionggọu MAWU Ruatanu e si kamene, kumbahangbe měngensọ u pẹ̌saraěng ěntanang lampungu kụ seng nitantu reng dokeng nạung kal᷊imona.”

¹⁵ ”Sahidi kụ kẹ̌tạeng sěngkatau tawe makaiěkụ mělahẹ u sěngkatau lẹ̌ěnsilang u nẹ̌sal᷊a, mẹ̌těngkahal᷊i rarua gausang baugu ene.

¹⁶Kereu sěngkatau e mapulu mapakanawong sěngkatau wal᷊ine e ringangu pěngangěnsilẹ̌ tạ katěngade su anung mělahukunge,

¹⁷tangú irědua e harusẹ̌ sol᷊ong tampạu pẹ̌kakal᷊iomanengang kụ nitěbọ u MAWU e tadeạu pakihukungu manga imang dingangu mělahukung kụ kạpamunarane.

¹⁸Manga mělahukunge harusẹ̌ měnanẹ̌sui pěrkara ene pakaunsui, kụ kamagengu kawe nal᷊ahẹ u tau ene kawe seng něhinakang sěndinganenge tau Israel,

¹⁹i sie harusẹ̌ makahombang hukumang kerẹewe hinone waugu rokạ e ene. Kụ ual᷊ingu kerene ute, i kamene mẹ̌ngěnsue karal᷊akisẹ̌ e.

²⁰Patikụ taumata e sarung makaringihẹ̌ hal᷊ẹ̌ ene ringangu měngkatakụ, hakịu semben tạ u l᷊ai karal᷊akisẹ̌ kerene.

²¹ Abe tal᷊ěntụ su hal᷊ẹ̌ kerene. Hukumange kai mạngawẹ u: Niawa awenge niawa, mata awenge mata, isi awenge isi, lima awenge lima, dingangu laedẹ̌ awenge laedẹ̌.”