Read Sangir PANGANGONGGỌ U TORATẸ̌ KAPIA 20 Bible Online

PANGANGONGGỌ U TORATẸ̌ KAPIA 20 - Sangir bible

PANGANGONGGỌ U TORATẸ̌ KAPIA 20

¹”Kereu i kamene rumal᷊eng mẹ̌sekẹ dumokạ kal᷊awọu sekẹ i kamene, abe katakụ makasilo karetang sekẹ dingangu kawal᷊ong sire mal᷊awọ dingangu manga sordadon sire limembong kal᷊awọe wọu sordadong kamene. MAWU Ruatanu e něliwiri kamene wọu Misirẹ̌ e, mal᷊aing sarung mẹ̌tul᷊ung i kamene.

²Kal᷊amonang manětạ mẹ̌sekẹ e, sěngkatau imang harusẹ̌ tamai mẹ̌bisarang kamene kere ini,

³’Manga anạ u sěmbaụ, daringihẹ̌ko! Sahěllo ini i kamene rumal᷊eng mẹ̌sekẹ. Abe katakụ arau kuměndụ arau mẹ̌bingọ.

⁴MAWU Ruatanu e sarung tumol᷊e mẹ̌tul᷊ung i kamene, kụ i Sie sarung mẹ̌gěllịu kal᷊auntu si kamene.’

⁵Bọu e manga pěrwira harusẹ̌ mẹ̌bera kere ini si kamene, ’Piạ ngae sutal᷊oarang kamene, taumata kụ buhụe mamětị bal᷊e, kaiso wědang tawe měkoạ tundung dumangeng bal᷊e? Kereu piạ tangú i sie wotongewe mapul᷊ẹ. U kamagengu i sie mate su pẹ̌seketang, tangu taumata wal᷊ine e sarung dumangeng mẹ̌tanạ su wal᷊ene.

⁶Piạ ngae wọu tal᷊oarang kamene taumata kụ buhụe nẹ̌suang baelu anggore kụ deng ta nakạtipo wuang anggore tangú? Kereu piạ, i sie wotonge mapul᷊ẹ. U ute i sie mate su pẹ̌seketang, taumata wal᷊ine sarung makateěng akẹ u anggore.

⁷Piạ ngae sutal᷊oarang kamene taumata kụ mẹ̌tẹ̌tatonangang e mẹ̌kawing? Kamageng u piạ, i sie wotonge mapul᷊ẹ. U kereu i sie mate su pẹ̌seketang, taumata wal᷊ine sarung mẹ̌kawingu kaghiange.’

⁸Manga pěrwira mal᷊aing harusẹ̌ mẹ̌berang ini e si kamene, ’Piạ ngae sutal᷊oarang kamene taumata kụ tụtaghiawahẹ̌ dingangu matakụ. Kereu piạ, i sie wotonge mapul᷊ẹ, tadeạu i sie kumbahang makagholang kal᷊okong taumata wal᷊ine.’

⁹Bọuten manga pěrwira e nẹ̌bera su manga sordado, harusẹ̌ itěbọ těmbonangu apang komol᷊ang sěmbaụ.

¹⁰Mạengu i kamene tamai luměbạ soa sěmbua e, gělirengkon loahe kal᷊amona su pamanuane měmpẹ̌samal᷊ẹ.

¹¹Kamagengu i sire měmpěnope manga tukadu pasěllangeng kụ mẹ̌samal᷊ẹ, i sire kěbị e harusẹ̌ makoạ ěllangu ringangu mẹ̌koạ hal᷊ẹ̌ mawěhạ baugi kamene.

¹²Kai kereu pamanuang soa ene kawe tawe mẹ̌samal᷊ẹ kụ kawe ěndọu mapulu mẹ̌sekẹ e ute i kamene harusẹ̌ pěliwung soa ene.

¹³Bọu ene, kereu MAWU Ruatanu e mapakawalang kamene měmul᷊aho soa ene, ute i kamene harusẹ̌ pěmpěmate kal᷊awọu pamanuane manga esẹ.

¹⁴Kaiso i kamene wotonge wue měngal᷊ạ manga wawine, manga rariọ, binatang dingangu walạewe měnsang apa su soa ene. Kal᷊awọu arětạ tataghuanengu sekẹ i kamene e wotonge paketang i kamene. MAWU Ruatanu něnarakang u ene si kamene.

¹⁵Kerene hinone i kamene miěbạ kal᷊awọu soa kụ marau wọu wanua pẹ̌tẹ̌tanakeng i kamene e.

¹⁶Kai kereu soa ene su ral᷊ungu wanua kụ nionggọ u MAWU Ruatanu e si kamene, ute kal᷊awọu pěmamanuane harusẹ̌ pate.

¹⁷Kerẹewe nịlaorong MAWU Ruatanu e, i kamene harusẹ̌ pěmiua kal᷊awọu tau Het, Amori, Kanaan, Feris, Hewi ringangu Yebus.

¹⁸Patẹ e i sire, tadeạu i sire tawe makakariading kamene warạdosa su MAWU Ruatanu e kụ maněntiro si kamene mẹ̌koạ kal᷊awọu kakanoạ makạdarěnting su manga ruatan sire.

¹⁹Kereu i kamene sumekẹ soa sěmbaụ kụ tal᷊iwungang i kamene su ral᷊ungu tempo piạ kararěnane, kumbahang měmpěnuwang kalu piạ buane kẹ̌kanengang sene. Kaěngke wuane, kaiso kumbahangbe gagholokang pungene, u manga kakaluang e wal᷊inewe sědụ u.

²⁰Manga kakaluang bal᷊ine e wotonge wue tuwangeng i kamene koateng těndạu i kamene tumal᷊iwung soa ene sarangkewe ikawatạ.”