Read Sangir PANGANGONGGỌ U TORATẸ̌ KAPIA 21 Bible Online

PANGANGONGGỌ U TORATẸ̌ KAPIA 21 - Sangir bible

PANGANGONGGỌ U TORATẸ̌ KAPIA 21

¹”Kereu su wanua nionggọu MAWU Ruatanu e si kamene kụ kai piạ taumata kinaẹ̌bakeng u nate nipate su rahami kụ tawe kinasingkateng měnsang kawe i sai namate,

²tangú těmbonange ringangu mělahukungu e harusẹ̌ tamai měletẹ̌ karaune wọu tampạ u maietẹ̌ ene kinaěbakeng suapang soa mẹ̌dẹ̌dẹ̌duhẹ̌.

³Mase manga pangahạ e wọu soa karaniange harusẹ̌ měmile sapi sěmbaụ kawuhuang kụ bědang tawe nipẹ̌pakẹ baugu piněhal᷊ẹ̌.

⁴Sapi ene harusẹ̌ bawaěng i sire su tampạ sěmbaụ maranin sal᷊ụ kụ tawe maral᷊ẹ̌sa ringangu ěntanane ren tawe nikẹ̌kal᷊i arau pinẹ̌suangeng. Kụ sene i sire harusẹ̌ mapẹ̌papěding lehẹu binatang ene.

⁵Manga imang tau Lewi e mal᷊aing harusẹ̌ makoạ sol᷊ong ene, u i sire kai harusẹ̌ měngonggọu putusang su ral᷊ungu apạeweng kakanoạ u tatingkaị. I sire nipilem MAWU Ruatanu e waugu mẹ̌tangkiang si Sie ringangu mẹ̌berang alamatẹ̌ su arengʼE.

⁶Mase kal᷊awọeweng matatebone wọu apan soa kararěduhange hinong měnguhasẹ̌ liman sire su wowon sapi ene

⁷kụ mẹ̌bera u, ’Wal᷊inewe i kami němate tau ene, ringangu i kami e wěga wue měnsang i sai mẹ̌kakoạ e.

⁸MAWU, ampungeko Israelẹ̌ e umatʼU niliwirʼU e wọu Misirẹ̌. Ampungeko i kami ringangu kumbahang mangěnna u i kami e kai harusẹ̌ sumimbang u pěmamate tau tạ sal᷊ane ene.’

⁹Tangú ual᷊ingu pẹ̌kakoạ apang tẹ̌tuntukangu MAWU e, i kamene tawe niěnna u harusẹ̌ piạ sasimbange su hal᷊ẹ̌ u pěmamate ene.”

¹⁰”Kereu i kamene mẹ̌sekẹ dingangu MAWU Ruatanu e měngonggọu kal᷊auntu si kamene, mase i kamene měngal᷊ạbe apan tawengu sekẹ,

¹¹aramanung bọu tal᷊oaran sire piạ sěngkatau wawine maholẹ ikẹ̌kapulu ringangu ilẹ̌ěnningu makoạ kawingu.

¹²Paringangke wawine ene sol᷊om bal᷊enu. Sene tangú i sie hinong měnggunting utạ e,[20] měmonọ kanukune,

¹³ringangu měngahusu pakeange. I sie harusẹ̌ matanạ su wal᷊enu kụ mělutung papateng gaghurange su ral᷊ungu sěmbul᷊ang karěngụ e. Bọu ene i kau e wotonge mẹ̌kawing dingange.

¹⁴Kereu su tempo ramahi i kau e semben tawẹ apa ěnningu e si sie, i kau e wotongewe měngoro si sie pakapul᷊ẹ tạ sangkural᷊ange. I sie tawe wotonge koatengu kere sěngkatau ěllang arau wal᷊ukangu, watụ u i sie kawe nisasihasanu nẹ̌sěngkapẹ̌tikị dingangu e.”

¹⁵”Kereu andene piạ sěngkatau piạ kawinge ruang katau, kụ i rẹ̌dua namantelu anạ esẹ, kai rariọ kinawantelẹ̌ humotong e wal᷊inewe anạ bọu kawinge kẹ̌kapiaěnge.

¹⁶Kereu tau ene mapulu manilakehu kereapa sarung i sie mẹ̌papahiạ u kakakalạ e su manga anạ e, i sie tawe wotonge manumbẹ̌ka anạ su kawinge kẹ̌kapiaěnge kụ mangonggọ su rariọ ěndaị e wahageangu makoạ tataghuanengu anạ kaiakanenge.

¹⁷I sie harusẹ̌ měngonggọu wahageange rua sul᷊e kal᷊awọe wọu arětạ tẹ̌taghuanenge su anạ esẹ i akang, maningbe rariọ ěndaị e wal᷊inewe anạ su kawinge kẹ̌kapiaěnge. Hakẹ̌ u anạ i akang harusẹ̌ iakung amange, ringangu waugu anạ ene harusẹ̌be gěllirangu pusakạ kụ makoạ tataghuanenge tuhụewe tiahane.”

¹⁸”Manga andene piạ anạ esẹ kụ těmbọe makětị, puluang měnggohaeng dingangu mạdiri rumaringihẹ̌ gaghurange manilaing i sire seng něhukung si sie.

¹⁹Tangú gaghurange e hinong mẹ̌bawa si sie sarang anung manga těmbonangu soa su tampạ kẹ̌katanakeng i sire e ringangu mẹ̌dorong tadeạu rariọ ene e pakihukung.

²⁰I sire e harusẹ̌ pẹ̌bera su těmbonangu soa ene, ’Anạ i kami ini kai makětị těmbọ e, puluang měnggohaeng dingangu tawe tumatuhụ si kami; i sie e mawombarẹ̌ su roitẹ̌ dingangu puluang mẹ̌těngkiwukang.’

²¹Ene manga esẹ bọu soa ene harusẹ̌ měmahungu watu su rariọ ene sarang pakapate ual᷊ingu kawe kerene tangú i kamene e mạngupu karal᷊akisẹ̌ ene. Patikụ taumata su Israelẹ̌ e sarung dumaringihẹ̌ mạanung karariadi ene e ringangu něngkatakụ.”

²²”Kereu pẹ̌sěngkatau e seng nihukungu papate ual᷊ingu sěmbaụ karal᷊amuhụ, kụ maiete nighantong su kalu nipasị,

²³ maietẹ̌ ene e tawe wotonge iwala kerene sene sěnaung sěhěbi karěngụ e, kaiso harusẹ̌be lěbing lai su ěllo ěndaị e. Maietẹ̌ kạgaghantong su kalu e makạual᷊i anen Duata su wanua. Kụ lěbingke maietẹ̌ ene tadeạu i kamene tawe makal᷊amuhụ banua kụ nionggọ u MAWU Ruatanu e si kamene.