Read Sangir PANGANGONGGỌ U TORATẸ̌ KAPIA 22 Bible Online

PANGANGONGGỌ U TORATẸ̌ KAPIA 22 - Sangir bible

PANGANGONGGỌ U TORATẸ̌ KAPIA 22

¹ Kereu sapi arau domba tataghuanengu taumata lawọ kawanua sěmbaụ kụ kai mapal᷊idẹ̌, kụ i kamene makasilo binatang ene e, kumbahangbe měmẹ̌mělle wěga e, kaiso wawako binatang ene kapia su anung taghuange.

²Kereu taghuange marau wọu wal᷊ene, arau i kamene kawe wěga i sai taghuange, ute wawạ e binatang ene sol᷊ong bal᷊enu. Kereu taghuange ruměnta mẹ̌deạ, ute sarakangke si sie.

³Koạko l᷊ai kerene kereu i kamene makahombang kalide sěmbaụ, pakeang sěmpotọ, arau walạewe měnsang apa tataghuanengu kawanuanu e.

⁴Kereu kalide sěmbaụ arau sapi tataghuanengu kawanuanu e nělinsumagẹ̌ su ral᷊eng ute, kumbahangbe kawe mẹ̌mělle wěga, kaiso tul᷊ung bue i sie mapẹ̌bangung u binatang ene kạpia.

⁵Tau wawine e tawe wotonge mẹ̌papakeang kere manga esẹ dingangu manga esẹ e tawe wotonge mẹ̌papakeang kere manga wawine batụu taumata mẹ̌kẹ̌koạ kerene e kai ipẹ̌bẹ̌binsị u MAWU Ruatanu e.

⁶Kereu i kamene makahombang sal᷊ehu manụ u winalangeng su kakaluang arau su ěntana ringangu iněngem manụ u winalangeng kạkaiange su wowon tělluhe arau kạdaringang su manga anạ e, ute kumbahangbe měngal᷊ạ iněngem manụ ene.

⁷I kamene wotongewe měmpangal᷊ạ manga anạ u manụ u winalangeng ene, arawe iněngene walạekere tatěllu e, tadeạu i kamene tatapẹ̌be umbure manandụ dingangu mẹ̌biahẹ̌be mal᷊unsemahẹ̌.

⁸Kereu i kamene měmpěmětị bal᷊e, ute i kamene harusẹ̌be pěmpěmasị u manga tatěndạ e pěngělikụ biwihu atụ e. Tangú i kamene e wěga wue kereu piạ u manawo wọu atụ ene kụ měngkapate.

⁹ Kumbahangbe mẹ̌suangu sasuang bal᷊ine su wawaelangu anggoru tabeạu katewe kalung anggorẹ̌. Kereu mambeng suangeng i kamene lai, i kamene tawe wotonge měmpẹ̌ngal᷊ạ gẹ̌sing baelẹ̌ ene, waẹbe wọu anggorẹ̌, arau wọu lai sasuang bal᷊ine.

¹⁰Kumbahang měngikị u sapi sěmbaụ dingangu kalide sěmbaụ su wawajakẹ̌ sěmbaụ.

¹¹Kumbahang měluhem pakeang kụ nikoạ wọu wolẹ̌ dingangu leneng su pěngangahiwuang sěmbaụ.

¹² Koateko manga humbune pakeangu e su pondol᷊e ěpạ.”

¹³”Kere andene sěngkatau esẹ mẹ̌kawingu sěngkatau mahuala, kụ bọu ene semben tawẹ saụ měnning.

¹⁴I sie měngěnsilu sal᷊a měllewe maul᷊ị u kawinge wal᷊inewe parawang su tempong i rẹ̌dua e nẹ̌kawing.

¹⁵Su ral᷊ungu ene tangú ghaghurang u wawine ene e harusẹ̌ měngal᷊ạ pakeangu kawing kụ piạ ěnnạu rahane, pělahekangu anạ i sire e su tempo ene e wědaweng parawang. Pakeang ene harusẹ̌ todẹ i sire su manga těmbonang u soa su pěnggaghutaěng.

¹⁶I amangu mahuala ěndaị e harusẹ̌ mẹ̌bera si sire, ’Iạ e sen něnarakangu anạku su tau ini e makoạ kawinge, kai orasẹ̌ ini e i sie tawẹ lai ěnninge.

¹⁷I sie měllewe mẹ̌ngěnsilu kawinge wal᷊inewe parawang su piạ i rẹ̌dua e němpẹ̌kawing. Kai ini e tatialane u anạku tempo ene e wědangbeng parawang. Tatingangke wue ěnnạu raha su pakeangu kawing ěndaị ini e!’

¹⁸Tangú manga těmbonangu soa e harusẹ̌ mẹ̌kui tau esẹ ene kụ měngoka si sie.

¹⁹I sire lai mapakarendan sie roitẹ̌ sal᷊aka mahasụ su kal᷊ěpane ringangu měnarakangu roitẹ̌ ene su ghaghurange kinaratingang, batụu i sie kai seng nakawuhụ arengu sěngkatau wawineng tau Israelẹ̌ e. Tapengu l᷊ai tau wawine ěndaị e mang těbewe makoạ kawinge, ringangu tawe wotonge sindoěnge sarang kanandung pẹ̌bawiahe.

²⁰Kai manga andene laěnsilẹ̌ ene e mamben těngadẹ̌ dingangu tawẹ apa tatialane ipẹ̌sahiding kawinge ene wědangbem parawang su tempong nẹ̌kawing,

²¹tangú wawine ěndaị e harusẹ̌be iwawa sol᷊ong tukadu wal᷊eng gaghurange. Sene tangú manga esẹ u soa ene harusẹ̌ měmahungu watu sarang pakapate. Bawine ene nẹ̌koạ sěmbaụ kakanoạ nakasamedẹ̌ kawanuang kitẹ batụu nẹ̌sěngkapẹ̌tikị kal᷊amonang pẹ̌kakawing su tempong i sie wědang mạtanạ su wal᷊eng amange. Kụ ual᷊ingu měhukung i sie tangú i kamene e mapakapurạ u lamuhụ ene.

²²Kereu sěngkatau esẹ ikatangkạ kararamasage mẹ̌sẹ̌sěngkapẹ̌tikị dingangu kawingu tau e, i rẹ̌dua kěbị tangú harusẹ̌be hukungu hukumang papate. Dingangu kerene tangú i kamene měndědasẹ̌ lamuhụ ene.

²³Manga andene su soane sěngkatau esẹ ikasamẹ kararamasage mẹ̌sẹ̌sěngkapẹ̌tikị u sěngkatau mahuala kụ nạung seng nẹ̌kakaghiang u esẹ bal᷊ine.

²⁴Su hal᷊ẹ̌ ene tangú i rẹ̌dua e hinong isěbang sol᷊ong likudu soa kụ bahungeng batu sarang pakapate. Mahuala ene harusẹ̌be pate ual᷊ingu i sie tawe němansagu makịambang, sěmbal᷊iau hal᷊ẹ̌ ene kawe nariadi su soane, su piạ tingihu wansagẹ̌ botonge ikaringihẹ̌. Dingangu tau esẹ ěndaị harusẹ̌be pate watụ u i sie kawe nẹ̌sěngkapẹ̌tikị dingangu tau wawine sem piạ kaghiange. Kụ dingangu pělahukung si rẹ̌dua e tangú i kamene měndědasẹ̌ lamuhụ ene.

²⁵Kai wal᷊inewe mẹ̌sul᷊ungu kamagengu sěngkatau esẹ kawe limia sěngkatau mahuala kụ seng nẹ̌kakaghiangu esẹ bal᷊ine. Sene tangú kětạembeng esẹ harusẹ̌be hukungu hukumang papate.

²⁶Mahuala ene e, abe kapurai watụ u i sie tawe nẹ̌koạbe manga apa hinong makahombang hukumangu papate. Pěrkara ene mẹ̌sul᷊ungu pěrkarang sěngkatau něngalo taumata wal᷊ine kụ němate.

²⁷Limia ene e nariadi su waelẹ̌, kaiso maningbe mahuala ěndaị e mạmansagu makịambang, kai kutẹu kawe tawẹ u riměnta něngambang.

²⁸ Mangawe sěngkatau esẹ nikasamẹ kararamasage lụl᷊ia sěngkatau mahuala ren tawe nẹ̌kẹ̌kakaghiang.

²⁹Su hal᷊ẹ̌ ene tangú i sie harusẹ̌ pěmaehẹ̌ si amangu rariọ mahuala ěndaị e wul᷊aengu kawing arěgang limam pul᷊o su kal᷊ěpane roitẹ̌ sal᷊aka e. Mahuala ěndaị e hinong makoạ kawinge watụ u i sie kawe nisihasa nẹ̌sěngkapẹ̌tikị dingangu karěngụu pẹ̌bawiahe i sie tawe wotonge sindoěng.

³⁰ Tawẹu sarang sěngkatau wotonge měhinakang si amange ringangu mẹ̌sěngkapẹ̌tikị u sěngkatau wọu kawing i amange.”