Read Sangir PANGANGONGGỌ U TORATẸ̌ KAPIA 23 Bible Online

PANGANGONGGỌ U TORATẸ̌ KAPIA 23 - Sangir bible

PANGANGONGGỌ U TORATẸ̌ KAPIA 23

¹”Taumata apan seng bọu nikabiri arau niruru su wadange pělli e tawe wotonge marekeng dal᷊ohong umatu MAWU.

²Taumata apang piněhěnding su l᷊ikudu kawing dingangu patikụewe hitene sarang kapul᷊o hawenge, tawe wotonge marekeng umatʼu MAWU.

³ Tau Amon dingangu Moab dingangu hiten sire sarang kapul᷊o hawenge tawe wotonge makoạ umatu MAWU,

⁴ ual᷊ingu i sire tawe mapulu měngonggọu kaěng dingangu inumang su tempong i kamene suraral᷊engang mạhunsěbang bọu Misirẹ̌. Katewe lai mạpatiral᷊ang i sire měmẹ̌maehẹ̌ si Bileam, anạ i Beor bọu soam Petor su Mesopotamia, baugu mangane si kamene.

⁵ Kai arawe MAWU Ruatanu e tawe mapulu rumaringihẹ̌ si Bileam. Ral᷊iune i Sie mamal᷊eohẹ̌ bue ane ene makoạ al᷊amatẹ̌, ual᷊ingu i Sie kụkěndagi kamene.

⁶Karěngụeweng i kamene mẹ̌bẹ̌biahẹ̌ dingangu sarang marěngụ-děngụ, kumbahangbe mẹ̌tul᷊ungu kal᷊awọu wansa ene e arau mapakal᷊unsemahʼi sire.

⁷Abe pěngěnna u tau Edom kai tawẹ mangal᷊ene watụ u i sire e kai anạ u sěngkataung kamene. Abe lai piạ pěndangu i sire tau Misirẹ̌ e kawe tawẹ mangal᷊ene, batụu i kamene kai sem bọu němpẹ̌tanạ su wanuan sire.

⁸Nanětạ bọu hawenge katěllune sarangkewe tuhụ e sarang marěngụ hiten sire e wotonge makoạ dal᷊ohong umatʼu MAWU e.”

⁹”Su tempong keng i kamene kapẹ̌sẹ̌sekẹ e, i kamene harusẹ̌be měmpẹ̌teghangbeng kal᷊awọu haghi makal᷊amuhụ si kamene.

¹⁰Kereu sěngkatau e mal᷊amuhụ ual᷊ingu napasěbangu akẹ u wadang e pělli e su tempong kạtikị e, i sie hinong maněntangu pẹ̌darasengang kụ mẹ̌tanạ su l᷊ikude.

¹¹Kakạsandigem bawěllo e i sie harusẹ̌ měndenọ dingangu su tempongkem matangěllo sumědạ tangú i sie wotonge saụ mẹ̌sul᷊e si sello e.

¹²I kamene harusẹ̌ měndiahing tampạ su l᷊ikudu pẹ̌darasengang baugu sumea.

¹³Mạengu sol᷊ong paị ene tangú, sul᷊ikudu manga apal᷊iwụ e tangú pěngapidẹ̌ko l᷊ai kalu sěmpědi waugu pěmangka lohangu pěndarěmekangu sea mase wọu ene pěngambungang u ene.

¹⁴MAWU Ruatanu e mạněntanudẹ̌ si kamene suraseng i kamene kụ mangěllung i kamene ringangu měngonggọu watạ i kamene su manga sekẹ i kamene. Tangú těntanude riagate wue takadeạu raseng i kamene e těbewe wurẹ̌si. Kumbahangbe sarang kaěbakeng piạ u tawe hinone sutal᷊oarang kamene, tadeạu kumbahangbe sarang MAWU e maněntang i kamene.”

¹⁵”Kereu sěngkatau ěllang mělingkạ u watangenge wọu anung mawune kụ duměnta su anunu e mẹ̌gausẹ̌ makiěllung, ute kumbahangbe měnokol᷊ʼi sie.

¹⁶I sie wotongewe mẹ̌tanạ su soa sěmbaụ bọu tal᷊oaran soang kamene tuhụewe kapulune, ringangu kumbahang i kamene měngkai mẹ̌tingkaị si sie.

¹⁷ Sěngkatau tau Israelẹ̌ e, baẹ esẹ arau wawine e, tawe wotonge makoạ taumatan sundal᷊ẹ̌ su manga pangkunangu pananěmbaěng mahan duata.

¹⁸Kerene lai roitẹ̌ kụ kai ěbạ u pẹ̌sasundal᷊ẹ̌ e kumbahang itonda arau iwawa sol᷊ong Bal᷊em MAWU Ruatanu e ipěmaehẹ̌ pẹ̌kakakědo, u MAWU Ruatanu e kai měbẹ̌binsịu pẹ̌sasundal᷊ẹ̌ su manga pangkunangu pananal᷊eěng dingangu roitu pẹ̌sasundal᷊ẹ̌.

¹⁹ Kereu i kamene mẹ̌gěllị u roitẹ̌ pakiědang su tau raghị e, i kamene wotonge mẹ̌dorong rentene. Kaiso kereu i kamene mẹ̌gěllịu roitẹ̌ pakịědang arau mẹ̌gěllịu kaěng arau sabarang lai wal᷊ine su kawanuanu e, ute ědang ene měngkate onggọ tawahal᷊uasu piạ rentene. Tuhukeko tita ene, tangú MAWU Ruatanu e měngal᷊amatẹ̌ patikụ sabarang apạeweng kẹ̌koateng i kamene su wanua kinakaianeng i kamene e.

²¹ Kereu i kamene nẹ̌kědong apa-apa su MAWU Ruatanu e, kumbahangbe měngawengu mapakasěhụ u kědo ene, u MAWU Ruatanu e těbewe mạnuntụ ene, dingangu i kamene mamben nẹ̌sal᷊a kamagengu i kamene tawe něngganapẹ̌ ene.

²²I kamene tawe nẹ̌sal᷊a kereu tawe nẹ̌kědo su MAWU.

²³Kai kamagengu i kamene nẹ̌kědowe ringangu mal᷊uasẹ̌ su MAWU Ruatanu e, i kamene hinong mapakasěhụu kědo ene.

²⁴Kereu i kamene kạpahundal᷊enge lụl᷊iu wawaelangu anggoru taumata wal᷊ine, i kamene wotongewe mahungkaěng buang anggorẹ̌ kal᷊awọeweng ilẹ̌ěnning i kamene, kaiso tawe wotonge komol᷊ang i kamene su ral᷊ungu kěmbuahẹ̌.

²⁵Kereu kạpahundal᷊enge lụl᷊iu wawaelangu gandungu taumata wal᷊ine, i kamene wotongewe měmpahungkaěng gandung nitipong limang kamene, kaiso tawe wotonge hěnsikangu laambesẹ̌.”