Read Sangir PANGANGONGGỌ U TORATẸ̌ KAPIA 24 Bible Online

PANGANGONGGỌ U TORATẸ̌ KAPIA 24 - Sangir bible

PANGANGONGGỌ U TORATẸ̌ KAPIA 24

¹ ”Manga andene sěngkatau esẹ saụ mělanda kire mẹ̌kawingu sěngkatau mahuala, kutẹu wọu ene semben tawẹ ěnninge saụ ual᷊ingu i sie kai nakaěbạ hal᷊ẹ̌ sěmbaụ nakamea si sie.[21] Tangú wọu ene esẹ ěndaị e něnarakangu suratu sindo si sie ringangu něnokol᷊ʼi sie wọu wal᷊ene.

²Bọu ene wawine ene nẹ̌kawingu sěngkatau esẹ bal᷊ine.

³Kaiso nal᷊iung ene tawe nararěnnạ i anu esẹ e semben saụewe tawe mapulun sie, kụ bọu ene něnarakangken suratu sindo si sie mase něnokol᷊ʼi sie. Aramanung lai kawing esẹ karuane ene kai nairị.

⁴Su hal᷊ẹ̌ darua kụ matarang ene su esẹ kinawing humotong e tawe wotonge saụ mẹ̌kawingu wawine ěndaị e kapia; kụ i sie hinong makasilo tabidạu sěngkatau wawine kụ seng nipělamuhukang. Kụ kamagengu wědang lai pẹ̌kawingange, ute kakanoạ ene e mẹ̌sul᷊ungu lahinakang su MAWU Ruatanu. I kamene tawe wotonge měkoạ pẹ̌sasal᷊a kerene karal᷊akise su wanua kụ nionggọ u MAWU e si kamene.”

⁵”Sěngkatau esẹ kụ buhu wuhu pẹ̌kakawing e tawe wotonge apasowa sordado kụ apẹ̌sekẹ arau lai pẹ̌koạ munara ipẹ̌sahiune. I sie harusẹ̌ ipakal᷊iu wọu munarane ghěnnangu sěntaung mẹ̌tangkiang dal᷊ohom bal᷊ene ringangu mapakạl᷊uasu ral᷊ungu naungu kawinge.[22]

⁶Kereu i kamene měngonggọu manga apa pakiědang su taumata wal᷊ine, ute kumbahangbe měngal᷊ạ tatahul᷊ěndingu watu nạung nial᷊ạ nipakẹ u tau ene niapěnggiling gandung e. Ual᷊ingu něngal᷊ạ batu ene, tangú i kamene kai němul᷊aho apal᷊iwụ nạung nipakẹ u ral᷊ohom bal᷊ene waugu sasěmpụ pẹ̌bawiahẹ̌.

⁷ Taumata kụ nẹ̌tangehẹ̌ taumata kawanua sěmbaụ, mase nẹ̌tahuěllang i sie arau nẹ̌bal᷊ụ i sie, ute tau ene hinong ihukungu papate. Kụ ual᷊ingu kerene tangú i kamene kai nangěnsue karal᷊akisẹ̌ ene.

⁸ Kereu kaěbakeng piạ sakị u pisị makạtatakụ, ute koạbe ringangu pakaudupẹ̌ apạewen niorom manga imang u Lewi e si kamene; tol᷊ei wue kal᷊awọu tatumbal᷊ung takụ nionggọ baugʼi sire.

⁹ Tahěndunge apang kinoạ u MAWU Ruatanu e waugʼi Miryam su raral᷊engu e suměbang bọu Misirẹ̌ e.

¹⁰ Kereu i kamene mangonggọu ědang su sěndinganengu e kumbahang sumuẹ̌ su ral᷊ungu wal᷊ene kụ měngal᷊ạ pakeange kụ makoạ sasal᷊iune.

¹¹Pahědọ e su l᷊ikude kụ hědongke wala i sie sẹ̌sane apanonda su anunu.

¹²Kereu tau ene kawe kasiang, ute pakeange ene tawe wotonge arangeng u sěnaung sěhěbi karěngụ e,

¹³kaiso harusẹ̌be sul᷊e kapia si sie apang hěbi, tadeạu ikapẹ̌pakeben sie ipẹ̌tikị. Tangú i sie sarungbe makitarimakasẹ dingangu MAWU Ruatanu e sarungbe lẹ̌lahimpuluang i kamene.

¹⁴ Kumbahang maměhạ taumatam mantorosẹ̌ masasigěsạ dingangu wiahe masusa e, baewe taumata kawanua sěmbaụ dingangu, arau waẹbe lai taumata raghị apang měmpẹ̌tẹ̌tanạ su soa sěmbaụ bọu tal᷊oarang kal᷊awọu soang kamene.

¹⁵Apang kal᷊aěllo těntal᷊ang matangěllo ren tawe simẹ̌sědạ e, i kamene harusẹ̌ měmaehẹ̌ sewang hal᷊ẹ̌ su ral᷊ungu sěhěllo ini e; i sie lụalong doitẹ̌ ene, ual᷊ingu i sie mẹ̌gẹ̌gausẹ̌. Kereu i kamene tawe měmaehẹ̌ sewane, i sie sarung kumahiorọ su MAWU mẹ̌dorong tul᷊ung baugʼi kamene, kụ i kamene kai nilahẹ u kai waradosa.

¹⁶ Kumbahangbe měhukungu papate su maghurang ual᷊ingu kakanoạ u anạ e, dingangu kumbahangbe měhukungu papate su anạ e ual᷊ingu kakanoạ dal᷊akisẹ̌ kinoạu gaghurange. Apan taumata wotonge ihukungu papate ual᷊ingu karal᷊akisẹ̌ nikoạ e hala.

¹⁷ Kumbahang měmul᷊aho hakẹ̌ u taumata raghị dingangu manga rariọ kasisi ěndusẹ̌, dingangu kumbahang měngal᷊ạ pakeangu sěngkatau taumata wal᷊u e waugu tatahul᷊ěndinge.

¹⁸Pẹ̌tahěndung bue u i kamene kai nạung bọu nakoạ ěllang su Misirẹ̌ kụ niliwiru MAWU Ruatanu e; kai ual᷊ingu ene hakịu iạ e něngonggọu tita ini e si kamene.

¹⁹ Kereu i kamene měngomol᷊ẹ̌ gẹ̌sing ěntanang kamene, abe kawe saụ mẹ̌sul᷊e měngal᷊ạ běkisu gandung apan natěntang. Gandung ene walạete waugʼi sire tau raghị, manga rariọ kasisi ěndusẹ̌, dingangu manga wawine wal᷊u, tadeạu i kamene al᷊amatengu MAWU Ruatanu e su ral᷊ungu patikụ munaranu e.

²⁰Bọuteng i kamene sěnsul᷊e manipo wuan zaitun dingangu wuang anggoru e, ute kumbahang mẹ̌sul᷊e kụ měnampungu manga wuane apang kụ natěntange. Ene tangú měngkate walang kamene waugu tau raghị, manga anạ kasisi ěndusẹ̌ dingangu manga wawine wal᷊u.

²²Pẹ̌tahěndungke u i kamene nạung bọu nakoạ ěllang su Misirẹ̌; kụ kai ual᷊ingu ene iạ nakapangonggọu tita mahini e si kamene.