Read Sangir PANGANGONGGỌ U TORATẸ̌ KAPIA 25 Bible Online

PANGANGONGGỌ U TORATẸ̌ KAPIA 25 - Sangir bible

PANGANGONGGỌ U TORATẸ̌ KAPIA 25

¹Kereu manga piạ duang katau wọu tau Israel měngkakoạ sol᷊ong anung mělahukung mẹ̌bẹ̌bawa sěmbaụ pěrkara, kụ bọu ene sěngkatau e nilahẹ u tawẹ pẹ̌sasal᷊ane arawe wal᷊ine ute nẹ̌sal᷊a.

²Kereu i sain nẹ̌sal᷊a e kawe makaěbạ hukumang bawěbahẹ̌, kụ mělahukung e měngoro si sie apararěmạ. Kal᷊awọu rekenangu wawěbahẹ̌ pinaměbahẹ̌ e ute tumuhụewe kasariang kakanoạ e ral᷊akisẹ̌ kụ seng nịkakoạ e,

³ kaiso tawe wotonge něngalembo wọu ěpạ u pul᷊o susul᷊ene. Kereu měngalembo ute mangal᷊ene tau ene lẹ̌hinakaneng arau tẹ̌tahumeang su těngon lawọ.

⁴ Kumbahang maměting mohongu sapi kụ kạpamuige gandung.”

⁵ ”Kereu pẹ̌sěntamahuariang e mạtanạ su wal᷊e sěmbaụ e, kụ sěngkatau wọu i sire nairị tawẹ těntange anạ esẹ, tangu wal᷊une tawe wotonge mẹ̌kawing u taumata wal᷊ine su l᷊ikudu anạ u sěmbaụ u kawinge. Tuaring anu nairị e hinone mẹ̌kawingu wal᷊u ěndaị e.

⁶Dariọ esẹ anạ kaiakaneng i sire e harusẹ̌ irekeng anạ u sěngkatau sen nate ene, tadeạu i sie piạbe hitene sutal᷊oarang taumatang Israel.

⁷ Kereu tau ene tawe mẹ̌kawing dingangu kawingu wahakạ u tuhange, ute wawine ěndaị e hinong mẹ̌těngong manga matatebone su soa e kụ maul᷊ị u, ’Ipagẹ̌ku e kawe madiri mědeạu makapẹ̌gěllịu sěngkatau pal᷊ahite waugu tuhange sutal᷊oarang kawanuang Israel.’

⁸Bọu e apạeweng matatebone su soa e harusẹ̌ mẹ̌kui tau ene kụ pẹ̌bisara ringange. Kamageng i sie měngkai tawe měnarimạ,

⁹ute kawingu wahakạ u tuhange harusẹ̌ humaung si sie su těngom manga matatěllang u soa, měluạ sandalẹ̌ u tau ene, měngědu ghatine kụ mẹ̌bera, ’Kere ini harusẹ̌ koạ e taumata kụ tawe mapulu měngonggọu pal᷊ahite waugu anạ u sěmbaụ e.’

¹⁰Anạ u sěmbaụ u tau ene sarung ikakiral᷊a su Israel mẹ̌sul᷊ungu ’Balagu taumata kụ piněluakeng sandalẹ̌ e.’ ”

¹¹”Kereu manga esẹ duang katau kapẹ̌kẹ̌kakokane, kụ kawingu sěngkatau wọu i rẹ̌dua e tumatawang kawinge kụ měhěgo arau měhěngkung badang pělling tau esẹ dokạ u kawinge,

¹²ute potọ e limang tau wawine ěndaị e kụ kumbahang tumal᷊ěntụ i sie.

¹³ Kumbahang měngakal᷊ẹ̌ kụ mẹ̌pakẹ u timbangeng dingangu sasupa tawẹ katěngade.

¹⁵Pakẹko timbangeng dingangu sasupa těngadẹ̌ e tadeạu i kamene manandụ umbure su wanua kụ nionggọu MAWU e si kau.

¹⁶MAWU Ruatanu e měbẹ̌binsị u taumata kụ puluang mělinga.”

¹⁷ ”Pẹ̌tahěndungke kereapa tau Amalek miěbạ i kamene nạung piạ i kamene kạpahundal᷊enge sụsěbang bọu Misirẹ̌.

¹⁸I sire tawe matatakụ u Mawu kụ něngalo si kamene wọu l᷊ikude su tempong i kamene naral᷊owe ringangu nikasueěngu toghasẹ̌, bọu e němate kal᷊awọu taumatanu e kạpahundal᷊enge ringangu mautẹ̌ su l᷊ikude.

¹⁹Ual᷊ingu ene, kereu MAWU Ruatanu e seng něgěllịu wanua ene si kau e kụ i kamene nal᷊iwirẹ̌ bọu kal᷊awọu sekẹ apang mạtanạ mạngělikụ, kal᷊awọu tau Amalekẹ̌ e harusẹ̌be pateng kamene sarang i sire seng tawe katahěndungang. Abe kiwul᷊ei!”