Read Sangir PANGANGONGGỌ U TORATẸ̌ KAPIA 26 Bible Online

PANGANGONGGỌ U TORATẸ̌ KAPIA 26 - Sangir bible

PANGANGONGGỌ U TORATẸ̌ KAPIA 26

¹”Kereu i kamene seng nasuẹ̌ su wanua kụ nionggọu MAWU Ruatanu e si kamene kụ seng nẹ̌banua sene,

² tangu ual᷊ine humotong bọu ěntanang kamene kụ seng nikomol᷊i kamene tangú harusẹ̌be tahong kamene su ral᷊ungu patanga, kụ ěntudi kamene su tampạ kụ nipilem MAWU Ruatanu e.

³Kakoạko sol᷊ong anung imang kụ měmẹ̌munara su tempo ene kụ paul᷊ịko si sie, ’Iạ e mělahẹ su MAWU Ruatanu e u iạ kai seng nasuẹ̌ su wanua kụ nikědonʼE su manga i upung i kitẹ e mědeạu ionggọ si kitẹ.’

⁴Imang e sarung měnarimạ patanga ene wọu limanu kụ pěllokange su těngom pananěmbaěng u MAWU Ruatanu e.

⁵Bọu ene su těngom MAWU Ruatanu e, i kau harusẹ̌ mẹ̌bera manga wawera ini: ’O MAWU, i upungku e kai tau Aram kụ mẹ̌pẹ̌palilị. I sie nẹ̌bawa anạ u sěmbaụ e su Misirẹ̌ mědeạu matanạ sene mẹ̌sul᷊ungu tumatal᷊ang. Piạ e nạung natamai sol᷊om pai ene tumbạeng i sire mahal᷊i, kaiso i sire kawe nakoạ bansa ghẹ̌guwạ dingangu masěllahẹ̌.

⁶Tau Misirẹ̌ e matatingkaị miěbạ i kami ringangu měnẹ̌nihasang kami apělẹ̌hal᷊ẹ̌ kere ěllang.

⁷Bọu e i kami gimahiorọ makịtul᷊ung si Kau, MAWU, Ruatang upung i kami. I Kau e rụdaringihẹ̌ kakindoạ i kami ringangu makạsilo kasasigěsạ, kasasusa ringangu wěhạ i kami.

⁸Ual᷊ingu kawasa ringangu katoghasẹ̌ masaria e i Kau e seng něliwirʼi kami e wọu Misirẹ̌. I Kau seng nẹ̌karạdiahang munara makạlaherang dingangu makạdal᷊inaụ ore lai makạděntang kal᷊awọu munara makạbintogẹ̌ patikụ sekẹ.

⁹Bọu ene i Kau e nanondang kami e sini kụ něngonggọu ěntana kalạ dingangu matawa ini e si kami.

¹⁰Ual᷊ingu ene, o MAWU, iạ e maněmbang gěsing ěntana nikaual᷊i humotonge, ěntanạ e nạung nighěllị u e si siạ.’ Mase pěllọ e patanga ene su těngom MAWU Ruatanu e kụ sěmbai wue i Sie.

¹¹Pakitarimakasẹ bue waugu patikụ pẹ̌bawiahẹ̌ kụ seng nionggọu MAWU Ruatanu e si kau, ringangu ral᷊ohom bal᷊enu e. Paringangkong kamene tau Lewi ringangu taumatan daghị apam měmpẹ̌tẹ̌tanạ sutal᷊oarang kamene kụ mahuntol᷊e su ral᷊ungu sal᷊iwangu parahul᷊uasẹ̌ e.

¹² Apan taung katěllune i kamene harusẹ̌ měngonggọu sasěmba pẹ̌tahạsěngkapul᷊one, kụ sěngkatahạpul᷊one wọu ghẹ̌sing ěntananu e waugu imang tau Lewi, taumata raghị, manga anạ kasisi ěndusẹ̌ dingangu manga wawine wal᷊u, hakịu su ral᷊ungu apan soanu e i sire makaěbạbe kaěng kụ gẹ̌gausang apang i sire.

¹³Mạeng sem bọu tangú, pẹ̌berạe su MAWU Ruatanu u, ’Wọu sěngkatahạpul᷊one wọu gěsing ěntana kụ harusẹ̌ isěmba si Kau MAWU e, u tawẹ sarang kadodọ kụ natěntang su wal᷊eku e; u kěbị e sen takụ nasueng gěllị e su tau Lewi, tau raghị, manga rariọ kasisi ěndusẹ̌, manga wawine wal᷊u, kerẹewe niorong MAWU Ruataku e si siạ. Bọu laorom MAWU su hal᷊ẹ̌ u sasěmba pẹ̌tahạsěngkapul᷊one tangú tawẹu takụ tawe nituhukang.

¹⁴Bọu sasěmba ene, tawẹu sarang kadodọ-dodọ takụ nikaěng piạ iạ deng kạpẹ̌lẹ̌lutune, arau takụ iwawa sol᷊ong likudu wal᷊e piạ iạ nạung deng mal᷊amuhụ, arau takụ ighěllị kere sasal᷊e su tau nate. Iạ e seng timuhụ si Kau MAWU; patikụ apan nitita-Nu seng takụ bọu kinoạ.

¹⁵Bọu tampạu susi su sorga e mal᷊owọko i Kau e měmanda ringangu měngal᷊amatẹ̌ umatʼU Israel; al᷊amate lai wanua kalạ dingangu matawa e kụ sen nionggọʼU e si kami natuhụewe su kědonʼU su manga i upung i kami.’ ”

¹⁶”Su ěllo ini MAWU Ruatanu e něngoro si kamene waugu pẹ̌děndal᷊eng kal᷊awọu parenta ene; koạko patikụ ene ringangu kasasatia ore lai ringangu kasěllahu wadang dingangu himukudu e.

¹⁷Ěllo ini i kamene něngaku MAWU e mẹ̌sul᷊ung u Ruatanu. I kamene nẹ̌kědo waugu mẹ̌těngkasatia si Sie kụ měndal᷊engu patikụ tita ringangu laoronʼE.

¹⁸ Ěllo ini MAWU e něnarimạ i kamene mẹ̌sul᷊ungu umatʼE hala, kere nikědonʼE si kamene, ringangu i Sie nangoro si kamene apẹ̌kẹ̌koạ patikụ laoro-Ne.

¹⁹MAWU sarung mapakasěllahʼi kamene limembo wọu patikụ bansa wal᷊ine kinoạ e, kụ i kamene sarung daloěng dingangu lẹ̌adateng.[23] I kamene sarung makoạ umatʼu MAWU Ruatanu e mẹ̌sul᷊ungkewen nikědonʼE.”