Read Sangir PANGANGONGGỌ U TORATẸ̌ KAPIA 27 Bible Online

PANGANGONGGỌ U TORATẸ̌ KAPIA 27 - Sangir bible

PANGANGONGGỌ U TORATẸ̌ KAPIA 27

¹Bọu ene ringangu manga těmbonangu Israel, i Musa e něhabaru tatanatane ini su wansa ene, ”Daringihe wue kal᷊awọu tita nạung takụ nionggọ si kamene ěllo ini.

² Su ěllo nạung i kamene limiu Sal᷊ụ u Yordan mědeạu sumuẹ̌ su wanua kụ nionggọ u MAWU Ruatanu e si kamene, ute i kamene hinong mapararisị u watu ghaghuwạ piram baụ kụ bọu ene labureng apụ.

³Bohekeko su manga watu ene apạeweng bawerang manga tita ini. Kereu i kamene seng nasuẹ̌ su wanua kalạ dingangu matawa kụ nikědom MAWU e, Ruatang upungu si kamene,

⁴dingangu i kamene seng ene su sěmběkan Sal᷊ụ u Yordan, i kamene hinong makoạ sol᷊ong Bul᷊udu Ebal. Sene i kamene hinong mapararisị dingangu mělaburu apụ su manga watu ene kerẹewe takụ ilẹ̌oro nạung si kamene su sěhěllo ini.

⁵ Sene harusẹ̌ lai i kamene pěndarisị u pananěmbaěng sěmbaụ su MAWU bọu manga watu kụ den tawe nilẹ̌hal᷊ẹ̌ u apal᷊iwụ uase,

⁶batụu apam pananěmbaěng kụ nirarisị baugu MAWU Ruatanu e harusẹ̌be koạ bọu watu tạ turạ e. I kamene harusẹ̌ pěmpaněmbang manga sasěmba tẹ̌tongkateng su wowom pananěmbaěng ene.

⁷Sěmbako l᷊ai manga laonggọ baugu pẹ̌darame wọu anunu e kụ kaěngke lai ěndaị sene ore lai pěmpahul᷊uase su těngom MAWU Ruatanu e.

⁸Su wowom batu nilaburangu apụ ene e, i kamene harusẹ̌ pěmpěmohẹ pakal᷊ětạ apam bawerang manga tita e wọu Mawu Ruata.”

⁹Bọu ene sěndal᷊eng dingangu manga imang u Lewi, i Musa nẹ̌bera su kal᷊awọu taumatang Israel, ”Manga anạ u sěmbaụ, tatingangko ringangu pẹ̌daringihẹ̌! Sahěllo ini e i kamene seng nakoạ umatʼu MAWU Ruatanu.

¹⁰Ual᷊ingu ene tangú raringiheko MAWU Ruatanu, ringangu koạko kal᷊awọu titanʼE nạung takụ nionggọ si kamene sahěllo ini.”

¹¹Bọu e i Musa nẹ̌bera su tau Israel,

¹² ”Bọuteng i kamene limiu Sal᷊ụ u Yordan, hěnton Simeon, Lewi, Yehuda, Isakar, Yusup dingangu i Benyamin, harusẹ̌ dumarisị su wowom Bul᷊udu Gerizim su tempong pẹ̌bawerang al᷊amatẹ̌ baugu wansa ini.

¹³Su tempong pẹ̌bawerang laane, hěnton Ruben, Gad, Asyer, Zebulon, i Dan, dingangu i Naftali, harusẹ̌ dumarisị su wowom Bul᷊udu Ebal.

¹⁴Tau Lewi harusẹ̌ mẹ̌berang manga wawera ini piạ tingihe maihạ kụ tau Israel harusẹ̌ sumimbahu, ’Aming’.

¹⁵ Tau Lewi e: ’Kai pisị su tau nẹ̌koạ tul᷊ada wọu watu, kalu arau barang makakětị, kụ maněmba sahiung mělẹ̌likosẹ̌; MAWU e měbẹ̌binsị u pěnanal᷊e mahan duata!’ Patikụ kawanua: ’Aming!’

¹⁶ ’Kai pisị su taumata kụ tawe měngangadatẹ̌ gaghurange ringangu mapakawalan sire mal᷊anting.’ ’Aming!’

¹⁷ ’Kai pisị su taumata kụ měngẹ̌ngensọ pẹ̌saraěngu ěntana ringangu lampunge.’ ’Aming!’

¹⁸ ’Kai pisị su taumata kụ makapal᷊idẹ̌ tau wuta!’ ’Aming!’

¹⁹ ’Kai pisị su taumata kụ měmul᷊aho hakẹ̌ u taumata raghị, manga rariọ kasisi ěndusẹ̌ dingangu apam bal᷊u.’ ’Aming!’

²⁰ ’Kai pisị su taumata kụ měhinakang si amange ual᷊ingu mẹ̌sěngkapẹ̌tikị dingangu sěngkatau wọu kawing i amange!’ ’Aming!’

²¹ ’Kai pisị su taumata kụ mẹ̌sěngkapẹ̌tikị dingangu binatang.’ ’Aming!’

²² ’Kai pisị su taumata kụ mẹ̌sěngkapẹ̌tikị dingangu wawinene tamba inang i amang arau wawinene kụ i amang dingangu i ninange sěmbaụ.’ ’Aming!’

²³ ’Kai pisị su taumata kụ mẹ̌sěngkapẹ̌tikị dingang i ninange kinaratingang.’ ’Aming!’

²⁴’Kai pisị su taumata kụ nělikosẹ̌ němate.’ ’Aming!’

²⁵’Kai pisị su taumata kụ dimaẹ sasorokẹ̌ baugu měmate taumata tawẹ sal᷊ane.’ ’Aming!’

²⁶ ’Kai pisị su taumata kụ tawe něngganapẹ̌ tita ringangu těntiro Mawu Ruata e su ral᷊ungu kakanoạ.’ ’Aming!’ ”