Read Sangir PANGANGONGGỌ U TORATẸ̌ KAPIA 28 Bible Online

PANGANGONGGỌ U TORATẸ̌ KAPIA 28 - Sangir bible

PANGANGONGGỌ U TORATẸ̌ KAPIA 28

¹ ”Kereu i kamene rụdaringihẹ̌ MAWU Ruatanu e ringangu satia mẹ̌koạ kal᷊awọu apan takụ ilẹ̌oro si kamene sěhěllo ini, tangú i Sie sarung mapakariading kamene umatẹ̌ timeleng kapiaěnge su dunia.

²Daringihe wue MAWU Ruatanu e, tangú kal᷊awọu al᷊amatẹ̌ ini e sarung ionggọ si kau e:

³Kaal᷊amatengko manga soa ringangu manga rahaminu e.

⁴Kaal᷊amatengko l᷊ai i kamene e, hakịeweng manga anạu e mal᷊awọ, kụ gěsing ěntananu e ipẹ̌dal᷊embo, ringangu sapi ore lai kambing dingangu dombanu e kal᷊awọe wotonge wue.

⁵Mal᷊owọko pěnsạ u gandungu e ringangu manga kaěng nikoạ i kamene wọu gandung ene.

⁶Mal᷊owọko reng al᷊amateng kal᷊awọu munaranu e.

⁷Kereu i kamene aloěng, MAWU e sarung měmatạ sekẹ u e. I sire sarung měmpěngalowe maudupẹ̌, kaiso kawe mahuntal᷊ang kụ měmpẹ̌sal᷊iawuhẹ̌.

⁸MAWU Ruatanu e sarung měngal᷊amatẹ̌ karadiahangu dingangu měloho manga wakudu e ringangu gandung. I Sie sarung měngal᷊amatẹ̌ si kamene su wanua nionggọ e si kamene.

⁹Kereu i kamene mararingihẹ̌ bue su MAWU Ruatanu e ringangu měmpẹ̌koạbe kal᷊awọu apang tita-Ne, i kamene sarungbe koateng kere umatʼE hala e, kerẹewe seng nikědonʼE.

¹⁰Tangú patikụ umatẹ̌ su dunia e sarung makasilo u i kamene kai kawanua pinilem MAWU, ringangu i sire sarungbe lumahunggeě i kamene.

¹¹I kamene sarungbe pěngal᷊amatengu makareạ anạ l᷊awọ. Binatangu e sarung mal᷊awọ dingangu ghěsing ěntananu e ipẹ̌dal᷊embo su wanua nikědom MAWU su manga i upungu e mědeạu ionggọ si kamene.

¹²MAWU e sarung maparasehu tahiti su tempone wọu tampạ u pěndaresokange mạhěmpal᷊iu su langị e. I Sie sarung měngal᷊amatẹ̌ kal᷊awọu karadiahangu, hakịu i kamene makapangonggọu ědang baugu umatẹ̌ mal᷊awọ, kaiso i kamene hala e ta wahal᷊uasu měmpěngědang.

¹³MAWU Ruatanu e sarung mapakariading kamene těmbonange sutal᷊oarang umatẹ̌ lawọ, kụ bal᷊inewe tumatol᷊ene. Kereu i kamene masatia tumuhụ patikụ titam MAWU kụ takụ nionggọ si kamene sahěllo ini, i kamene sarungbe kakạl᷊unsemahe ringangu tawe sumasohọ.

¹⁴Kai kumbahangbe měngkai ale-ale su kal᷊awọu parenta tamai ene kụ balạewe měnsang kereapa kakakoạ e. Kumbahangbe l᷊ai mẹ̌samal᷊ẹ dingangu mẹ̌suba kal᷊awọu ruata wal᷊ine.”

¹⁵”Kai kamagengu i kamene tawe rumararingihẹ̌ MAWU Ruatanu e, ringangu tawẹ satiane mẹ̌koạ kal᷊awọu laoro ringangu titanʼE nạung takụ nionggọ si kamene sěhěllo ini, tangu kal᷊awọu laane ini e sarung tumuhung si kamene:

¹⁶Kawontogang manga soa ringangu manga rahaminu.

¹⁷Kawontogang pěnsạu gandungu e ringangu kaěng nikoạ i kamene wọu gandung ene.

¹⁸Kawontogang i kamene, hakịu sarung mahal᷊i anạ i kamene, gẹ̌sing ěntanang kamene, ore lai sapi arau kambing dingangu dombanu.

¹⁹Kawontogang kal᷊awọu munaranu.

²⁰Kereu i kamene mẹ̌koạ dal᷊akisẹ̌ dingangu měnuhudu MAWU, i Sie sarung maparěntang silakạ, pẹ̌gaghaghohaeng, dingangu kasasigěsạ su ral᷊ungu kal᷊awọu apang kẹ̌koateng i kamene, hakịu su ral᷊ungu tempo manimbụ i kamene ipakawinasa tạ l᷊ěmbene.

²¹Sakị mẹ̌dẹ̌dal᷊ahěmbon sakị sarung mihombang si kamene, sarang pěngěnsueěnge tawẹu sarang sěngkatau wọu i kamene wědang měpẹ̌tẹ̌tanạ su wanua nikaianeng i kamene ene.

²²MAWU e sarung měhukung i kamene ringangu kal᷊awọu sakị marěkẹ, manga sahěnụ dingangu lěhabẹ̌. I Sie sarung maparěntang banua měhangu ringangu anging makahěngisẹ̌ hakịu pěnsạu e magholọ. Kal᷊awọu manga sawěda ene měngkate tatapẹ̌ mahumagẹ̌ si kamene sarang i kamene mawihua.

²³Tahiti e sarung tawe rumasehẹ̌ kụ ěntananu e sarung mẹ̌tungkětị kere uase.

²⁴MAWU e tawe sarung aparasehu tahiti, kaiso kawe tahiting awul᷊ẹ̌ dingangu ěnne sarang i kamene masue mawihua.

²⁵Kereu i kamene tawe rumaringihẹ̌ MAWU Ruatanu e, i Sie sarung mapakawatạ i kamene su manga sekẹ u e. I kamene sarung měmpěngalo maudupẹ̌, kaiso kawe mahuntal᷊ang měmpẹ̌kal᷊iaesẹ̌. Kal᷊awọu umatẹ̌ su dunia e sarung makapěndang lěntihe makasilo hombangu e.

²⁶Kereu i kamene mate, maietʼi kamene e makoạ kinạ u manga manụ u winalangeng dingangu manga binatang dul᷊u, dingangu tawẹ apa měndal᷊iwuahe manga binatang tamai ene.

²⁷MAWU sarung měhukung i kamene ringangu manga wisul᷊ẹ̌ kere nạung kinoạʼE waugu tau Misirẹ̌. Badangu e sarung mahěmbungu hempang dingangu kěhe makakatị, kaiso tawẹ apa undange.

²⁸MAWU e sarung mapakariading kamene mẹ̌pulu, mawatạ, ringangu ipẹ̌tal᷊ạbingọ e.

²⁹Su ěllo mal᷊ětu i kamene měmpạnaghipo mẹ̌sul᷊ungu tau wuta, kaiso tawe nakareạ dal᷊eng. Kal᷊awọu saghedu e nakoạ tawẹ ual᷊ine. I kamene měngkate hanesẹ̌ sěsẹ̌dakeng dingangu lẹ̌hampaseng, dingangu tawẹ u mẹ̌tul᷊ung i kamene.

³⁰Kereu i kamene tawe rumaringihẹ̌ MAWU Ruatanu e, kěbị tamai ene sarung maěnsạ su watangengu: I kamene sarung mẹ̌kakaghiang, kaiso kawe taumata wal᷊ine mẹ̌kawingu kaghiangu. I kamene měmětị bal᷊e, kai tawe makapětanạ sene. I kamene sarung mẹ̌suang anggorẹ̌ kai tawe makateěng.

³¹Sapinu e sarung potokang su těngonu, kai i kau tawe kuminạ gěsine. Manga kalidenu sarung iahạ aparal᷊eng su tempong i kamene reng makạsilo ene e, ringangu tawe sarung isul᷊e. Manga dombanu e sarung ionggọ su manga sědụu e kụ tawẹu měmpẹ̌tul᷊ung.

³²Su těngom matanu manga anạu e sarung ighěllị kere manga ěllang baugu taumata raghị. Apang kal᷊aěllo matanu e měngkai měpẹ̌paiwuhị mědẹ̌deạ manga anạu, kaiso saghedu e mang sia-sia, batụu i sire sarung tawe mẹ̌sul᷊e.

³³Taumata raghị e sarung měngal᷊ạ kěbị gěsing ěntana nạung nikaẹ̌bakeng ual᷊ing liaghang gati, kaiso i kamene hala tawe makal᷊ewa apa-apa sul᷊iun taghal᷊ẹ̌ sěsẹ̌dakeng dingangu měngkai tẹ̌tingkaitang.

³⁴I kamene sarung měmpẹ̌pulu ual᷊ingu apang kinahombangeng i kamene.

³⁵MAWU e sarung mapakariading laedu mapenẹ u hempang maghaghiadẹ̌ kụ tawe mapia, wọu laedẹ̌ sarang pusigu e mahěmbungu manga wisul᷊ẹ̌.

³⁶I kamene ringangu ratung kamene e sarung iwawam MAWU sol᷊ong daraganeng kụ tawe nịkakiral᷊ang kamene ringangu l᷊ai manga i upung i kamene. Sene i kamene sarung mẹ̌samal᷊ẹ mahan duata kinoạ bọu kalu ringangu watu.

³⁷Su wanua kụ nạung tampạ i kamene nipẹ̌kal᷊iaesu MAWU e, taumata e sarung humiubẹ̌ makasilo si kamene; i kamene sarungbe lẹ̌henghesang dingangu lělẹ̌geěng i sire.

³⁸Mal᷊awọ bine sarung sawuhang i kamene, kaiso kawe mahal᷊i ual᷊ine kahombangeng i kamene, u sasuang i kamene kawe nasueng kekehe su kal᷊imbotong.

³⁹I kamene sarung měmpẹ̌suang kal᷊awọu wawaelang u anggorẹ̌ kụ padul᷊iang, kaiso tawe měnipo wuang anggorẹ̌ arau měmpanginung akene, u kal᷊awọu kalung anggorẹ̌ e nasueng kekehe su ul᷊idẹ̌.

⁴⁰Su kasěllahu wanuanu e nituwoěngu kalun zaitun, kaiso wuane kawe něngkahondosẹ̌, hakịu i kamene tawe nakahombang lanane.

⁴¹I kamene sarung makahombang anạ esẹ dingangu wawine, kaiso i sire kawe al᷊akeng kere taweng u sekẹ, hakịu i kamene e kinailangeng i sire.

⁴²Kal᷊awọu kalu ringangu sasuang i kamene e sarung masueng kekehe su binatang sụsahomang.

⁴³Tau raghị mạtanạ su wanuanu e sarung mạhuntinambang kawasane, arawe kawasanu hala e mangkeng kẹ̌kakohone.

⁴⁴I sire piạ doite mědeạu pakiědang si kamene, kai arawe i kamene tawẹ manga apa mědeạu pakiědang si sire. Kụ pěngěnsueěnge i kamene e pinẹ̌kawasaěng i sire.

⁴⁵Kal᷊awọu silakạ ene e sarung maěnsạ si kamene sarang i kamene měngkawinasa watụ u i kamene tawe rumararingihẹ̌ su MAWU Ruatanu e, ringangu tawe měndaral᷊eng u kal᷊awọu tita nionggọʼE si kamene.

⁴⁶Kal᷊awọu haghing silakạ ene e nakoạ tatialang hukumang u MAWU waugʼi kamene ringangu hitenu e sarang marěngụ-děngụ.

⁴⁷I kamene seng nial᷊amatengu MAWU Ruatanu e su ral᷊ungu patikụ, kaiso tawe mapulu mẹ̌tangkiang si Sie, ringangu katul᷊idu naung ore lai karal᷊uasẹ̌.

⁴⁸Ual᷊ingu ene i kamene harusẹ̌ mẹ̌tangkiang baugu manga sědụ u e nirolohu MAWU e apẹ̌děndokạ si kamene. I kamene e sarung kal᷊unusang, měngkarou, těntol᷊e ore lai kakawusangu patikụ. MAWU e sarung[24] manědạ si kamene marasai sarang i kamene mawinasa.

⁴⁹Kawanua sěmbaụ kụ tawe kaěnnaěng i kamene wawerane e sarung aparěntang MAWU wọu pondol᷊u dunia mědeạu rumokạ si kamene. Kere manụ kasiahe, i sire sarung měmpěnahedẹ̌ si kamene.

⁵⁰I sire kai mahěgisẹ̌ dingangu wěgawe tumal᷊ěntụ u taumata maghaghurang dingangu manga rariọ.

⁵¹I sire sarung měngěnsue binatang lẹ̌hikinang dingangu ghẹ̌sing ěntananu, ringangu tawe maněntang gandung si kamene, akẹ anggorẹ̌, lanang zaitun arau sapi ringangu kambing arau dombanu sarang i kamene mate kal᷊unusang.

⁵²I sire sarung měngalo apan soa su wanua kụ nionggọ u MAWU Ruatanu si kamene sarang meselẹ̌ mararangẹ e, ringangu nipakatoghasẹ̌ kụ pangumbalaěng i kamene e kawe něngkahaka.

⁵³Těntal᷊ang manga sědụu e němpangalo manga soanu, i kamene sarung měngkapěndụ ual᷊ingu lunusẹ̌, hakịu i kamene mahungkinạ manga anạ i kamene hala e, manga rariọ apang nionggọ u MAWU Ruatanu e si kamene.

⁵⁴Manilaing taumata mapapangkatẹ̌ kapiaěnge naunge, kai mang sarung kuměndụ karěngụeweng pẹ̌ngangalo ene, hakịu sarang i sie kiminạ manga anạ e hala, puhinengu tawẹ apa kaěnge wal᷊ine. Bal᷊inewe lai kadodọ nighěllị e su anạ u sěngkataune arau kawinge ikẹ̌kěndagẹ̌ e arau manga anạ e kụ deng biahẹ̌.

⁵⁵

⁵⁶ Manilaing bawine mapapangkatẹ̌ kapiaěngu naunge, ringangu něngalembong kakakalạ e hakịu seng tạ běke ren dumal᷊engu laedẹ̌, kụ mal᷊aing sarung mẹ̌koạ kerene. Su tempong sědụ něngalo su soa, wawine ene sarung kuměndung ual᷊ingu kinal᷊unusang, hakịu i sie ringangu marěmasẹ̌ kuminạ anạ e wuhu ral᷊ěpụ dingangu manga pisine, wal᷊inewe lai kadodọ nionggọ e su kawinge kẹ̌kapiaěnge arau su manga anạ e.

⁵⁷

⁵⁸Kereu i kamene tawẹ satiane tumuhụ kal᷊awọu titam MAWU Ruatanu e kụ mạbawohẹ su ral᷊ungu bukẹ̌ ini ringangu tawe měngadatẹ̌ MAWU Ruatanu e mawantugẹ̌ dingangu makạl᷊aherang,

⁵⁹MAWU e sarung maparěntang haghin sakị tamal᷊aul᷊e ringangu manga sahindạ tawe mapapontodẹ̌ si kamene ringangu su manga hitenu.

⁶⁰Kal᷊awọu sakị makạtatakụ kinasilong kamene su Misirẹ̌ e sarung tumangga si kamene, kụ i kamene tawe mul᷊e.

⁶¹MAWU lai sarung maparěntang haghin sakị dingangu sahindạ kụ tawe nisěbạ su ral᷊ungu bukẹ̌ ini, bukẹ̌ u Titam MAWU. Mase i kamene sarung ipakawinasa.

⁶²Manilaing kakěpal᷊e seng kere kal᷊awọu wituing su l᷊angị, kai tumbạeweng mahal᷊i sutal᷊oarang kamene kụ bědang biahẹ̌, batụu i kamene tawe rumararingihẹ̌ su MAWU Ruatanu.

⁶³Kerẹewe MAWU e makěhagẹ̌ mẹ̌gěllịu kasasukụ u pẹ̌bawiahẹ̌ mawadang si kamene, ringangu mapakal᷊awọ i kamene e, i Sie sarung mal᷊uasẹ̌ mapakawinasa ringangu mangěnsue si kamene. I kamene sarung sawukang bọu wanua kụ seng tạ kararěnane lai pẹ̌tanakeng i kamene.

⁶⁴MAWU e sarung mapẹ̌tal᷊eing kamene wọu tal᷊oarang manga wansa su kasěllahu wowon dunia ini. Paị sene i kamene sarung měmpaněmba mahan duata kinoạ bọu kalu ringangu watu, mahan duata e tawe ikakiral᷊ang kamene ringangu l᷊ai ta ikakakiral᷊ang upung i kamene.

⁶⁵Sutal᷊oarang manga wansa ene e i kamene tawe makahombang karal᷊enehẹ̌, dingangu tawẹ apa tampạ kụ ikasěbạ i kamene tataghuanengu; MAWU e sarung mapakariading kamene tụtaghiawahẹ̌ dingangu kụkěndụ u tạ u pěharapeng.

⁶⁶Pẹ̌bawiahu e sarung sěntiniạ sẹ̌sahěsekangu hombang. Ěllo hěbi i kamene makạpěndang makạgaghěnggang dingangu mạtakụ u mate.

⁶⁷Su tempong balạewe makasilo měnsang apạ e, pẹ̌pusoku e měngkate apa tutarěntung ual᷊ingu takụ. Apang kamal᷊ukadẹ̌ i kamene mělẹ̌harapẹ̌ hěbi, ringangu hěbi-hěbi e i kamene mělẹ̌harapu mal᷊ukadẹ̌.

⁶⁸MAWU e sarung měndingọ i kamene kapia su kapal᷊ẹ̌ e sol᷊ong Misirẹ̌, manilaing i Sie[25] seng nẹ̌bera u i kamene semben tawe mẹ̌bal᷊ị kapia sol᷊ong ene. Paị sene i kamene sarung mẹ̌tawakal᷊i mẹ̌bal᷊ụu watangeng i kamene kere ěllang su manga sědụ u e, kaiso tawẹ u sarang sěngkatau kụ deng měměllị si kamene.”