Read Sangir PANGANGONGGỌ U TORATẸ̌ KAPIA 3 Bible Online

PANGANGONGGỌ U TORATẸ̌ KAPIA 3 - Sangir bible

PANGANGONGGỌ U TORATẸ̌ KAPIA 3

¹”Bọu ene i kitẹ e mẹ̌kakanoạ sarang sěmběkan sawěnahẹ̌ mẹ̌timona ěntanang Basan. I Og, datuʼm Basan dingangu kal᷊awọu sordadone němpẹ̌damahi něnekẹ si kitẹ maraning soang Edrei.

²Arawe MAWU e něhengetang si siạ, ’Abe katakụ i sie, Musa. Iạ e měnarakang i sie, sordadone ringangu kasěllahu ěntanane si kau. Pẹ̌koạ e si sie kerẹewe sen kinoạu si Sihon, datung Amori kụ nẹ̌parenta su Hesybon.’

³Kụ MAWU Ruatang kitẹ e lai něnarakangu Ratu i Og dingangu kawanuane si kitẹ e, ringangu i sire kěbị seng kinawatạ i kitẹ.

⁴Su tempo ene i kitẹ e němul᷊aho kěbị soa e, kụ tawẹ u sarang sěmbaụ deng nal᷊ěmbe. Kěbị e ěnnungu pul᷊o su waụ e soa nipul᷊ahong kitẹ su kaguwạu wanuang Argob, kụ pẹ̌parentaěngu Ratu i Og bọu Basan.

⁵Kěbị soa ene nipakatoghasu mesele mararangẹ, tukadu pasěllangenge ringangu manga kakal᷊ehẹ̌ tukadẹ̌ e pěmẹ̌mal᷊e manga pasěllangeng ene. Su l᷊iung ene mal᷊awọ lai soa wal᷊ine kụ tawẹ mesele.

⁶Kěbị soa ene gholangeng i kitẹ, dingangu kěbị apang manga esẹ, manga wawine ringangu manga anạ i sire e pateěng i kitẹ, kerẹewe seng kinoạ i kitẹ su manga soan Datu i Sihon bọu Hesybon.

⁷Binatang i sire e nial᷊ạ i kitẹ e wọu manga soa ene kụ nihampasʼi kitẹ e.

⁸Su tempo ene i kitẹ něngal᷊ạ bọu ratung Amori rarua ene wanua su sěmběkan daki wọu Sal᷊ụ u Yordan dingangu Sal᷊ụ u Arnon sarang Bul᷊udu Hermon. (

⁹Bul᷊udu Hermon nisěbạ Siryon kahian tau Sidon, dingangu Senir kahian tau Amori.)

¹⁰I kitẹ e měngal᷊ạ kạguwạu wanuan Datu i Og bọu Basan: manga soane su tenene marangẹ, banuang Gilead dingangu Basan, turusẹ̌ sarang sěmběkan daki karaung soan Salkha ringangu Edrei.” (

¹¹Datu i Og e kai tau Refaim pěngěnsueěnge. Peting maiete[2] nikoạ bọu watu,[3] nandune ěpạ u meterẹ̌, běnahe maraning dua meterẹ̌ tumuhụ ukurange kụ seng nitantu e. Sarang orasẹ̌ ini wědang piạ ikẹ̌kasilo su Raba, soan tau Amon.)

¹²”Sarangke ěntana ene nakoạ tataghuaneng i kitẹ e, takụ nionggọ su ghal᷊ipohong Ruben dingang i Gad banua su sěmběkan sawěnahẹ̌ bọu soang Aroër maraning Sal᷊ụ u Arnon, dingangu sěmbahageang bọu wawul᷊urangu Gilead, nasowa l᷊ai manga soane.

¹³Baugu sěngkapahiakeng darua wọu ghal᷊ipohong Manasye takụ nionggotangu lěmbeng ěntanang Gilead, kerene lai ěntanang Basan nạung paparentaěng i Og, kụ kai kạguwạu wanuang Argob.” (Basan timeleng kere wanuan tau Refaim.

¹⁴I Yair bọu ghal᷊ipohong Manasye něngal᷊ạ kạguwạu wanuang Argob, kụ bọu Basan sarang pẹ̌saraěngu Gesur dingangu Maakha. I sie nẹ̌sěbạu manga weọ e ene tuhụ arenge hala, ringangu sarang orasẹ̌ ini e wědang timeleng manga weọ i Yair.)

¹⁵”Banuang Gilead takụ nionggọ su manga walagi Makhir bọu ghal᷊ipohong Manasye.

¹⁶Dingangu waugu manga ghal᷊ipohong Ruben dẹ̌duang Gad takụ nionggotangu wanua su tal᷊oarang Gilead dingangu Sal᷊u u Arnon. Tal᷊oarang sal᷊ụ ene e nakoạ pẹ̌saraěng i sire su sěmběkan timuhẹ̌, arawe su sěmběkan sawěnahẹ̌ e i sire mẹ̌sẹ̌sarang Sal᷊ụ u Yabok, kụ sěmbahageange al᷊ingkai pěsaraěngu wanuan tau Amon.

¹⁷Su sěmběkaʼm bahẹ, banuan sire e nawatedẹ̌ sarang Sal᷊ụ u Yordan, bọu Ranong Galilea su sěmběkan sawěnahẹ̌ sarang Laudẹ̌ Nate su sěmběkan timuhẹ̌, těpase sarang pentọu Wul᷊udu Pisga su sěmběkan daki.

¹⁸ Su tempo ene iạ e něngonggọu tita ini e si sire: MAWU Ruatanu e něngonggọu wanua su sěmběkan daki wọu Sal᷊ụ u Yordan si kamene makoạ pẹ̌tatanakeng i kamene. Arawe manga sordadong kamene e harusẹ̌ piạ aghide, ringangu lumiu Sal᷊ụ u Yordan e pěngal᷊imonawe manga ghal᷊ipohong Israelẹ̌ bal᷊ine e.

¹⁹Kětạeweng anạ dingangu kawing i kamene e ore lai binatang i kamene kụ mal᷊awọ e wotonge makakatanạ su apan soa kụ sen takụ nionggọ si kamene.

²⁰Tongkai wue apan taumata kụ i kamene wansa sěmbaụ e sarang i sire e makakaiang ěntana kụ sarung ionggọ u MAWU Ruatanu e si sire su sěmběkam bahẹ bọu Sal᷊ụ u Yordan, dingangu sarang MAWU e napakawalan sire e nẹ̌biahẹ̌ tawẹ sungkal᷊ene paị sene, mẹ̌sul᷊ungkewen seng kinoạʼE waugi kamene e sini. Buhụewe i kamene wotonge mẹ̌bal᷊ị sarang ěntanang kamene hala kụ sen takụ nionggọ si kamene.

²¹Bọu ene iạ nẹ̌bera si Yosua: I kau e seng nakasilo kal᷊awọu apang nikoạ u MAWU Ruatanu e si Sihon dẹ̌duang Og, datu rarua ene. Kerene lai i Sie sarung miěbạ apan datu kụ nipul᷊ahonu e ěntanane.

²² Abe katakụ i sire e, ual᷊ingu MAWU Ruatanu e sarung mẹ̌tawakal᷊i waugi kamene.”

²³”Su tempo ene iạ e kụkindoạ su MAWU:

²⁴O MAWU Kụ Limembong Karangetange, iạ e masingkạ u apan nitěbọʼU si siạ ini e wuhụewe nakoạ kere panẹ̌takengu kal᷊awọu manga kakanoạʼU e ghaghuwạ dingangu makạdal᷊inaụ. Tawẹ duata wal᷊ine su langị arau lai su dunia e kere i Kau kụ makakoạ kal᷊awọu hal᷊ẹ̌ masasaria e.

²⁵Apakawalako iạ e luměbạ Sal᷊ụ u Yordan, o MAWU mědeạu makasilo wanua kụ mahuntawa e su sěmběka, wanua e wawul᷊urange kụ maholẹ e ringangu wawul᷊urangu Libanon.

²⁶Arawe i kamene e seng nakakariading MAWU e nẹ̌pědu si siạ e hakịu i Sie e mạdiri rumaringihẹ̌ kakindoạku e. Su sěmběkane MAWU e něhengetang, ’Seng kapapianẹ e i Musa, abe relain sěbakengu e hal᷊ẹ̌ ene e!

²⁷Tangú kakakoạ e sarang pusigu Wul᷊udu Pisga kụ tatingangko sarang sěmběkan sawěnahẹ̌ dingangu sěmběkan timuhẹ̌, daki ringangu wahẹ. Kụ pakatitikeko pakapia-pia apa sarung ikasilonu e, batụu i kau e tawe makakal᷊iu Sal᷊ụ u Yordan.

²⁸Pẹ̌gěllikong manga tatul᷊ada e si Yosua. Apakararagẹ̌ko naunge, u seng i sie e sarung měngahạ bansa ene sarang sěmběkane mědeạu makapětanạ su wanua kụ kinasilonu ene.’

²⁹Tangú matanạ e i kitẹ su wal᷊ane su sěmběkan soang Bet-Peor.”