Read Sangir PANGANGONGGỌ U TORATẸ̌ KAPIA 30 Bible Online

PANGANGONGGỌ U TORATẸ̌ KAPIA 30 - Sangir bible

PANGANGONGGỌ U TORATẸ̌ KAPIA 30

¹”Orasẹ̌ ini e i kamene wotonge měmile wọu tal᷊oarang al᷊amatẹ̌ dingangu laane kerẹewe sen takụ nitualagẹ̌ si kamene. Kereu i kamene seng nakapěndang kal᷊awọu likibe ene dingangu mẹ̌biahẹ̌ sutal᷊oarang manga wansa raghị tampạ i kamene niapẹ̌kal᷊iaesu MAWU Ruatanu e, i kamene sarung makatahěndung pamamile kere takụ nionggọ si kamene.

²Kereu i kau ringangu manga hitenu e mapulu mẹ̌sul᷊e kapia su anum MAWU Ruatanu e, ringangu kạguwạu ral᷊ung u naung tụtuhụ kal᷊awọu titanʼE kụ sen takụ nionggọ si kamene sahěllo ini,

³tangú MAWU Ruatanu e sarung kuměndagʼi kamene. I kamene sarung al᷊akeng kapia wọu manga wansa suapan nạung i kamene nipẹ̌kal᷊iaesẹ̌ e, mase kinoạ e kapia niapakatul᷊ende.

⁴Maningbe i kamene nẹ̌sal᷊iawuhẹ̌ suapan tampạ su kasěllahu dunia e, MAWU Ruatanu e sarung měngomol᷊ʼi kamene ringangu mẹ̌bawa si kamene kạpia.

⁵Tangú i kamene makapěnaghuang kapia ěntana nạung kal᷊imona pẹ̌tẹ̌tanakeng u manga i upung i kamene. Kụ i kamene sarumbe lai ipangělembong katul᷊endene, ringangu kakěpal᷊u e sarumbe limembong kasěllahe wọu manga i upungu.

⁶I kamene ringangu manga hitenu e sarung gěllirangu naung makěhagẹ̌ hakịu i kamene kụkěndagu MAWU Ruatanu ringangu kạguwạu ral᷊ungu naungu kụ makapẹ̌tanạ sěntiniạ su wanua ene.

⁷Kal᷊awọu laane ene sarung ipakaěnsạ su manga sekẹ u apang měmpẹ̌bẹ̌binsị dingangu měmpạnẹ̌dạ si kamene.

⁸I kamene sarung mẹ̌sul᷊e kapia rumaringihẹ̌ MAWU ringangu měndal᷊engu kal᷊awọu titanʼE kụ takụ nionggọ si kamene su sahěllo ini.

⁹MAWU Ruatanu e sarung mapakariading kal᷊awọu karadiahangu e piạ ual᷊ine; i kamene sarung makahombang anạ l᷊awọ dingangu binatang lẹ̌hikinang mal᷊awọ; manga rahaminu e sarungbe makaonggọu ual᷊ine mẹ̌dẹ̌dal᷊embo. MAWU e mal᷊uasẹ̌ bue mapakatul᷊endeng kamene, kerẹewe lai i Sie mal᷊aing mal᷊uasẹ̌ měngonggọu katatul᷊ende su manga i upung i kamene.

¹⁰Kai i kamene harusẹ̌be mararingihẹ̌ su MAWU Ruatanu e ringangu matuhụ su kal᷊awọu titanʼE mạbawohẹ su ral᷊ungu bukẹ̌ ini, bukẹ̌ u Titam MAWU e. I kamene harusẹ̌ pẹ̌sul᷊e su anune ringangu kasěllahu ral᷊ungu naungu.

¹¹Tita takụ nionggọ si kamene tawe tumanịu mawěhạ si kamene ringangu tawe tumanịu marau.

¹² Tampạ e wal᷊inewe su l᷊angị, hakịu i kamene makịbal᷊o, ’Kai i sai sarung taraị sumaka měngal᷊ạ baugʼi kitẹ, tadeạu i kitẹ makaringihẹ̌ dingangu tumuhụ ene?’

¹³Tampạ e wal᷊inewe lai su sěmběkang laudẹ̌, hakịu i kamene makiwal᷊o, ’Kai i sai sol᷊ong sěmběkang laudẹ̌, měngal᷊ạ baugʼi kitẹ, tadeạu i kitẹ makaringihẹ̌ dingangu tumuhụ ene?’

¹⁴Kumbahang makiwal᷊o kerene, watụ u tita ene e kai apạ e marani-rani wọu anunu. I kamene seng masingkạ dingangu makawera wọu ral᷊ungu ěndumang, kụ sembeng kate mẹ̌koạ samatang.

¹⁵Sahěllo ini i kamene wotonge měmile wọu tal᷊oarang mapia ringangu ral᷊akị, wọu tal᷊oarang biahẹ̌ dingangu nate.

¹⁶Sahěllo ini iạ sarung měngoro si kamene waugu kuměndagu MAWU Ruatanu e ringangu matuhụ si Sie mase měndal᷊engu patikụ tita ringangu parenta-Ne tadeạu i kamene mahuweka ringangu makoạ sěmbaụ bansa masěllahẹ̌. MAWU Ruatanu e sarung měngal᷊amatẹ̌ si kamene su wanua kụ seng tạ kararěnane lai kaianeng i kamene.

¹⁷Kai kamagengu i kamene tawe rumararingihẹ̌ ringangu tawe mapulu tumuhụ, kụ mapakawalan batangengu e mipal᷊idẹ̌ baugu maněmba manga mahan duata e,

¹⁸nal᷊ahẹ u i kamene sarung ipakawinasa, ringangu umburu e tawẹ kananandụ e su wanua kụ seng tạ kararěnane lai sarung kaianeng i kamene. Tahěndungeko! Hal᷊ẹ̌ ene seng takụ nihabarẹ̌ si kamene su sahěllo ini.

¹⁹Orasẹ̌ ini i kamene seng botonge měmile wọu tal᷊oarang mẹ̌biahẹ̌ dingangu mate, wọu tal᷊oarang al᷊amatu MAWU ringangu anenʼE. Langị dingangu dunia e takụ nikuiang nakoạ sahidi su putusangu. Pěmilẹ e pẹ̌bawiahẹ̌.

²⁰ Kěndagẹ̌kong MAWU Ruatanu e, raringihe wue i Sie, ringangu pakasatiako si Sie. Tangú i kamene ringangu manga hitenu e sarung mẹ̌biahẹ̌ dingangu umburẹ̌ manandụ su wanua kụ nikědom MAWU e su manga i upung i kamene i Abraham, Ishak dingangu i Yakub.”