Read Sangir PANGANGONGGỌ U TORATẸ̌ KAPIA 31 Bible Online

PANGANGONGGỌ U TORATẸ̌ KAPIA 31 - Sangir bible

PANGANGONGGỌ U TORATẸ̌ KAPIA 31

¹I Musa e nẹ̌bera kapia su tau Israel,

² angkuěnge, ”Orasẹ̌ ini e umburẹ̌ku seng mahasụ duam pul᷊o su taunge ringangu iạ e seng tawe makaumal᷊ẹ̌ lai makoạ těmbonang i kamene. Sul᷊iung ene tangú MAWU e seng něhengetang u iạ e seng tawe wotonge lumiu Sal᷊ụ u Yordan.

³MAWU Ruatanu e hala sarung dumal᷊eng su těngonu kụ mapakawinasang kal᷊awọu wansa apang měmpẹ̌tẹ̌tanạ sene e, hakịu i kamene makapẹ̌tumanạ su ěntanang sire. I Yosua e sarung makoạ pangahạ i kamene, kerẹewe seng niweram MAWU e.

⁴ MAWU e sarung mapakawinasang manga wansa ene, kerẹewe i Sie němatạ Sihon dingangu Og, datung tau Amori, ringangu napakagholangu wanuan sire.

⁵MAWU e sarung měngonggọu watạ i kamene si sire, mase i kamene hinong miěbạ i sire tuhụewe kere takụ pinẹ̌bera si kamene.

⁶Pakatatoghasẹ̌ bue naung i kamene ringangu pakawawahani! Kumbahang matakụ i sire, watụ u MAWU Ruatanu hala e sarung mẹ̌tul᷊ung i kamene. I Sie tawe mapakanawong naung i kamene arau maněntang i kamene.”

⁷Bọu e i Musa nẹ̌kui si Yosua, ringangu su těngong kal᷊awọu umatu Israelẹ̌ e i sie něhengetang si sie, ”Pakatoghasẹ̌ bue naungu e ringangu pakawahani wue, i kau Yosua! U seng i kau sarung měmihing kawanua ini e mědeạu kumaiang su wanua nikědom MAWU su manga i upung i sire.

⁸ MAWU sẹ̌sane měngahạ dingangu mẹ̌tul᷊ung i kau e. I sie tawe sarung makakewạ arau měněntang i kau. Ual᷊ingu ene tangú kumbahang matakụ arau tumaghiawahẹ̌.”

⁹Mase i Musa namohẹ u Toratʼu MAWU Ruata ringangu něngonggọ su manga imang u Lewi kụ nioro piněngurusẹ̌ Petiʼm Pẹ̌dariandi, ringangu su manga pangahạ u tau Israel.

¹⁰ I sie nẹ̌parenta si sire, ”Su tempong pěngěnsueěngu apan taung kapitune, su ral᷊ungu taungu pangangipẹ̌ utang u sal᷊iwang u Selon Daukalu,

¹¹i kamene harusẹ̌ mẹ̌basang manga tita ini ringangu tingihe maihạ baugu taumatang Israel kụ duměnta maněmba MAWU Ruatanu su tampạ kụ pinilenʼE.

¹²Oroko kěbị apam manga esẹ, manga wawine, manga rariọ dingangu apan tau raghị su manga soanu apẹ̌tampung pẹ̌daringihẹ̌ bawasaěng ene, tadeạu i sire měngěndung měngadatẹ̌ MAWU Ruatanu ringangu satia rumaringihẹ̌ manga tita-Ne.

¹³Ual᷊ingu kakakoạ e ene manga anạu apang bědang tanakạdingihẹ̌ titam MAWU Ruatanu kụ makaringihẹ̌ ene ringangu měngěndung měngadatẹ̌ MAWU karěngụeweng i sire wiahẹ̌ su wanua kụ seng tawẹ lai kararěngụ e kaianeng i kamene su sěmběkan Sal᷊ụ u Yordan.”

¹⁴Bọu e MAWU něhengetang si Musa, ”Pẹ̌bawiahu e selain tawẹ kararěngụ e. Kụ pẹ̌kuiko si Yosua kụ bawako i sie sol᷊ong Tenta-Ku, tadeạu Iạ e makaonggọbeng manga sasal᷊ěntihọ si sie.” Tangú tamaị e i Musa ringangu i Yosua sol᷊ong Tentam MAWU,

¹⁵kụ MAWU e nẹ̌těngkatodẹ u watangengʼE si sire su ral᷊ungu rihi winawa maraning tukadu Tenta.

¹⁶Angkuěngu MAWU si Musa, ”Papatenu e seng masandigẹ̌. Mal᷊iung tatamainu e, tau Israelẹ̌ e sembengkewe saụ tawẹ satiane si Siạ, kụ sembeng mělandang kire nạung seng Takụ kinoạ baugʼi sire. I sire sarung mamalang Iạ kụ měmpaněmba manga mahan duata kụ nisěmba su wanua kụ seng tạ kararěngụ e lai sarung suěkang i sire.

¹⁷Kereu ene mariadi, ral᷊angehẹ̌-Ku e sarung matompẹ si sire. I sire Takụ sarung itěntang dingangu Takụ ipakawinasa. Mal᷊awọ hombang gaghaghuwạ sarung mihombang si sire, kụ i sire sarung makaěnna u kěbị ene e mariadi kawe ual᷊ingu Iạ, kawe Ruatan sire, kụ semben tawe lai maněntanudẹ̌ si sire.

¹⁸Su tempo ene Iạ e tawe mapulu mẹ̌tul᷊ung i sire, watụ u i sire kawe seng naněmba manga mahan duata ringangu němpẹ̌koạ dal᷊akị.

¹⁹Orasẹ̌ ini e tangú pěmohẹko kakantarị ini ringangu těntiroko su tau Israel kere sasahidi si sire.

²⁰I sire sarung Takụ iwawa sol᷊ong banua marotong dingangu matawa, kere Takụ nikědo su manga i upung i sire. Sene tangú i sire sarung mẹ̌biahẹ̌ mal᷊uasẹ̌ dingangu makahombangbe haghing kaěng apang gausang i sire. Kaiso wọu ene i sire kawe sarung mẹ̌sul᷊e ringangu měmpaněmba manga mahan duata. I sire sarung měnuhudu Iạ dingangu mělanda kědo-Ku,

²¹ringangu lawọ hombang gaghaghuwạ sarung mihombang si sire. Kaiso kakantarị ini e sarung těbe kẹ̌kantarikang dingangu pẹ̌paketang kere sasahidi si sire. Pundangu orasẹ̌ ini kal᷊amonang i sire Takụ iwawa sol᷊ong banua Takụ nikědo, Iạ e masingkạ u raral᷊engu tiněnnan sire.”

²²Su ěllo ene lai i Musa mal᷊aing němohẹ u kakantarị ene, wọu ene nitěntirone su tau Israel.

²³ Bọu e MAWU e něhengetang si Yosua, anạ i Nun, angkuěngʼE, ”Pakatoghasẹ̌ bue naungu ringangu pakawahani wue i kau Yosua! I kau e sarung měngahạ tau Israel sumuẹ̌ su wanua Takụ nikědo si sire, kụ Iạ e sarungbe mẹ̌tul᷊ung i sire.”

²⁴Mase i Musa němohẹ e titan Duata su ral᷊ungu bukẹ̌ sěmbaụ. I sie němohẹ̌ pinakaunsui wọu tětạ e sarang pěngěnsueěnge.

²⁵Ene nasuẹ e, i sie nẹ̌berạ e su manga imang u Lewi e apang nioro piněngurusẹ̌ Petiʼm Pẹ̌dariandi.

²⁶”Al᷊ạ e bukẹ̌ u Toratu Mawu ini e, pěllọko su sěmběkang Peti Pẹ̌dariandiʼm MAWU Ruatanu e, tadeạu těbewe ene sene kere sahidi su wansa ene.

²⁷Iạ masingkạ u i sire kai taumata těmbọ i sire makakětị dingangu puluang měnggohaeng. Těntal᷊ang iạ e reng biahẹ̌ i sire mal᷊aing měmpẹ̌gěnggohaeng su těngoʼm MAWU; dumakelengke lai tempo ramahi samuring papateku!

²⁸Kụ pěngoroko kal᷊awọu těmbonangu kawanua ringangu manga pěrwira pětampung su těngoku, tadeạu iạ makapěhabaru patikụ ini si sire. Langị dingangu dunia takụ kuiang makoạ sahidi si sire.

²⁹Iạ masingkạ u samuring iạ e mate, i sire ene sarung makoạ dal᷊akị dingangu tawe měnarimạ u apan sen takụ nitěntiro si sire. Dingangu i sire sarung kahombangengu silakạ, ual᷊ingu kai nakal᷊angehẹ̌ MAWU ual᷊ingu pẹ̌kakoạ apa nạung isẹ̌sědingʼE.”

³⁰Bọu ene i Musa e nẹ̌kantarịeng kakantarị ini e sarang nasue těntal᷊angbe kal᷊awọu taumatang Israelẹ̌ e měmpẹ̌dẹ̌daringihẹ̌.