Read Sangir PANGANGONGGỌ U TORATẸ̌ KAPIA 32 Bible Online

PANGANGONGGỌ U TORATẸ̌ KAPIA 32 - Sangir bible

PANGANGONGGỌ U TORATẸ̌ KAPIA 32

¹”Pẹ̌daringihẹ̌ko ei langị! Iạ e kai mapulu měhengetang; ei runia, pẹ̌taingko tul᷊i!

²Mal᷊owọko těntiroku e dumasehẹ̌ kere tahiti, ringangu apam baweraku e měmpẹ̌tědọ kere namuhẹ̌, mẹ̌sul᷊ungu tahiti tahebọe su wowon děmpugẹ̌; dingangu tahiti mahěbung su wowom manga sasuang.

³Iạ e sarung mẹ̌dalo arengu MAWU. Pẹ̌dal᷊ahabarẹ̌kong kasěllahu Ruatang kitẹ!

⁴MAWU e Tumatatawang si kamene matoghasẹ̌, munara-Ne e masukụ, dingangu patikụ daral᷊engʼE adilẹ̌. Ruatanu e satia, tawẹ apa pěndal᷊inga si Sie, i Sie mẹ̌kẹ̌koạ apam mapia ringangu kahěngang.

⁵Arawe i kamene ute kai wansa tạ satiane, ringangu sen tawe hinone relaing makoạ umatʼE, bansa napenẹ u pělal᷊inga ringangu rosa.

⁶Kai kerene pěmamal᷊isʼi kamene su kapiang MAWU, ei taumata wodo ringangu tawẹ tahuěnnane? Kai wal᷊inewe i Amangu tangú i Sie, Něndiadi si kau, arau napakariading kamene bansa sěmbaụ tangu?

⁷Pẹ̌tahěndungko nạung tempo kal᷊imona, tatingangko tempong pěmamunara nạung. Pakiwal᷊ọ e su manga ghaghurang i kamene tadeạu i sire měhabarẹ̌ si kamene.

⁸ Piạ e nạung Karangetange němahiạ u ěntana, apam bansa e nitilakehangu wanuane piạ duatane mang sěmbaụ nakoạ kere měngangawasane.

⁹Arawe hěnton Yakub ini e nipilem MAWU waugu watangengʼE hala.

¹⁰I Sie nakaěbạ si sire kạpẹ̌papalilị e su tampạ marěmasẹ̌ su wanua l᷊inggi. Mase i Sie maněntanudẹ̌ dingangu měpẹ̌padul᷊i si sire ringangu mělẹ̌lukadẹ̌ si sire kere tataghuanenge.

¹¹Kere manụ kalěmba mạmihing anạ e tuměllạ singkateng su papanide mạbawingkahẹ̌ dingangu tingkul᷊uang su wowom papanide,

¹²kerene MAWU sẹ̌sane němihing umatʼE, kụ tawẹ apa ruata raghị naněntanudẹ̌ si sie.

¹³I Sie napakariadin sire nẹ̌kawasa manga wul᷊ude; němpẹ̌kaěng gẹ̌sing dahamin sire ringangu němpěnginung mahang madu wọu wongkom batu. I sire makạěbạ lana wọu kalun zaitun kụ timuwo su ěntana mawatu.

¹⁴Sapi ringangu kambing domban sire makaual᷊i susu mal᷊awọ; binatang i sire lahikinang karal᷊ěnggihange; gandung dingangu akẹ u anggorʼi sire mal᷊ahuwusẹ̌.

¹⁵Umatu MAWU e něngkakalạ katewe kawe papuluang měnggohaeng, badang i sire maral᷊ikěpụ, měngkal᷊aedẹ̌. Mase i sire němpěněntangbeng Mawu, Měndariadine kụ tawe rumaẹ Měngangambange kereng katoghase.

¹⁶I sire měmpạněmba mahan duata, hakịu MAWU e simingking libutu-Ne timompẹ ual᷊ingu karal᷊akisẹ̌ ene.

¹⁷ I sire měgẹ̌gěllịu sasěmba su manga rohkẹ̌ dal᷊akisẹ̌ bal᷊inewe Ruata, su manga ruata kụ tawe nịkẹ̌kakiral᷊an sire, manga e mahan duata wuhu kụ tawe ikẹ̌katakụ u i upung i sire.

¹⁸I sire seng ale-ale su Měnanal᷊amatʼi sire matoghasẹ̌ e, kụ mẹ̌timbul᷊eng Duatan sire kụ mangonggọ u pẹ̌bawiahẹ̌ e.

¹⁹Mẹ̌panda hal᷊ẹ̌ ene tangú MAWU e napatiral᷊ang limangehẹ̌ kụ něnuhudu manga anạʼE.

²⁰AngkuěngʼE, ’Iạ seng madiri mẹ̌tul᷊ung i sire kapia; maning Takụ pandaěng kereapa samurine i sire. U wansa ene kai matul᷊ikětị dingangu mamben tawẹ satiane.

²¹ I sire makạbodaị si Siạ sụsingking su wal᷊ine Ruata, ringangu lumangehẹ̌ su tul᷊adam mahan duatan sire. Tangú manga umatẹ̌-Ku e Takụ iapasingkingu wal᷊ine bansa arau apạtakehu wansa kụ apang longong.

²²Dal᷊angehẹ̌-Ku e sarung mẹ̌daraẹ kere putung kụ manutung sol᷊ong dunian tau nate. Putung ene sarung manutung banua ringangu kal᷊awọu ghẹ̌sine ringangu wawul᷊urange sarangkewe manga hamụ e.

²³Sarung tawẹ pontode Takụ iaparěntang hombang masasaria, Takụ pitikangu kal᷊awọu horom papitị-Ku e i sire.

²⁴I sire sarung měngkapate ual᷊ingu lěhabẹ̌ dingangu kẹ̌kal᷊unusang, dingangu kahian sakị makạtatakụ. Takụ iwala i sire pakitěmboi su binatang dul᷊u, ringangu pakitemọ su těmpu maghaghiadẹ̌.

²⁵Pẹ̌sasekẹ makạbawa sol᷊om papate suapan dal᷊eng; hombang makạtatakụ lụhombang su taumata su wal᷊e. Umbaseng dingangu mahuala kal᷊ahětune sarung ipakawinasa, kerene lai manga rariọ bědang sụsusu ringangkeweng maghaghurang.

²⁶Iạ mapulu mapakaupun sire marasai, tadeạu i sire semben tawe sarang katahěndungang.

²⁷Kaiso Iạ e mạdiri kụ sědụu Israelẹ̌ e relain lumesạ; kiwuạu i sire kawe mẹ̌sal᷊a ěnna ringangu mẹ̌bera u i sire měmatạ umatẹ̌-Ku,’ sumbal᷊iau kawe Iạ e nẹ̌koạ ene.

²⁸Israelẹ̌ e kai sěmbaụ bansa tawẹ sipirange; katatahuěnna e kawe tạ apa si sire.

²⁹Kai mangawe i sire pelesa, ute i sire sarumbe makaěnna, ringangu mẹ̌sipiru pẹ̌bawiahʼi sire su ěllo samuri.

³⁰Kereapa sěngkatau makasahusu sěhiwu su kataune, kụ duang katau makakatal᷊angu mapul᷊o hiwu su kataune? MAWU, Ruatan sire, seng nẹ̌bal᷊ụ i sire; i sire sen nitěntang u Ruatan sire matoghasẹ̌ tạ sihinge.

³¹Sekẹ u tau Israel masingkạ u měngangěllung si sire e wal᷊inewe kere Ruata měngangěllung Israelẹ̌.

³²Batụu i sire kai ral᷊akisẹ̌ kere Sodom dingangu Gomora, mẹ̌sul᷊ungu kalung anggorẹ̌ mapaị ringangu makạkilu wuane.

³³Akẹ u anggorʼi sire e kai lailun těmpu maghaghiadẹ̌.

³⁴MAWU e mẹ̌tẹ̌tahěndung kakanoạ u sědụ u umatʼE kụ sarung měhukung i sire su tempone.

³⁵ MAWU e sarung měmal᷊isẹ̌ dingangu měhukung i sire, kụ seng tạ kararěngụ e lai i sire měngkanawo mawinasa; tempong kananawon sire e seng masandigẹ̌.

³⁶ MAWU e sarung mapakasal᷊amatu umatʼE kụ kuměndagu manga ěllangʼE, kereu i Sie makasilo si sire tamakakoạ apa-apa kụ kinasueěngu toghasẹ̌.

³⁷Tangú MAWU e sarung makiwal᷊o su manga umatʼE, ’Suapa mahan duata matatoghasẹ̌ pạngumbalaěng i kamene?’

³⁸I sire němpẹ̌kinạ tawang binatang nisěmbaěng kamene, kụ němpanginung akẹ u anggorẹ̌ nisěmbang kamene. Dolohẹ̌ko i sire parěnta pẹ̌tul᷊ung i kamene, kụ balạ e kere i sire kakoạ pẹ̌kakěllungang i kamene.

³⁹Kakěllako, Iạ e kai Ruata Mang Sembaụ, tawẹ Duata sul᷊iung Iạ. Iạ mạmate, ringangu mẹ̌miahẹ̌, mělesẹ dingangu mạpakapia. Mạengu Iạ mẹ̌karadiahang tangú tawẹ u sarang sěngkatau makarokạ.

⁴⁰Baugu Iạ sẹ̌saku, Ruata wiahẹ̌, Takụ hengketang takiahẹ̌-Ku, bọu e mẹ̌salu:

⁴¹Iạ e sarung měngasa peda-Ku kụ kụkerong, mase měndal᷊engu hukumang. Takụ bal᷊isang kal᷊awọu sědụ-Ku e kụ Takụ ihukung kal᷊awọu i sai-saim měmpẹ̌bẹ̌binsị u Iạ e.

⁴²Manga horom papitị-Ku sarung mělapusu dahan sire; kal᷊awọu apam měmpẹ̌děndokạ si Siạ e Takụ pilikang u peda-Ku. Tawe Takụ ipakawala walạewe měnsang i sai rumokạ si Siạ e; taumatan tahungkụ dingangu apan něngkal᷊esẹ hinol᷊aing mate.

⁴³ Ei manga wansa, pẹ̌daloko umatʼu MAWU, batụu MAWU e něhukungu patikụ taumata apang němpěmate si sire. I Sie sarung měmal᷊isẹ̌ une su sědụʼE, kaiso mangampung dosang manga umatʼE.”

⁴⁴I Musa ringangu i Yosua anạ i Nun mẹ̌kantarị u kakantarị ene, hakịu kakěpal᷊u taumatang Israelẹ̌ e makạdingihẹ̌.

⁴⁵Nasuẹeng těntirone kal᷊awọewen těntirom MAWU e su tau Israel,

⁴⁶i Musa e nẹ̌bera, ”Tatingangko patikụ tita takụ nionggọ si kamene su sěhěllo ini. Těntiroko su manga anạ i kamene, tadeạu i sire satia měndal᷊engu patikụ titam MAWU.

⁴⁷Těntiro ene wal᷊inewe manga wawera tạ l᷊ohone, kaiso kawe pẹ̌bawiahu. Daringihe wue patikụ tita ene, tadeạu manandụ umburʼi kamene su wanua kụ seng tạ kararěnnane lai sarung kaianeng i kamene pai su sěmběkang Sal᷊ụ u Yordan.”

⁴⁸ Ěllo ini lai MAWU e něhengetang si Musa,

⁴⁹”Kakoạko sol᷊ong Bul᷊udu Abarim su wanuang Moab su sěmběkan soang Yerikho. Bọu e sakako e sol᷊ong Bul᷊udu Nebo, kụ kakěllako ěntanang Kanaan kụ seng tạ kararěnane lai Takụ isarakang su tau Israel.

⁵⁰I kau e sarung masue singongonu su wowom bul᷊ude ene, mẹ̌sul᷊ungu i Harun anạ u sěmbaụ u e nairị su Wul᷊udu Hor.

⁵¹I rua e tawẹ satian dua si Siạ e dingangu tawe nengadatẹ̌ si Siạ su těngon tau Israel, piạ i kamene wědang su simbul᷊u akẹ u Meriba, su rěduhu soang Kades, su wanua L᷊ingging Zin.

⁵²Ual᷊ingu ene i kau e tawe wotonge makakasuẹ̌ su wanua kụ Takụ nighěllị su tau Israel; i kau e tumbạeng botonge měmanda wọu maraune.”