Read Sangir PANGANGONGGỌ U TORATẸ̌ KAPIA 33 Bible Online

PANGANGONGGỌ U TORATẸ̌ KAPIA 33 - Sangir bible

PANGANGONGGỌ U TORATẸ̌ KAPIA 33

¹Dem bědang biahẹ̌, i Musa e rarolohang u Mawu, něngal᷊amatẹ̌ tau Israel dingangu wawerane ini:

²”MAWU e narěnta wọu Wul᷊udu Sinai; i Sie siměpụ bọu wowong Edom mẹ̌sul᷊ungu matangěllo kụ bọu Wul᷊udu Paran i Sie mạnualagẹ̌ manga umatʼE. I Sie rẹ̌děndinganengu malạekatẹ̌ mapul᷊o hiwu su kataune; putunge rụděllị su sěmbẹ̌kane koaneng.

³Těngadẹ̌, MAWU e kụkěndagu wansa-Ne,[26] i Sie mạněntanudẹ̌ kěbị taumata kụ nakoạ tataghuanengʼE. Bọete i kitẹ mẹ̌tumpěkuhẹ̌ su těngon laedʼE kụ dumaringihẹ̌ kal᷊awọu titanʼE.

⁴Tita nionggọ i Musa e tuhukang i kitẹ, tataghuaneng kaarẹ̌gaěngu wansa ini.

⁵Piạ e tau Israel nẹ̌tampung dingangu manga pangahạ e, MAWU e nakoạ Datu waugu umatʼE.”

⁶Baugu hěnton Ruben, i Musa e nẹ̌bera, ”Mal᷊owọko hěnton Ruben den tawe masilakạ, manịeng taumatane tumbạeng mahal᷊i.”

⁷Baugu hěnton Yehuda e i sie nẹ̌bera: ”MAWU raringihẹ̌ko gaghahiorọ u Yehuda; pakasěmbaụko kapia i sire ringangu wansane. Pěmpẹ̌sekẹko waugʼi sire, o MAWU, tul᷊ungko i sire waugu rokạ.”[27]

⁸ Baugu hěnton Lewi e i sie nẹ̌bera u: ”Ringangu Urim dingangu Tumim[28] i Kau e pělahẹ u kakěndagʼU lumiun tau Lewi, ěllangʼU satia e. I Kau e seng němanikạ si sire su Masa, kụ nẹ̌darendehẹ̌ dingang i sire su simbul᷊u akẹ u Meriba.

⁹I sire e satia si Kamene němal᷊iu patikụ, němal᷊iu taumata maghurang dingangu manga anạ u sěmbaụ. Manga tita-Nu e nituhukang i sire, ringangu pẹ̌kakědonʼU e nipakasěhụ i sire.

¹⁰I sire mạněntiro manga umatʼU e rumaringihẹ̌ kal᷊awọu tita-Nu e, ringangu měnarakangu sasěmba su wowom pananěmbaěngu e.

¹¹MAWU tul᷊ungko umatẹ̌ ini e, tadeạu matoghasẹ̌, mal᷊owọko i Kau e mẹ̌tatal᷊ahino su munaran sire. Apakawihuako kal᷊awọu sekẹ i sire, sarang tawe saụ makapẹ̌pětị.”

¹²Mạanung hal᷊ẹ̌ u hěntom Benyamin tangú i sie nẹ̌bera u: ”Seng ini e hěnto ikẹ̌kěndagu MAWU. Iạ e mạněntanudẹ̌ si sire ěllo ringangu hěbi ringangu mạtanạ sutal᷊oaran sire.”[29]

¹³Mạanụeweng hěnton Yusup i sie nẹ̌bera u: ”Mal᷊owọko ěntanan sire al᷊amatengu MAWU kụ onggol᷊angu tahiti, ringangu akẹ bọu ral᷊ungu ěntana.

¹⁴Mal᷊owọko apạeweng musungu pẹ̌bawuang kalu e, kụ dembeng ipẹ̌dal᷊embo manga wuane mapapia kụ masasạ su kalune.

¹⁵Mal᷊owọko manga wěntihe ren dokeng bọu tětạ-tětạ e reng mạpenẹu ghěsing ěntana mapapia e.

¹⁶Mal᷊owọko ěntanane iapẹ̌dal᷊embong patikụ apang kapapiaěnge, kụ lẹ̌al᷊amateng u kapiang MAWU kụ nạung něhengetang bọu ral᷊ungu manga gahundunge piạ děllị e. Mal᷊owọko al᷊amatẹ̌ ene matěntung su hiwang pal᷊ahěnton Yusup, batụu kai seng i sie e těmbonange sutal᷊oaran manga anạ u sěmbaụ e.

¹⁷I Yusup piạ katoghase kere toghasu banteng sěmbaụ, dingangu sungen sapi kěhu esẹ kụ i Manasye ringangu hiwune ore lai Efraim kụ pul᷊one hiwune. Manga wansa e sẹ̌sungeěnge ringangu sẹ̌sahẹ̌sekange sol᷊ong pondol᷊u dunia.”

¹⁸Mạanum manga hěnton Zebulon dingangu Isakarẹ̌ e i sie nẹ̌bera u: ”Mal᷊owọko i Zebulon mahuweka wue ual᷊ingu raral᷊enge, ringangu Isakarẹ̌ e matul᷊ende wue su manga pẹ̌darasengange.

¹⁹I sire němpěhaěng u manga wansa e sol᷊ong bul᷊udʼi sire ringangu němpẹ̌gěllịu sasěmba kahěngang paị sene. I sire nakahombang kakakalạ bọu l᷊audẹ̌, dingangu wọu ene kanandụeweng apeng.”

²⁰Mạanung hěntong Gad i sie nẹ̌bera u: ”Karaloko Ruata e kụ napakawěnahu wanuang Gad. I Gad mạngampal᷊ẹ̌ kere binatang singa sembaụ kụ měnggaghonai takiahẹ̌ dingangu pisin těmbọ.

²¹Ěntana kapaelange al᷊akeng baugu watangenge, kụ bahageangu těmbonange nisarakang si sire. I sire němpẹ̌koạ kal᷊awọu parenta ringangu titam MAWU piạ manga těmbonangu Israelẹ̌ e nẹ̌komol᷊ẹ̌ sěngkapẹ̌komol᷊ẹ̌.”[30]

²²Mạanung hěnton Dan i sie nẹ̌bera u: ”Mẹ̌sul᷊ungkewelain singa kawuhuang sěmbaụ kụ liminsọ sol᷊ong likude wọu Basan.”

²³Mạanụeweng hěnton Naftali, i sie nẹ̌bera u: ”Naftali e niapẹ̌dal᷊embong al᷊amatẹ̌ dingangu kakěndagu MAWU; wanuane e wọu Ranong Galilea sol᷊ong sěmběkan timuhẹ̌.”

²⁴Mạanung hěnton Asyer i sie nẹ̌bera u: ”I Asyer nial᷊amateng nipangělembo wọu manga wansa wal᷊ine; mal᷊owọko i sie makoạ i amang polọ u manga anạ u sěmbaụ e, ringangu kalun zaitun timuwo mapia su ěntanane.

²⁵Mal᷊owọko manga soane ipakal᷊indung u manga tukadu pasěllangeng bọu tambaga ringangu uase tadeạu pẹ̌bawiahe hanesẹ̌ mal᷊ěmpị dingangu mal᷊enehẹ̌.”

²⁶”Ei Israel! Tawẹ apa ruata kere Ruatanu e; i Sie limiu langị tạ konsange apa ringangu nẹ̌tahatausu winawa, waugu měngambang si kamene.

²⁷Duata e sarang marěngụ makoạ pẹ̌kakěllungangu takiahe kakalẹ̌ e mạnuilẹ̌ si kamene. I Sie měnokol᷊u sědụ wọu těngonu, ringangu měngoro si kamene apěminasa si sire e.

²⁸Tangú hěnton Yakub sarung mẹ̌biahẹ̌ mal᷊enehẹ̌ su wanua nẹ̌dal᷊embong gandung dingangu akẹ u anggore, ringangu nihuaketangu namuhẹ̌ bọu l᷊angị.

²⁹Kariangkamang i kau e, ei Israel! Tawẹ apa wansa kụ kere i kau e niapakasal᷊amatʼu MAWU. MAWU e mẹ̌sul᷊ungu peda dingangu kěllung baugu e; baugu mẹ̌tahutěndạ i kau ringangu mẹ̌gěllịu watạ si kamene. Manga sekẹ i kamene e sarung duměnta makikasiang kụ i kau e sarung měnahida si sire.”[31]