Read Sangir PANGANGONGGỌ U TORATẸ̌ KAPIA 34 Bible Online

PANGANGONGGỌ U TORATẸ̌ KAPIA 34 - Sangir bible

PANGANGONGGỌ U TORATẸ̌ KAPIA 34

¹Mase i Musa naněntangkem bal᷊ang Moab kụ simaka Wul᷊udu Nebo, sol᷊ong pusigu Pisga su sěmběkan daki wọu Yerikho. Kụ sene MAWU e naněbọ si sie kạguwạu wanua ene, tangú: Wanuang Gilead sol᷊ong sawěnahẹ̌ nịdatingu soan Dan karaune;

²kasěllahu wanuang Naftali; wanuang Efraim dingangu i Manasye, wanuang Yehuda sol᷊ong sěmběkam bahẹ, karaune sol᷊ong Laudu Tal᷊oarane;

³sěmběkan timuhẹ̌ bọu Yehuda ringangu wal᷊ane kụ nawatedẹ̌ bọu Zoar sol᷊ong Yerikho, soa kụ napenẹ u kalung korma.

⁴ Mase MAWU něhengetang si Musa, ”Seng ene e wanua Takụ pinẹ̌kědo si Abraham, Ishak, dingangi Yakub mědeạu isarakang su manga hiten sire. Iạ e mapatodẹ u ene si kau, i Musa! kaiso tawe mapakawalang kau e makoạ sol᷊ong pai ene.”

⁵Mase i Musa naminsul᷊e singongone, i Musa e ěllangu MAWU su ěntanang Moab, kerẹewe seng piněhengetangu MAWU kal᷊amona.

⁶MAWU e nělěbing i sie su wal᷊ane sěmbaụ su Moab su sěmběkan soam Bet-Peor kai sarang ěllo ini e tawẹu sarang sěngkatau masingkạ mapia-pia suapa pěndal᷊ẹ̌bingange.

⁷I Musa e nairị umbure mahasụ duam pul᷊o su taunge. Katoghase tawe kimoho ringangu matane bědangbe matualagẹ̌.

⁸Su wal᷊ang Moab tau Israel simangị i Musa ringangu nělutu ghěnangu těllum pul᷊o su ěllone.

⁹MAWU e napẹ̌dal᷊embong Yosua anạ i Nun dingangu kapelesa, ual᷊ingu i sie sen nitěbọ i Musa nakoạ pěngaweng si sie. Tau Israelẹ̌ e mararingihẹ̌ si Yosua ringangu makěhagẹ̌ měndal᷊engu kal᷊awọu tita nionggọu MAWU e si sire wọʼi Musa.

¹⁰ Su Israelẹ̌ e selain tawẹ apa nabi kere i Musa kụ mẹ̌bẹ̌bisara mẹ̌tẹ̌těngong gati ringangu MAWU.

¹¹Tawẹ apa kụ mẹ̌kẹ̌koạ manga tanda makạdal᷊inaụ dingangu makạl᷊aherang kere nạung kẹ̌koateng i Musa e waugu wanuang Misirẹ̌ e, ratune ringangu kal᷊awọu manga mapapangkatẹ̌ naẹ lintuhe, natuhụewe kere su laorom MAWU.

¹²Tawẹu nẹ̌kẹ̌koạ munara makạl᷊ahěngking ore lai makạtatakụ kere nạung kinoạ i Musa e su těngong kal᷊awọu umatu Israel.