Read Sangir PANGANGONGGỌ U TORATẸ̌ KAPIA 4 Bible Online

PANGANGONGGỌ U TORATẸ̌ KAPIA 4 - Sangir bible

PANGANGONGGỌ U TORATẸ̌ KAPIA 4

¹Mase i Musa e nẹ̌bera su wansa ene, ”Tuhukeko kěbị toratẹ̌ kụ takụ nitěntiro si kamene e, tadeạu i kamene wotonge mẹ̌biahẹ̌ sarang mẹ̌tanạ su ěntana kụ sarung i onggọu MAWU, Ruatang i upunge si kamene.

² Apang kụ takụ nioro e, kumbahangbe tambaěng arau ghaingang sarang kadodọ. Daringihe wue manga titang MAWU Ruatanu e kụ takụ nionggọ si kamene.

³ I kamene e nakasilo hala apang kụ nikoạ u MAWU Ruatanu e su Wul᷊udu Peor. Apan taumata kụ měněmba Baal su tampạ ene e ipakawinasa-Ne,

⁴arawe i kamene kụ tatapẹ̌be satia su MAWU Ruatanu e wědangbe wiahẹ̌ sarang orasẹ̌ ini.

⁵Kěbị toratẹ̌ ene e takụ nitěntiro si kamene kere nạung seng nioroʼm MAWU Ruataku. Tuhukeko kěbị ene e su wanua kụ sarung suěkang i kamene ringangu pẹ̌tanakeng i kamene e.

⁶Koạko ene e ringangu kasasatia. Kereu i kamene e mẹ̌koạ kerene, tangú kapelesanu e mal᷊ahẹ baugu manga wansa wal᷊ine e. Kereu i sire makaringihẹ̌ kakakoạu manga toratẹ̌ ene, i sire e měmpẹ̌berau, ’Kai apạe kapelesa ringangu katahuěnna wansa kụ masěllahẹ̌ ene e!’

⁷Bansa ghẹ̌guwạ sude kụ piạ duatane kereng karěduhe kereu ghausang kere MAWU Ruatang kitẹ kụ maraning kitẹ e tangu? I Sie simimbangu su tempo sude i kitẹ e kụkahiorọ u makịtul᷊ung si Sie.

⁸Dingangu wansa ghẹ̌guwạ sude kụ mạnaghuang manga toratẹ̌ kụ kereng kạadile mẹ̌sul᷊ungu manga toratẹ̌ kụ takụ nitěntiro si kamene sěhěllo ini?

⁹Naungeko ringangu tahěndungeko pakapia-pia, tadeạu kananduʼm biahu e i kamene tawe miwul᷊eng apang kụ seng nisahidiang i kamene hala e. Pẹ̌běkeko su manga anạ pulung i kamene e

¹⁰mạanung ěllo ene, piạ i kamene rụdarisị su těngong MAWU Ruatanu e su Wul᷊udu Sinai. Su tempo ene i Sie nẹ̌bera si siạ, ’Tampungko wansa ene. Iạ e mapulu i sire rumaringihẹ̌ apang kụ Takụ ihabarẹ̌, tadeạu i sire e měngěndung mararingihẹ̌ si Siạ kanandung biahẹ̌, dingangu tadeạu i sire e měněntiro manga anạ i sire e kụ dumaringihẹ̌ si Siạ e.’

¹¹ Pẹ̌běkeko su manga anạu kereapa i kamene riměnta ringangu rimarisị su pentọ u wul᷊ude kụ nihěmbungangu tipu nẹ̌kětung kere winawa masuwenehẹ̌ dingangu putunge riměllị sarang langị.

¹²Bọu ene MAWU e nẹ̌bisara si kamene wọu putung kụ i kamene nakaringihẹ̌ tingihʼE, kaiso tawe nakasilo si Sie, ringangu kakakoạ e kereapa.

¹³ Paị sene i Sie němohang si kamene apang kụ hinong koateng i kamene e waugu mapakasěhụu kědo kụ seng kinoạʼE ringang i kamene. Tita Mapul᷊o kụ seng niwohẹʼE su watu pamamohekang darua ene harusẹ̌be koạ i kamene.

¹⁴ MAWU e něngoro si siạ apẹ̌něntiro si kamene kal᷊awọu tita kụ hinon tuhukang su wanua kụ sarung suěkang dingangu pẹ̌tanakeng i kamene ene.”

¹⁵”Tahěndungeko pakapia-pia! Piạ e MAWU nẹ̌bisarang kamene wọu ral᷊ungu putung su Wul᷊udu Sinai, i kamene e tawe nakasilo manga apa.

¹⁶ Kụ diagateko tadeạu i kamene kumbahang sarang mẹ̌baradosa ual᷊ingu mẹ̌koạ baugu watangengu e tul᷊ada mědeạu sěmbaěng su ral᷊ungu kakakoạ e měnsang kereapa, esẹ arau wawine,

¹⁷ manụ u winalangeng arau kinạ, arau binatang lụhomang arau binatang kewe wal᷊ine.

¹⁸

¹⁹Kumbahang mẹ̌baradosa ual᷊ingu maněmba ringangu mẹ̌tahamawu su mangạe apa kụ ikasilong kamene su l᷊angị: matangěllo, wul᷊ang dingangu manga wituing. MAWU Ruatanu e napakawalang manga wansa wal᷊ine e němpěněmba kal᷊awọu sabarang tamai ene.

²⁰ Arawe i kamene ute kai wansa kụ niambangengʼE wọu Misirẹ̌ tampạ i kamene nẹ̌tatahangu sigěsạ marasai. I kamene niapasěbangʼE wọu wanua ene, tadeạu makoạ taumatan-Ne hala kerẹewe kakakoạ u e orasẹ̌ ini.

²¹ Arawe MAWU Ruatanu e nẹ̌pědu si siạ ual᷊ingu i kamene ringangu i Sie nẹ̌salu u iạ e sarung tawe lumiu Sal᷊ụ u Yordan baugu sumuẹ̌ su ěntana kụ mahuntawa e kụ sarung ionggọʼE si kamene.

²²Tawẹ kararěngụ e lai i kamene sarung lumiu ringangu makapẹ̌tanạ su ěntana kụ matawa ene e; arawe iạ e tawe timol᷊e, watụ u iạ kai sarung mate sini.

²³Pẹ̌tahěndungko pakapia-pia! Abe kiwul᷊eng pẹ̌dariandi kinoạ u MAWU Ruatanu e si kamene. Tuhukeko tita-Ne; kumbahang-bahangbe měkoạ tul᷊ada waugu watangengu waẹbe kakakoạ e kereapa mědeạu sěmbaěngu,

²⁴ u MAWU Ruatanu e mẹ̌sul᷊ungu putung kụ makahěngisẹ̌. Iạ e mạdiri isul᷊ung su manga apa.

²⁵Kerene lai kereu i kamene kawe sarung lai marěngụ mẹ̌tanạ sene e ringangu seng měhanạ mẹ̌pulung, kumbahang mẹ̌dosa ual᷊ingu pẹ̌kakoạ tul᷊ada waugu watangengu e waẹbe kakakoạ e kereapa. Kakanoạ ene e kai sěmbaụ karal᷊akisẹ̌ su těngom MAWU Ruatanu kụ sarung makapẹ̌pẹ̌dụ si Sie.

²⁶Karimạko langị dingangu dunia e ěllo ini makoạ sahidi u kereu i kamene tawe tumuhụ si siạ e, i kamene tawẹ kararěnane matạdise wọu wanua katatanakeng i kamene su sěmběkan Sal᷊ụ u Yordan ene. I kamene e tawe sarung mararěna matanạ sene; i kamene e sarung binasaěng marihutu.

²⁷ MAWU sarung mapẹ̌tal᷊eing kamene sutal᷊oarang manga wansa wal᷊ine ringangu kětạeng mahal᷊i wọu tal᷊oarang kamene e kạtatanạ biahẹ̌.

²⁸Sene i kamene e sarung mẹ̌tahamawu manga ruata kụ kinoạ i kamene ringangu l᷊iman taumata, manga ruata wọu kalu ringangu watu kụ tawe makasasilo arau tawe makararingihẹ̌, tawe makakakaěng arau tawe makal᷊aimbu.

²⁹ Mase i kamene sarung mědeạ MAWU Ruatanu, kụ kereu i kamene e mědeạ si Sie ringangu kasariang naungu e, i kamene sarung makareạ si Sie.

³⁰Kereu i kamene kahinoěngu kěbị hombang ene kụ i kamene ene su ral᷊ungu kasasěsẹ, tangú i kamene e sarung mẹ̌sul᷊e su anung MAWU Ruatang kamene ringangu mararingihẹ̌ si Sie.

³¹MAWU Ruatanu e kai apạe makěndagẹ̌. I Sie tawe sarung maněntang arau mapakawinasang kamene e, arau mapakawul᷊eng pẹ̌dariandi kụ seng kinoạʼE hala ringangu manga i upung i kamene.

³²Sẹ̌suieko tempo nal᷊iu, pai marau kal᷊imonang kararěntang kamene su dunia, nakětạ bọu ěllo nạung Duata e něndiadi taumata su dunia ini. Deakeko su kasěllahu wowon dunia ini e. Bọu nariadi ngae hal᷊ẹ̌ masěllahẹ̌ kere ini kal᷊imonang ene? Bọu nariadi ngae taumata kụ nakaringihẹ̌ mạanung hal᷊ẹ̌ nariadi kụ kere ini?

³³Bọu nạung piạ bansa kụ těbe wiahẹ̌ sarětạeng nakaringihẹ̌ duata sěmbaụ kụ mẹ̌bẹ̌bisaran sire wọu putung, kere nạung seng kinahombangeng i kamene?

³⁴Piạ nạung duata sěmbaụ kụ bahani měngal᷊ạ bansa sěmbaụ bọu tal᷊oarang manga wansa kụ ene mase mapakariading sire umate hala e, kere nạung seng kinoạ u MAWU Ruatanu e si kamene su Misirẹ̌ tangu? I kamene seng nakasilo hala kereapa Ruata ringangu katoghase masaria e naparěntan silakạ dingangu pẹ̌sasekẹ, mẹ̌koạ manga karal᷊inaụ dingangu mẹ̌koạ hal᷊ẹ̌ masasaria e.

³⁵ Kěbị ene e nilahẹu MAWU si kamene mědeạu mapakal᷊ahẹ u tumbạeng MAWU Ruata, kụ tawẹ apa wal᷊ine.

³⁶Bọu langị i Sie mapạdaringihu tingihʼE si kamene mědeạ u měněntiro si kamene; su wanua ini i Sie seng napasilong putungʼE masaria, dingangu wọu putung ene i Sie mẹ̌bẹ̌bisara si kamene.

³⁷Ual᷊ingu ene i Sie tụtal᷊ěntụu manga i upung i kamene, tangú i kamene e seng nipile-Ne; ringangu kawasa-Ne masaria i kamene seng niapasěbangʼE wọu Misirẹ̌.

³⁸Manga wansa kụ limembong masaria ringangu limembong katoghase nitokol᷊ʼE wọu těngonu, waugu měnonda si kamene sarang banuan sire kụ seng nionggọ e si kamene, banua e kụ orasẹ̌ ini e nakoạ tataghuanengu.

³⁹Ual᷊ingu ene kasingkạ e sěhěllo ini ringangu abe kiwul᷊e: MAWU e Ruata mang sěmbaụ baẹ su langị ore lai su dunia; tawẹu wal᷊ine.

⁴⁰Daringiheko kal᷊awọu toratẹ̌ kụ takụ nionggọ si kamene sěhěllo ini, tangú i kamene ringangu hěntong kamene e sarung mal᷊unsemahẹ̌ dingangu tiniạ mẹ̌biahẹ̌ su wanua e nionggọu MAWU Ruatanu e nakoạ tataghuanengu sarang marěngụ-děngụ.”

⁴¹ Mase i Musa něněbọu soa tatěllu su sěmběkan daki wọu Sal᷊ụ u Yordan

⁴²nakoạ soa tatal᷊angeng, tampạu taumata mapakasal᷊amatʼu watangeng kereu i sie tawe ipẹ̌tatudẹ kụ seng němate taumata kụ bal᷊inewe sědụ e. I sie wotonge makakatal᷊ang u watangenge sarang soa sěmbaụ bọu tal᷊oarang manga soa ene tadeạu tawe lai pateěng.

⁴³Baugu ghal᷊ipohong Ruben seng nisadia soang Bezer su tenene marangẹ su wanua l᷊inggi; waugu ghal᷊ipohong Gad soang Ramot su wanuang Gilead, dingangu waugu taumatang Manasye soang Golan su wanuang Basan.

⁴⁴Mase i Musa něngonggọu manga toratẹ̌ dingangu manga tiahan Duata su tau Israel.

⁴⁵Hal᷊ẹ̌ ene kinoạ e samurin sire e nisěbang bọu Misirẹ̌ kụ ene su wal᷊ane sěmběkan daki wọu Sal᷊ụ u Yordan, mẹ̌tẹ̌těngon soang Bet-Peor. Banua ene nạung ěnnạu wanuan Sihon, datun tau Amori, kụ kal᷊imona e mẹ̌pẹ̌parenta su soang Hesybon. I Musa ringangu tau Israel němatạ si sie su tempong i sire e siměbang bọu Misirẹ̌.

⁴⁶

⁴⁷I sire nakapẹ̌tanạ su ěntanan Datu i Sihon ene, kerene lai ěntanan Datu i Og bọu Basan, sěngkatau ratung Amori wal᷊ine e kụ mạtanạ su sěmběkan daki wọu Sal᷊ụ u Yordan.

⁴⁸Ěntana ene nawatedẹ̌ bọu soang Aroër su wiwihu Sal᷊ụ u Arnon, těpase sarang sěmběkan sawěnahẹ̌ sarang Bul᷊udu Siryon,[4] kụ kai Wul᷊udu Hermon,

⁴⁹dingangu wanua su sěmběkan daki wọu Sal᷊ụ u Yordan sarang sěmběkan timuhẹ̌ sarang Laudẹ̌ Nate su pentọ u Wul᷊udu Pisga.