Read Sangir PANGANGONGGỌ U TORATẸ̌ KAPIA 5 Bible Online

PANGANGONGGỌ U TORATẸ̌ KAPIA 5 - Sangir bible

PANGANGONGGỌ U TORATẸ̌ KAPIA 5

¹I Musa e něnampung kal᷊awọu tau Israel, bọu e nẹ̌bera si sire, ”Manga anạ u sěmbaụ daringihẹ̌ko kal᷊awọu toratẹ̌ kụ takụ ionggọ si kamene su ěllo ini. Ěndungeko kal᷊awọu toratẹ̌ ene, ringangu tuhuke wue pakasatia.

²Su Wul᷊udu Sinai MAWU Ruatang kitẹ e nẹ̌koạ sěmbaụ pẹ̌dariandi,

³bal᷊inewe kětạeng dingangu manga i upung i kitẹ e, kaiso lai ringang i kitẹ kěbị.

⁴Bọu putung su wowoʼm bul᷊ude ene e MAWU mapulu mẹ̌bisara mahatedẹ̌ dingang i kamene.

⁵Kaiso ual᷊ingu i kamene kawe matakụ u putung dingangu tawe wahani sumaka wul᷊ude, tangú iạ e su tempo ene dimarisị sutal᷊oarang kamene ringangu MAWU e mědeạu měhabaru wawerang MAWU e si kamene. MAWU e němohangu,

⁶’Iạ e kai MAWU Ruatanu kụ naněbang i kamene wọu Misirẹ̌, tampạ i kamene nipẹ̌tahuěllang.

⁷Kumbahang maněmba manga ruata wal᷊ine. Paněmbạ e si Siạ samatang.

⁸ Kumbahang i kau mẹ̌koạ baugu watangengu e pakal᷊uang kụ mạngawẹ manga apa su l᷊angị, su dunia, arau su ral᷊ungu akẹ su al᷊ungu dunia.

⁹ Kumbahang maněmba tul᷊ada kerene batụu Iạ e kai Ruatanu dingangu mạdiri isul᷊ung su manga apa. Apan taumata kụ mẹ̌bẹ̌binsị u Iạ e Takụ ihukung sarang hitene katěllu ringangu kaěpạ u hawenge.

¹⁰Arawe Iạ e kai měnodẹu kakěndagẹ̌-Ku e su manga hitene ringangu hiwune[5] wọu apan taumata kụ kụkěndagu Iạ e ringangu tụtuhụ kal᷊awọu tita-Ku e.

¹¹ Kumbahang měngkai kạsěbạ e areng-Ku e, watụ u Iạ kai MAWU Ruatanu, měhukung i sai-sai kụ měngkai kạsěbạ e areng-Ku e.

¹² Pěmantugẹ̌kong ěllon Sabatẹ̌ e ringangu pěngadatẹ̌kong ěllo ene e kai susi, u Iạ e kai MAWU Ruatanu kụ nẹ̌parentang ene e si kamene.

¹³ I kamene e seng nionggotangu ěnnungu ěllo e waugu měmunara,

¹⁴arawe su ěllo kapitune e kai ěllong pěngirul᷊eěng kụ samatang baugu Iạ e, MAWU Ruatanu. Su ěllo ene tawẹu sarang sěngkatau wotonge měmunara, baewe i kamene, arau lai manga anạ u, manga ěllangu, binatangu arau taumata raghị kụ mạtanạ su wanuanu. Manga ěllangu e harusẹ̌be apěngirul᷊e kerẹewe lai i kamene hala.

¹⁵Pẹ̌tahěndungko u i kamene nạung kal᷊imona e nipẹ̌tahuěllang su Misirẹ̌ e wọu ene nipakal᷊iwiru MAWU Ruatanu e ringangu katoghasẹ̌ tawẹ sihinge kasěllahe. Ual᷊ingu ene i kamene e Takụ ioro pěmantugẹ̌be ěllon Sabatẹ̌.

¹⁶ Pěngadatẹ̌ko ringangu pandunge wue i amangu ringangu i ninangu: ene e kai tita-Ku, wọu MAWU Ruatanu, tadeạu i kamene e mal᷊unsemahẹ̌ dingangu maumburẹ̌ su wanua kụ sarung Takụ ionggọ si kamene.

¹⁷ Kumbahang měmate.

¹⁸ Kumbahang mawuang.

¹⁹ Kumbahang mẹ̌tako.

²⁰ Kumbahang mẹ̌sahiding konti mạanun taumata wal᷊ine.

²¹ Kumbahang měnningu rarotongu taumata wal᷊ine: bal᷊ene, ěntanane, kawinge, manga ěllange, binatange, kalidene, arau walạewe apa tẹ̌taghuanenge.’

²² Ene ute kai kal᷊awọu tita kụ nionggọ u MAWU e si kamene piạ i kamene kạtatampung su wul᷊ude. Piạ i Sie mẹ̌bẹ̌bisara wọu putung dingangu winawa masuwenehẹ̌ e, i Sie něngonggọu manga tita ene e, ringangu wal᷊inewe lai wal᷊ine. Bọu e i Sie němohẹu ene su watu pamamohekang darua e kụ nionggọ e si siạ.”

²³”Su tempong kal᷊awọu wul᷊ude riměllị kụ i kamene nakaringihe tingihẹ̌ bọu kararěndunge, patikụ pangahạ u ghal᷊ipohong kamene e ringangu apan těmbonangu kawanua e nahunděnta su anuku.

²⁴Angkuěng i sire e, ’MAWU Ruatang kitẹ e seng něnodẹ u kasaria ringangu kawawantugʼE piạ i kami e nakaringihẹ̌ si Sie mẹ̌bẹ̌bisara wọu ral᷊ungu putung. Ěllo ini i kami e seng nakasahidi u mambeng botonge taumata e kụ tatapẹ̌ biahẹ̌, manịeng MAWU e seng nẹ̌bisara ringange.

²⁵Kaiso kawe unụe i kami e harusẹ̌ měnarakangu niawang kami e kapia? Putung kụ kereng kasariane ene sarung mapakawinasang kami e! I kami mạngiaking u i kami e sarung mate kereu makaringihẹ̌ MAWU Ruata mẹ̌bisara kạpia.

²⁶Piạ ngae taumata kụ těbe wiahẹ̌ sarětạeng nakaringihẹ̌ Duata kụ biahẹ̌ e mẹ̌bẹ̌bisara wọu ral᷊ungu putung?

²⁷Ual᷊ingu ene rimal᷊engke i Musa kụ, daringihẹ̌ko kal᷊awọu apang niwerang MAWU Ruatang kitẹ e, bọu ene habarẹ̌ko si kami apang kụ nipěhengetangʼE si kamene. I kami e sarung dumaringihẹ̌ dingangu tumuhụ.’

²⁸Nakaringihẹ̌ ene, MAWU e nẹ̌hengetang si siạ, ’Iạ seng nakaringihẹ̌ apang kụ niwerang bansa ene, ringangu mambeng kahěngang apang niweran sire.

²⁹Kěnang manga i sire hanesẹ̌ piạ pěndange kerene! Kěnang manga i sire hanesẹ̌ měngẹ̌ngadatẹ̌ si Siạ e ringangu tụtuhụ kal᷊awọu tita-Ku hakịu i sire e ringangu manga hiten sire e mal᷊unsemahẹ̌ sarang marěngụ-děngụ!

³⁰Dakọ e ini, kụ dolohẹ̌ko wansa ene pẹ̌sul᷊e sarang daseng i sire sěngkatau-sěngkatau.

³¹Arawe i kau e, Musa, pẹ̌bal᷊ị e ringangu katanạ e sini ringang-Ku; si kau e sarung Takụ onggotangu kal᷊awọu toratẹ̌ dingangu tita-Ku e. Těntiroiko si sire e tadeạu i sire e tumuhụ ene su wanua kụ Takụ nionggọ si sire e.’

³²Manga anạ u sěngkatau, tuhukewe pakasatia kal᷊awọu apang nioroʼm MAWU Ruatanu e si kau. Abe pẹ̌lampa sarang sěmbaụ bọu kal᷊awọu tita ene.

³³Koạko kěbị apang niorong MAWU Ruatanu e si kau tadeạu i kamene e mal᷊unsemahẹ̌ dingangu wotongewe měnatapẹ̌ su wanua kụ sarung pẹ̌tanakeng i kamene.”