Read Sangir PANGANGONGGỌ U TORATẸ̌ KAPIA 6 Bible Online

PANGANGONGGỌ U TORATẸ̌ KAPIA 6 - Sangir bible

PANGANGONGGỌ U TORATẸ̌ KAPIA 6

¹”MAWU Ruatanu e něngoro si siạ pạněntirong kěbị toratẹ̌ ini si kamene tadeạu i kamene mẹ̌koạ ene su wanua kụ tawẹ kararěnane lai pẹ̌tanakeng i kamene.

²Mal᷊owọko i kamene ringangu hiteng kamene e kanandung biahu e měngadatẹ̌ MAWU Ruatang ringangu rumaringihẹ̌ kěbị toratʼE kụ takụ ihabarẹ̌ si kamene, tadeạu i kamene e maumburẹ̌ su wanua ene.

³Ual᷊ingu ene raringihẹ̌ko manga anạ u sěngkatau, koạko ene ringangu kasasatia, tadeạu i kamene e mal᷊unsemahẹ̌ dingangu makoạ bansa gẹ̌guwạ su wanua kụ kalạ dingangu mahuntawa, kere nikědong MAWU Ruata i upung i kitẹ e.

⁴ Manga anạ u sěngkatau, pẹ̌tahěndungko! Kětạeng MAWU, ringangu MAWU sẹ̌sane Ruatang kitẹ![6]

⁵ Kěndagẹ̌kong MAWU Ruatanu e ringangu kasěllahu naungu: Todẹko ene su kakakoạ u pẹ̌bawiahu ringangu su ral᷊ungu kakanoạ u.

⁶ Kumbahang-bahang miwul᷊eng kal᷊awọu tita kụ takụ nionggọ si kamene sěhěllo ini.

⁷Těntiroiko su manga anạ i kamene. Pahumbisarangkong ene i kamene su ral᷊ungu wal᷊e, arau su l᷊ikude, su tempong měngẹ̌ngirul᷊e ringangu su tempong kapělẹ̌hal᷊ẹ̌ e.

⁸Ul᷊asẹ̌ko su takiahu ringangu pahěkụko su rěhụ u[7] tadeạu tẹ̌tatahěndungang.

⁹Bohẹko su rihing tukadu wal᷊enu ringangu su tukadu pasěllangengu e.”

¹⁰ ”MAWU Ruatanu nẹ̌diandi su manga i upung i kamene i Abraham, Ishak dingangi Yakub u i Sie sarung měngonggọu wanua ini e si kau. Manga soane gaghaghuwạ dingangu masasoroga, dingangu wal᷊inewe i kamene e němpěndarisị u ene.

¹¹Manga wal᷊ene napenẹ u apal᷊iwụ kụ mapapia e, ringangu wal᷊inewe i kamene nělohong ene e. I kamene sarung makaěbạ manga sumu, dingangu wal᷊inewe i kamene němpěmangka ene. I kamene sarung makaěbạ manga waelu anggorẹ̌ dingangu zaitun, kai wal᷊inewe i kamene němpẹ̌suang. Kereu MAWU e mẹ̌bawa si kamene sarang banua ene, ringangu i kamene mạnaghuang kal᷊awọu apang ilẹ̌ěnning i kamene waugu kanengang,

¹²riagateko pakapia-pia tadeạu i kamene kumbahang miwul᷊eʼm MAWU kụ seng napakal᷊iung kamene wọu Misirẹ̌ e, tampạ i kamene nipẹ̌tahuěllang.

¹³ Pěngadatẹ̌ko MAWU Ruatanu, ringangu pẹ̌kal᷊iomanengko si Sie samatang, dingangu kereu i kamene mẹ̌salu, koạko ene su ral᷊ungu arengʼE samatang.

¹⁴Kumbahang měněmba manga ruata wal᷊ine kụ sẹ̌sěmbaěngu manga wansa kụ mạtanạ sěnaung dẹ̌duhu e.

¹⁵Kereu i kamene maněmba manga ruata wal᷊ine e, tangú i kamene e sarung kahinoěngu ral᷊angehu MAWU Ruatang kamene e ringangu ipakawinasa marihutu, u MAWU Ruatanu kụ ene sutal᷊oarang kamene e tawe mapulu ipẹ̌sul᷊ungu manga apa.

¹⁶ Kumbahang měnal᷊ukạ MAWU Ruatanu e kerẹewe seng kinoạ i kamene su Masa.

¹⁷Daringihẹ̌ko apan toratẹ̌ kụ seng nionggọ u MAWU Ruatanu e si kau.

¹⁸Pẹ̌koạko apang kụ su MAWU e mapia ringangu adilẹ̌, tangú i kamene e sarung tawẹ konsange apa. Ěntana mahuntawa e kụ niriandiʼm MAWU su manga i upung i kamene e, sarung makoạ tataghuanengu,

¹⁹dingangu i kamene e sarung měnokol᷊ẹ̌ manga sědụ i kamene e kere sen niriandiʼm MAWU e.

²⁰Su samurine manga anạu e sarung makiwal᷊o si kau, ’Kawe unụe MAWU Ruatang kitẹ něngoro si kitẹ apạtuhụ kěbị tita ene?’

²¹Tangú i kamene harusẹ̌ simbahẹ̌ kere ini, ’Kal᷊imona i kitẹ e nakoạ ěllangu ratung Misirẹ̌, bọu ene MAWU e napakal᷊iwirʼi kitẹ e ringangu katoghasẹ̌ masaria.

²²I kami e hala nakasahidim MAWU e nẹ̌koạ manga karal᷊inaụ dingangu kal᷊awọu apạeweng makạtatakụ baugu tau Misirẹ̌ dingangu ratun sire e ore lai kěbị apang mapapangkatẹ̌ e.

²³I Sie něliung kitẹ e wọu Misirẹ̌ mědeạu mẹ̌bawa si kitẹ sarang ini, ringangu ěntana ini e nionggọʼE si kitẹ mẹ̌sul᷊ungkewe nạung niriandi-Ne su manga i upung i kitẹ e.

²⁴MAWU Ruatang kitẹ e něngoro si kitẹ apẹ̌děndal᷊engu tita ene kěbị dingangu pěngěngadatẹ̌ si Sie. Kereu i kitẹ e mẹ̌koạ kerene, i Sie sarung měhiking bansang kitẹ e tadeạu kạtatanạbe mẹ̌bẹ̌biahẹ̌ tawe kakawusangu apa.

²⁵Kereu i kitẹ e mang satia tumuhụ kal᷊awọu apang nititang MAWU Ruatang kitẹ e si kitẹ,[8] tangú i Sie sarung lụlahimpuluang i kitẹ.’ ”